Read fon Mɛsɛ́dó 7 Bible Online

Mɛsɛ́dó 7 - fon bible

Mɛsɛ́dó 7

¹Vɔ̌sánú-xwlémawutɔ́ ɖaxó ɔ́ kanbyɔ́ Etyɛ́ni ɖɔ: “Nǔ nyí mɔ̌ nǔgbó a?”

² Bɔ Etyɛ́ni yí xó, bó ɖɔ: “Nɔví ce lɛ́ɛ mi, tɔ́ ce lɛ́ɛ mi, mi ɖótó mì. Mawu susunɔ ɔ́ tɔ́n dó tɔ́gbó mǐtɔn Ablaxámu jí hwenu e é kpo ɖo Mɛzopotamíi, bó ma kó yi sá xwé ɖó Haláani ǎ é,

³bó ɖɔ n'i ɖɔ: ‘Tɔ́n sín to towe mɛ; tɔ́n sín hɛ̌nnumɔ towe lɛ́ɛ mɛ, bó yi to e un ná xlɛ́ we ɔ́ mɛ.’

⁴ Nǔgbó ɔ́, Ablaxámu gosín Kaludéenu lɛ́ɛ tomɛ, bó wá sá xwé dó Haláani; ée tɔ́ tɔn kú gúdo ɔ́, Mawu ɖe e sín fínɛ́, bó sɔ́ ɛ wá to e mɛ mi ɖe din é mɛ.

⁵ Mawu ná ayǐkúngban ɖěbǔ Ablaxámu ɖo tomɛ fí ǎ; ayǐkúngban alɔbá ɖokpó vɔ́vɔ́ nyí étɔn ǎ. Lo ɔ́, Mawu dó akpá n'i ɖɔ émí ná ná ɛ to ɔ́, bɔ é ná wá nyí vǐvú tɔn lɛ́ɛ lɔ tɔn, có Ablaxámu ka ko ji vǐ ɖěbǔ hwenɛ́nu ǎ.

⁶ Mawu ka lɛ́ ɖɔ n'i ɖɔ: ‘Vǐvú towe lɛ́ɛ ná yi cí mɛ ɖěvo tomɛ, bɔ è nǎ sɔ́ yě dó ɖó kannumɔ, lobo ná dó ya nú yě xɔ xwe afɔwe (400).

⁷ Amɔ̌, un ná ɖɔ hwɛ xá akɔta e mɛ yě ná nyí kannumɔ ɖe é. Énɛ́ gúdo ɔ́, yě ná gosín to ɔ́ mɛ, bó ná wá sɛn mì ɖo fí.’

⁸ Bɔ Mawu jɛ akɔ xá ɛ, bó sɔ́ adagbigbo dó ɖó akɔjijɛ énɛ́ sín wuntun. Énɛ́ ɔ́ wú wɛ hwenu e Ablaxámu ji Izáki ɔ́, é gbo ada n'i azǎn tɔn tántɔngɔ́ ɔ́ gbe. Ée Izáki lɔmɔ̌ ji Jakɔ́bu ɔ́, é gbo ada n'i, bɔ Jakɔ́bu gbo nú tɔ́gbó mǐtɔn wěwe lɛ́ɛ.

⁹ “Tɔ́gbó mǐtɔn énɛ́ lɛ́ɛ hwan wǔ dó nɔví yětɔn Jozɛ́fu, lobo sɔ́ ɛ yi sa, bɔ è kplá ɛ yi Ejípu; lo ɔ́, Mawu nɔ gǔdo tɔn,

¹⁰bó hwlɛ́n ɛ ɖo nǔgbomɛ lɛ́ɛ bǐ mɛ, lobo ná ɛ nǔnywɛ́, bó bló bɔ nǔ tɔn nyɔ́ Ejípu xɔ́sú ɔ́ nukún mɛ, bɔ é sɔ́ ɛ gǎn ɖó to ɔ́ kpódó xwé tɔn kpán nu.

¹¹ Adɔ ɖé ka tɔ́n ɖo Ejípu kpódó Kanáa kpó, bɔ mɛ bǐ jɛ ya ɖaxó ɖé mɛ, tɔ́gbó mǐtɔn lɛ́ɛ sɔ́ mɔ nǔɖé ná ɖu ǎ.

¹²Jakɔ́bu ka se ɖɔ jinukún ɖo Ejípu, lobo sɛ́ tɔ́gbó mǐtɔn lɛ́ɛ dó azɔn nukɔn tɔn ɔ́.

¹³ Azɔn wegɔ́ e é sɛ́ yě dó ɔ́, Jozɛ́fu ɖe éɖée xlɛ́ nɔví tɔn lɛ́ɛ, bɔ Ejípu xɔ́sú ɔ́ wá tunwun hɛ̌nnu e mɛ Jozɛ́fu gosín é.

¹⁴ Jozɛ́fu sɛ́ yě dó ɖɔ yě ní yi kplá tɔ́ émítɔn Jakɔ́bu ɔ́ kpódó hɛ̌nnumɔ tɔn lɛ́ɛ bǐ kpán wá nú émí; yě mɛ gbɛtɔ́ kanɖé gbantɔ́n (75) wɛ.

¹⁵ Jakɔ́bu wá yi Ejípu; fínɛ́ wɛ é kú ɖe, bɔ tɔ́gbó mǐtɔn lɛ́ɛ lɔmɔ̌ kú ɖo fínɛ́.

¹⁶ È sɔ́ cyɔ yětɔn lɛ́ɛ yi Sikɛ́mu, bó ɖi yě dó yɔdo e Ablaxámu sɔ́ akwɛ́ dó xɔ ná ɖo Hamɔ́ɔ vǐ lɛ́ɛ sí é mɛ.

¹⁷ “Hwenu e Mawu ná ɖe akpá e é dó nú Ablaxámu ɔ́ wá ɖo susu wɛ; bɔ togun Izlayɛ́li tɔn ɔ́ ɖo jiji d'é jí wɛ, bó ɖo kpɔ́ sú d'é jí wɛ ɖo Ejípu;

¹⁸yě ɖo kpɔ́ su d'é jí wɛ mɔ̌ káká yi jɛ axɔ́sú Ejípu tɔn ɖěvo e ma tunwun Jozɛ́fu ǎ é hwenu.

¹⁹ Axɔ́sú énɛ́ ɔ́ zán ayi dídá dó akɔta mǐtɔn wú, bó dó ya nú tɔ́gbó mǐtɔn lɛ́ɛ káká, lobo zɔ́n ɖɔ yě ní nɔ́ sɔ́ vǐ yětɔn lɛ́ɛ nyi gbě, nú yě ma nɔ gbɛ ó.

²⁰ Hwenɛ́nu wɛ è ji Mɔyízi, bɔ é nyɔ́ ɖɛkpɛ ɖésú ɖo Mawu nukún mɛ. Mɛ tɔn lɛ́ɛ kpé nukún wú tɔn ɖo tɔ́ tɔn sín xwé gbe xɔ sun atɔn.

²¹ Énɛ́ ɔ́ gúdo ɔ́, yě wá sɔ́ ɛ nyi gbě, bɔ Ejípu xɔ́sú ɔ́ sín vǐ nyɔ̌nu ɔ́ wá sɔ́ ɛ, bó hɛn ɛ vǐ é ɖésúnɔ tɔn ɖɔhun.

²²Fínɛ́ wɛ é yí nǔnywɛ́ Ejípunu lɛ́ɛ tɔn bǐ ɖe, bó lí dǒ ɖo xóɖiɖɔ kpódó nǔwiwa kpó mɛ.

²³ “Hwenu e é ɖó xwe kanɖé (40) ɔ́, nɔví tɔn Izlayɛ́li ví lɛ́ɛ sín nǔ byɔ́ ayi mɛ n'i, bɔ é ɖɔ émí ná yi kpɔ́n lě e yě ɖe gbɔn é.

²⁴Ée é yi ɔ́, é mɔ Ejípunu ɖé ɖo ya dó nú Izlayɛ́li ví ɖokpó wɛ, bó jɛ ahwan jǐ tɔn; é ba hlɔn, bó hu Ejípunu ɔ́.

²⁵É vɛdó ɖɔ nɔví émítɔn lɛ́ɛ ná mɔ nǔ jɛ mɛ ɖɔ Mawu wɛ sɛ́ émí dó ɖɔ émí ní wá hwlɛ́n yě gán sín; yě ká mɔ nǔ jɛ mɛ ǎ.

²⁶Ayǐhɔ́ngbe tɔn ɔ́, Mɔyízi mɔ Izlayɛ́li ví we ɖé lɛ́ɛ ɖo hun xo wɛ, lobo jló ná kɔ́ nǔ nú yě, bó ɖɔ: ‘Xɔ́ntɔn ce lɛ́ɛ mi; nɔví wɛ mi nyí hǔn. Nɛ̌ ká gbɔn bɔ mi ɖo ya dó nú miɖée wɛ?’

²⁷Mɛ e ɖo mɛ tɔn wegɔ́ ɔ́ dó ya ná wɛ ɔ́ ká sísɛ́ Mɔyízi bó ɖɔ jí: ‘Mɛ̌ ká sɔ́ we gǎn, abǐ hwɛɖɔtɔ́ ɖo mǐ nu?

²⁸A jlǒ ná hu mì lě e a hu Ejípunu ɔ́ gbɔn sɔ é wɛ a?’

²⁹ Ée Mɔyízi se mɔ̌ ɔ́, é hɔn bó yi cí to e è nɔ ylɔ́ ɖɔ Madiáani ɔ́ mɛ, bó ji vǐ súnnu we ɖo fínɛ́.

³⁰ “Xwe kanɖé (40) wá yi, bɔ wɛnsagun Mawu tɔn ɖokpó wá tɔ́n dó jǐ tɔn ɖo gbětótló Sinayíi só tɔn mɛ, ɖo zungodwe ɖé mɛ, bɔ zungodwe ɔ́ ɖo zo ji wɛ.

³¹Nǔ énɛ́ e Mɔyízi mɔ ɔ́ kpácá ɛ tlala, bɔ é jló ná sɛ yá, bó ná kpɔ́n tlítlí tɔn, lobo ká se Aklúnɔ sín gbe bɔ é ɖɔ jí:

³²‘Nyɛ wɛ nyí Mawu tɔ́gbó towe lɛ́ɛ tɔn; Mawu Ablaxámu tɔn; Mawu Izáki tɔn; Mawu Jakɔ́bu tɔn.’ Ée Mɔyízi se mɔ̌ ɔ́, é jɛ sísɔ́sísɔ́ jí, bó sɔ́ glá, bó kpɔ́n ǎ.

³³Aklúnɔ ka ɖɔ n'i ɖɔ: ‘ɖe afɔkpa towe lɛ́ɛ, ɖó ayǐkúngban e jí a ɖo te ɖe ɔ́, ayǐkúngban mímɛ́ wɛ.

³⁴Un mɔ ya e ji wɛ togun ce ɖe ɖo Ejípu ɔ́ ganjí. Un se azɔn e wɛn wɛ é ɖe ɔ́, lobo jɛ te wá hwlɛ̌nhwlɛ́n ɛ gán gbé. Din ɔ́, wǎ. Un ná sɛ́ we dó Ejípu.’

³⁵ “Mɔyízi énɛ́ e yě kó gbɛ́, bó kanbyɔ́ ɛ ɖɔ: ‘Mɛ̌ ká sɔ́ we gǎn, abǐ hwɛɖɔtɔ́’ a jí é wɛ Mawu wá sɛ́ dó yě, lobo ná ɛ hlɔ̌nhlɔ́n gbɔn wɛnsagun e tɔ́n dó jǐ tɔn ɖo zungodwe mɛ ɔ́ jí, nú é ná ɖu gǎn ɖo yě nu, lobo hwlɛ́n yě gán.

³⁶ Mɔyízi énɛ́ wɛ kplá Izlayɛ́li ví lɛ́ɛ tɔ́n sín Ejípu, gbɔn nǔdábaɖa e é ɖe tɔ́n lɛ́ɛ kpódó nǔ e é jlɛ́ ɖo to énɛ́ ɔ́ mɛ, bó jlɛ́ ɖo Xu Vɔvɔ ɔ́ tó, bó jlɛ́ ɖo gbětótló mɛ, káká xɔ xwe kanɖé (40) ɔ́ kpó gbla mɛ.

³⁷ Mɔyízi ɖokpó énɛ́ wɛ ɖɔ nú Izlayɛ́li ví lɛ́ɛ ɖɔ jí: ‘Mawu ná bló bɔ gbeyíɖɔ nyɛ ɖɔhun ɖokpó ná tɔ́n ɖo togun mitɔn mɛ.’

³⁸ Hwenu e togun ɔ́ kplé ɖo gbětótló mɛ ɔ́, é wɛ nɔ kpɔ́ xá yě; é nɔ kpɔ́ xá tɔ́gbó mǐtɔn lɛ́ɛ, kpó wɛnsagun e ɖɔ xó n'i ɖo Sinayíi só jí ɔ́ kpó, bó yí Mawuxó e nɔ́ ná gbɛ mɛ ɔ́, bó ɖɔ nú mǐ.

³⁹“Lo ɔ́, tɔ́gbó mǐtɔn lɛ́ɛ jló ná se tónú n'i ǎ, lobo gbɛ́ xó tɔn, bó jló ná lɛ́ kɔ yi Ejípu,

⁴⁰bó ɖɔ nú Aalɔ́ɔn ɖɔ jí: ‘Blǒ vodún e ná sixú nɔ nukɔn nú mǐ lɛ́ɛ nú mǐ; ɖó Mɔyízi énɛ́ e kplá mǐ sín Ejípu ɔ́, mǐ sɔ́ tunwun gbɛ e mɛ é ɖe tawun ɔ́ ǎ.’

⁴¹ Énɛ́ ɔ́, yě bló nyibúví ɖokpó hwenɛ́nu, bó jɛ vɔ̌sánú xwlé e jí, bɔ nǔ e yě ɖésú sɔ́ alɔ dó bló ná ɔ́, nyí awǎjijɛnú nú yě.

⁴² Mawu ka dó gǔdo yě, bó jó yě dó, bɔ yě jɛ hwe kpó sun, kpódó sunví lɛ́ɛ kpó sɛn jí, lě e è ko wlán ɖo gbeyíɖɔ Mawu tɔn lɛ́ɛ sín wěma mɛ gbɔn é; è wlǎn ɖɔ jí: ‘Izlayɛ́li ví lɛ́ɛ mi! Ée mi nɔ gbětótló mɛ xɔ xwe kanɖé (40) ɔ́, kanlin tɛ́ mi ka hu nú mì? Vɔ̌ tɛ́ mi ka sá nú mì gbeɖé?

⁴³Goxɔ vodún Mɔlɛ́ki tɔn, kpódó sunví vodún Hlefánu tɔn kpán sín bǒcyɔ wɛ mi kpa, bó zé hɛn, lobo nɔ sɛn ǎ cé? Énɛ́ ɔ́ wú ɔ́, un ná bɛ́ mi sín to mitɔn mɛ yi Babilɔ́nu gúdo.’

⁴⁴ “Hwenu e tɔ́gbó mǐtɔn lɛ́ɛ ɖo yiyi wɛ ɖo gbětótló mɛ ɔ́, yě hɛn goxɔ e ɖe xlɛ́ ɖɔ Mawu ɖo kpɔ́ xá yě ɔ́, bɔ awǐnnya we e jí Mawusɛ́n lɛ́ɛ ɖe ɔ́ ɖ'é mɛ. Mɔyízi bló goxɔ énɛ́, bɔ é sɔgbe xá ée é mɔ é.

⁴⁵ Goxɔ énɛ́ wá jɛ tɔ́gbó mǐtɔn lɛ́ɛ sí; bɔ Jozuwée nɔ yě nu, bɔ yě zé byɔ́ to e mɛ Mawu nya akɔta ɖé lɛ́ɛ sín, bɔ yě yi ɔ́ mɛ. Goxɔ ɔ́ nɔ yě sí ɖo fínɛ́ káká jɛ hwenu e Davídi wá ɖu axɔ́sú é.

⁴⁶ Davídi sín nǔ nyɔ́ Mawu e Jakɔ́bu nɔ sɛn ɔ́ nukún mɛ, bɔ Davídi byɔ́ ɛ ɖɔ é ní ná gbe émí, nú émí ná gbá xɔ ɖokpó n'i.

⁴⁷ Amɔ̌, axɔ́sú Salomɔ́ɔ wɛ wá gbá xɔ énɛ́ nú Mawu.

⁴⁸“Lo ɔ́, Mawu Ajalɔ̌nlɔn ɔ́ nɔ́ nɔ xɔ e gbɛtɔ́ gbá é mɛ ǎ, lě e gbeyíɖɔ tɔn ko ɖɔ gbɔn é; é ɖɔ:

⁴⁹ Aklúnɔ ɖɔ: ‘Jǐnukúnsin ɔ́, axɔ́súzinkpo ce wɛ, bɔ ayǐkúngban ka nyí afɔɖótɛn ce. Xwé tɛ́ mi ka sixú gbá nú mì? Abǐ fítɛ́ ka sixú nyí gbɔjɛtɛn ce?

⁵⁰Nyɛ wɛ bló nǔ énɛ́ lɛ́ɛ bǐ ǎ cé?’

⁵¹ “Mi tamɛtitɔ́, tótlítɔ́, ayisyɛ́nsyɛ́nnɔ lɛ́ɛ mi; gǔ jɛ́n mi nɔ fɔ́n dó Yɛsinsɛn jí; nǔ e tɔ́gbó mitɔn lɛ́ɛ wa ɔ́, é wa wɛ jɛ́n mi lɔmɔ̌ ɖe.

⁵²Gbeyíɖɔ tɛ́ tɔ́gbó mitɔn lɛ́ɛ má ka dó ya ná ǎ? Yě hu mɛ e wá ɖɔ ɖ'ayǐ ɖɔ hwɛjijɔnɔ ɔ́ ná wá lɛ́ɛ é. Hwɛjijɔnɔ énɛ́ wɛ midɛɛ lɛ́ɛ mi sa, lobo hu din.

⁵³Mi mɛ e yí sɛ́n ɔ́ gbɔn wɛnsagun Mawu tɔn lɛ́ɛ jí ɔ́, mi nyi sɛ́n énɛ́ ǎ.”

⁵⁴Ée toxóɖɔtɔ́ lɛ́ɛ se xó énɛ́ e Etyɛ́ni ɖɔ ɔ́, xomɛ sin yě dó wǔ tɔn tlala, bɔ yě jɛ aɖǔkún ɖu jí.

⁵⁵Yɛsinsɛn gɔ́ ayi mɛ nú Etyɛ́ni, bɔ é kpɔ́n jǐxwé, bó mɔ susu Mawu tɔn, bɔ Jezu ɖo te ɖo ɖisíxwé nú Mawu,

⁵⁶bɔ é ɖɔ: “Mi ɖótó! Un mɔ sɛ́xwé ɖo hunhun, bó mɔ Gbɛtɔ́ví ɔ́ ɖo te ɖo ɖisíxwé nú Mawu.”

⁵⁷Ée yě se mɔ̌ ɔ́, yě bǐ sú xó tlílí, bó sú tó, bó zɔn jǐ tɔn zɛ̌ɛ́n,

⁵⁸bó dɔn ɛ yi to ɔ́ gúdo, lobo nyi awǐnnyaglo dó hu i. Kúnnuɖetɔ́ lɛ́ɛ zɔ́n awu yětɔn hɛn nyaví dɔ̌nkpɛvú ɖé, bɔ è nɔ ylɔ́ ɛ ɖɔ Sólu.

⁵⁹Hwenu e yě ɖo awǐnnyaglo nyi dó Etyɛ́ni wɛ ɔ́, Etyɛ́ni xo ɖɛ, bó ɖɔ: “Aklúnɔ Jezu, yǐ lǐndɔ̌n ce.”

⁶⁰Énɛ́ ɔ́ gúdo ɔ́, é húzú jɛ kpo, bó sú xó tlílí ɖɔ: “Aklúnɔ, ma lɛ́n hwɛ élɔ́ dó kɔ nú yě ó.” Ée é ɖɔ mɔ̌ ɔ́, é bɔnu.