Read fon Hlɔ̌manu 12 Bible Online

Hlɔ̌manu 12 - fon bible

Hlɔ̌manu 12

¹Nɔví ce lɛ́ɛ mi, ée Mawu ɖe xomɛnyínyɔ́ tɔn xlɛ́ mi mɔ̌ é ɔ́, un ɖo vo sa nú mi wɛ ɖɔ mi ní sɔ́ mi ɖésúnɔ bǐ jǒ, vɔ̌sánú gbɛɖe e è sɔ́ ɖ'ayǐ nú Mawu, bɔ é nyɔ́ nukún tɔn mɛ é ɖɔhun. Lě e mi ná sɛn ɛ gbɔn, bɔ é ná nyí sinsɛn titewungbe ɔ́ é nɛ́.

²Mi ma nɔ wa nǔ lě e gbɛ ɔ́ nɔ wa nǔ gbɔn é ó; lo ɔ́, mi jó Mawu dó, nú é húzú mi gbɔn ayi mitɔn sín hǔzúhúzú gbla mɛ. Énɛ́ ɔ́, mi ná sixú tunwun jlǒ Mawu tɔn: é wɛ nyí nǔ ɖagbe; nǔ e nɔ nyɔ́ nukún tɔn mɛ é; nǔ e sɔgbe bɔ nǔ bǐ vɔ ɖ'é wú é.

³Đó nǔníná e Mawu ná mǐ ɖo xomɛnyínyɔ́ tɔn mɛ é wú ɔ́, un ɖo ɖiɖɔ nú mi mɛ ɖokpó ɖokpó wɛ ɖɔ mɛɖé ní ma nɔ mɔ éɖée zɛ nǔ e é nyí ɔ́ wú ɖo linlin é ɖésúnɔ tɔn mɛ ó; lo ɔ́, linlin e é nɔ ɖó dó é ɖésúnɔ wú ɔ́ ní nɔ́ nɔ jlɛ̌mɛ, lě e Mawu ná nǔɖiɖi mɛ ɖokpó ɖokpó gbɔn é.

⁴ Wǔjɔnú gěgé wɛ ɖo agbaza mǐ mɛ ɖokpó ɖokpó tɔn wú, bɔ yě bǐ ɖó azɔ̌ vovo bó nɔ wa.

⁵Mɔ̌ ɖokpó ɔ́, lě do e mǐ sukpɔ́ sɔ́ ɔ́, agbaza ɖokpó géé wɛ mǐ nyí ɖo bǔ e mǐ ɖe xá Klísu é mɛ, bɔ mǐ bǐ cá dó miɖée wú wǔjɔnú e ɖo agbaza ɖokpó wú lɛ́ɛ ɖɔhun.

⁶ Nǔníná vovo wɛ mǐ ɖó bó ná zán lě e Mawu ná vɔ̌nu tɔn mǐ mɛ ɖokpó ɖokpó gbɔn é. Ényí mɛɖé ɖó nǔníná e nɔ yí wɛn ɖo Mawu sí, bó nɔ dó ɔ́, é ɖó ná bló lě e mǐ ɖi nǔ nú Klísu gbɔn é.

⁷Ényí mɛɖé ɖó nǔníná e ná wa Mawuzɔ́ ɔ́ hǔn, é ní wa. Mɛ e ɖó nǔníná e ná kplɔ́n nǔ mɛ ɔ́, ní kplɔ́n nǔ mɛ.

⁸Mɛ e ɖó nǔníná e nɔ́ ná akɔ́nkpinkpan mɛ ɔ́ ɖó ná ná akɔ́nkpinkpan mɛ. Mɛ e nɔ ná nǔ mɛ ɔ́ ní nɔ hun alɔ bo nɔ ná mɛ. Mɛ e nyí nukɔntɔ́ ɔ́ ní bí dó azɔ̌ wú. Mɛ e nɔ d'alɔ gbɛ̌dónánɔ lɛ́ɛ ní nɔ́ bló kpódó xomɛhunhun kpó.

⁹Wǎn yíyí e mi ɖó ɔ́ ní yi xomɛ ganjí. Mi gbɛ́ wǎn nú nǔ nyanya wiwa. Mi nɔ ɖó kan dó nǔ ɖagbe wiwa wú.

¹⁰Mi nɔ ɖó wǎn yíyí titewungbe nú miɖée lě e nɔví nɔví lɛ́ɛ nɔ́ yí wǎn nú yěɖée gbɔn é. Mi nɔ ɖó sísí titewungbe nú miɖée.

¹¹Mi nɔ bí dó azɔ̌ wú; mi ma nɔ ɖi fɔnlín ó. Akpakpa ní nɔ́ sɔ́ mi dó aklúnɔzɔ́ wiwa wú.

¹²Nǔ e ɖó nukún wɛ mi ɖe ɔ́ ní dó xomɛhunhun nú mi. Mi nɔ ɖó sɔxwixwe ɖo wǔvɛ́ e mɔ wɛ mi ɖe lɛ́ɛ mɛ. Mi nɔ ɖó kan dó ɖɛxixo wú.

¹³Mi nɔ dó alɔ nɔví mitɔn ɖo Klísu mɛ lɛ́ɛ ɖo nǔ e hudó yě lɛ́ɛ mɛ. Mi nɔ yí mɛ e nɔ wá gɔ̌n mitɔn lɛ́ɛ ganjí.

¹⁴ Mi nɔ byɔ́ Mawu ɖɔ é ní xo ɖɛ dó mɛ e nɔ dó ya nú mi lɛ́ɛ jí. Mi nɔ byɔ́ ɛ ɖɔ é ní xo ɖɛ dó yě jǐ; é ní ma nɔ́ dó nu yě ó.

¹⁵Mi nɔ jɛ awǎ xá mɛ e ɖo awǎ jɛ wɛ lɛ́ɛ, bó nɔ́ ya avǐ xá mɛ e ɖo avǐ ya wɛ lɛ́ɛ.

¹⁶ Mi nɔ ɖó linlin ɖokpó ɔ́ dó miɖée wú. Mi ma nɔ yí go ó; mi ma ɖó nukún kloklo ó; lo ɔ́, mi nɔ ba nǔ e ɖo jlɛ̌ mɛ lɛ́ɛ. Mi ma nɔ́ mɔ miɖée dó mɔ nǔnywɛ́tɔ́ ó.

¹⁷Mi ma nɔ zé nǔ nyanya dó sú nǔ nyanya xɔ́ mɛ ɖěbǔ ó; mi nɔ ba ná wa nǔ ɖagbe ɖo gbɛtɔ́ lɛ́ɛ bǐ nukɔn.

¹⁸Ényí mi kpé wú hǔn, mi tɛ́nkpɔ́n gbɔn alɔkpa bǐ mɛ lě e mi kpé wú gbɔn é, bó nɔ fífá mɛ xá gbɛtɔ́ lɛ́ɛ bǐ.

¹⁹ Mɛvívɛ́ná ce lɛ́ɛ mi, mi ɖésúnɔ ma nɔ ba hlɔn ó; lo ɔ́, mi nɔ jó xomɛsin Mawu tɔn dó ní nɔ́ wa azɔ̌, ɖó è wlǎn dó Mawuxówéma ɔ́ mɛ ɖɔ: “Nyɛ wɛ nɔ ba hlɔn; nyɛ wɛ nɔ sú nǔ e è wa ɔ́ sín axɔ́ mɛ; Aklúnɔ wɛ ɖɔ mɔ̌.”

²⁰ È lɛ̌ wlán dó Mawuxówéma ɔ́ mɛ ɖɔ: “Ényí xovɛ́ sin kɛntɔ́ towe hǔn, nǎ nǔɖuɖu i; ényí kɔ xú i hǔn, nǎ sin i. Ényí a ɖo mɔ̌ wa wɛ ɔ́, winnyá ná hu i káká bɔ é ná mɔ wǔvɛ́ myɔkán wɛ è kplé ɖó ta n'i ɖɔhun.”

²¹Ma jó hwiɖée dó nú nǔ nyanya wiwa ɖu ɖo jǐ towe ó; é nyɔ́ wa ɔ́, nɔ wa nǔ ɖagbe dó ɖu ɖo nǔ nyanya jí.