Read fon Hlɔ̌manu 14 Bible Online

Hlɔ̌manu 14 - fon bible

Hlɔ̌manu 14

¹ Mi yí mɛ e ma ɖó gǎn ɖo nǔɖiɖi mɛ ǎ é ganjí, mi ma ɖɔ xó nyanya dó linlin tɔn lɛ́ɛ wú ó.

²Nǔ e wú mi na kpɔ́n dó ɔ́, mɛ ɖě ɖi nǔ ɖɔ émí hɛn ɔ́, émí ná ɖu nǔ bǐ; mɛ ɖe ɔ́ e ma ka ɖó gǎn ɖo nǔɖiɖi mɛ ǎ ɔ́, mǎ kɛ́ɖɛ́ jɛ́n éyɛ́ nɔ ɖu.

³Mɛ e nɔ ɖu nǔ bǐ ɔ́ ɖó ná gbɛ́ wǎn nú mɛ e nǔɖé lɛ́ɛ tíin, bɔ é ma nɔ ɖu ǎ é ǎ; mɛ e nǔɖé lɛ́ɛ tíin bɔ éyɛ́ ma nɔ ɖu ǎ é lɔ ɖó ná dó hwɛ mɛ e nɔ ɖu nǔ bǐ é ǎ; ɖó Mawu yí é lɔmɔ̌.

⁴Mɛ nǎhún wɛ a nyǐ, bó ná dó hwɛ mɛsɛntɔ́ mɛɖěvo tɔn? É wa azɔ̌ tɔn ganjí kpó é ma wa ganjí kpó ɔ́, gǎn tɔn wɛ é kan. É ka ná wa azɔ̌ tɔn ganjí, ɖó Aklúnɔ ɖó acɛ e ná ɛ hlɔ̌nhlɔ́n bɔ é ná wa azɔ̌ tɔn ganjí é.

⁵Mɛ ɖě nɔ lin ɖɔ azǎn ɖé lɛ́ɛ tíin, bó ɖo tají hú ɖě lɛ́ɛ; mɛ ɖěvo lɛ́ɛ ka nɔ lin ɖɔ azǎn lɛ́ɛ bǐ wɛ nyí nǔ ɖokpó ɔ́. Mɛ ɖokpó ɖokpó ɖó ná gán jɛ nǔ e ɖɔ wɛ é ɖe ɔ́ wú ɖo ayi tɔn mɛ.

⁶Mɛ e nɔ sɔ́ azǎn ɖé lɛ́ɛ dó mɔ azǎn tají ná lɛ́ɛ nɔ́ bló mɔ̌, bó nɔ dó sɔ́ Aklúnɔ su; mɛ e nɔ ɖu nǔ bǐ ɔ́, nɔ bló mɔ̌, bó nɔ dó sɔ́ Aklúnɔ su; ɖó é nɔ dó kú nú Aklúnɔ dó nǔɖuɖu énɛ́ tamɛ. Mɛ e ma nɔ ɖu nǔ bǐ ǎ lɔ nɔ bló mɔ̌, bó nɔ dó sɔ́ Aklúnɔ su, bó nɔ dó kú nú Mawu.

⁷Nǔgbó ɔ́, mɛɖé ɖo mǐ mɛ, bó ɖó ná nɔ gbɛ nú éɖée ǎ; mɛɖé ka ɖo mǐ mɛ, bó ɖó ná kú nú éɖée ǎ. Ényí mǐ ɖo gbɛ ɔ́, mǐ ɖo gbɛ nú Aklúnɔ.

⁸Ényí mǐ kú ɔ́, mǐ kú nú Aklúnɔ. Énɛ́ ɔ́, nú mǐ ɖo gbɛ oo, mǐ kú oo, Aklúnɔ tɔn wɛ mǐ nyǐ.

⁹Đó Klísu kú, bó ka lɛ́ wá gbɛ, bó ná nyí Aklúnɔ nú mɛ e kú lɛ́ɛ kpó mɛ e ɖo gbɛ lɛ́ɛ é kpó.

¹⁰ Amɔ̌, hwɛ ɔ́, étɛ́wú a ɖo hwɛ dó nɔví towe wɛ? Hwɛ lo, étɛ́wú a gbɛ̌ wǎn nú nɔví towe?

¹¹Đó Mawuxówéma ɔ́ ɖɔ: “Nyɛ Aklúnɔ gbɛɖe ɔ́, un tɛ ɖɛ̌ jí ɖɔ: gbɛtɔ́ lɛ́ɛ bǐ ná jɛ kpo ɖo nukɔn ce, bɔ mɛ ɖokpó ɖokpó ná zé gbe yi jǐ, bó ɖɔ nyɛ Aklúnɔ ɔ́ wɛ nyí Mawu.”

¹²Énɛ́ ɔ́, mɛ ɖokpó ɖokpó ná ɖó nǔ e é ɖésúnɔ wa ɔ́ sín gbe nú Mawu.

¹³Hǔn, mǐ ní bó gɔn hwɛ dó mǐɖée. Gbeta e mǐ ná ɖe tɔ́n kpowun ɔ́ ɖíe: Mǐ ní ma wa nǔ e ná zɔ́n bɔ nɔví mǐtɔn ná klɛ́n afɔ, abǐ é ná jɛ hwɛ mɛ é ɖěbǔ ó.

¹⁴Đo bǔ e un ɖe xá Aklúnɔ Jezu ɔ́ mɛ ɔ́, un tunwun, bó gán jɛ wú ɖɔ nǔɖuɖu ɖěbǔ kún nyí nǔblíblí ó; lo ɔ́, ényí mɛɖé lin ɖɔ nǔɖé nyí nǔblíblí ɔ́, nǔ ɔ́ húzú nǔblíblí nú mɛ ɔ́.

¹⁵Ényí a nɔ bló bɔ nɔví towe nɔ mɔ wǔvɛ́ ɖó nǔɖuɖu e ɖu wɛ a ɖe ɔ́ wútu ɔ́, a sɔ́ ɖo nǔ wa wɛ lě e wǎn yíyí ɔ́ byɔ́ gbɔn é ǎ. É ná sɔ́n nǔ e ɖu wɛ hwɛ ɖe ɔ́ wú kpowun bɔ a nǎ dɔn mɛ e tamɛ Klísu kú dó ɔ́ yí bú a?

¹⁶Nǔ e nyɔ́ nú mi ɔ́ ɖó ná nyí nǔ e wú mɛ ɖě lɛ́ɛ ná ɖɔ xó nyanya dó é ǎ.

¹⁷Đó axɔ́súɖuɖu Mawu tɔn nyí nǔɖuɖu kpó ahan kpó sín xó ɖé ǎ; hwɛjijɔ kpódó fífá kpó, kpódó awǎjijɛ e Yɛsinsɛn nɔ ná mɛ ɔ́ kpó sín xó wɛ.

¹⁸Mɛ e nɔ wa azɔ̌ nú Klísu gbɔn mɔ̌ ɔ́, nǔ tɔn nɔ nyɔ́ Mawu nukún mɛ; gbɛtɔ́ lɛ́ɛ nɔ kpa ɛ.

¹⁹Hǔn, mǐ ní bó ba nǔ e nɔ dɔn fífá wá, bó ná zɔ́n bɔ mǐ ná dó wǔsyɛ́n lanmɛ nú miɖée ɖo nǔɖiɖi mɛ é.

²⁰Ma hɛn Mawuzɔ́ ɔ́ gblé ɖó nǔɖuɖu wútu ó. Nǔgbó ɔ́, è sixú ɖu nǔ bǐ. Nú è nǎ ɖu nǔɖé, bónú nɔví mɛtɔn ná jɛ hwɛ mɛ ɔ́, é nyɔ́ nú è nǐ gɔn ɖuɖu.

²¹Nǔ e nyɔ́ ɔ́ wɛ nyí ɖɔ, è nǐ jó nǔ e ná zɔ́n bɔ nɔví mɛtɔn ná jɛ hwɛ mɛ ɔ́ bǐ dó; ényí lan wɛ hǔn, ma ɖu ó; ényí vɛ̌ɛn wɛ hǔn, ma nu ó; ényí nǔ ɖěbǔ wɛ hǔn, ma bló ó.

²²Hɛn nǔɖiɖi e hwi ɖésúnɔ ɖó dó nǔ énɛ́ wú ɔ́ nú hwiɖée ɖo Mawu nukɔn. Nǔ nyɔ́ nú mɛ e wa nǔ e é mɔ ɖɔ é nyɔ́ bɔ ayi tɔn ma xo hun xá ɛ ǎ é.

²³Lo ɔ́, mɛ e xo nǔ kpɔ́n dó nǔɖuɖu ɖé wú, cóbó ka ɖu ɔ́, Mawu ɖó hwɛ nú mɛ énɛ́; ɖó é wa nǔ lě e nǔɖiɖi ɔ́ zɔ́n gbɔn é ǎ. Nǔ ɖěbǔ e è ma wa kpó nǔɖiɖi kpó ǎ ɔ́, hwɛ wɛ é nyí.