Read fon 1 Kɔlɛ́ntinu 11 Bible Online

1 Kɔlɛ́ntinu 11 - fon bible

1 Kɔlɛ́ntinu 11

¹ Mi wa nǔ nyɛ ɖɔhun, lě e nyi lɔ nɔ wa nǔ Klísu ɖɔhun gbɔn é.

²Un nɔ kpa mi, ɖó mi nɔ flín mì ɖo nǔ bǐ mɛ; mi nɔ xwedó nǔ e un kplɔ́n mi lɛ́ɛ.

³É ka ɖo mɔ̌ có, un jló ɖɔ mi ní mɔ nukúnnú jɛ nǔ élɔ́ wú: Klísu nyí gǎn nú súnnu bǐ; asisúnɔ nyí gǎn nú asi tɔn, bɔ Mawu ka nyí gǎn nú Klísu.

⁴Hǔn, ényí súnnu ɖé sɔ́ nǔɖé cyɔ́n ta hwenu e é ɖo ɖɛ xo wɛ, abǐ hwenu e Mawu sɔ́ xó ɖé dó nu n'i, bɔ é ɖo ɖiɖɔ wɛ ɔ́, Klísu ɖe kpo wɛ é ɖe.

⁵Amɔ̌, ényí nyɔ̌nu ɖé ɖe nǔ e é cyɔ́n ta ɔ́ síin, hwenu e é ɖo ɖɛ xo wɛ, abǐ hwenu e Mawu sɔ́ xó ɖé dó nu n'i, bɔ é ɖo ɖiɖɔ wɛ ɔ́, asú tɔn ɖe kpo wɛ é ɖe; é cí nyɔ̌nu e xwlɛ́ ta ɔ́ ɖɔhun.

⁶Nú nyɔ̌nu ɖé ma ka sɔ́ nǔɖé cyɔ́n ta ǎ ɔ́, é sixú kpa ɖa. Lo ɔ́, ɖěe é ka nyí ɖɔ ɖa kpikpa, abǐ ta xwlɛ́xwlɛ́ ɔ́, winnyánú wɛ é nyí nú nyɔ̌nu ɔ́, hǔn é ɖó ná sɔ́ nǔɖé cyɔ́n ta.

⁷ É byɔ́ ɖɔ súnnu ní sɔ́ nǔɖé cyɔ́n ta ǎ; ɖó akpajlɛ́ Mawu tɔn kpó susu Mawu tɔn kpó wɛ é nyí; lo ɔ́, nyɔ̌nu ɔ́ susu súnnu tɔn wɛ é nyí.

⁸ Nǔgbó ɔ́, é nyí nyɔ̌nu wú wɛ Mawu ɖe súnnu sín ǎ; lo ɔ́, súnnu wú wɛ é ɖe nyɔ̌nu sín.

⁹Mawu bló súnnu nú nyɔ̌nu ǎ; amɔ̌ nyɔ̌nu wɛ é bló nú súnnu.

¹⁰Énɛ́ ɔ́ wú wɛ nyɔ̌nu e ɖo asúxwé ɔ́, wuntun e ɖe xlɛ́ ɖɔ é ɖo asú tɔn sín acɛ mɛ ɔ́ ɖó ná ɖo ta tɔn ɖó wɛnsagun lɛ́ɛ wú.

¹¹É ka ɖo mɔ̌ có, ɖo bǔ e mǐ ɖe xá Aklúnɔ ɔ́ mɛ ɔ́, nyɔ̌nu sixú tíin súnnu mɛ vo ǎ; súnnu ka sixú tíin nyɔ̌nu mɛ vo ǎ.

¹²Đó ée è ɖe nyɔ̌nu sín súnnu wú ɔ́, mɔ̌ ɖokpó ɔ́, nyɔ̌nu ji súnnu. Mawu wɛ ka bló nǔ bǐ.

¹³Mi ɖésúnɔ ɔ́, mi vɛ gbéjé kpɔ́n: é nyɔ́ bónú nyɔ̌nu ná nɔ ta vɔ́ hwenu e é ɖo xó ɖɔ xá Mawu wɛ ɔ́ a?

¹⁴Gbɛ ɔ́ ɖésú ko kplɔ́n mi ɖɔ nú ɖa e ɖo súnnu ta ɔ́ ɖi ga ɔ́, winnyánú wɛ é nyí n'i.

¹⁵Lo ɔ́, nú ɖa e ɖo ta nú nyɔ̌nu ɔ́ ka ɖi ga ɔ́, yɛ̌yinú wɛ é nyí n'i. Nǔgbó ɔ́, Mawu ná ɖa gaga nyɔ̌nu, bɔ ɖa ɔ́ ná cyɔ́n ta tɔn.

¹⁶Amɔ̌, nú mɛɖé ka jló ná lɛ́ dɔn nǔ dó xó énɛ́ ɔ́ wú ɔ́, nǔ ɖokpó e é ná tunwun ɔ́ wɛ nyí ɖɔ: mǐdɛɛ lɛ́ɛ ɖó walɔ ɖěvo ǎ; agun Mawu tɔn lɛ́ɛ lɔ ka ɖó walɔ ɖěvo ǎ.

¹⁷Un sixú kpa mi ɖo xó e wú ná kɛ nu dó nú mi wɛ un ja din lɛ́ɛ mɛ ǎ, ɖó kplé e mi nɔ kplé lɛ́ɛ nɔ wa nyanya nú mi hú ɖagbe.

¹⁸Jɛ nukɔn ɔ́, un se ɖɔ, nú agun ɔ́ kplé ɔ́, gbɛ̌ta ɖé lɛ́ɛ ɖo mi mɛ, bɔ gbe yětɔn ɖo kpɔ́ ǎ. Un ka ɖi nǔ na kpɛɖé.

¹⁹Kínklán ɖó ná nɔ tɛ́ntin mitɔn, bónú è nǎ dǒ tunwun mɛ e Mawu yí gbe nú nǔwiwa yětɔn lɛ́ɛ é.

²⁰Ényí mi kplé ɔ́, é nyí Aklúnɔ sín nǔɖuɖu ɔ́ wɛ mi nɔ ɖu ǎ.

²¹Nǔgbó ɔ́, káká nú mi ná jɛ nǔɖuɖu kɔn lě ɔ́, mɛ ɖokpó ɖokpó nɔ hwlɛ́ndó nǔɖuɖu é ɖésúnɔ tɔn, bó nɔ ɖu, bɔ hwenu e xovɛ́ ɖo mɛ ɖě sin wɛ ɔ́, mɛ ɖě nɔ ɖo ahan nu mú wɛ.

²²Étɛ́! Mi ɖó xwé, bó ná ɖu nǔ, bó ná nu ahan ɖ'é gbe ǎ cé? Abǐ mi gbɛ́ wǎn nú agun Mawu tɔn ɔ́ wɛ a? Mi jló ná dó winnyá mɛ e ma ɖó nǔɖé ǎ lɛ́ɛ wɛ a? Étɛ́ nɔ te kpɔ́n wɛ mi ɖe ɖɔ ma ɖɔ nú mi? Má kpa mi wɛ a? Éeǒ! Un sixú kpa mi nǔgbó ǎ!

²³Đó nǔ e Aklúnɔ kplɔ́n mì bɔ un kplɔ́n mi ɔ́ ɖíe: Aklúnɔ Jezu ɔ́, zǎn e mɛ è sɔ́ ɛ jó ɔ́, é zé wɔ̌xúxú,

²⁴bó dó kú nú Mawu, bó kán, bó ɖɔ: “Élɔ́ ɔ́, agbaza ce e nyí mitɔn ɔ́ wɛ; mi ná nɔ bló gbɔn lě dó flín mì ná.”

²⁵ Mɔ̌ ɖokpó ɔ́, ée yě ɖu nǔ fó ɔ́, é zé kɔ́fu e mɛ vɛ̌ɛn ɖe ɔ́, bó ɖɔ: “Élɔ́ ɔ́, akɔjijɛ yɔ̌yɔ́ Mawu tɔn e sín afɔ hun ce sɔ́ ɖó te ɔ́ wɛ. Ényí mi ɖo nunu wɛ hweɖěbǔnu hǔn, mi nɔ nu dó flín mì ná.”

²⁶Nǔgbó ɔ́, káká jɛ hwenu e Aklúnɔ ná wá dó ɔ́, nú mi ɖo wɔ̌xúxú élɔ́ ɖu wɛ, bó ɖo nunu wɛ ɖo kɔ́fu élɔ́ mɛ hweɖěbǔnu ɔ́, kú e Aklúnɔ kú ɔ́ jlá wɛ mi ɖe.

²⁷Énɛ́ wútu ɔ́, nú mɛɖé ɖu Aklúnɔ sín wɔ̌xúxú, abǐ é nu ɖo kɔ́fu tɔn mɛ dó acɛ jí ɔ́, nǔ wɛ é wa nyi do dó Aklúnɔ sín agbaza kpó hun tɔn kpó wú.

²⁸Hǔn mɛ ɖokpó ɖokpó ní bó kíjé éɖée mɛ kpɔ́n, cóbó ɖu wɔ̌xúxú élɔ́, abǐ cóbó nu ɖo kɔ́fu élɔ́ mɛ.

²⁹Đó, wɔ̌xúxú ɔ́ kpódó vɛ̌ɛn ɔ́ kpó ɔ́, nú mɛɖé ma tunwun nǔ e ɖo yě kpó agbaza Aklúnɔ tɔn kpó tɛ́ntin ɔ́ ǎ, bó ɖu wɔ̌xúxú ɔ́, lobo nu ɖo kɔ́fu ɔ́ mɛ ɔ́, mɛ énɛ́ ɔ́ ɖo hwɛɖɔxámɛ Mawu tɔn dɔn dó éɖée jí wɛ, hwenu e é ɖo ɖuɖu wɛ, bó ɖo nunu wɛ é.

³⁰Énɛ́ ɔ́ wú wɛ mɛ gěgé ɖo mi mɛ, bó ɖo azɔn jɛ wɛ; mɛ gěgé gblé wɔ̌n; mɛ ɖě ká ko kú.

³¹Ényí mǐ nɔ kíjé mǐ ɖésúnɔ sín ayixa mɛ kpɔ́n ɔ́, mǐ ná jɛ hwɛɖɔxámɛ Mawu tɔn mɛ ǎ.

³²Amɔ̌, ényí Aklúnɔ ɖo hwɛ ɖɔ xá mǐ wɛ ɔ́, tó dɔn nú mǐ wɛ é ɖe, bónú Mawu ma wá ɖó kúhwɛ nú mǐ kpódó yě mɛ e nyí gbɛ ɔ́ tɔn lɛ́ɛ kpó ó.

³³Énɛ́ ɔ́, nɔví lɛ́ɛ mi, nú mi kplé, bó ja nǔɖuɖu Aklúnɔ tɔn ɖu gbé hǔn, mi bo nɔ nɔ te kpɔ́n miɖée.

³⁴Ényí xovɛ́ sin mɛɖé hǔn, ní nɔ ɖu nǔ ɖo xwé tɔn gbe, bó ma dɔn hwɛɖɔxámɛ Mawu tɔn dó mi jí ɖo kplé mitɔn lɛ́ɛ mɛ ó. Nǔ e kpo lɛ́ɛ ɔ́, nú un ko wá mi gɔ́n ɔ́, un ná ɖɔ gbo.