Read fon Mɛsɛ́dó 4 Bible Online

Mɛsɛ́dó 4 - fon bible

Mɛsɛ́dó 4

¹Piyɛ́ɛ kpódó Jǎan kpán kpo ɖo xó ɖɔ nú togun ɔ́ wɛ, bɔ vɔ̌sánú-xwlémawutɔ́ lɛ́ɛ kpódó sinsɛnxɔcɔ́tɔ́ lɛ́ɛ sín gǎn kpó, sinsɛngbɛ́ e è nɔ ylɔ́ ɖɔ Saduseɛn lɛ́ɛ kpó wá xwetɔ́n.

²Nǔ e kplɔ́n togun ɔ́ wɛ mɛsɛ́dó we énɛ́ lɛ́ɛ ɖe, bó ɖɔ Jezu fɔ́n sín kú, lobo dó ɖo ɖiɖe xlɛ́ gbɔn fínɛ́ wɛ ɖɔ mɛkúkú lɛ́ɛ ná fɔ́n sín kú ɔ́, é vɛ́ yě wú,

³bɔ yě wlí mɛsɛ́dó énɛ́ lɛ́ɛ yi dó gankpá mɛ, bɔ yě nɔ́ fínɛ́ káká bɔ ayǐ hɔ́n; ɖó hwe ko ɖo xɔ yi wɛ.

⁴Nǔ ka ɖo mɔ̌ có, mɛ e se xó e mɛsɛ́dó lɛ́ɛ ɖɔ ɔ́ gěgé ɖi nǔ. Mɛ e ɖi nǔ lɛ́ɛ ná yi děgba ɖě afatɔ́n (5.000) mɔ̌.

⁵Ayǐhɔ́ngbe tɔn ɔ́, Jwifugán lɛ́ɛ, tomɛxó lɛ́ɛ, kpódó sɛ́nkplɔ́nmɛtɔ́ lɛ́ɛ kpán wá kplé ɖo Jeluzalɛ́mu.

⁶Vɔ̌sánú-xwlémawutɔ́ ɖaxó Hanna ɖo tɛn énɛ́ mɛ, kpódó Kayífu kpó, kpó Jǎan kpó, kpódó Alɛsándlu kpó, kpódó vɔ̌sánú-xwlémawutɔ́ ɖaxó ɔ́ sín hɛ̌nnumɔ lɛ́ɛ bǐ sésé kpán.

⁷Yě zɔ̌n bɔ è kplá Piyɛ́ɛ kpódó Jǎan kpán wá nukɔn yětɔn, bɔ yě kanbyɔ́ yě ɖɔ jí: “Mɛ̌ sín acɛ mɛ abǐ mɛ̌ sín nyǐkɔ mɛ mi ka bló nǔ énɛ́ dó?”

⁸Hwenɛ́nu ɔ́, Yɛsinsɛn gɔ́ ayi mɛ nú Piyɛ́ɛ bɔ é ɖɔ nú yě ɖɔ jí: “Gǎn lɛ́ɛ mi; tomɛxó lɛ́ɛ mi;

⁹mi ɖo hwɛ ɖɔ xá mǐ wɛ égbé, ɖó mǐ wa ɖagbe nú sékúnɔ ɖé, bɔ mi jló ná tunwun lě e mǐ wa gbɔn, bó gbɔ azɔn n'i ɔ́; é má nyí mɔ̌ wɛ ǎ cé?

¹⁰Mi bǐ kpódó Izlayɛ́li togun ɔ́ lɔmɔ̌ kpó ní tunwun ɖɔ Jezu Klísu Nazalɛ́tinu e mi ká nyi aklúzu jí, bɔ Mawu ka fɔ́n ɛ sín kú ɔ́ sín nyǐkɔ mɛ wɛ nya énɛ́ ɖo ganjí ɖe, bó ɖo te nukɔn mitɔn din.

¹¹ Jezu énɛ́ sín xó wɛ è ko ɖɔ ɖo Mawuxówéma ɔ́ mɛ ɖɔ jí: ‘Awǐnnya e mi xɔmɛtɔ́ lɛ́ɛ má sɔ́ dó mɔ nǔɖéwanú ǎ, bó xo nyi kɛ́n ɔ́, wá húzú awǐnnya tají ɔ́, awǐnnya zwe jí tɔn ɔ́.’

¹²É ɖokpónɔ géé jɛ́n sixú hwlɛ́n mɛ gán; ɖó, gbɔn gbɛ ɔ́ bǐ mɛ ɔ́, Mawu sɔ́ ná mɛ ɖěvo gbɛtɔ́ lɛ́ɛ ɖo fí ɖěbǔ, bɔ mi ná mɔ hwlɛngán gbɔn jǐ tɔn ǎ.”

¹³Mɛ e ɖo toxóɖɔgbɛ́ ɔ́ mɛ lɛ́ɛ mɔ ɖɔ Piyɛ́ɛ kpódó Jǎan kpán ɔ́, gbɛtɔ́ yǎyá ɖé kpowun wɛ yě nyí; yě kún se wěma ɖé ó; lě e yě ka gbó adɔ, bó ɖo xó ɖɔ gbɔn wɛ ɔ́ nyí nǔɖé, bó kpácá yě tlala. Yě ka mɔ nǔ jɛ yě wú ganjí ɖɔ yě mɛ e ko zɔn xá Jezu lɛ́ɛ ɖěe wɛ.

¹⁴Lo ɔ́, ée yě mɔ mɛ e yě gbɔ azɔn ná ɔ́ ɖo te ɖo yě kpá ɔ́, yě sɔ́ tunwun nǔ e yě ná ɖɔ d'é wú ɔ́ ǎ.

¹⁵Yě ka ɖɔ nú yě ɖɔ yě ní tɔ́n sín toxóɖɔgbɛ́ ɔ́ xɔsá, bó jɛ xó ɔ́ gbéjé kpɔ́n jí ɖo yěɖée tɛ́ntin.

¹⁶Yě nɔ́ ɖɔ jí: “Nɛ̌ mǐ ká ná wa nya énɛ́ lɛ́ɛ sín nǔ gbɔn? Đó nǔ e Mawu jlɛ́ gbɔn yě jí din ɔ́ ɖo gannaganna; Jeluzalɛ́mu toxo ɔ́ bǐ wɛ mɔ nukúnnú jɛ wú céɖécéɖé ɖɔ yě wɛ bló, bɔ mǐ sixú gbɛ́ ǎ.

¹⁷Lo ɔ́, mǐ ná tɛ́nkpɔ́n nú xó ɔ́ má sɔ́ gba kpé d'é jí ɖo togun ɔ́ mɛ ó; mǐ ná ván nukún dó yě, bó dó sɛ́n nú yě ɖɔ yě ma sɔ́ ɖɔ xó nú mɛ ɖěbǔ ɖo Jezu nyǐkɔ mɛ ó.”

¹⁸Ée yě ɖɔ mɔ̌ ɔ́, yě ylɔ́ Piyɛ́ɛ kpódó Jǎan kpán, bó dó sɛ́n nú yě syɛ́nsyɛ́n ɖɔ yě ma sɔ́ ɖɔ xó dó Jezu nyíkɔ mɛ ɖě ó, yě ma ka sɔ́ kplɔ́n nǔ mɛ dó nyǐkɔ tɔn mɛ ɖě ó.

¹⁹Piyɛ́ɛ kpódó Jǎan kpán ka yí xó, bó ɖɔ nú yě ɖɔ: “Mi ɖésú mi kpɔ́n ɖɔ é sɔgbe ɖo Mawu nukɔn ɖɔ è nǐ se tónú nú mi hú è nǐ se tónú nú Mawu ají.

²⁰Mǐdɛɛ lɛ́ɛ ɔ́, nǔ e mǐ mɔ, lobo se ɔ́, mǐ sixú gɔn ɖiɖɔ gbeɖé ǎ.”

²¹Ée yě ɖɔ mɔ̌ ɔ́, mɛ e ɖo toxóɖɔgbɛ́ ɔ́ mɛ lɛ́ɛ lɛ́ ván nukún dó yě, lobo jó yě. Yě tunwun lě e yě ná dɔn tó nú yě gbɔn é ǎ, ɖó togun ɔ́ wú. Đó togun ɔ́ bǐ wɛ ɖo susu kpa nú Mawu wɛ, ɖó nǔ énɛ́ e jɛ ɔ́ wú.

²²Nya e sín azɔn gbɔ gbɔn nǔ e Jezu jlɛ́ gbɔn yě jí nɛ́ ɔ́ gbla mɛ ɔ́ ko ɖó xwe kanɖé (40) zɛ wú.

²³Ée è jǒ Piyɛ́ɛ kpódó Jǎan kpán gúdo ɔ́, yě lɛ́ kɔ yi gbɛ̌ yětɔn lɛ́ɛ gɔ́n, bɔ nǔ e vɔ̌sánú-xwlémawutɔ́gán lɛ́ɛ kpódó tomɛxó lɛ́ɛ kpán ɖɔ ɔ́, yě wlí bǐ ɖɔ nú yě.

²⁴ Ée gbɛ̌ yětɔn lɛ́ɛ se xó énɛ́ lɛ́ɛ ɔ́, yě bǐ ɖó gbe kpɔ́, bó ɖɔ nú Mawu ɖɔ: “Aklúnɔ! Hwi wɛ bló jǐxwé kpódó ayǐkúngban kpán, bó lɛ́ bló xu kpódó nǔ e ɖ'é mɛ lɛ́ɛ bǐ sésé kpán.

²⁵ Hwi wɛ gbɔn Yɛsinsɛn jí, bó sɔ́ xó élɔ́ lɛ́ɛ dó nu mɛ nú mɛsɛntɔ́ towe tɔ́gbó mǐtɔn Davídi, bɔ é ɖɔ: ‘Étɛ́wú mɛ e ma nyí Jwifu ǎ lɛ́ɛ ka ɖo adǎn jí? Étɛ́wú togun ɔ́ bǐ ka ɖo gbě blá wɛ dó wǔvɔ́?

²⁶Axɔ́sú e ɖo wɛ̌kɛ́ ɔ́ mɛ lɛ́ɛ sɔ́ ahwan nú, bɔ gǎn lɛ́ɛ ɖó gbe kpɔ́, bó tɔ́n ahwan Aklúnɔ Mawu kpó Klísu tɔn kpó.’

²⁷ Nǔgbó ɔ́, gbe wɛ Elódu kpódó Pɔ́nsu Pilátu kpó ɖó kpɔ́ ɖo tomɛ fí xá mɛ e ma nyí Jwifu ǎ lɛ́ɛ, kpódó Izlayɛ́li ví lɛ́ɛ kpán, bó fɔ́n gǔ dó mɛsɛntɔ́ towe mímɛ́ Jezu, e a sɔ́ Klísu ɔ́ jí.

²⁸Yě ɖó gbe kpɔ́, bó bló nǔ e hwi ɖésúnɔ kó jló, bó kó ɖe wě tɔn ɖ'ayǐ ɖo hlɔ̌nhlɔ́n towe mɛ ɔ́ bǐ.

²⁹Din ɔ́, Aklúnɔ, kpɔ́n adǎn e gblɔ́n nú mǐ wɛ yě ɖe é, bó bló bónú mǐ mɛ mɛsɛntɔ́ towe lɛ́ɛ ná ɖó akɔ́nkpinkpan, bó jlá xó towe kpódó jiɖiɖe bǐ kpán.

³⁰Dlɛ̌n alɔ towe, bónú nǔjlɛ́jlɛ́ lɛ́ɛ kpódó nǔdábaɖa lɛ́ɛ kpó ná tíin, ɖo mɛsɛntɔ́ towe mímɛ́ Jezu sín nyǐkɔ mɛ.”

³¹Ée yě xo ɖɛ fó ɔ́, fí e yě kplé ɖe ɔ́ dán wǔ. Yɛsinsɛn gɔ́ ayi mɛ nú yě, bɔ yě jɛ Mawuxó jlá jí, kpódó jiɖiɖe kpán.

³² Nǔɖitɔ́ lɛ́ɛ bǐ sésé ɖó jlǒ ɖokpó ɔ́, bó ɖó linlin ɖokpó ɔ́, bɔ mɛ ɖěbǔ sɔ́ nɔ sɔ́ nǔ e nyí étɔn ɔ́ sɔ́ ylɔ́ étɔn ǎ; lo ɔ́, nǔ e ɖo mɛ ɖokpó ɖokpó sí ɔ́ húzú mɛ bǐ tɔn.

³³Mɛsɛ́dó lɛ́ɛ ka nɔ́ ɖe kúnnu nú fínfɔ́n sín kú Aklúnɔ Jezu tɔn, kpódó jiɖiɖe kpó, bɔ Mawu tún acɛ dó yě mɛ bǐ jǐ.

³⁴Mɛ ɖé nɔ́ jɛ nǔɖé do ɖo yě mɛ ǎ ɖó mɛ e ɖó ayǐkúngban abǐ xwé lɛ́ɛ nɔ sɔ́ sa,

³⁵bó nɔ́ zé akwɛ́ tɔn wá nú mɛsɛ́dó lɛ́ɛ, bɔ yě nɔ́ má nú mɛ ɖokpó ɖokpó lě e nǔ tɔn hudó e gbɔn é.

³⁶Mɔ̌ wɛ nya ɖé tíin, bɔ è nɔ ylɔ́ ɛ ɖɔ Jozɛ́fu; mɛsɛ́dó lɛ́ɛ ká sun nyǐ i ɖɔ Baanabási, (tínmɛ tɔn wɛ nyí gbɔdónúmɛtɔ́,) Levíi ví wɛ bɔ è ji i ɖo Cíplu.

³⁷É lɔmɔ̌ sa ayǐkúngban ɖokpó, bó sɔ́ akwɛ́ tɔn wá nú mɛsɛ́dó lɛ́ɛ.