Read fon Mɛsɛ́dó 28 Bible Online

Mɛsɛ́dó 28 - fon bible

Mɛsɛ́dó 28

¹Ée mǐ wá gán lo ɔ́, mǐ se ɖɔ tɔtɛ́ntinto énɛ́ ɔ́, Maluti wɛ è nɔ ylɔ́ ɖɔ.

²To ɔ́ mɛ nu lɛ́ɛ nyɔ́ xomɛ dó mǐ wú tlala. Ée jǐ wlí, bɔ avivɔ gbɛ́ ɔ́, yě bɔ myɔ ɖaxó ɖé, bó yí jǒnɔ mǐtɔn ɖ'é kɔn.

³Pɔ́lu bɛ́ nǔywɛ́, bó ná kɔn nyi myɔ ɔ́ mɛ, bɔ amanɔnú jakpata ɖokpó tɔ́n sín nǔywɛ́ ɔ́ mɛ, bó tɛ́ dó alɔ tɔn wú, ɖó myɔ ɔ́ sín yǒzo hɛn ɛ.

⁴Ée to ɔ́ mɛ nu lɛ́ɛ mɔ dan ɔ́ ɖo gblɛlɛ ɖo alɔ tɔn wú ɔ́, yě nɔ ɖɔ nú yěɖée ɖɔ: “Dandan mɛ ɔ́, mɛhutɔ́ wɛ nya élɔ́ nyí; ɖó é gán ɖo xu sí, có vodún hwɛjijɔ kpo ɖo gǔdo tɔn.”

⁵Pɔ́lu ka mi dan ɔ́ dó myɔ ɔ́ mɛ; nǔ ɖěbǔ ka wa é ɖésúnɔ ǎ.

⁶Mɛ lɛ́ɛ ko ɖo te kpɔ́n ɖɔ é ná jɛ flɔ́flɔ́ jí, abǐ é ná jɛ ayǐ bó kú cúɖúɖú; lo ɔ́, ée yě nɔ te káká bɔ nǔɖé ma sɔ́ wa ɛ ǎ ɔ́, yě húzú gbe bó ɖɔ vodún wɛ é nyí.

⁷To ɔ́ mɛ sín gǎn e è nɔ ylɔ́ ɖɔ Publiwúsi ɔ́ ɖó ayǐkúngban ɖokpó ɖo akpá fínɛ́. É yí jǒnɔ mǐtɔn, bɔ é fɛ́ wǔ ɖésú, bɔ mǐ nɔ xwé tɔn gbe xɔ azǎn atɔn.

⁸Publiwúsi sín tɔ́ ɖo ayǐmlɔ́mlɔ́, bɔ avivɔ ɖo jǐ tɔn, bɔ é ɖo zɛntín nyɛ wɛ. Pɔ́lu ka yi kpɔ́n ɛ, bó xo ɖɛ, bó ɖó alɔ jǐ tɔn, bó gbɔ azɔn n'i.

⁹Énɛ́ gúdo ɔ́, azinzɔnnɔ e kpo ɖo to ɔ́ mɛ lɛ́ɛ wá mɔ Pɔ́lu, bɔ é gbɔ azɔn nú yě lɔmɔ̌.

¹⁰Énɛ́ ɔ́ wú wɛ yě wlí yɛ̌yi bǐ nú mǐ, bɔ ée mǐ ɖo hǔn mɛ byɔ́ wɛ ɔ́, yě ná nǔ e ná hudó mǐ lɛ́ɛ bǐ mǐ.

¹¹Sun atɔn wɛ mǐ bló ɖo to énɛ́ ɔ́ mɛ, cóbó wá dó hǔn ɖé, bɔ é ko wá nɔ fínɛ́ avivɔ hwenu; Alɛsándli wɛ é gosín, bɔ è ɖǒ nyǐkɔ n'i ɖɔ “Vodún hǒxo lɛ́ɛ.”

¹²Mǐ wá jɛ Silakúsi, bó nɔ fínɛ́ xɔ azǎn atɔn.

¹³Ée mǐ wá gosín fínɛ́ ɔ́, hǔn ɔ́ gbɔn xutó xutó káká yi jɛ Hlejio. Ayǐhɔ́ngbe tɔn ɔ́, jɔhɔn tofɔligbé tɔn ɔ́ jɛ nyinyi jí, bɔ azǎn atɔngɔ́ ɔ́ gbe ɔ́, mǐ jɛ Puzɔ́lu.

¹⁴Mǐ mɔ nɔví mǐtɔn ɖo Klísu mɛ e ɖo fínɛ́ lɛ́ɛ, bɔ yě sa vo nú mǐ ɖɔ mǐ ní nɔ émí gɔ́n nú azǎn tɛ́nwe, bɔ mǐ nɔ yě gɔ̌n. Fínɛ́ wɛ mǐ gosín bó yi Hlɔ̌ma.

¹⁵Nɔví mǐtɔn ɖo Klísu mɛ e ɖo Hlɔ̌ma lɛ́ɛ kó se ɖɔ mǐ jǎwe, bó wá kpé mǐ ɖo alixo; mɛɖé lɛ́ɛ wá nɔ te kpɔ́n mǐ ɖo Jǒnɔyítɛn Atɔn lɛ́ɛ nukɔn; mɛɖé lɛ́ɛ hun káká wá kpé mǐ ɖo Apiwúsixi mɛ. Ée Pɔ́lu mɔ yě ɔ́, é dó kú nú Mawu, bɔ wǔ yá ɛ.

¹⁶Ée mǐ jɛ Hlɔ̌ma ɔ́, è nǎ gbe Pɔ́lu ɖɔ ní yi nɔ vo; è ka ɖó sɔ́ja ɖokpó n'i, bɔ é ná nɔ cɔ́ ɛ.

¹⁷Azǎn atɔngɔ́ ɔ́ gbe ɔ́, Pɔ́lu ylɔ́ Jwifu nukúnɖéjí lɛ́ɛ wá xwé tɔn gbe. Ée yě wá kplé ɔ́, é ɖɔ nú yě ɖɔ: “Nɔví ce lɛ́ɛ mi, un jɛ agɔ ɖé dó togun mǐtɔn ǎ; un ka jɛ agɔ dó tɔ́gbó mǐtɔn lɛ́ɛ sín hwɛndo ǎ, có è wlǐ mì dó gankpá mɛ ɖo Jeluzalɛ́mu, bó jó mì nú Hlɔ̌manu lɛ́ɛ.

¹⁸Ée Hlɔ̌manu lɛ́ɛ kan nǔ byɔ́ mì káká ɔ́, yě mɔ nǔɖé wú ná ɖó dó, bó dó ɖó kúhwɛ nú mì ǎ, bó kó jló ná jó mì.

¹⁹ Lo ɔ́, Jwifu lɛ́ɛ ka gbɛ́; énɛ́ ɔ́ wú ɔ́, un mɔ ɖɔ é ɖo dandan mɛ nú ma ylɔ́ hwɛ ɖaxó ɖo Dadá Hlɔ̌ma tɔn gɔ́n; é ka nyí to ce sín hwɛ ná jɛ wɛ un ɖe bo wá fí ǎ.

²⁰Nǔ e wú un byɔ́ ɖɔ ma mɔ mi, bó ná ɖɔ xó nú mi ɔ́ nɛ́; ɖó mɛ e ɖó nukún wɛ Izlayɛ́li togun ɔ́ ɖe ɔ́ wú wɛ è dǒ wlɔ mì lě.”

²¹Yě ka yí gbe n'i ɖɔ: “Mǐdɛɛ lɛ́ɛ ɔ́, wěma ɖěbǔ wá nú mǐ sín Judée, bó ɖɔ xó nú mǐ dó wǔ towe ǎ; nɔví mǐtɔn ɖě ka gosín dɔ̌n, bó wá jɛ hwɛ towe, abǐ bó wá ɖɔ xó towe nyanya ɖé nú mǐ ǎ.

²²Lo ɔ́, mǐ jló ɖɔ hwi ɖésú ní ɖɔ nǔ e a lin ɔ́ nú mǐ; ɖó mǐ tunwun ɖɔ fí bǐ jɛ́n è nɔ ɖɔ xó nyanya dó sinsɛngbɛ́ énɛ́ wú ɖe.”

²³É kpódó yě kpó ɖó azǎn, bɔ yě sukpɔ́ d'é jí, bó wá yi mɔ ɛ, ɖo xɔ e mɛ é ɖe ɔ́. Sín zǎnzǎn káká wá jɛ gbadanu ɔ́, é tín nǔ mɛ nú yě. É ɖɔ axɔ́súɖuɖu Mawu tɔn sín xó nú yě; é sɔ́ Mɔyízi sɛ́n lɛ́ɛ kpódó nǔkplɔ́nmɛ gbeyíɖɔ Mawu tɔn lɛ́ɛ tɔn kpán dó ɖɔ xó nú yě, bó ba ná dɔn yě, nú yě na ɖi nǔ ɖɔ nǔ e ɖɔ dó Jezu wú wɛ é ɖe ɔ́ nǔgbó wɛ.

²⁴Mɛ ɖé lɛ́ɛ ɖo yě mɛ, bó mɔ nǔgbó nú xó e ɖɔ wɛ Pɔ́lu ɖe ɔ́, lobo ɖi nǔ ná; mɛɖé lɛ́ɛ ka ɖi nǔ ǎ.

²⁵Bɔ yě nɔ gbe ma ɖó kpɔ́ mɔ̌, bó ɖidó, bɔ Pɔ́lu ɖɔ nú yě kpowun ɖɔ: “Xó e Yɛsinsɛn ɖɔ nú tɔ́gbó mǐtɔn lɛ́ɛ gbɔn gbeyíɖɔ Mawu tɔn Ezayíi jí ɔ́, nǔgbó jɛ́n é nyí.

²⁶ É wɛ nyí ɖɔ: ‘Yi togun énɛ́ ɔ́ gɔ́n, bó ɖɔ n'i ɖɔ: mi ná se céɖécéɖé, mi ka ná mɔ nǔ jɛ mɛ ǎ; mi ná mɔ ganjí có mi ka ná mɔ ǎ.

²⁷Đó togun élɔ́ sín ayixa ko syɛ́n; yě sú tó yětɔn, bó myɔ nukún, ɖó nukún yětɔn táá wá mɔ nǔ, bónú tó yětɔn táá wá se nǔ, nú ayixa yětɔn ná wá ja nǔ mɔ jɛ nǔ mɛ gbé, bónú yě ná wá ja kɔ lɛ́ sín hwɛ yětɔn lɛ́ɛ gúdo gbé, nú ma wá gbɔ azɔn nú yě. Xó e Aklúnɔ ɖɔ ɔ́ nɛ́.’ ”

²⁸Pɔ́lu ka lɛ́ ɖɔ nú yě ɖɔ: “Mi bo nywɛ́ ganjí ɖɔ Mawu sɛ́ hwlɛngán tɔn dó mɛ e ma nyí Jwifu ǎ lɛ́ɛ; yědɛɛ lɛ́ɛ ná ɖótó e.” [

²⁹Ée Pɔ́lu ɖɔ xó énɛ́ lɛ́ɛ fó ɔ́, Jwifu lɛ́ɛ ɖidó, bó ɖo nǔ dɔn ɖo yěɖée tɛ́ntin wɛ ɖésú.]

³⁰Pɔ́lu nɔ xɔ e é xáya ɔ́ mɛ xɔ xwe we kpíkpé, bó nɔ́ yí mɛ e nɔ wá gɔ̌n tɔn lɛ́ɛ bǐ sín jǒnɔ ɖo fínɛ́.

³¹É nɔ ɖɔ axɔ́súɖuɖu Mawu tɔn sín xó, bó nɔ́ kplɔ́n nǔ mɛ dó Aklúnɔ Jezu Klísu wú, kpódó jiɖiɖe kpán, bɔ mɛ ɖěbǔ sɔ́ nɔ́ dó tagba n'i ǎ.