Read fon Mɛsɛ́dó 9 Bible Online

Mɛsɛ́dó 9 - fon bible

Mɛsɛ́dó 9

¹Sólu ka kpo ɖo kúdán gblɔ́n nú Jezu sín ahwanvú lɛ́ɛ wɛ. É yi mɔ vɔ̌sánú-xwlémawutɔ́ ɖaxó ɔ́,

²bó ɖɔ ní bló wěma nú émí nú émí ná hɛn yi kplɔ́ngbasá e ɖo Damási lɛ́ɛ, bónú émí mɔ mɛ e byɔ́ sinsɛn yɔ̌yɔ́ ɔ́ mɛ lɛ́ɛ ɖě ɔ́, súnnu abǐ nyɔ̌nu ɔ́, émí ná blá yě, bó kplá yě wá Jeluzalɛ́mu.

³Dɔ̌n ɔ́ yi wɛ é ɖe, bó kó sɛ yá Damási to ɔ́, bɔ tlóló ɔ́, wěziza ɖé gosín jǐxwé wá hɔ́n lɛ́ lɛ̌ dó e,

⁴bɔ é jɛ ayǐ. É ka se gbe ɖé, bɔ gbe ɔ́ nɔ́ kanbyɔ́ ɛ ɖɔ: “Sólu, Sólu, étɛ́wú a ka ɖo ya dó nú mì wɛ?”

⁵Sólu ka kanbyɔ́ ɛ ɖɔ: “Hwi mɛ̌ ká wɛ Aklúnɔ?” Gbe ɔ́ ká ɖɔ: “Nyɛ Jezu e dó ya ná a ɖe ɔ́ wɛ.

⁶Din ɔ́, sí te, bó byɔ́ toxo ɔ́ mɛ; è nǎ ɖɔ nǔ e a ɖǒ ná wa ɔ́ nú we.”

⁷Ahwangbɛ́ tɔn e kpó é kpó xwe to ɔ́ mɛ lɛ́ɛ nɔ te, bó sɔ́ sixú kɛ nu ǎ. Yě ɖo xó ɔ́ se wɛ, yě ka mɔ mɛ e ɖo xó ɔ́ ɖɔ wɛ é ǎ.

⁸Sólu ka wá sí te sín kɔ́ mɛ, bó hun nukún, é ka sɔ́ sixú mɔ nǔ ɖěbǔ ǎ, bɔ yě hɛn alɔ tɔn, bó kplá ɛ byɔ́ Damási.

⁹É nɔ nukúnnú ma mɔ nú azǎn atɔn. É ɖu nǔ ǎ; é nu sin ǎ.

¹⁰Ahwanvú Jezu tɔn ɖokpó ka ɖo Damási fínɛ́, bɔ è nɔ ylɔ́ ɛ ɖɔ Ananíyasi. É mɔ nǔ, bó mɔ Aklúnɔ bɔ é ɖɔ n'i ɖɔ: “Ananíyasi.” Bɔ é yí gbe n'i ɖɔ: “Nyɛ ɖíe Aklúnɔ.”

¹¹Aklúnɔ ka ɖɔ n'i ɖɔ: “Sí te, bó wlí ali e è nɔ ylɔ́ ɖɔ ali Jlɔ́jlɔ́ ɔ́, bó yi Judási xwé gbe, bó kan nya Táasinu e è nɔ ylɔ́ ɖɔ Sólu ɔ́ byɔ́; é ɖo ɖɛ xo wɛ din;

¹²Sólu ɖo ɖɛ xo wɛ, bó mɔ nǔ, bó mɔ nya ɖé, bɔ è nɔ ylɔ́ nya ɔ́ ɖɔ Ananíyasi, bɔ é byɔ́ xwé gbe, bó ɖó alɔ jǐ tɔn, bónú é ná lɛ́ mɔ nǔ.”

¹³Ananíyasi ka yí gbe ɖɔ: “Aklúnɔ! Un ko se nya élɔ́ sín xó, ɖo mɛ gěgé nu. Nǔ nyanya e é wa xá mɛ e nyí towe ɖo Jeluzalɛ́mu lɛ́ɛ ɔ́, un se bǐ.

¹⁴Fí e é ka wá din ɔ́, vɔ̌sánú-xwlémawutɔ́gán lɛ́ɛ wɛ é byɔ́ gbe, bó ná wlí mɛ e nɔ xomlá nyǐkɔ towe lɛ́ɛ bǐ.”

¹⁵Aklúnɔ ka ɖɔ n'i ɖɔ: “Vɛ̌ yi, ɖó nya énɛ́ ɔ́, alǐnnyánú ɖé wɛ é nyí, bɔ un sɔ́, bó ná dó wa azɔ̌ ná, nú é ná jlá nyǐkɔ ce mɛ e ma nyí Jwifu ǎ lɛ́ɛ, bó ná jlá axɔ́sú yětɔn lɛ́ɛ, kpódó Izlayɛ́li togun ɔ́ kpó.

¹⁶Un ka ná ɖe ya e é ná ji ɖó nyǐkɔ ce wú lɛ́ɛ bǐ xlɛ́ ɛ.”

¹⁷Ananíyasi ka yi nǔgbó, bó byɔ́ xwé ɔ́ gbe, lobo ɖó alɔ Sólu jí, bó ɖɔ: “Sólu nɔví ce! Aklúnɔ Jezu e tɔ́n dó jǐ towe ɖo ali e a gbɔn bó wá é jí ɔ́ wɛ sɛ́ mì dó, nú a nǎ lɛ́ mɔ nukúnnú, bónú Yɛsinsɛn ní gɔ́ ayi mɛ nú we.”

¹⁸Azɔn ɖokpó ɔ́, nǔ hwevízá ɖɔhun ɖé lɛ́ɛ jɛ ayǐ sín Sólu nukún jí, bɔ é lɛ́ jɛ nǔ mɔ jí bó sí te, bó lɛ yɛhwesin.

¹⁹Énɛ́ ɔ́ gúdo ɔ́, é ɖu nǔ, bɔ hlɔ̌nhlɔ́n wá wǔ tɔn. Sólu nɔ ahwanvú Jezu tɔn e ɖo Damási lɛ́ɛ gɔ́n xɔ azǎn.

²⁰É ka jɛ kplɔ́ngbasá lɛ́ɛ gbɔn jí azɔn ɖokpó, bó nɔ́ ɖo Jezu xó ɖɔ nú mɛ lɛ́ɛ wɛ, ɖɔ Mawu ví wɛ é nyí.

²¹Nǔ énɛ́ kpácá mɛ e nɔ se xó e ɖɔ wɛ é ɖe lɛ́ɛ bǐ, bɔ yě nɔ́ ɖɔ: “Nya e ɖo mɛ e nɔ xomlá Jezu ɖo Jeluzalɛ́mu lɛ́ɛ sín kún sú dó wɛ ɔ́ nɛ́ ǎ cé? Mɛ e nɔ xomlá Jezu lɛ́ɛ ná wlí yi jó nú vɔ̌sánú-xwlémawutɔ́gán lɛ́ɛ gbé wɛ é tɔ́n bó wá fí ǎ cé?”

²²Hlɔ̌nhlɔ́n e Sólu dó ɖo Wɛn Ɖagbe ɔ́ jlá ná wɛ ɔ́ nɔ́ ɖo jijɛ jí wɛ, bɔ Jwifu e ɖo Damási lɛ́ɛ sɔ́ mɔ nu ɖé ná kɛ dó xó tɔn wú ǎ; ɖó é ɖe xlɛ́ titewungbe ɖɔ Jezu wɛ nyí Klísu.

²³ Azǎn wá ɖo azǎn jí jɛ wɛ, bɔ Jwifu lɛ́ɛ yi kpá dó Sólu wú, bó ná hu i.

²⁴Sólu se gbě e è blǎ dó wǔ tɔn ɔ́; zǎn kpó kéze kpó ɔ́, yě nɔ́ ɖo to ɔ́ sín hɔntogbó lɛ́ɛ jí, bó nɔ́ ɖo fí e é ná tɔ́n gbɔn ɔ́ cɔ́ wɛ, bó ná mɔ tɛn bo hu i.

²⁵Énɛ́ wú ɔ́, ahwanvú lɛ́ɛ wá sɔ́ ɛ dó xasun mɛ zǎn mɛ, bó sɔ́ ɛ gbɔn ahohó ɔ́ ta, bó ɖe e nyi te dǒ ɔ́ gúdo dɔ̌n.

²⁶Ée Sólu wá jɛ Jeluzalɛ́mu ɔ́, é jló ná xwe éɖée dó ahwanvú lɛ́ɛ mɛ; lo ɔ́, yě bǐ nɔ́ ɖi xɛsi dó wǔ tɔn, ɖó yě ɖeji ɖɔ élɔ́ ko húzú ahwanvú Klísu tɔn ǎ.

²⁷Baanabási ka kplá Sólu hɛn yi mɛsɛ́dó lɛ́ɛ gɔ́n, bó wlí lě e é mɔ Aklúnɔ gbɔn ɖo ali jí é, lě e Aklúnɔ ɖɔ xó n'i gbɔn é ɖɔ nú yě; é ɖɔ lě e Sólu ɖésú gbó adɔ bó jlá Mawuxó ɔ́ ɖo Jezu sín nyǐkɔ mɛ gbɔn, ɖo togun mɛ agbawungba ɖo Damási é bǐ nú yě.

²⁸Bɛ́ sín hwenɛ́nu ɔ́, yě yí Sólu, bɔ é nɔ ɖo yiyi wɛ, bó nɔ́ ɖo wǐwá wɛ, bó nɔ́ gbó adɔ dó ɖɔ Mawuxó, ɖo Aklúnɔ nyǐkɔ mɛ, ɖo Jeluzalɛ́mu.

²⁹É nɔ́ ɖɔ xó nú Jwifu e nɔ xwedó walɔ Glɛ̌sinu lɛ́ɛ tɔn ɔ́ lɔmɔ̌, bó nɔ́ ɖo nǔ dɔn xá yě wɛ; amɔ̌, yě ɖo biba ná hu i wɛ.

³⁰Ée nɔví lɛ́ɛ se mɔ̌ ɔ́, yě kplá ɛ yi Sezalée, bó nyi i sɛ́ dó Táasi.

³¹Yě mɛ e ɖi nǔ nú Jezu lɛ́ɛ sín agun e ɖo Judée ɔ́ kpó ée ɖo Galilée ɔ́ kpó, kpódó ée ɖo Samalíi ɔ́ kpán bǐ sín ayi wɛ jɛ ayǐ, bɔ yě ɖo dǒ lí wɛ, bó nɔ́ ɖo sísí ɖó nú Aklúnɔ wɛ ɖo nǔwiwa yětɔn lɛ́ɛ mɛ; Yɛsinsɛn gɔ́ alɔ nú yě, bɔ yě ɖo kpɔ́ sú d'é jí wɛ.

³²Piyɛ́ɛ ɖo to ɔ́ bǐ mɛ gbɔn wɛ, lobo yi nǔɖitɔ́ e ɖo Lida lɛ́ɛ gɔ́n gbe ɖokpó.

³³É mɔ nya ɖé ɖo fínɛ́, bɔ è nɔ ylɔ́ ɛ ɖɔ Enɛ́ɛ; nya énɛ́ xwe ayǐsó ɖo zan jí din ɔ́, xwe tɔn ko yi tántɔn; bɔ é ɖo ayǐmlɔ́mlɔ́.

³⁴Piyɛ́ɛ ka ɖɔ n'i ɖɔ: “Enɛ́ɛ, Jezu Klísu gbɔ azɔn nú we; sí te bó mlá zan towe.” Bɔ é sí te tlóló tɛn tɔn mɛ.

³⁵Lidanu lɛ́ɛ bǐ kpódó Calɔ́ni gbé jí nu lɛ́ɛ kpó ka mɔ nya énɛ́, bó húzú jɛ Aklúnɔ sín ali jí.

³⁶Nyɔ̌nu ɖé ka ɖo ahwanvú Jezu tɔn lɛ́ɛ mɛ ɖo Jopée, bɔ è nɔ ylɔ́ ɛ ɖɔ Tabita; (nyǐkɔ énɛ́ sín tínmɛ wɛ nyí “Dɔ̌kási” ɖo Glɛ̌sigbe mɛ, bó nyí “Tɛ́” ɖo Fɔngbe mɛ.) Nyɔ̌nu ɖagbewatɔ́ ɖé wɛ, bó nɔ́ dó alɔ wamamɔnɔ lɛ́ɛ ɖésú.

³⁷Hwenɛ́nu ɔ́, é bɛ́ azɔn, lobo kú, bɔ yě lɛ wǔ nú cyɔ tɔn, bó sɔ́ yi tɛ́ ɖó xɔ ɖé mɛ, ɖo síngbó jí.

³⁸Ée ahwanvú Jezu tɔn e ɖo Jopée lɛ́ɛ se ɖɔ Piyɛ́ɛ ɖo Lida, bɔ Lida ma ka lín dó Jopée ǎ ɔ́, yě ɖe mɛ we sɛ́ dó e nú yě ní yi ɖɔ n'i ɖɔ ní kɛnklɛ́n bó wá kpɔ́n nǔ élɔ́ nú émí din tlóló.

³⁹Ée Piyɛ́ɛ se wɛn énɛ́ tlóló ɔ́, é sí te bó xwedó yě azɔn ɖokpó. Ée yě wá Jopée ɔ́, yě kplá ɛ yi xɔ ɔ́ mɛ, ɖo síngbó jí. Ée Piyɛ́ɛ byɔ́ xɔ ɔ́ mɛ ɔ́, asúkúsi lɛ́ɛ bǐ sɛkpɔ́ ɛ ɖasin ɖo nukún mɛ, bó xlɛ́ ɛ awu kpó avɔ kpán e Dɔ̌kási nɔ bló hwenu e é ɖo gbɛ é.

⁴⁰Piyɛ́ɛ ka ɖe mɛ bǐ tɔ́n sín xɔ ɔ́ mɛ, bó húzú jɛ kpo, lobo xo ɖɛ, bó wá lílɛ́ kpan nukɔn cyɔ ɔ́, bó ɖɔ: “Tabita! Sí te!” Tabita ka hun nukún; ée é mɔ Piyɛ́ɛ ɔ́, é fɔ́n jínjɔ́n ayǐ.

⁴¹Piyɛ́ɛ ka hɛn alɔ tɔn, bó sɔ́ ɛ sí te, bó ylɔ́ nǔɖitɔ́ lɛ́ɛ, kpódó asúkúsi lɛ́ɛ kpán, bó sɔ́ ɛ xlɛ́ yě gbɛɖe.

⁴²Jopéenu lɛ́ɛ bǐ se nǔ énɛ́ ɔ́, bɔ yě mɛ gěgé ɖi nǔ nú Aklúnɔ.

⁴³Piyɛ́ɛ ka nɔ Jopée fínɛ́, ɖo anyǔzɔ́watɔ́ e è nɔ ylɔ́ ɖɔ Sinmɔ́ɔ é xwé xɔ azǎn.