Read fon 1 Kɔlɛ́ntinu 1 Bible Online

1 Kɔlɛ́ntinu 1 - fon bible

1 Kɔlɛ́ntinu 1

¹Nyɛ Pɔ́lu e Mawu ylɔ́ ɖo jlǒ tɔn mɛ, bónú ma nyí mɛsɛ́dó Klísu Jezu tɔn ɔ́ kpódó nɔví mǐtɔn ɖo Klísu mɛ Sositɛ́nu kpán

² wɛ ɖo wěma élɔ́ wlán sɛ́ dó agun Mawu tɔn e ɖo Kɔlɛ́nti é wɛ, bó ɖo wlǎnwlán sɛ́ dó yě mɛ e Mawu ylɔ́, bɔ yě ná nɔ gbɛ n'i, ɖo bǔ e yě ɖe xá Klísu Jezu ɔ́ mɛ lɛ́ɛ wɛ, bó ɖo wlǎnwlán sɛ́ dó mɛ e nyí étɔn lɛ́ɛ kpó mɛ e nɔ ɖo Aklúnɔ mǐtɔn Jezu Klísu sín nyǐkɔ ylɔ́ wɛ ɖo fí ɖěbǔ e yě ɖe lɛ́ɛ é bǐ kpó wɛ. Aklúnɔ Jezu Klísu ɔ́ wɛ nyí Aklúnɔ yětɔn, bó nyí mǐ lɔmɔ̌ tɔn.

³Mawu Tɔ́ mǐtɔn ɔ́ kpódó Aklúnɔ Jezu Klísu kpán ní ná fɛ́nú kpódó fífá kpó mi.

⁴Un nɔ dó kú nú Mawu ce hwebǐnu dó ta mitɔn mɛ, ɖó fɛ́nú e é ná mi ɖo bǔ e mi ɖe ɖo Klísu Jezu mɛ é wútu.

⁵Nǔgbó ɔ́, Mawu zě nǔníná lɛ́ɛ bǐ dó dó dɔkun nú mi, ɖo bǔ e mi ɖe xá Klísu Jezu ɔ́ mɛ; ɖo tají ɔ́, é zé nǔníná e kunkplá xó ɔ́ lɛ́ɛ, kpódó éé kunkplá nukúnnú-mɔjɛnǔmɛ lɛ́ɛ kpán é bǐ dó dó dɔkun nú mi.

⁶Kúnnu e è ɖe nú Klísu ɔ́ lí dǒ ɖo tɛ́ntin mitɔn titewungbe,

⁷bɔ nǔníná Mawu tɔn ɖěbǔ hwedó mi mɛ e ɖo te kpɔ́n hwenu e Mawu ná ɖe Aklúnɔ mǐtɔn Jezu Klísu xlɛ́ dó é lɛ́ɛ ǎ.

⁸Aklúnɔ mǐtɔn Jezu Klísu ɔ́ wɛ ná hɛn mi, bɔ mi na syɛ́nlǐn káká yi vivɔnu, bónú mɛɖé ní ma mɔ nǔɖé ɖɔ dó mi wú ɖo azǎn tɔn gbe ó.

⁹Mawu ɖo gbejí. É wɛ ylɔ́ mi, bónú mi ná nɔ bǔ xá Vǐ tɔn Aklúnɔ mǐtɔn Jezu Klísu.

¹⁰Nɔví lɛ́ɛ mi, ɖo Aklúnɔ mǐtɔn Jezu Klísu sín nyǐkɔ mɛ ɔ́, un ɖo byɔ̌byɔ́ mi wɛ ɖɔ mi bǐ ní ɖó gbe kpɔ́, bónú kínklán ma nɔ tɛ́ntin mitɔn ó; mi ní nɔ bǔ ganjí, bó ɖó linlin ɖokpó ɔ́; ayixa mitɔn ní nɔ ɖɔ nǔ ɖokpó ɔ́.

¹¹Nɔví ce lɛ́ɛ mi, nǔgbó ɔ́, Klowée sín hɛ̌nnumɔ ɖé lɛ́ɛ ɖɔ nú mǐ ɖɔ mi ɖo jlɛ ɖɔ wɛ.

¹² Nǔ e ɖɔ wɛ un ɖe bó ɖɔ mɔ̌ ɔ́ ɖíe: mi ɖokpó ɖokpó nɔ́ ɖo xó vovo ɖɔ wɛ; mɛ ɖě nɔ ɖɔ: “Nyɛ ɔ́, Pɔ́lu tɔn wɛ un nyí”; mɛɖěvo nɔ ɖɔ: “Nyɛ ɔ́, Apolosu tɔn wɛ un nyí”; mɛɖěvo nɔ lɛ́ ɖɔ: “Nyɛ ɔ́, Sefási tɔn wɛ un nyí”; bɔ mɛ ɖě nɔ lɛ́ ɖɔ: “Nyɛ ɔ́, Klísu tɔn wɛ un nyí.”

¹³Nǔ e un ka ná kanbyɔ́ mi ɔ́, mi vɛdó ɖɔ Klísu ɔ́ má éɖée ɖó donu vovo wɛ sín a? Pɔ́lu ɔ́ wɛ è ká ɖó aklúzu jí dó ta mitɔn mɛ a? Pɔ́lu sín nyǐkɔ mɛ wɛ è lɛ yɛhwesin nú mi dó a?

¹⁴ Un dó kú nú Mawu ɖɔ un kún lɛ yɛhwesin nú mɛɖé ɖo mi mɛ zɛ Klisipúsi kpó Gayiwúsi kpó wú ó.

¹⁵Énɛ́ ɔ́, mɛ ɖěbǔ ɖo mi mɛ bó ná sixú ɖɔ nyǐkɔ ce mɛ wɛ è lɛ yɛhwesin nú émí dó ǎ.

¹⁶(Áááá! Un lɛ́ lɛ yɛhwesin nú Sitefanási sín hɛ̌nnu ɔ́ lɔ; lo ɔ́, un to lɛ́ lɛ yɛhwesin nú mɛɖé hǔn, un sɔ́ flín ǎ.)

¹⁷Klísu sɛ́ mì dó nú má wá lɛ yɛhwesin nú mɛ ǎ; Wɛn Ɖagbe ɔ́ wɛ é sɛ́ mì dó ɖɔ má wá jlá; nyɛ ní má ka zé nǔnywɛ́ gbɛtɔ́ tɔn sín xó dó jlá ná ó; é má nyí mɔ̌ ǎ ɔ́, hlɔ̌nhlɔ́n e kú e Klísu kú ɖo aklúzu jí ɔ́ ɖó ɔ́ táá nyí nǔ yǎyá.

¹⁸Nǔgbó ɔ́, kú e Klísu kú ɖo aklúzu jí é sín xó ɔ́, xlonɔxó wɛ yě mɛ e ɖo bǔbú wɛ lɛ́ɛ nɔ dó mɔ ná; lo ɔ́, hlɔ̌nhlɔ́n Mawu tɔn wɛ é nyí nú mǐ mɛ e ɖo hwlɛngán sín ali jí lɛ́ɛ.

¹⁹ Nǔ e Mawuxówéma ɔ́ ɖɔ ɔ́ ɖíe: “Un ná sú nǔnywɛ́tɔ́ lɛ́ɛ sín nǔnywɛ́ sín kún dó; un ná gbɛ́ nǔ e nukúnnú-mɔjɛnǔmɛtɔ́ lɛ́ɛ tunwun é.”

²⁰ Ényí nǔ nyí mɔ̌ ɔ́, ani wɛ nǔnywɛ́tɔ́, abǐ wěmasetɔ́, abǐ xóɖɔdóxówútɔ́ gbɛmɛ fí tɔn lɛ́ɛ sɔ́ sixú lɛ́ ɖɔ? Mawu ɖe xlɛ́ ɖɔ nǔnywɛ́ gbɛmɛ fí tɔn ɔ́, xlojijɔ wɛ é nyí.

²¹Nǔgbó ɔ́, gbɔn nǔnywɛ́ e gbɛtɔ́ lɛ́ɛ ɖó ɔ́ gbla mɛ ɔ́, yě kpé wú bó tunwun Mawu ɖo fí e nǔnywɛ́ tɔn ɖo azɔ̌ wa ɖe wɛ ɔ́ ǎ. Énɛ́ ɔ́ wú wɛ é nyɔ́ Mawu nukún mɛ ɖɔ émí ná hwlɛ́n mɛ e ɖi nǔ lɛ́ɛ gán, gbɔn wɛn élɔ́ e dó wɛ mǐ ɖe, bɔ gbɛtɔ́ lɛ́ɛ nɔ mɔ dó mɔ xlonɔxó ná é gbla mɛ.

²²Jwifu lɛ́ɛ nɔ byɔ́ ɖɔ è nǐ jlɛ́ nǔ, bó dó ná xlɛ́ émí, bɔ Glɛ̌sinu lɛ́ɛ ka nɔ ba nǔnywɛ́.

²³Mǐdɛɛ lɛ́ɛ ɔ́, Klísu e è ká nyi aklúzu jí ɔ́ jlá wɛ mǐ ɖe: afɔklɛ́nnúxó wɛ xó énɛ́ nyí nú Jwifu lɛ́ɛ, bɔ mɛ e ma nyí Jwifu ǎ lɛ́ɛ nɔ́ mɔ dó mɔ xlonɔxó.

²⁴Lo ɔ́, Klísu ɔ́, hlɔ̌nhlɔ́n Mawu tɔn kpódó nǔnywɛ́ Mawu tɔn kpó wɛ é nyí nú mɛ e Mawu ylɔ́ lɛ́ɛ; Jwifu kpódó Glɛ̌sinu kpó.

²⁵Đó nǔ e è nɔ mɔ dó mɔ xlojijɔ Mawu tɔn ná ɔ́, nǔnywɛ́ e ɖ'é mɛ ɔ́ hú gǎn nǔnywɛ́ e gbɛtɔ́ lɛ́ɛ ɖó é; nǔ e è nɔ mɔ dó mɔ vǐvɔ́ Mawu tɔn ná ɔ́, hlɔ̌nhlɔ́n e é ɖó ɔ́ hú gǎn ée gbɛtɔ́ lɛ́ɛ ɖó é.

²⁶Nɔví lɛ́ɛ mi, mi ní mɔ ɖɔ, ɖo gbɛtɔ́ sín ali jí ɔ́, nǔnywɛ́tɔ́ nabíɖé kún ɖo mi mɛ e Mawu ylɔ́ lɛ́ɛ mɛ ó; mɛ e ɖó hlɔ̌nhlɔ́n ɔ́ nabíɖé kún ɖo mi mɛ ó; mɛ nabíɖé kún ka ɖo mi mɛ bó gosín hɛ̌nnu nukúnɖéjí lɛ́ɛ mɛ ó.

²⁷Lo ɔ́, Mawu sɔ́ nǔ e gbɛtɔ́ lɛ́ɛ nɔ mɔ dó mɔ xlo ná ɔ́ dó dó winnyá nǔnywɛ́tɔ́ lɛ́ɛ ná; é sɔ́ nǔ e yě nɔ mɔ dó mɔ vǐvɔ́ ná ɔ́ dó dó winnyá mɛ e ɖó hlɔ̌nhlɔ́n lɛ́ɛ.

²⁸Nǔ e gbɛtɔ́ lɛ́ɛ mɔ dó mɔ nǔ masɔatɛ́n, nǔ gbɛ́hɛn, nǔ yǎyá ɔ́, Mawu sɔ́ dó gba nǔ e yě sɔ́ dó mɔ nǔgɛ́n é.

²⁹Énɛ́ ɔ́, gbɛtɔ́ ɖěbǔ sixú yí go ɖo Mawu nukɔn ǎ.

³⁰Lo ɔ́, Mawu dɔn mi kpó Klísu Jezu kpán ɖó bǔ, bó sɔ́ ɛ dó ɖó nǔnywɛ́ mǐtɔn. Gbɔn Klísu Jezu jí ɔ́, mǐ húzú hwɛjijɔnɔ ɖo Mawu nukɔn; Mawu ɖe mǐ ɖó vo gbɔn jǐ tɔn; é hwlɛ́n mǐ sín hwɛ mǐtɔn lɛ́ɛ mɛ gbɔn jǐ tɔn.

³¹ Énɛ́ ɔ́ wú ɔ́, lě e Mawuxówéma ɔ́ ɖɔ gbɔn ɔ́: “Nú mɛɖé jló ná jlá ajɔ̌ nú éɖée ɔ́, ní jlá ɖó Aklúnɔ ɔ́ wú.”