Read fon Hlɔ̌manu 10 Bible Online

Hlɔ̌manu 10 - fon bible

Hlɔ̌manu 10

¹Nɔví lɛ́ɛ mi, nǔ e ba wɛ un ɖe kpó ayi ce bǐ kpó, bó ɖo byɔ̌byɔ́ ɖo Mawu sí wɛ nú Jwifu lɛ́ɛ ɔ́, wɛ nyí ɖɔ yě ní mɔ hwlɛngán.

²Đó un hɛn ɔ́, un ná ɖe kúnnu nú yě ɖɔ nǔ wa bó nyɔ́ ɖo Mawu sí sín akpakpa ɖaxó ɖé ɖo yě jí; lo ɔ́, yě ɖǒ nukúnnú-mɔjɛnǔmɛ titewungbe ɔ́ ǎ.

³Nǔgbó ɔ́, yě mɔ nukúnnú jɛ lě e Mawu nɔ sɔ́ gbɛtɔ́ dó húzú hwɛjijɔnɔ gbɔn ɔ́ wú ǎ, bó ba ali yě ɖésúnɔ tɔn, bó ná dó húzú hwɛjijɔnɔ ɖo Mawu nukɔn; énɛ́ ɔ́, yě sɔ́ gbɔn ali e Mawu ɖe bɔ gbɛtɔ́ lɛ́ɛ ná gbɔn, bɔ Mawu ná sɔ́ yě dó húzú hwɛjijɔnɔ ná é ǎ.

⁴Đó Klísu wɛ nyí mɛ e gɔ́n Mɔyízisɛ́n ɔ́ kplá mǐ xwe é, bónú Mawu ná sɔ́ mɛ e ɖi nǔ lɛ́ɛ bǐ dó húzú hwɛjijɔnɔ.

⁵ Mɔyízi wlán ɖɔ: “Mɛ e nɔ wa nǔ jlɔ́jlɔ́ lě e sɛ́n ɔ́ zɔ́n gbɔn ɔ́ ná mɔ gbɛ gbɔn sɛ́n ɔ́ jí.”

⁶ Lo ɔ́, xó e è ɖɔ dó lě e Mawu nɔ sɔ́ gbɛtɔ́ dó húzú hwɛjijɔnɔ ná gbɔn ɖo é ɖésúnɔ nukɔn, gbɔn nǔɖiɖi gbla mɛ gbɔn ɔ́ ɖíe: “Ma ɖɔ dó ayi mɛ ɖɔ: ‘Mɛ̌ ka ná yi jǐxwé?’ (Bó ná ɖe Klísu jɛ te ó.)

⁷Ma ka lɛ́ ɖɔ dó ayi mɛ ɖɔ: ‘Mɛ̌ ka ná yi kútomɛ?’ (Bó ná fɔ́n Klísu sín kú) ó.”

⁸Bɔ nɛ̌ è ka ɖɔ lo? Nǔ e è ɖɔ ɔ́ ɖíe: “Xó ɔ́ ɖo akpá towe; é ɖo nu towe mɛ, bó ɖo ayi towe mɛ.” Xó énɛ́ wɛ nyí nǔɖiɖi sín wɛn e jlá wɛ mǐ ɖe é.

⁹Đó ényí a sɔ́ nu towe dó ɖɔ ná ɖo mɛ bǐ nukɔn ɖɔ Jezu wɛ nyí Aklúnɔ lobo ɖi nǔ ɖo ayi towe mɛ ɖɔ Mawu fɔ́n ɛ sín kú ɔ́, Mawu ná hwlɛ́n we gán.

¹⁰Đó, nú mɛɖé ɖi nǔ ɖo ayi tɔn mɛ ɔ́, é nɔ sín énɛ́ wú bɔ mɛ énɛ́ nɔ húzú hwɛjijɔnɔ ɖo Mawu nukɔn. Nú mɛɖé ɖɔ kpó nu tɔn kpó ɖo mɛ bǐ nukɔn ɖɔ Jezu wɛ nyí Aklúnɔ ɔ́, é ná sín énɛ́ wú bɔ Mawu ná hwlɛ́n mɛ énɛ́ gán.

¹¹ Nǔgbó ɔ́, Mawuxówéma ɔ́ ɖɔ: “Mɛɖěbǔ ɖi nǔ n'i ɔ́, é ná ɖu winnyá ǎ.”

¹²Đó vogbingbɔn ɖé ɖo mɛ e nyí Jwifu é kpódó mɛ e ma nyí Jwifu ǎ é kpo tɛ́ntin ǎ; yě bǐ wɛ ɖó Aklúnɔ ɖokpó ɔ́; Aklúnɔ e nɔ dó nú mɛ e nɔ xomlá ɛ lɛ́ɛ bǐ, bɔ é nɔ túnflá é.

¹³Đó lě e Mawuxówéma ɔ́ ɖɔ gbɔn ɔ́: “Mɛɖěbǔ ylɔ́ Aklúnɔ sín nyǐkɔ ɔ́, mɛ ɔ́ ná gán.”

¹⁴Lo ɔ́, ényí mɛ lɛ́ɛ ma ɖi nǔ n'i ǎ ɔ́, nɛ̌ yě ka ná xomlá ɛ gbɔn? Ényí è ma ɖɔ xó tɔn bɔ yě se ǎ ɔ́, nɛ̌ yě ka ná ɖi nǔ n'i gbɔn? Ényí mɛɖé ma jlá xó tɔn ǎ ɔ́, nɛ̌ yě ka ná se xó tɔn gbɔn?

¹⁵ Ényí è ma sɛ́ mɛ dó xó tɔn jlá gbé ǎ ɔ́, nɛ̌ è ka ná mɔ Wɛn Ɖagbejlátɔ́ gbɔn? Lě e Mawuxówéma ɔ́ ɖɔ gbɔn ɔ́ ɖíe: “È mɔ Wɛn Ɖagbejlátɔ́ lɛ́ɛ jǎwe ɔ́, é nɔ nyɔ́ kpɔ́n mɛ.”

¹⁶ Amɔ̌, mɛ bǐ yí gbe nú Wɛn Ɖagbe ɔ́ ǎ. Nǔgbó ɔ́, Ezayíi ɖɔ: “Aklúnɔ, mɛ̌ ka ɖi nǔ nú Mawuxó e mǐ ɖɔ é?”

¹⁷Énɛ́ ɔ́, nǔ e se wɛ è ɖe ɔ́ mɛ wɛ nǔɖiɖi nɔ tɔ́n sín, bɔ nǔ e se wɛ è ɖe ɔ́ ka nyí Klísu sín xó e jlá wɛ è ɖe é.

¹⁸ Lo ɔ́, un nɔ kanbyɔ́ ɖɔ: “Yě ka se Mawuxó ɔ́ ǎ wɛ a?” Ɛɛn, yě se ganjí. Đó Mawuxówéma ɔ́ ɖɔ: “Yě ɖɔ xó bɔ è se gbɔn ayǐkúngban ɔ́ bǐ jǐ, bɔ xó e yě ɖɔ ɔ́ yi káká fí e gbɛ ɔ́ kponu ɖó é.”

¹⁹ Un nɔ lɛ́ kanbyɔ́ ɖɔ: “Togun Izlayɛ́li tɔn ɔ́ ka mɔ nukúnnú jɛ wú ǎ wɛ a?” Bó ná dó ná xó énɛ́ ɔ́ sín sin ɔ́, nǔ e Mɔyízi ɖɔ ɔ́ ɖíe: “Un ná bló bɔ mi ná hwan wǔ dó akɔta e ma nyí akɔta nǔgbó nǔgbó ǎ é. Un ná bló bɔ akɔta e ma ɖó nǔnywɛ́ ǎ é ná dó xomɛsin xomɛ nú mi.”

²⁰ Ée Ezayíi ɖɔ ɔ́ hú mɔ̌; é ɖɔ: “Mɛ e ma ɖo biba mì wɛ ɖ'ayǐ ǎ lɛ́ɛ ɔ́, yě mɔ mì. Un sɔ́ nyɛɖée xlɛ́ mɛ e ma ko nɔ kan mì byɔ́ ɖ'ayǐ ǎ lɛ́ɛ.”

²¹ Lo ɔ́, nǔ e é ɖɔ dó Izlayɛ́li wú ɔ́ ɖíe: “Tɛgbɛ tɛgbɛ wɛ un nɔ dlɛ́n alɔ nú togun e nɔ vɛ́ tóli, togun e nɔ fɔ́n gǔ é.”