Read fon Hlɔ̌manu 16 Bible Online

Hlɔ̌manu 16 - fon bible

Hlɔ̌manu 16

¹Un ɖe gbě nú nɔví mǐtɔn nyɔ̌nu Fwebée e ɖo azɔ̌ wa nú agun Klísu tɔn e ɖo Sanklé é,

²bónú mi na yí i ganjí ɖo Aklúnɔ sín nyǐkɔ mɛ, lě e mɛ e ɖo mɛɖeɖóvo Mawu tɔn mɛ lɛ́ɛ ná bló gbɔn ɖo yěɖée tɛ́ntin é; mi d'alɔ ɛ ɖo nǔ e kɔn nǔ mitɔn ná hudó e ɖe lɛ́ɛ é bǐ mɛ. É lɔmɔ̌ d'alɔ mɛ gěgé, ɖo tají ɔ́, é d'alɔ nyɛ lɔmɔ̌.

³ Mi dó gbe Plisílu kpódó Akilási kpó nú mì; nyɛ kpó yě kpó wɛ wa azɔ̌ nú Klísu Jezu.

⁴Yě ko ɖibla sɔ́ gbɛ yě ɖésúnɔ tɔn nyi gbě dó ta ce mɛ; nyɛ ɖokpónɔ wɛ tunwun ɖagbe énɛ́ nú yě ǎ; agun klísusɛntɔ́ e ma nyí Jwifu ǎ lɛ́ɛ tɔn lɛ́ɛ lɔmɔ̌ ɔ́ bǐ tunwun ɖagbe énɛ́ nú yě.

⁵Mi dó gbe agun e nɔ kplé ɖo xwé yětɔn gbe ɔ́ lɔmɔ̌ nú mì. Mi dó gbe wǎnyínámɔ ce Epenɛ́ti e nyí mɛ nukɔn tɔn e ɖi nǔ nú Klísu ɖo tokpɔn Azíi tɔn mɛ é nú mì.

⁶Mi dó gbe Mali e jɛ tagba ɖésú dó ta mitɔn mɛ ɔ́ nú mì.

⁷Mi dó gbe Andlonikúsi kpó Juniyasi kpó nú mì; hɛ̌nnumɔ ce wɛ yě nyí, bɔ nyɛ kpó yě kpó kó nɔ gankpá mɛ kpɔ́n. Mɛ nukúnɖéjí wɛ yě nyí ɖo mɛsɛ́dó lɛ́ɛ mɛ, yě ko húzú klísusɛntɔ́ dó nukɔn nú mì.

⁸Mi dó gbe Anpliatúsi e nyí mɛvívɛ́ná ce ɖo bǔ e mǐ ɖe xá Aklúnɔ mɛ ɔ́ nú mì.

⁹Mi dó gbe Wibɛ́ɛn e kpó mǐ kpó ɖo azɔ̌ wa nú Klísu wɛ é nú mì; bó dó gbe mɛvívɛ́ná ce Sitaxísi nú mì.

¹⁰Mi dó gbe Apɛlu e ɖe nǔ e é ɖi nú Klísu ɔ́ xlɛ́ é nú mì. Mi dó gbe mɛ e ɖo Alisitobúlu xwé lɛ́ɛ nú mì.

¹¹Mi dó gbe hɛ̌nnumɔ ce Elódiɔ́n nú mì. Mi dó gbe mɛ e ɖo Naasísi xwé, bó ɖi nǔ nú Aklúnɔ lɛ́ɛ nú mì.

¹²Mi dó gbe Tlifɛ́nu kpó Tlifɔ́su kpó e ɖo azɔ̌ wa nú Aklúnɔ wɛ lɛ́ɛ nú mì. Mi dó gbe mɛvívɛ́ná ce Pɛsízi e wa azɔ̌ ɖésú nú Aklúnɔ ɔ́ nú mì.

¹³ Mi dó gbe Hlufúsi e nyí mɛ bɔ Aklúnɔ sɔ́ é nú mì, bó dó gbe nɔ tɔn e nyí nɔ nú nyɛ lɔmɔ̌ ɔ́ nú mì.

¹⁴Mi dó gbe Asɛnklíti kpó Flegɔ́ɔn kpó Ɛɛmɛsi kpó, kpódó Patlɔbási kpó, kpódó Ɛɛmasi kpó, bó dó gbe nɔví ɖě lɛ́ɛ e ɖo kpɔ́ xá yě ɔ́ nú mì.

¹⁵Mi dó gbe Filolɔ́gu kpó Juli kpó, bó dó gbe Nɛlée kpó nɔví tɔn nyɔ̌nu ɔ́ kpó nú mì, bó dó gbe Olɛ́npási kpódó mɛɖeɖóvo Mawu tɔn e ɖo kpɔ́ xá yě lɛ́ɛ bǐ kpán nú mì.

¹⁶Mi ki nɔví nɔví sín si dó dó gbe miɖée ná; agun Klísu tɔn lɛ́ɛ bǐ dó gbe sɛ́ dó mi.

¹⁷Nɔví lɛ́ɛ mi, un ɖo vo sa nú mi wɛ ɖɔ mi cɔ́ miɖée dó mɛ e nɔ dɔn kínklán byɔ́ mɛ mɛ lɛ́ɛ wú. Nǔ e yě nɔ ɖɔ lɛ́ɛ nɔ gbɔn vo nú nǔ e è kplɔ́n mi lɛ́ɛ, bó nyí afɔklɛ́nnú nú mi; mi lɛ́ kɔ sín yě gúdo.

¹⁸Đó gbɛtɔ́ mɔ̌hunkɔtɔn lɛ́ɛ ɖo azɔ̌ wa nú Klísu Aklúnɔ mǐtɔn ɔ́ wɛ ǎ; lo ɔ́, adɔgo yě ɖésúnɔ tɔn wa azɔ̌ ná wɛ yě ɖe. Yě nɔ ɖɔ xó víví, bó nɔ ɖɔ mɛblɛ́ɖuxó dó flú xomɛvɔ́nɔ lɛ́ɛ sín ayixa.

¹⁹Mɛ bǐ wɛ tunwun ɖɔ mi nɔ se tónú nú Aklúnɔ; hǔn xomɛ nɔ hun mì dó mi wú; lo ɔ́, un jló ɖɔ nǔnywɛ́ ní kpé mi, bónú mi ná nɔ wa nǔ ɖagbe; un jló ɖɔ mi ní nɔ mǐmɛ́ jí, bó hɔn nú nǔ nyanya.

²⁰Zaanɖé din ɔ́, Mawu e nɔ ná fífá mɛ ɔ́ ná nyínyɛ́ Satáan dó afɔ mitɔn lɛ́ɛ glɔ́. Fɛ́nú Aklúnɔ mǐtɔn Jezu tɔn ní nɔ kpɔ́ xá mi.

²¹ Azɔ̌gbɛ́ ce Timɔtée dó gbe sɛ́ dó mi; mɔ̌ ɖokpó ɔ́, hɛ̌nnumɔ ce Lusiwúsi kpó Jazɔ́ɔn kpó, kpódó Sosipatlɔ́si kpán dó gbe sɛ́ dó mi.

²²Nyɛ Tɛtiwúsi e ɖo wěma élɔ́ wlán nú Pɔ́lu wɛ ɔ́ dó gbe sɛ́ dó mi ɖo bǔ e mǐ ɖe xá Aklúnɔ ɔ́ mɛ.

²³ Gayiwúsi e yí nyɛ Pɔ́lu dó xwé tɔn gbe ɔ́, é mɛ e sín xwé gbe agun ɔ́ bǐ nɔ́ kplé ɖe ɔ́ dó gbe sɛ́ dó mi. Elasíti e nɔ hɛn akwɛ́gbá to ɔ́ tɔn ɔ́ kpódó nɔví mǐtɔn Kaatúsi kpán dó gbe sɛ́ dó mi. [

²⁴Fɛ́nú Aklúnɔ mǐtɔn Jezu Klísu tɔn ní nɔ kpɔ́ xá mi bǐ. Amǐ!]

²⁵Mi nú mǐ ná kpa Mawu! É ɖó acɛ bó ná bló bɔ mǐ ná ɖó hlɔ̌nhlɔ́n ɖo nǔɖiɖi mɛ, lě e Wɛn Ɖagbe e jlá wɛ un ɖe ɔ́ ɖɔ gbɔn é, ɖi lě e wɛn e kunkplá Jezu Klísu bɔ un ɖo dǐdó wɛ ɔ́, kpo nǔtunwuntunwun e mǐ mɔ yí ɖo nǔbúdo Mawu tɔn mɛ ɔ́ kpán ɖɔ gbɔn é. Nǔbúdo énɛ́ ko ɖo hwlǎhwlá sín xóxó hwenu ɖokpóó.

²⁶Amɔ̌, din ɔ́, wěma e gbeyíɖɔ Mawu tɔn lɛ́ɛ wlán lɛ́ɛ ɖe nǔbúdo énɛ́ nyi wěxo. Đi lě e Mawu Mavɔmavɔ ɔ́ ná gbe tɔn gbɔn ɔ́, è ɖe nǔbúdo énɛ́ ɔ́ xlɛ́ akɔta lɛ́ɛ bǐ, bónú yě ná ɖi nǔ, bó ná se tónú.

²⁷Mawu nǔnywɛ́tɔ́ ɖokpó géé e tíin ɔ́, susu n'i káká sɔ́yi gbɔn Jezu Klísu jí. Amǐ!