Read fon 1 Kɔlɛ́ntinu 10 Bible Online

1 Kɔlɛ́ntinu 10 - fon bible

1 Kɔlɛ́ntinu 10

¹ Nɔví ce lɛ́ɛ mi, nǔ e jɛ dó tɔ́gbó mǐtɔn e xwedó Mɔyízi lɛ́ɛ jí ɔ́, un jló ɖɔ mi ní flín. Yě bǐ wɛ nɔ akpɔ́kpɔ́ ɔ́ glɔ́; yě bǐ wɛ gbɔn Xu Vɔvɔ ɔ́ tɛ́ntin dín.

²Yě bǐ wɛ è lɛ yɛhwesin ná, ɖo akpɔ́kpɔ́ kpó xu kpó mɛ, bɔ yɛhwesin lilɛ énɛ́ ɔ́ dɔn yě ɖó bǔ xá Mɔyízi.

³ Yě bǐ wɛ ɖu nǔɖuɖu Yɛsinsɛn tɔn ɖokpó ɔ́,

⁴bó nu Yɛsinsɛn sín sin ɖokpó ɔ́: yě nu sin ɖo só Yɛsinsɛn tɔn e ɖo yě kplá wɛ ɔ́ nu; só énɛ́ ɔ́, Klísu wɛ.

⁵ É ka ɖo mɔ̌ có, mɛ wɔ̌buwɔ́bú ɖo yě mɛ, bɔ nǔwiwa yětɔn nyɔ́ Mawu nukún mɛ ǎ; énɛ́ ɔ́ wú wɛ yě kú ɖo gbětótló mɛ.

⁶ Kpɔ́ndéwú wɛ nǔ énɛ́ lɛ́ɛ e jɛ lɛ́ɛ nyí nú mǐ, bónú mǐ ní ma wá ɖó jlǒ nyanya yě ɖɔhun ó.

⁷ Mi ka ɖó ná jɛ vodún sɛn jí lě e mɛɖé lɛ́ɛ bló gbɔn ɖo yě mɛ ɔ́ ɖɔhun ǎ. Lě e Mawuxówéma ɔ́ ɖɔ gbɔn ɔ́: “Mɛ lɛ́ɛ jínjɔ́n ayǐ, bó ɖu nǔ, bó nu ahan; énɛ́ ɔ́ gúdo ɔ́, yě sí te, bó da ayihún.”

⁸ Mǐ ɖó ná jó miɖée nú agalilɛ lě e mɛɖé lɛ́ɛ bló gbɔn ɖo yě mɛ, bɔ gbɛtɔ́ adɔ̌kpo ɖokpó afɔwó afatɔ́n (23.000) kú ɖo kéze gbe ɖokpó mɛ é ǎ.

⁹ Mǐ ɖó ná tɛ́n Aklúnɔ kpɔ́n, lě e mɛɖé lɛ́ɛ bló gbɔn ɖo yě mɛ, bɔ dan ɖu yě bɔ yě kú é ǎ.

¹⁰ Mi ɖó ná hlún nǔ ɖɔ lě e mɛɖé lɛ́ɛ bló gbɔn ɖo yě mɛ, bɔ wɛnsagun e nɔ hu mɛ ɔ́ wá hu yě ɔ́ ǎ.

¹¹Nǔ nyanya énɛ́ lɛ́ɛ jɛ dó yě jǐ, bó ná dó nyí kpɔ́ndéwú nú mɛɖěvo lɛ́ɛ; è wlǎn nǔ énɛ́ lɛ́ɛ e jɛ lɛ́ɛ, bó ná dó kplɔ́n nǔ mǐ ná; ɖó hwenu e mǐ ɖe din ɔ́, hwenu lɛ́ɛ sín vivɔ ko sɛ yá.

¹²Énɛ́ ɔ́ wú ɔ́, mɛ e lin ɖɔ émí ɖo te ɔ́ ɖó ná cɔ́ éɖée, bó ma wá jɛ ayǐ ó.

¹³Mi mɔ tɛ́nkpɔ́n ɖěbǔ zɛ ée gbɛtɔ́ nɔ mɔ é wú ǎ. Mawu nɔ́ gɔn akpá e é dó lɛ́ɛ ɖe ǎ; é ná lɔn bɔ tɛ́nkpɔ́n ɖé ná wá nú mi bó hú gǎn hlɔ̌nhlɔ́n e mi ɖó é ǎ; amɔ̌ hwenu e tɛ́nkpɔ́n ná wá nú mi ɔ́, é ná ná hlɔ̌nhlɔ́n mi bɔ mi ná dɛ ɖ'é nu; énɛ́ ɔ́, é ná ɖe ali nú mi bɔ mi ná tɔ́n sín mɛ.

¹⁴Énɛ́ ɔ́ wú ɔ́, mɛvívɛ́ná ce lɛ́ɛ mi, mi ma sɛn vodún ó.

¹⁵Un ɖɔ xó nú mi, lě e è nǎ ɖɔ xó nú nukúnnú-mɔjɛnǔmɛtɔ́ gbɔn é ɖɔhun; mi ɖésú ní bo kíjé xó e un ɖɔ ɔ́ mɛ kpɔ́n.

¹⁶ Mi flín kɔ́fu e tamɛ mǐ nɔ́ dó kú nú Mawu dó ɖo Aklúnɔ sín nǔɖuɖu ɔ́ hwenu é: hwenu e mǐ ɖo ahan e ɖ'é mɛ ɔ́ nu wɛ ɔ́, é nɔ kɔn mǐ ɖó kpɔ́ xá Klísu sín hun ǎ cé? Wɔ̌xúxú e mǐ nɔ́ kán ɔ́ ka lo? Hwenu e mǐ nɔ́ ɖo ɖuɖu wɛ ɔ́, é nɔ́ kɔn mǐ ɖó kpɔ́ xá Klísu sín agbaza a cé[6]?

¹⁷Wɔ̌xúxú ɖokpó géé wɛ ɖe; nú mǐ tlɛ sukpɔ́ gbɔn ɖěbǔ ɔ́, agbaza ɖokpó géé wɛ mǐ nyí, ɖó wɔ̌xúxú ɖokpó ɔ́ wɛ mǐ bǐ má ɖu.

¹⁸ Mi kpɔ́n nǔ dó togun Izlayɛ́li tɔn wú: mɛ e nɔ ɖu nǔ e è sɔ́ dó sá vɔ̌ ná lɛ́ɛ ɔ́ ɖó kɔnɖókpɔ́ xá Mawu e è sɔ́ vɔ̌sákpe ɔ́ kɛ é.

¹⁹Étɛ́ ɖɔ wɛ un ka ɖe? Điɖɔ wɛ un ɖe ɖɔ nǔɖuɖu e è nǎ vodún ɔ́ nyí nǔɖé a? Điɖɔ wɛ un ɖe ɖɔ vodún ɔ́ ɖésú nyí nǔɖé a?

²⁰ Gbeɖé kpɔ́n! Lo ɔ́, nǔ e ɖɔ wɛ un ɖe ɔ́ wɛ nyí ɖɔ mɛ e ma nyí klísusɛntɔ́ ǎ lɛ́ɛ ɔ́, vɔ̌ e yě nɔ́ sá ɔ́, yɛ nyanya lɛ́ɛ wɛ yě nɔ́ sá ná; é nyí Mawu wɛ yě nɔ sá ná ǎ. Un ka jló ɖɔ mi ní ɖó kɔnɖókpɔ́ xá yɛ nyanya lɛ́ɛ ǎ.

²¹Mi sixú nu ahan ɖo kɔ́fu Aklúnɔ tɔn mɛ, bó lɛ́ nu ahan ɖo kɔ́fu yɛ nyanya lɛ́ɛ tɔn mɛ ǎ; mi sixú ɖu Aklúnɔ sín nǔɖuɖu, bó lɛ́ ɖu yɛ nyanya lɛ́ɛ sín nǔɖuɖu ǎ[7].

²² Abǐ mǐ jlǒ ná bló bɔ Aklúnɔ ná jɛ wǔ hwan jí wɛ a? Mi vɛdó ɖɔ mǐ dó hlɔ̌nhlɔ́n hú i wɛ sín a?

²³ Mɛ ɖé lɛ́ɛ nɔ ɖɔ: “È nǎ nǔ bǐ sín gbe.” Nǔgbó wɛ! É ka ɖo mɔ̌ có, nǔ lɛ́ɛ bǐ wɛ ka nyɔ́ ǎ. “È nǎ nǔ lɛ́ɛ bǐ sín gbe”; é ɖo mɔ̌ có, nǔ lɛ́ɛ bǐ wɛ nɔ wa ɖagbe ǎ.

²⁴Mɛɖěbǔ ní ma nɔ ba ɖagbe é ɖésúnɔ tɔn ó; lo ɔ́, ní nɔ ba ɖagbe mɛɖěvo lɛ́ɛ tɔn.

²⁵Mi hɛn ɔ́, mi ná ɖu nǔ e sa wɛ è ɖe ɖo axi mɛ é bǐ; ayixa mitɔn ma xo hun xá mi bónú mi kan nǔɖé byɔ́ ó.

²⁶Đó lě e Mawuxówéma ɔ́ ɖɔ gbɔn ɔ́: “Aklúnɔ tɔn wɛ nyí ayǐkúngban kpódó nǔ e ɖ'é mɛ lɛ́ɛ bǐ kpó.”

²⁷Ényí mɛ e ma ɖi nǔ ǎ ɔ́ ɖě ylɔ́ mi dó nǔɖuɖu kɔn, bónú mi yí gbe bo yi hǔn, mi ɖu nǔ e é ná xwlé mi é bǐ; ayixa mitɔn ma xo hun xá mi bónú mi kan nǔɖé byɔ́ ó.

²⁸Amɔ̌ ényí mɛɖé ɖɔ nú mi ɖɔ: “Lan élɔ́ ɔ́, kanlin e è sɔ́ dó sá vɔ̌ ná nú vodún ɔ́ sín lan wɛ hǔn”, mi ma ɖu ó; ɖó mɛ e ɖɔ xó d'é wú nú mi ɔ́ wútu, nú ayixa ma xo hun xá mɛ ó.

²⁹Ayixa midɛɛ lɛ́ɛ tɔn xó ɖɔ wɛ un ɖe ɖo fí ǎ; lo ɔ́, mɛ ɖě ɔ́ tɔn xó ɖɔ wɛ un ɖe. È nǎ kanbyɔ́ ɖɔ: “Aniwú ka wɛ? Nǔɖé jlǒ mì bónú un ja wiwa gbé ɔ́, mɛɖěvo sín ayixa wɛ ná ɖɔ fí e un ná wa yi jɛ ɔ́ nú mì a?

³⁰Nú un dó kú nú Mawu ɖó nǔ e ɖu wɛ un ɖe ɔ́ wú ɔ́, nɛ̌ ka gbɔn bɔ è nǎ ɖɔ xó dó wǔ ce, ɖó nǔɖuɖu énɛ́ e tamɛ un dó kú nú Mawu dó é?”

³¹Nǔ ɖu wɛ mi ɖe oo, ahan nu wɛ mi ɖe oo, abǐ nǔ ɖěbǔ wa wɛ mi ɖe hǔn, mi bló bǐ, bó dó sɔ́ Mawu su.

³²Mi ma wa nǔ e ná nyí afɔklɛ́nnú nú Jwifu lɛ́ɛ, abǐ mɛ e ma nyí Jwifu ǎ lɛ́ɛ, abǐ agun Mawu tɔn ɔ́ ɖěbǔ ó.

³³Mi nɔ wa nǔ nyɛ ɖɔhun; un nɔ dó gǎn bó ná nyɔ́ ɖo mɛ bǐ sí, ɖo nǔ bǐ mɛ; un nɔ ba nyɛ ɖésúnɔ sín ɖagbe ǎ; lo ɔ́, ɖagbe mɛ bǐ tɔn wɛ un nɔ ba, bónú Mawu ná hwlɛ́n yě gán.