Read fon Mɛsɛ́dó 5 Bible Online

Mɛsɛ́dó 5 - fon bible

Mɛsɛ́dó 5

¹Nya ɖé tíin, bó nɔ́ nyí Ananíyasi, bɔ asi tɔn nɔ nyí Safíla. Yě lɔmɔ̌ ɖó gbe kpɔ́, bó sa ayǐkúngban yětɔn.

²É ɖɔ xá asi tɔn, bɔ yě ɖe akwɛ́ e yě sa ayǐkúngban ɔ́ yí ɔ́ kpo, bɔ é sɔ́ ée kpo ɔ́ yi jó nú mɛsɛ́dó lɛ́ɛ.

³Piyɛ́ɛ ka kanbyɔ́ ɛ ɖɔ: “Ananíyasi! Aniwú Satáan gɔ́ ayi mɛ nú we mɔ̌, bó zɔ́n bɔ a ɖe akwɛ́ e a dǒ sa ayǐkúngban ɔ́ ná ɔ́ kpo, bó wá ɖo nǔvú ɖó nú Yɛsinsɛn wɛ?

⁴Hwenu e a ma ko sa ayǐkúngban ɔ́ ǎ ɔ́, towe wɛ é nyí ǎ cé? Ée a ka wá sa ɔ́, akwɛ́ tɔn ɔ́, é má nyí towe wɛ é nyí a? Fítɛ́ a ka ba ayi hízíhízí mɔ̌hun sín? Gbɛtɔ́ lɛ́ɛ wɛ a ɖǒ nǔvú ná ǎ, Mawu wɛ a ɖǒ nǔvú ná.”

⁵Ée Ananíyasi se xó énɛ́ ɔ́, é jɛ ayǐ, bó kú cúɖúɖú, bɔ xɛsi ɖaxó ɖé jɛ mɛ e se nǔ énɛ́ e jɛ lɛ́ɛ bǐ jí.

⁶Dɔ̌nkpɛvú e ɖo fínɛ́ lɛ́ɛ sí te, bó bú avɔ dó cyɔ tɔn, lobo sɔ́ ɛ yi ɖi.

⁷É bló ganxixo atɔn mɔ̌, bɔ asi tɔn lɔmɔ̌ wá xwetɔ́n; é ka ko se nǔ e jɛ ɔ́ ǎ.

⁸Piyɛ́ɛ ka ylɔ́ ɛ, bó kanbyɔ́ ɛ ɖɔ: “Akwɛ́ élɔ́ wɛ mi sa ayǐkúngban mitɔn yí a? Đɔ nú mǐ.” É ka yí gbe ɖɔ: “Ɛɛn, mɔ̌ jɛ́n mǐ sa yí hǔn.”

⁹Ée é ɖɔ mɔ̌ ɔ́, Piyɛ́ɛ ɖɔ n'i ɖɔ: “Nɛ̌ ka gbɔn bɔ hwi kpódó asú towe kpó blá ɖɔ, bó jló ná ba do nú Yɛ Aklúnɔ tɔn kpɔ́n mɔ̌? Đǒtó; mɛ e ɖi asú towe lɛ́ɛ nɛ́ ɖo xwé gbe byɔ́ wɛ nɛ́; yě ná sɔ́ hwi lɔmɔ̌ yi ɖi.”

¹⁰Tɛn tɔn mɛ tlóló ɔ́, nyɔ̌nu ɔ́ jɛ ayǐ ɖo Piyɛ́ɛ sá mɛ, bó kú. Ée dɔ̌nkpɛvú lɛ́ɛ byɔ́ xwé gbe ɔ́, yě mɔ cyɔ tɔn, bó ka sɔ́ é lɔmɔ̌ yi ɖi ɖó asú tɔn kpá.

¹¹Bɔ xɛsi ɖaxó ɖé jɛ agun nǔɖitɔ́ lɛ́ɛ tɔn ɔ́ bǐ jí, bó jɛ mɛ e se nǔ énɛ́ e jɛ lɛ́ɛ bǐ jí.

¹²Mawu jlɛ́ nǔ gěgé, bó ɖe nǔdábaɖa gěgé xlɛ́ gbɔn mɛsɛ́dó lɛ́ɛ jí, ɖo togun ɔ́ mɛ. Nǔɖitɔ́ lɛ́ɛ bǐ nɔ́ nɔ kpɔ́ ɖo Salomɔ́ɔ gba jí.

¹³Mɛɖěvo sɔ́ nɔ́ glá gɔ́ nú yě ǎ; lo ɔ́, togun ɔ́ yí wǎn nú yě ɖésú.

¹⁴Mɛ e ɖo nǔ ɖi nú Aklúnɔ wɛ lɛ́ɛ ɖo kpɔ́ su d'é jí wɛ, ɖo súnnu mɛ, ɖo nyɔ̌nu mɛ.

¹⁵Bɔ mɛ lɛ́ɛ nɔ́ zé azinzɔnnɔ yětɔn lɛ́ɛ wá ɖó ali lɛ́ɛ xo; yě nɔ́ tɛ́ yě dó akánma jí, bó nɔ́ lɛ́ tɛ́ yě dó zan jí bónú Piyɛ́ɛ wá xweyǐgbe ɔ́, yɛ tɔn ná gbɛ́ gbɔn mɛ ɖěe jí ɖo yě mɛ vɔ́vɔ́.

¹⁶Mɛ gěgé nyi ahwan sín to e yá Jeluzalɛ́mu lɛ́ɛ lɔ mɛ, bó nɔ́ kplá azinzɔnnɔ lɛ́ɛ, kpódó mɛ e yɛ nyanya ɖo tagba dó ná wɛ lɛ́ɛ kpán wá, bɔ azɔn nɔ gbɔ nú yě bǐ.

¹⁷Vɔ̌sánú-xwlémawutɔ́ ɖaxó ɔ́ kpódó mɛ e ɖo kpɔ́ xá ɛ lɛ́ɛ bǐ kpó jɛ wǔ hwan jí, bó sí te dó mɛsɛ́dó lɛ́ɛ jí. Mɛ e ɖo kpɔ́ xá ɛ lɛ́ɛ wɛ nyí Saduseɛn lɛ́ɛ.

¹⁸Yě wlí yě dó gankpá mɛ, fí e è nɔ wlí mɛ kpaa lɛ́ɛ sú dó é.

¹⁹Lo ɔ́, ée zǎn kú ɔ́, wɛnsagun Aklúnɔ tɔn ɖokpó hun gankpá ɔ́ sín hɔn lɛ́ɛ, bó kplá yě jɛ hɔnto, bó ɖɔ nú yě ɖɔ:

²⁰“Mi yi cí sinsɛnxɔ mɛ, bó jlá Wɛn Ɖagbe Mawu tɔn e nɔ ná gbɛ mɛ é bǐ togun ɔ́.”

²¹Ée yě se mɔ̌ ɔ́, yě fɔ́n zǎn yi sinsɛnxɔ mɛ, bó jɛ nǔ kplɔ́n mɛ lɛ́ɛ jí. Vɔ̌sánú-xwlémawutɔ́ ɖaxó ɔ́, kpódó mɛ e ɖo kpɔ́ xá ɛ lɛ́ɛ kpó ka ylɔ́ Izlayɛ́li tomɛxó lɛ́ɛ bónú yě ná bló toxóɖɔgbɛ́ ɔ́ sín kplé. Ée yě kplé ɔ́, yě sɛ́ mɛ dó ɖɔ è nǐ yi kplá mɛsɛ́dó lɛ́ɛ wá sín gankpá mɛ.

²²Ée sɔ́ja lɛ́ɛ yi ɔ́, yě sɔ́ mɔ yě ɖo gankpá ɔ́ mɛ ǎ, bó lɛ́ kɔ bó wá ɖó gbe ɖɔ:

²³“Mǐ mɔ hɔn lɛ́ɛ bǐ ɖo súsú ganjí, bó mɔ sɔ́ja ɖo hɔn lɛ́ɛ jí; ée mǐ ka hun hɔn lɛ́ɛ ɔ́, mǐ mɔ mɛ ɖěbǔ ɖo xɔ ɔ́ mɛ ǎ.”

²⁴Ée sinsɛnxɔcɔ́tɔ́ lɛ́ɛ sín gǎn, kpódó vɔ̌sánú-xwlémawutɔ́gán lɛ́ɛ kpán se mɔ̌ ɔ́, yě bǔ ayǐ ɖo mɛsɛ́dó énɛ́ lɛ́ɛ sín xó kpódó nǔ e ná wá jɛ gúdo lɛ́ɛ kpó mɛ.

²⁵Bɔ mɛ ɖě wá xwetɔ́n, bó ɖɔ nú yě ɖɔ: “Mɛ e mi wlí sú dó gankpá mɛ lɛ́ɛ nɛ́ ɖo sinsɛnxɔ mɛ, bó ɖo nǔ kplɔ́n togun ɔ́ wɛ nɛ́.”

²⁶Bɔ sinsɛnxɔcɔ́tɔ́ lɛ́ɛ sín gǎn kpódó mɛ tɔn lɛ́ɛ kpán yí kplá mɛsɛ́dó lɛ́ɛ wá; yě ka kplá yě kpódó zǐngídi kpó ǎ, ɖó yě ɖo xɛsi ɖi wɛ ɖɔ togun ɔ́ táá wá nyi awǐnnyaglo dó hu émí.

²⁷Ée yě kplá mɛsɛ́dó lɛ́ɛ wá ɔ́, yě kplá yě yi toxóɖɔgbɛ́ ɔ́ nukɔn, bɔ vɔ̌sánú-xwlémawutɔ́ ɖaxó ɔ́ jɛ hwɛ tɛ́ xá yě jí ɖɔ:

²⁸ “Mǐ má kó dó sɛ́n nú mi syɛ́nsyɛ́n ɖɔ mi ma sɔ́ kplɔ́n nǔ mɛ dó nya énɛ́ sín nyǐkɔ mɛ ó a? Énɛ́ nǔ e kplɔ́n mɛ wɛ mi ɖe ɔ́ ka gba kpé Jeluzalɛ́mu to ɔ́ bǐ mɛ nɛ́; bɔ mi jló ná zé nya énɛ́ sín kú kplá kɔ nú mǐ.”

²⁹Piyɛ́ɛ kpódó mɛsɛ́dó lɛ́ɛ kpó ká yí gbe n'i ɖɔ: “È ɖó ná se tónú nú Mawu; é nyɔ́ hú è se tónú nú gbɛtɔ́.

³⁰Mawu tɔ́gbó mǐtɔn lɛ́ɛ tɔn kó fɔ́n Jezu énɛ́ e midɛɛ lɛ́ɛ hu, hwenu e mi ká ɛ nyi aklúzu jí é.

³¹Mawu sɔ́ ɛ ɖó ɖisí tɔn xwé, bó sɔ́ ɛ su, lobo sɔ́ ɛ axɔ́sú Mɛhwlɛ́ngántɔ́, nú é ná xlɛ́ ali Izlayɛ́li togun ɔ́, bónú Izlayɛ́li togun ɔ́ ná lɛ́ kɔ sín hwɛ tɔn lɛ́ɛ gúdo, bɔ Mawu ná sɔ́ hwɛ e é hu lɛ́ɛ kɛ ɛ.

³²Mǐ nyí kúnnuɖetɔ́ nǔ énɛ́ lɛ́ɛ tɔn; mǐ kpódó Yɛsinsɛn e Mawu nɔ́ ná mɛ e nɔ se tónú n'i lɛ́ɛ é kpán.”

³³Ée toxóɖɔtɔ́ lɛ́ɛ se xó énɛ́ lɛ́ɛ ɔ́, xomɛ sin yě tlala, bɔ yě jló ná hu mɛsɛ́dó lɛ́ɛ.

³⁴Lo ɔ́, Falizyɛn ɖokpó ɖo yě mɛ hwenɛ́nu; è nɔ ylɔ́ ɛ ɖɔ Gamaliyɛ́li; sɛ́nkplɔ́nmɛtɔ́ ɖaxó ɖokpó wɛ é nyí, bɔ to ɔ́ bǐ nɔ́ sí i. Nya énɛ́ sí te ɖo toxóɖɔgbɛ́ ɔ́ mɛ, bó ɖe gbe ɖɔ è nǐ ɖe mɛsɛ́dó lɛ́ɛ tɔ́n hwɛ̌.

³⁵Énɛ́ gúdo ɔ́, é ɖɔ nú toxóɖɔtɔ́ lɛ́ɛ ɖɔ: “Izlayɛ́li ví e mi, mi hɛn ayi dó nǔ e wa xá mɛ énɛ́ lɛ́ɛ gbé mi ja ɔ́ wú.

³⁶É kó lín din ǎ, bɔ Tedasi sí te ɖo fí, bó ɖɔ émí jɛ́n tíin, bɔ súnnu mɛxó ná yi afɔwe (400) mɔ̌ xwedó e. È ka hu i, bɔ mɛ énɛ́ lɛ́ɛ bǐ gbadó, bɔ xó fó.

³⁷Éyɛ́ gúdo ɔ́, Judási Galiléenu ɔ́ sí te, ɖo mɛxixa hwenu, bó dɔn ahwan dó éɖée jí; é lɔmɔ̌ kú, bɔ mɛ e xwedó e lɛ́ɛ bǐ gbadó.

³⁸Din ɔ́, ma ɖɔ nú mi, mi ma sɔ́ kpɔ́n mɛ énɛ́ lɛ́ɛ ɖě sín jɛ jí ó; mi jó yě dó nú yě yi. Đó ényí tito yětɔn abǐ nǔwiwa yětɔn ɔ́, gbɛtɔ́ gɔ́n wɛ é gosín ɔ́, é ná sú dó.

³⁹Lo ɔ́, é ka nyí ɖɔ Mawu sín nǔwiwa wɛ ɔ́, mi sixú kpé wú bó sú dó ǎ; mi cɔ́ miɖée, bó má tɔ́n ahwan Mawu ó.”

⁴⁰Ée é ɖɔ mɔ̌ ɔ́, yě bǐ yí gbe nú xó tɔn, bó ka ylɔ́ mɛsɛ́dó lɛ́ɛ, lobo zɔ́n bɔ è xo yě, bó dó sɛ́n nú yě ɖɔ yě má sɔ́ ɖɔ xó dó Jezu nyǐkɔ tamɛ ɖě ó, lobo jó yě dó.

⁴¹Mɛsɛ́dó lɛ́ɛ ka gosín toxóɖɔgbɛ́ ɔ́ nukɔn, bɔ xomɛ hun yě tlala, ɖó yě mɔ ɖɔ Mawu mɔ émí dó mɔ mɛ e jɛ xá ya ji dó Jezu nyǐkɔ mɛ é.

⁴²Ayǐhɔ́ngbe ayǐhɔ́ngbe ɔ́, yě nɔ́ gɔn nǔ kplɔ́n mɛ lɛ́ɛ ɖo sinsɛnxɔ mɛ mɛ kpó xwé lɛ́ɛ gbe kpó ǎ, yě ka nɔ́ gɔn Wɛn Ɖagbe e ɖɔ xó dó Jezu-Klísu wú ɔ́ jlá yě ǎ.