Read fon Hlɔ̌manu 11 Bible Online

Hlɔ̌manu 11 - fon bible

Hlɔ̌manu 11

¹ Hǔn, un nɔ kanbyɔ́ ɖɔ: Mawu gbɛ̌ togun tɔn wɛ a? Gbeɖé kpɔ́n! Đó nyɛ ɖésúnɔ ɔ́, Izlayɛ́li ví wɛ un nyí; Ablaxámu kún mɛ wɛ un jɔ ɖe, ɖo akɔta Bɛnjamɛ́ɛ tɔn mɛ.

²Mawu gbɛ̌ togun tɔn e é ko tunwun sín do é ǎ; nǔ e Mawuxówéma ɔ́ ɖɔ ɖo akpá e xwé Elíi jɛ Izlayɛ́li ví lɛ́ɛ sín hwɛ ɖo Mawu nukɔn ɖe ɔ́, mi ma tunwun a?

³ Elíi ɖɔ: “Aklúnɔ, yě hu gbeyíɖɔ towe lɛ́ɛ; yě gba vɔ̌sákpe towe lɛ́ɛ; nyɛ ɖokpónɔ géé wɛ kpo, bɔ yě ka lɛ́ ɖo biba na hu mì wɛ.”

⁴ Xó tɛ́ Mawu ka ɖɔ d'é wú n'i? Mawu ɖɔ: “Un sɔ́ gbɛtɔ́ děgba ɖě afɔwó-afatɔ́n (7.000) ɖ'ayǐ nú nyɛɖée; yě mɛ énɛ́ lɛ́ɛ ɖě jɛ kpo vodún Baalu nukɔn ǎ.”

⁵Mɔ̌ ɖokpó ɔ́, hwenu e mǐ ɖe din ɔ́, é lɛ́ kpo mɛ e Mawu cyán ɖo xomɛnyínyɔ́ tɔn mɛ ɔ́ kpɛɖé.

⁶Xomɛnyínyɔ́ tɔn wú wɛ é cyán yě; é nyí nǔ e yě wa lɛ́ɛ wú wɛ ǎ; é ma nyí mɔ̌ ǎ ɔ́, xomɛnyínyɔ́ Mawu tɔn sɔ́ na nyí xomɛnyínyɔ́ nǔgbó nǔgbó ǎ.

⁷Hǔn, é ɖo wɛn: togun Izlayɛ́li tɔn mɔ nǔ e ba wɛ é ɖe ɔ́ yí ǎ. Mɛ e Mawu cyán ɖo togun ɔ́ mɛ lɛ́ɛ kɛ́ɖɛ́ wɛ mɔ yí; mɛ e kpo lɛ́ɛ ɔ́, é bló bɔ yě húzú tótlítɔ́.

⁸ Lě e Mawuxówéma ɔ́ ɖɔ gbɔn ɔ́: “Mawu bló bɔ káká jɛ égbé ɔ́, ayixa yětɔn sɔ́ nɔ mɔ nǔ ǎ; nukún yětɔn sɔ́ nɔ mɔ nǔ ǎ, tó yětɔn lɛ́ɛ sɔ́ nɔ se nǔ ǎ.”

⁹ Davídi lɔ ɖɔ: “Nǔɖuɖu ɖagbe ɖagbe e yě ɖa ɔ́ ní nyí mɔ nú yě; é ní nyí ɖɔ, bónú yě ná jɛ mɛ, bónú è nǎ dɔn tó nú yě.

¹⁰Nukún yětɔn ní dó zǐnflú, bónú yě ní ba nukúnnú kpo; blǒ bónú yě ní mɔ wǔvɛ́ káká nú kpó yětɔn ní xá.”

¹¹Hǔn, un nɔ kanbyɔ́ ɖɔ: “Hwenu e Jwifu lɛ́ɛ klɛ́n afɔ ɔ́, yě jɛ ayǐ bó nɔ mɔ̌ káká sɔ́yi wɛ a?” Gbeɖé kpɔ́n! Lo ɔ́, ɖó hwɛ e yě hu ɔ́ wútu ɔ́, togun ɖě lɛ́ɛ mɔ hwlɛngán, bónú Jwifu lɛ́ɛ ná sixú hwan wǔ dó yě.

¹²Ényí hwɛ e Jwifu lɛ́ɛ hu ɔ́ dó dɔkun Yɛsinsɛn tɔn nú gbɛ ɔ́, ényí sɔ́ e è sɔ́ yě hwe ɔ́ dó dɔkun Yɛsinsɛn tɔn nú togun ɖě lɛ́ɛ ɔ́, nɛ̌ kɔ e yě bǐ sésé ná lɛ́ wá, bó mɔ hwlɛngán ɔ́ ma na wa azɔ̌ hú mɔ̌ ǎ gbɔn?

¹³Din ɔ́, mi mɛ e ma nyí Jwifu ǎ lɛ́ɛ ɖɔ xó ná wɛ un ɖe: un nyí mɛsɛ́dó nú mɛ e ma nyí Jwifu ǎ lɛ́ɛ; ée nǔ ka nyí mɔ̌ ɔ́, un nɔ gó ɖó azɔ̌ e nyí ce ɔ́ wú.

¹⁴Afɔ nyɔ́ ɔ́, un sixú fɔ́n wǔhwinhwan dó jǐ nú mɛ e ɖo akɔta ce mɛ lɛ́ɛ; ényí un wa nǔ gbɔn mɔ̌ ɔ́, un sixú hwlɛ́n yě mɛ ɖěe gán.

¹⁵Nǔgbó ɔ́, ée Mawu gbɛ́ mɛ e ɖo akɔta ce mɛ lɛ́ɛ ɔ́, é dó hwɛ gbɔ xá akɔta ɖě lɛ́ɛ e kpo ɖo gbɛ ɔ́ mɛ é. Hwenu e Mawu ka ná wá yí yě ɔ́, nɛ̌ é ná nyí gbɔn lo? Gbɛ wɛ é ná nyí nú mɛ e ko kú lɛ́ɛ.

¹⁶Ényí è sɔ́ wɔ̌xúxú ɖé bó kán ɖ'é wu, bó sɔ́ xwlé Mawu ɔ́, wɔ̌xúxú e kpo ɔ́ bǐ wɛ nyí étɔn. Ényí è sɔ́ atín sín ɖɔ ɖó vo nú Mawu ɔ́, atínla lɛ́ɛ lɔ bǐ wɛ nyí Mawu tɔn.

¹⁷Togun Izlayɛ́li tɔn ɔ́ cí olívutín e è tun bó kpé nukún d'é wú, bɔ è jlǎ ala tɔn ɖé lɛ́ɛ ɔ́ ɖɔhun. Hwi mɛ e ma nyí Jwifu ǎ ɔ́, a cí olívutín gbě tɔn sín ala e è sɔ́ cá dó ala e è jlǎ lɛ́ɛ nu é ɖɔhun. Din ɔ́, hwi lɔ ɖo nǔɖuɖu ɖagbe e nɔ tɔ́n sín olívutín e è tun ɔ́ sín ɖɔ mɛ ɔ́ ɖu xá ɛ wɛ.

¹⁸Énɛ́ wútu ɔ́, a ɖǒ na gbɛ́ wǎn nú ala ɖě lɛ́ɛ ǎ. Nɛ̌ a ka sixú jlá ajɔ̌ nú hwiɖée gbɔn? Hwi wɛ hɛn ɖɔ lɛ́ɛ ǎ, lo ɔ́, ɖɔ lɛ́ɛ wɛ hɛn hwɛ.

¹⁹A nǎ ɖɔ nú mì ɖɔ: “Ala énɛ́ lɛ́ɛ ɔ́, gbo wɛ è gbo yě síin, bó ná sɔ́ mì cá dó nu yětɔn.”

²⁰Nǔgbó wɛ é nyí. È gbo yě síin ɖó nǔmaɖi yětɔn wútu, bɔ a ɖo tɛn énɛ́ mɛ, ɖó nǔ e a ɖi ɔ́ wú. Hǔn ma yí go ó, lo ɔ́, ɖi xɛsi.

²¹Đó ényí Mawu ma jó Jwifu e nyí ala e jɔ kpó atín ɔ́ kpó lɛ́ɛ nyi tɛn yětɔn mɛ ǎ ɔ́, é ná jó hwi lɔ dó ǎ.

²²Kpɔ́n lě e Mawu ɖe xomɛnyínyɔ́ tɔn kpó hunnylánylá tɔn kpó xlɛ́ gbɔn é: é nɔ́ nylá hun dó mɛ e hu hwɛ lɛ́ɛ, bó ka nyɔ́ xomɛ dó wú we; lo ɔ́, a ɖǒ ná nɔ xomɛnyínyɔ́ tɔn mɛ; é ma nyí mɔ̌ ǎ ɔ́, é ná gbo hwi lɔ síin atínla ɖɔhun.

²³Ényí Jwifu lɛ́ɛ lɛ́ kɔ sín nǔmaɖi yětɔn gúdo ɔ́, Mawu ná cá yě dó fí e yě ko ɖe ɖ'ayǐ é; ɖó é ɖó acɛ bó ná lɛ́ vɔ́ yě cá.

²⁴Hwi mɛ e ma nyí Jwifu ǎ ɔ́, ala e jɔ kpó olívutín gbě tɔn kpó ɔ́ wɛ a nyǐ: è gbo ala ɔ́ síin, bó sɔ́ ɛ cá dó olívutín e è tun bo kpé nukún d'é wú ɔ́ wú, có mɔ̌ wɛ nǔ ka nɔ́ nyí gbɔn ɖo gbɛ ɔ́ mɛ ǎ. Jwifu lɛ́ɛ ɔ́, yědɛɛ lɛ́ɛ wɛ nyí ala e jɔ kpó olívutín énɛ́ e è tun bó kpé nukún d'é wú ɔ́ kpó é. Hǔn, ényí è nǎ lɛ́ vɔ́ yě cá dó atín e sín ala yě ko nyí ɖ'ayǐ ɔ́ wú ɔ́, é ná bɔwǔ ɖésú.

²⁵Nɔví ce lɛ́ɛ mi, nǔbúdo ɖokpó ɖíe, bɔ un jló ná ɖe xlɛ́ mi, bónú mi ma sɔ́ miɖée dó mɔ nǔnywɛ́tɔ́ ná ó: togun Izlayɛ́li tɔn akpá bǔ húzú tótlítɔ́. Lo ɔ́, yě ná nɔ mɔ̌ sɔ́yi ǎ; hwenu e togun ɖě lɛ́ɛ bǐ ná mɔ hwlɛngán dó ɔ́ jɛ́n yě ná nɔ mɔ̌ jɛ.

²⁶ Mɔ̌ wɛ Mawu ná hwlɛ́n Izlayɛ́li ví lɛ́ɛ bǐ gán gbɔn; lě e Mawuxówéma ɔ́ ɖɔ gbɔn ɔ́; Mawuxówéma ɔ́ ɖɔ: “Mɛhwlɛ́ngántɔ́ ɔ́ ná gosín Sinyɔ́ɔ wá; é ná ɖe sísí ma ɖó nú Mawu Jakɔ́bu ví lɛ́ɛ tɔn síin.

²⁷ Akɔ e un ná jɛ xá yě hwenu e un ná ɖe hwɛ yětɔn lɛ́ɛ sín kɔ nú yě ɔ́ nɛ́.”

²⁸Ényí è kpɔ́n lě e Jwifu lɛ́ɛ gbɛ́ Wɛn Ɖagbe ɔ́ gbɔn ɔ́, kɛntɔ́ Mawu tɔn wɛ yě nyí bɔ é húzú ɖagbe nú mi; lo ɔ́, nú è kpɔ́n lě e Mawu sɔ́ yě gbɔn ɔ́, yě wɛ Mawu yí wǎn ná ɖó akpá e é dó nú tɔ́gbó yětɔn lɛ́ɛ wútu.

²⁹Đó Mawu nɔ lɛ́ vɔ́ nǔ e é ná mɛ é yí ǎ; é ka nɔ húzú nǔ e é lin dó mɛ e è ylɔ́ lɛ́ɛ ɔ́ wú é ǎ.

³⁰Đ'ayǐ ɔ́, mi vɛ́ tóli nú Mawu; amɔ̌ din ɔ́, mi tunwun nǔbláwǔkúnúmɛ Mawu tɔn, ɖó Jwifu lɛ́ɛ vɛ́ tóli nú Mawu wútu.

³¹Mɔ̌ ɖokpó ɔ́, yě vɛ́ tóli nú Mawu din, bónú Mawu ná kú nǔbláwǔ nú mi, bónú yě lɔ ná sixú mɔ nǔbláwǔkúnúmɛ ɖokpó énɛ́ yí din.

³²Đó Mawu glɔ́n gbɛtɔ́ lɛ́ɛ bǐ dó tónúmase yě ɖésúnɔ tɔn mɛ, bó ná dó ɖe nǔbláwǔkúnúmɛ tɔn xlɛ́ mɛ bǐ.

³³ Fɛ́nú Mawu tɔn d'agba lóóo! Nǔnywɛ́ tɔn kpó nǔtunwuntunwun tɔn kpó gɔ́ngɔ́n lóóo! Mɛ̌ ka sixú tín gbeta e é nɔ ɖe tɔ́n lɛ́ɛ é mɛ? Mɛ̌ ka sixú mɔ nukúnnú jɛ tito tɔn lɛ́ɛ wú?

³⁴ Lě e Mawuxówéma ɔ́ ɖɔ gbɔn ɔ́ ɖíe: “Mɛ ɖěbǔ sixú tunwun linlin Aklúnɔ tɔn ǎ. Mɛ ɖěbǔ ka sixú kplɔ́n nǔ i ǎ.”

³⁵ Mɛ̌ ka ná nǔ i jɛ nukɔn bɔ é ná sú axɔ́ tɔn ɛ?

³⁶Đó gɔ̌n tɔn wɛ nǔ bǐ gosín; é wɛ bló nǔ bǐ, bɔ nǔ bǐ nyí étɔn. Susu nú Mawu káká sɔ́yi. Amǐ!