Read fon Mɛsɛ́dó 8 Bible Online

Mɛsɛ́dó 8 - fon bible

Mɛsɛ́dó 8

¹Etyɛ́ni e è hu ɔ́ nyɔ́ Sólu nukún mɛ. Gbe énɛ́ gbe e è hu Etyɛ́ni ɔ́, mɛ lɛ́ɛ jɛ ya dó nú agun Jezu tɔn e ɖo Jeluzalɛ́mu ɔ́ jí, bɔ yě bǐ gba kpé Judée kpódó Samalíi kpán gbejí. Mɛsɛ́dó lɛ́ɛ kɛ́ɖɛ́ jɛ́n ma hɔn yi ɖě ǎ.

²Mɛ e nɔ xwedó Mawusɛ́n ɔ́ lɛ́ɛ ɖěe ká sɔ́ Etyɛ́ni sín cyɔ yi ɖi, bó ya avǐ ɖésú.

³ Sólu ka nɔ́ ɖo gǎn dó wɛ, bó ná vívá agun Jezu tɔn. É nɔ gbɔn xwé gbe xwé gbe, bó nɔ́ wlí súnnu kpódó nyɔ̌nu kpán e ɖi nǔ nú Jezu lɛ́ɛ dó gankpá mɛ.

⁴Yě mɛ e gbadó lɛ́ɛ nɔ́ ɖo Wɛn Ɖagbe ɔ́ jlá wɛ gbɔn fí lɛ́ɛ fí lɛ́ɛ.

⁵Mɔ̌ wɛ Filípu wá yi toxo ɖaxó ɖé mɛ ɖo Samalíi yíkúngban jí, bó nɔ́ ɖo Klísu xó ɖɔ wɛ.

⁶Ée togun ɔ́ se xó e ɖɔ wɛ Filípu ɖe lɛ́ɛ, bó ká mɔ nǔ e jlɛ́ wɛ é ɖe lɛ́ɛ ɔ́, yě mɛ bǐ sésé yí nǔkplɔ́nmɛ tɔn se.

⁷Yɛ nyanya lɛ́ɛ nɔ gosín azinzɔnnɔ gěgé jí kpó xósúsú ɖaxó kpó; mɔ̌ ɖokpó ɔ́, azɔn gbɔ nú wǔkúnánɔ gěgé, kpódó sékúnɔ gěgé kpán.

⁸Énɛ́ ɔ́ wú ɔ́, xomɛ ɖaxó ɖé hun mɛ e ɖo to énɛ́ mɛ lɛ́ɛ.

⁹Nya ɖé ká ɖo Samalíi to ɔ́ mɛ ɖ'ayǐ, bɔ è nɔ ylɔ́ ɛ ɖɔ Sinmɔ́ɔ; nya énɛ́ nɔ́ ɖo majíki gěgé bló wɛ, bɔ é nɔ́ kpácá mɛ e ɖo Samalíi gbé jí lɛ́ɛ bǐ, bɔ é nɔ́ mɔ ɖɔ émí nyí nǔɖaxó,

¹⁰bɔ mɛ bǐ nɔ́ ɖótó e tlítlí, bɛ́ sín yɔkpɔ́vú bǐ lɛ́ɛ jí, káká yi mɛxó bǐ lɛ́ɛ jí; yě nɔ ɖɔ: “Nya élɔ́ wɛ nyí hlɔ̌nhlɔ́n Mawu tɔn e è nɔ ylɔ́ ɖɔ ‘hlɔ̌nhlɔ́n ɖaxó’ é.”

¹¹Yě bǐ nɔ́ ɖótó e tlítlí, ɖó nǔ e é nɔ́ jlɛ́ gbɔn majíki mɛ lɛ́ɛ ɖo yě kpácá wɛ din ɔ́, é kó lín.

¹²Lo ɔ́, hwenu e yě yǐ Wɛn Ɖagbe e jlá yě wɛ Filípu ɖe dó axɔ́súɖuɖu Mawu tɔn kpódó nyǐkɔ Jezu Klísu tɔn kpó wú ɔ́ se ɔ́, è lɛ yɛhwesin nú yě, súnnu kpódó nyɔ̌nu kpó.

¹³Sinmɔ́ɔ lɔ ɖi nǔ, bɔ è lɛ yɛhwesin n'i; énɛ́ ɔ́ gúdo ɔ́, é sɔ́ lɛ́ kɔ sín Filípu gúdo ǎ, bɔ nǔjlɛ́jlɛ́ kpódó nǔdábaɖa kpó e jlɛ́ wɛ Filípu nɔ ɖe lɛ́ɛ nɔ́ kpácá ɛ.

¹⁴Mɛsɛ́dó e ɖo Jeluzalɛ́mu lɛ́ɛ wá se ɖɔ Samalíinu lɛ́ɛ ɖi nǔ nú xó ɔ́, bó sɛ́ Piyɛ́ɛ kpódó Jǎan kpán dó yě.

¹⁵Ée yě jɛ to ɔ́ mɛ ɔ́, yě xo ɖɛ nú nǔɖitɔ́ lɛ́ɛ, nú Mawu ná ná yě Yɛsinsɛn;

¹⁶ɖó Yɛsinsɛn ko jɛ te dó mɛ ɖěbǔ jí ɖo yě mɛ hwenɛ́nu ǎ; yɛhwesin jɛ́n è lɛ nú yě ɖo Aklúnɔ Jezu nyíkɔ mɛ.

¹⁷Ée Piyɛ́ɛ kpódó Jǎan kpán xo ɖɛ gúdo ɔ́, yě ɖó alɔ yě jí, bɔ Mawu ná Yɛsinsɛn yě.

¹⁸Ée Sinmɔ́ɔ ka mɔ ɖɔ mɛsɛ́dó lɛ́ɛ ɖó alɔ nǔɖitɔ́ lɛ́ɛ jí, bɔ Mawu ná Yɛsinsɛn yě ɔ́, é dó akwɛ́ sín akpá nú yě,

¹⁹bó ɖɔ: “Mi ná acɛ nyi lɔmɔ̌, bónú mɛ e jí un ná ɖó alɔ ɔ́, Mawu ná ná Yɛsinsɛn mɛ ɔ́.”

²⁰Piyɛ́ɛ ka yí gbe n'i ɖɔ: “Hwi kpódó akwɛ́ towe kpó bǐ ní bó dɔn, ɖó a lin ɖɔ è nɔ sɔ́ akwɛ́ dó xɔ nǔníná Mawu tɔn.

²¹Nǔɖé kan we ɖo xó élɔ́ mɛ ǎ; nǔɖé ka nyí towe ɖ'é mɛ ǎ; ɖó ayi towe jlɔ́ ɖo Mawu nukɔn ǎ.

²²Hǔn, bo lɛ́ kɔ sín linlin towe nyanya énɛ́ gúdo, bó sa vo nú Aklúnɔ, bónú nǔ sixú nyí mɔ̌ ɔ́, é ná sɔ́ nǔ nyanya énɛ́ e a lin ɔ́ kɛ we;

²³ɖó un mɔ ɖɔ nǔ dídá kɛ́ɖɛ́ wɛ gɔ́ ayi towe mɛ, bɔ hwɛ dó gɛdɛ we.”

²⁴Sinmɔ́ɔ ka yí gbe ɖɔ jí: “Mi ɖésúnɔ mi bo sa vo nú Aklúnɔ nú mì, bónú nǔ e mi ɖɔ ɔ́ ɖě ma ɖi wǔ ce ó.”

²⁵Ée Piyɛ́ɛ kpódó Jǎan kpán ɖe kúnnu nú Aklúnɔ, bó jlá xó tɔn vɔ ɔ́, yě lɛ́ kɔ ɖidó Jeluzalɛ́mu, bó jlá Wɛn Ɖagbe ɔ́ dó ali, gbɔn Samalíi sín gletoxo gěgé mɛ.

²⁶Wɛnsagun Aklúnɔ tɔn ɖɔ nú Filípu ɖɔ jí: “A nǎ sí te, bó ɖidó to ɔ́ sín afɔligbé. Ali e gosín Jeluzalɛ́mu, bó gbɔn gbětótló mɛ yi Gaza ɔ́ wɛ a nǎ wlí.”

²⁷Filípu ka sí te, bó ɖidó. Nya agooɖojǐe Etiopíinu ɖé ka yi sɛn Mawu ɖo Jeluzalɛ́mu, bó lɛ́ kɔ wá xwe xwé. Nya énɛ́ ɔ́, axɔ́súzɔ́watɔ́ ɖaxó wɛ, bó nɔ́ kpɔ́n axɔ́sú nyɔ̌nu Etiopíi tɔn sín dɔkun lɛ́ɛ bǐ jǐ; é ɖo ayǐjínjɔ́n ɖo kɛkɛ́ví tɔn mɛ, bó ɖo nǔ xa wɛ, ɖo gbeyíɖɔ Mawu tɔn Ezayíi sín wěma mɛ.

²⁹Yɛsinsɛn ka ɖɔ nú Filípu ɖɔ: “Xwedó kɛkɛ́ví énɛ́ wú.”

³⁰Filípu ka kán wezun bó xwedó kɛkɛ́ví ɔ́ wú, bó se nya Etiopíinu ɔ́ ɖo nǔ xa wɛ, ɖo gbeyíɖɔ Mawu tɔn Ezayíi sín wěma mɛ lobo kanbyɔ́ ɛ ɖɔ: “A ka mɔ nǔ jɛ nǔ e xa wɛ a ɖe ɔ́ mɛ din a?”

³¹Etiopíinu ɔ́ ká yí gbe n'i ɖɔ: “Ényí mɛɖé má tínmɛ nú mì ǎ ɔ́, nɛ̌ un ka sixú mɔ nǔ jɛ mɛ gbɔn?” É ka ɖɔ nú Filípu ɖɔ ní byɔ́ kɛkɛ́ví ɔ́ mɛ, bó jínjɔ́n akpá émítɔn.

³² Nǔ e xa wɛ é ɖe ɖo Mawuxówéma ɔ́ mɛ ɔ́ ɖíe: “È kplá ɛ lě e è nɔ kplá lɛ̌ngbɔ́ yi lanhutɛn ɔ́ ɖɔhun; é cí xwíí, lě e lɛ̌ngbɔ́ nɔ cí xwíí ɖo mɛ e ɖo fún kpa n'i wɛ ɔ́ nukɔn gbɔn é.

³³È dǒ winnyá ɛ, è táfú i, bó ɖɔ hwɛ tɔn ganjí ǎ. Mɛ̌ ka ná sixú kpi vǐ tɔn lɛ́ɛ sín tan? Đó yě hu i sín gbɛ élɔ́ mɛ.”

³⁴Nya agooɖojǐe ɔ́ ká kanbyɔ́ Filípu ɖɔ: “Mɛ̌ xó ɖɔ wɛ gbeyíɖɔ Mawu tɔn ɔ́ ká ɖe? É ɖésú xó ɖɔ wɛ é ɖe a, abǐ mɛ ɖěvo? Kɛnklɛ́n, ɖɔ má se.”

³⁵Bɔ Filípu yí xó, bó bɛ́ sín nǔ e xa wɛ nya énɛ́ ɖe ɖo Mawuxówéma ɔ́ mɛ ɔ́ jí, bó ɖɔ Wɛn Ɖagbe Jezu tɔn ɔ́ sín xó n'i.

³⁶Yě ɖo yiyi wɛ, bó wá yi mɔ sin ɖo fí ɖé, bɔ agooɖojǐe ɔ́ ɖɔ jí: “Kpɔ́n! Sin ɖíe; étɛ́ ka sɔ́ ná gbɛ́ ɖɔ un ma lɛ yɛhwesin ó?” [

³⁷Filípu ka ɖɔ jí: “Ényí a ɖi nǔ kpódó ayi towe bǐ kpó ɔ́, è hɛn ɔ́, è nǎ lɛ yɛhwesin nú we.” Etiopíinu ɔ́ ka yí gbe n'i ɖɔ jí: “Un ɖi nǔ ɖɔ Jezu Klísu ɔ́, Mawu ví wɛ é nyí.”]

³⁸É zɔ́n bɔ è ɖǒ kɛkɛ́ví ɔ́ te, bɔ é kpódó Filípu kpó we lɛ́ɛ jɛ te, bó byɔ́ sin ɔ́ mɛ, bɔ Filípu lɛ yɛhwesin n'i.

³⁹Ée yě tɔ́n sín sin ɔ́ mɛ ɔ́, Aklúnɔ sín Yɛ sɔ́ Filípu yi, bɔ agooɖojǐe ɔ́ sɔ́ mɔ ɛ ǎ. Lo ɔ́, é wlí ali tɔn, bó ɖidó kpódó xomɛhunhun kpó.

⁴⁰Filípu ɔ́ ka wá mɔ éɖée ɖo to e è nɔ ylɔ́ ɖɔ Azɔtɔ́si ɔ́ mɛ, bó wlí ali, bó nɔ́ ɖo Wɛn Ɖagbe ɔ́ jlá wɛ gbɔn to lɛ́ɛ mɛ to lɛ́ɛ mɛ, káká yi jɛ Sezalée.