Read fon Mɛsɛ́dó 3 Bible Online

Mɛsɛ́dó 3 - fon bible

Mɛsɛ́dó 3

¹Piyɛ́ɛ kpódó Jǎan kpó xwe sinsɛnxɔ mɛ, gan atɔn mɛ hwelɛ́kɔ sín ɖɛxixo hwenu.

²Nya ɖé ka tíin, bó kú sé sín hwenu e è ko ji i é. Ayǐhɔ́ngbe ayǐhɔ́ngbe ɔ́, è nɔ zé nya énɛ́ wá ɖó xɔ ɔ́ sín hɔn e è nɔ ylɔ́ ɖɔ “hɔn ɖɛkpɛ ɖɛkpɛ” ɔ́ nukɔn, bónú é ná nɔ́ byɔ́ nǔ mɛ e nɔ gbɔn fínɛ́ byɔ́ sinsɛnxɔ mɛ lɛ́ɛ.

³Ée nya énɛ́ mɔ Piyɛ́ɛ kpódó Jǎan kpán ɖo sinsɛnxɔ mɛ ná byɔ́ wɛ ɔ́, é byɔ́ nǔ yě.

⁴Yě ka bɔ nukún nyi wǔ tɔn, bɔ Piyɛ́ɛ ɖɔ n'i ɖɔ jí: “Kpɔ́n mǐ.”

⁵Sékúnɔ ɔ́ ka jɛ yě kpɔ́n jí ma ɖe nukún, bó vɛdó ɖɔ nǔɖé ná ná émí wɛ yě ɖe sín.

⁶Piyɛ́ɛ ka ɖɔ n'i ɖɔ jí: “Un ɖó akwɛ́ ǎ, un ka ɖó siká ǎ, lo ɔ́, nǔ e un ɖó ɔ́, un ná ná we; ɖo Jezu Klísu Nazalɛ́tinu ɔ́ sín nyǐkɔ mɛ ɔ́: ɖi zɔnlin.”

⁷Piyɛ́ɛ ɖɔ mɔ̌ bó hɛn alɔ tɔn ɖisí ɔ́, bó sɔ́ ɛ sí te, bɔ azɔn ɖokpó ɔ́, sékúnɔ ɔ́ sín afɔ lɛ́ɛ kpódó afɔgómɛ tɔn lɛ́ɛ kpó syɛ́n,

⁸bɔ é lɔ́n xwete, bó jɛ zɔnlin ɖi jí, bó xwedó yě byɔ́ sinsɛnxɔ ɔ́ mɛ, bó ɖo zɔnlin ɖi wɛ, bó ɖo jǐ lɔ́n yi wɛ, bó ɖo susu kpa nú Mawu wɛ.

⁹Togun ɔ́ bǐ sésé mɔ ɛ ɖo zɔnlin ɖi wɛ, bó ɖo susu kpa nú Mawu wɛ.

¹⁰Ée mɛ bǐ wá tunwun ɖɔ nya e nɔ ɖo ayǐjínjɔ́n, bó nɔ́ ɖo nǔ byɔ́ wɛ ɖo “Hɔn ɖɛkpɛ ɖɛkpɛ” ɔ́ nukɔn ɔ́ wɛ ɔ́, nǔ énɛ́ e jɛ dó wǔ tɔn ɔ́ kpácá yě, bó fyán yě.

¹¹Nya ɔ́ ka sɔ́ lɛ́ kɔ sín Piyɛ́ɛ kpódó Jǎan kpán gúdo ǎ, bɔ nǔ énɛ́ lɛ́ɛ kpácá togun ɔ́ bǐ, bɔ yě nyi ahwan wá mɔ yě, ɖo fí e è nɔ ylɔ́ ɖɔ Salomɔ́ɔ gba jí é.

¹²Ée Piyɛ́ɛ mɔ mɔ̌ é ɔ́, é yí xó, bó ɖɔ nú togun ɔ́ ɖɔ: “Izlayɛ́li ví e mi! Étɛ́wú azɔn e gbɔ nú nya élɔ́ ɔ́ nɔ́ kpácá mi? Étɛ́wú mi nɔ kpɔ́n mǐ mɔ̌, ɖi hlɔ̌nhlɔ́n mǐ ɖésúnɔ tɔn, abǐ Mawu sísí mǐtɔn wɛ wa nǔ, bɔ nya élɔ́ ɖo zɔnlin ɖi wɛ ɖɔhun?”

¹³ Mawu Ablaxámu tɔn, Izáki tɔn, Jakɔ́bu tɔn, Mawu tɔ́gbó mǐtɔn lɛ́ɛ tɔn wɛ sɔ́ mɛsɛntɔ́ tɔn Jezu sɔ́ su. Jezu e mi jó nú gǎn lɛ́ɛ, lobo gbɛ́ ɛ ɖo Pilátu nukɔn hwenu e éyɛ́ jló ná ɖe e nyi te é.

¹⁴ Midɛɛ lɛ́ɛ ɔ́, mi gbɛ́ mɛ e nyí mɛ mímɛ́, bó nyí hwɛjijɔnɔ ɔ́, bó ka byɔ́ ɖɔ è nǐ ɖe mɛ e nyí mɛhutɔ́ ɔ́ nyi te.

¹⁵Mi zɔ́n bɔ è hu mɛ e nyí gbɛnámɛtɔ́ ɔ́. Mawu ka fɔ́n ɛ sín kú, bɔ mǐ ɖo kúnnu ɖe ná wɛ.

¹⁶Nǔɖiɖi ɖó nú hlɔ̌nhlɔ́n e Jezu sín nyǐkɔ ɖó ɔ́ zɔ́n, bɔ nyǐkɔ énɛ́ ná hlɔ̌nhlɔ́n nya e mi ko tunwun, bó ka ɖo mimɔ wɛ din é; nǔɖiɖi ɖó n'i wɛ zɔ́n, bɔ nya élɔ́ sín azɔn gbɔ bǐ sésé lě e mi ɖésúnɔ ɖo mimɔ gbɔn wɛ din é.

¹⁷Din ɔ́, nɔví ce lɛ́ɛ mi; un tunwun ɖɔ nǔ énɛ́ e mi kpódó gǎn mitɔn lɛ́ɛ kpó dó sin xá Jezu ɔ́, mi kún tunwun cóbó bló ó.

¹⁸Lo ɔ́, nǔ e Mawu ko ɖɔ ɖ'ayǐ ɖɔ Klísu émítɔn ɖó ná ji ya ɔ́ wɛ é bló.

¹⁹Hǔn mi bo lɛ́ kɔ sín hwɛ mitɔn lɛ́ɛ gúdo, bó wá Mawu gɔ́n, bónú é ná súnsún hwɛ mitɔn lɛ́ɛ.

²⁰Aklúnɔ Mawu ná sɛ́ fífá sín hwenu lɛ́ɛ dó mi, bó ná sɛ́ mɛ e é ko sɔ́ ɖ'ayǐ nú mi ɔ́ dó mi; mɛ ɔ́ wɛ nyí Jezu Klísu.

²¹Amɔ̌, din ɔ́, Jezu ná to ɖo Mawu gɔ́n hwɛ̌, káká jɛ hwenu e Mawu ná lɛ́ vɔ́ nǔ bǐ húzú dó, lě e é ko ɖɔ gbɔn ɖ'ayǐ xóxó gbɔn gbeyíɖɔ mímɛ́ tɔn lɛ́ɛ jí é.

²² Mɔyízi ko ɖɔ jí: “Aklúnɔ Mawu mitɔn ná bló bɔ gbeyíɖɔ nyɛ ɖɔhun ɖokpó ná tɔ́n ɖo togun mitɔn mɛ. Mi ná ɖótó nǔ e é ná ɖɔ nú mi lɛ́ɛ bǐ sésé.

²³ Mɛ ɖěbǔ ma ká ɖótó gbeyíɖɔ énɛ́ ɔ́ ǎ ɔ́, è nǎ ɖe e sín togun ɔ́ mɛ, bó hu i.”

²⁴Mɔ̌ ɖokpó ɔ́, gbeyíɖɔ Mawu tɔn e jí Mawu ɖɔ xó gbɔn, bɛ́ sín Samuwɛ́li jí lɛ́ɛ bǐ ɖɔ xó dó azǎn élɔ́ lɛ́ɛ wú ɖě jɛ ɖě gúdo.

²⁵ Mi lɔmɔ̌ ɔ́, Jwifu wɛ mi nyí, bɔ akɔ e Mawu jɛ xá tɔ́gbó mitɔn lɛ́ɛ gbɔn gbeyíɖɔ tɔn lɛ́ɛ jí ɔ́ nyí mitɔn, ɖó Mawu ko dó akpá tɔn nú tɔ́gbó mitɔn Ablaxámu ɖɔ jí: “Vǐ towe lɛ́ɛ jí wɛ un ná gbɔn, bó ná xo ɖɛ ɖagbe dó hɛ̌nnu e ɖo wɛ̌kɛ́ ɔ́ mɛ lɛ́ɛ bǐ jí.”

²⁶Hǔn, midɛɛ lɛ́ɛ wɛ nyí mɛ nukɔn tɔn e Mawu sɛ́ Jezu dó é. É sɛ́ ɛ dó bónú é ná lɛ́ kɔ nú ɖokpó ɖokpó mitɔn sín nǔ nyanya e mi nɔ wa lɛ́ɛ gúdo, bó ná xo ɖɛ dó mi jí.