Read fon Hlɔ̌manu 13 Bible Online

Hlɔ̌manu 13 - fon bible

Hlɔ̌manu 13

¹Gbɛtɔ́ lɛ́ɛ bǐ ɖó ná se tónú nú acɛkpikpa e ɖo to ɔ́ nu lɛ́ɛ, ɖó acɛkpikpa ɖé tíin, bɔ Mawu ma ná gbe tɔn ǎ; acɛkpikpa e tíin lɛ́ɛ ɔ́, Mawu wɛ ɖó yě ayǐ.

²Énɛ́ ɔ́, mɛ e nɔ sí te dó acɛkpikpa ɔ́ jí ɔ́, nǔ e Mawu ɖɔ è nǐ wa ɔ́ jí sí te dó wɛ é ɖe. Mɛ e ka nɔ sí te dó nǔ e Mawu ɖɔ è nǐ wa lɛ́ɛ jí ɔ́ ná dɔn hwɛɖónúmɛ Mawu tɔn dó éɖée jí.

³Nǔgbó ɔ́, mɛ e nɔ wa nǔ ɖagbe lɛ́ɛ wɛ ná ɖi xɛsi nú gǎn lɛ́ɛ ǎ; lo ɔ́, mɛ e nɔ wa nǔ nyanya lɛ́ɛ wɛ na ɖi xɛsi nú yě. Nú a ma jló ná ɖi xɛsi nú acɛkpikpa ɔ́ ǎ hǔn, nɔ wa nǔ ɖagbe; énɛ́ ɔ́, acɛkpikpa ɔ́ ná kpá we;

⁴ɖó azɔ̌ wa nú Mawu wɛ é ɖe nú ɖagbe hwi ɖésúnɔ tɔn. Ényí a ka nɔ wa nǔ nyanya hǔn, ɖi xɛsi n'i; ɖó yǎyá wɛ é ɖó acɛ bó ná dɔn tó nú mɛ ǎ: É ɖo azɔ̌ wa nú Mawu wɛ, bó ná ɖe xomɛsin Mawu tɔn xlɛ́ mɛ e nɔ wa nǔ nyanya é.

⁵Énɛ́ wú wɛ é ɖo dandan mɛ ɖɔ è nǐ se tónú nú acɛkpikpa lɛ́ɛ; ényí è nǎ hɔn nú xomɛsin Mawu tɔn kɛ́ɖɛ́ wú wɛ ǎ; lo ɔ́, ayixa mɛtɔn ko ɖɔ nǔ e è nǎ wa ɔ́ nú mɛ wútu wɛ.

⁶ Nǔ ɖokpó énɛ́ wú wɛ mi nɔ sú takwɛ́; ɖó mɛ e sí acɛkpikpa ɖe, bɔ yě ɖo azɔ̌ énɛ́ wa wɛ lɛ́ɛ ɔ́, azɔ̌ wa nú Mawu wɛ yě ɖe, bó ka ɖó ná wa azɔ̌ énɛ́ ganjí.

⁷Nǔ e sín axɔ́ mi ɖu lɛ́ɛ ɔ́, mi sú mɛ e mi ɖu dó lɛ́ɛ bǐ. Mi sú kuzú mɛ e mi ɖu kuzú sín axɔ́ dó lɛ́ɛ; mi sú tokwɛ́ mɛ e mi ɖu tokwɛ́ sín axɔ́ dó lɛ́ɛ. Mi sí mɛ e mi ɖó ná sí é; mi wlí yɛ̌yi nú mɛ mi ɖó ná wlí yɛ̌yi ná é.

⁸Mi ma ɖu axɔ́ dó mɛ ɖěbǔ ó; nǔ ɖokpó géé sín axɔ́ wɛ mi ɖu dó miɖée; é wɛ nyí mi ní yí wǎn nú miɖée; ɖó mɛ e yí wǎn nú mɛ ɖě lɛ́ɛ ɔ́ se tónú nú nǔ e sɛ́n ɔ́ nɔ zɔ́n ɔ́ bǐ dégbédégbé.

⁹ Nǔgbó ɔ́, mi tunwun nǔ e sɛ́n ɔ́ ɖɔ lɛ́ɛ: “Ma lɛ aga ó, ma hu mɛ ó, ma jɛ ajo ó, nukún towe ní má nɔ nɔzo towe sín nǔɖé wú ó”; sɛ́n énɛ́ lɛ́ɛ kpódó ɖě lɛ́ɛ bǐ kpó wɛ è sɛ sin xwe ná dó sɛ́n élɔ́ mɛ: “Yǐ wǎn nú nɔzo towe hwi ɖésúnɔ ɖɔhun.”

¹⁰Mɛ e yí wǎn nú mɛ ɔ́ nɔ wa nǔ nyanya ɖěbǔ dó nɔzo tɔn wú ǎ. Nú è yí wǎn nú mɛ hǔn, sɛ́n ɔ́ bǐ sésé se tónú ná wɛ è ɖe.

¹¹Mi wa nǔ gbɔn mɔ̌, ɖó mǐ tunwun hwenu e mǐ ɖe ɔ́. Hwenu e mi ná fɔ́n sín amlɔ mɛ ɔ́ su lo; ɖó hwlɛngán hwenu ɔ́ sɛkpɔ́ mǐ din hú hwenu e mǐ ɖi nǔ tlóló é.

¹²Zǎn kó sɛ yi; ayǐ kó ɖo nǎ hɔ́n wɛ. Hǔn, mi nú mǐ ná jó nǔ e è nɔ wa ɖo ablu mɛ lɛ́ɛ dó, lobo fɔ ahwanfunnú e nɔ́ zɔ́n bɔ è nɔ fun ahwan ɖo wěziza nu lɛ́ɛ kplá.

¹³Mi nú mǐ ná zán gbɛ mǐtɔn ɖo jlɔ̌jlɔ́ jí, lě e é jɛ xá ɖɔ è nǐ bló gbɔn ɖo kéze ɖéɖé é. Mǐ ní ma wa nǔ zɛ jlɛ̌ wú ó; mǐ ní ma nu ahan mú ó; mǐ ní ma lɛ aga ó; mǐ ní ma wa nǔblíblí ó; mǐ ní ma ɖɔ jlɛ ó; mǐ ní ma hwan wǔ ó.

¹⁴Lo ɔ́, mi ní sɔ́ Aklúnɔ Jezu Klísu dó awu ɖɔhun, bó ma sɔ́ jó miɖée dó nú ninɔmɛ gbɛtɔ́ tɔn e mi ɖó é, bó wa nǔ e jló e lɛ́ɛ ó.