Read fon 1 Kɔlɛ́ntinu 12 Bible Online

1 Kɔlɛ́ntinu 12 - fon bible

1 Kɔlɛ́ntinu 12

¹Din ɔ́ nɔví lɛ́ɛ mi, nǔ e kunkplá nǔníná Yɛsinsɛn tɔn lɛ́ɛ ɔ́, un jló ɖɔ mi ní tunwun yě ganjí.

²Mi tunwun ɖɔ hwenu e mi ma ko nyí klísusɛntɔ́ ǎ ɔ́, vodún e nyí nǔ bo ma sixú ɖɔ xó ǎ lɛ́ɛ kɔn wɛ nǔ ɔ́ nɔ dɔn mi yi, bɔ mi nɔ sixú gló ǎ.

³Énɛ́ ɔ́ wú wɛ un jló ɖɔ mi ní tunwun ganjí ɖɔ mɛ e Yɛsinsɛn sɔ́ xó dó ayi mɛ na bɔ é ɖo ɖiɖɔ wɛ ɔ́ sixú ɖɔ: “Jezu heelú we” ǎ; nú Yɛsinsɛn ma ka sɔ́ xó dó ayi mɛ nú mɛɖé ǎ ɔ́, mɛ ɔ́ sixú ɖɔ: “Jezu wɛ nyí Aklúnɔ” ǎ.

⁴ Nǔníná Yɛsinsɛn tɔn lɛ́ɛ ɔ́, alɔkpa alɔkpa wɛ tíin; lo ɔ́, Yɛsinsɛn ɖokpó ɔ́ jɛ́n nɔ na mɛ.

⁵Mawuzɔ̌ wiwa tɛnmɛ tɛnmɛ wɛ tíin; lo ɔ́, Aklúnɔ ɖokpó ɔ́ wa ná wɛ è ka ɖe.

⁶Nǔwiwa Mawu tɔn tɛnmɛ tɛnmɛ wɛ tíin, lo ɔ́, Mawu ɖokpó ɔ́ jɛ́n ɖo nǔ énɛ́ lɛ́ɛ bǐ wa wɛ gbɔn mɛ bǐ mɛ.

⁷Yɛsinsɛn nɔ zé nǔníná ɖé dó ɖe éɖée xlɛ́ ɖo mɛ ɖokpó ɖokpó sín gbɛzán mɛ, nú ɖagbe mɛ bǐ tɔn.

⁸Yɛsinsɛn nɔ ná mɛ ɖě, bɔ é nɔ ɖɔ xó kpó nǔnywɛ́ kpó; é ɖokpó ɔ́ nɔ lɛ́ ná mɛ ɖě, bɔ é nɔ ɖɔ mɛ e tunwun nǔ ɔ́ sín xó.

⁹Yɛsinsɛn ɖokpó géé énɛ́ nɔ ná nǔɖiɖi mɛ ɖě, bó nɔ ná acɛ e nɔ gbɔ azɔn nú mɛ ɔ́ mɛ ɖě.

¹⁰Yɛsinsɛn nɔ ná acɛ mɛ ɖě, bɔ é ná sixú jlɛ́ nǔ; é nɔ ná mɛ ɖě, bɔ é nɔ ɖɔ xó e Mawu sɔ́ dó nu n'i ɖɔ é ní ɖɔ lɛ́ɛ; é nɔ lɛ́ ná mɛɖěvo, bɔ é nɔ sixú tunwun yɛ nǔgbó ɔ́ ɖo yɛ nyanya lɛ́ɛ mɛ. É nɔ ná mɛ ɖě, bɔ é nɔ ɖɔ xó dó gbe tɛnmɛ tɛnmɛ lɛ́ɛ mɛ, bó nɔ́ lɛ́ ná mɛ ɖě, bɔ é nɔ tín gbe énɛ́ lɛ́ɛ mɛ.

¹¹Yɛsinsɛn ɖokpó géé ɔ́ jɛ́n nɔ bló nǔ énɛ́ lɛ́ɛ bǐ; é nɔ ma nǔníná lɛ́ɛ nú mɛ ɖokpó ɖokpó lě e é jló e gbɔn é.

¹² Nǔgbó ɔ́, Klísu cí agbaza ɖokpó géé ɖɔhun, bɔ wǔjɔnú gěgé ɖo wǔ tɔn; wǔjɔnú gěgé wɛ ɖo agbaza énɛ́ wú, có agbaza ɖokpó wɛ é nyí,

¹³bɔ mǐ bǐ ɔ́, Jwifu kpó mɛ e ma nyí Jwifu ǎ kpó, kannumɔ kpó mɛ e ɖo é ɖésúnɔ sí ɔ́ kpó ɔ́, mǐ bǐ wɛ è zě Yɛsinsɛn ɖokpó ɔ́ dó lɛ yɛhwesin ná, bónú mǐ ná nyí agbaza ɖokpó; Yɛsinsɛn ɖokpó énɛ́ wɛ mǐ bǐ nu.

¹⁴Wǔjɔnú ɖokpó géé wɛ bló agbaza ǎ; lo ɔ́, wǔjɔnú gěgé wɛ.

¹⁵Ényí afɔ ɖɔ: “Ée un ma nyí alɔ ǎ wútu ɔ́, un nyí agbaza tɔn ǎ”; énɛ́ ɔ́ wɛ ná zɔ́n bɔ é ná gɔn wǔjɔnú agbaza tɔn nyí a?

¹⁶Ényí tó ka ɖɔ: “Ée un ma nyí nukún ǎ wútu ɔ́, un nyí agbaza tɔn ǎ”; énɛ́ ɔ́ wɛ na zɔ́n bɔ é ná gɔn wǔjɔnú agbaza tɔn nyí a?

¹⁷Nú agbaza ɔ́ bǐ ɔ́ nukún wɛ é nyí ɔ́, nɛ̌ é ka na se nǔ gbɔn? É ka nyí tó wɛ é nyí ɔ́, nɛ̌ é ná se nǔ wǎn gbɔn?

¹⁸Nǔgbó ɔ́, Mawu sɔ́ wǔjɔnú lɛ́ɛ ɖokpó ɖokpó ɖó agbaza wú, lě e é jló e gbɔn é.

¹⁹Ényí wǔjɔnú lɛ́ɛ bǐ ɔ́, nǔ ɖokpó géé wɛ yě nyí ɔ́, hǔn agbaza na tíin ǎ!

²⁰Hǔn wǔjɔnú gěgé wɛ tíin, bɔ agbaza ɖokpó géé tíin.

²¹Énɛ́ ɔ́ wú ɔ́, nukún sixú ɖɔ nú alɔ ɖɔ nǔ tɔn kún hu dó émí ó ǎ. Ta lɔ ka sixú ɖɔ nú afɔ ɖɔ nǔ tɔn kún hu dó émí ó ǎ.

²²É nyɔ́ wa ɔ́, wǔjɔnú agbaza tɔn e è nɔ mɔ ɖɔ yě kún ɖó gǎn ɖěbǔ ó lɛ́ɛ ɔ́, è sixú ɖe yě kpo ǎ.

²³Ée mǐ ma nɔ́ ké ya ɖé ná ǎ lɛ́ɛ ɔ́, mǐ nɔ́ kpé nukún dó yě wú hú ɖě lɛ́ɛ. Ée ma nyɔ́ ɖɔ è nǐ ylɔ́ nyǐkɔ yětɔn vawun ǎ lɛ́ɛ ɔ́, è nɔ lɛ́ wlí yɛ̌yi nú yě hú ɖě lɛ́ɛ bǐ.

²⁴Ée ka nyɔ́ kpɔ́n tawun ɖo agbaza mǐtɔn wú lɛ́ɛ ɔ́, mǐ nɔ wlí yɛ̌yi nú yě sɔ mɔ̌ ǎ. Mawu to agbaza ɔ́ gbɔn alɔkpa ɖé bónú é ná wlí yɛ̌yi nú wǔjɔnú e yɛ̌yi hwedó lɛ́ɛ hú ɖě lɛ́ɛ bǐ,

²⁵bónú kínklán ní ma ɖo agbaza ɔ́ mɛ ó; lo ɔ́, nú wǔjɔnú tɛnmɛ tɛnmɛ lɛ́ɛ bǐ na kpé nukún dó yěɖée wú, gbɔn agbaza ɖokpó ɔ́ mɛ.

²⁶Nú agbaza ɔ́ sín wǔjɔnú ɖé ɖo wǔvɛ́ mɔ wɛ ɔ́, wǔjɔnú ɖě lɛ́ɛ bǐ wɛ nɔ mɔ wǔvɛ́ xá ɛ; ényí è ka wlí yɛ̌yi nú ɖokpó ɔ́, ɖě lɛ́ɛ bǐ wɛ nɔ j'awǎ xá ɛ.

²⁷Agbaza Klísu tɔn wɛ mi bǐ nyí, bɔ mi mɛ ɖokpó ɖokpó nyí wǔjɔnú ɖo agbaza énɛ́ ɔ́ wú.

²⁸Đo agun ɔ́ mɛ ɔ́, Mawu to mɛsɛ́dó lɛ́ɛ jɛ nukɔn; gbeyíɖɔ Mawu tɔn lɛ́ɛ bɔ d'é wú, bɔ nǔkplɔ́nmɛtɔ́ lɛ́ɛ nyí atɔngɔ́ ɔ́; énɛ́ ɔ́ gúdo ɔ́, yě mɛ e nɔ jlɛ́ nǔ lɛ́ɛ jɛ fínɛ́, bɔ yě mɛ e ɖó acɛ e nɔ gbɔ azɔn nú mɛ lɛ́ɛ jɛ yě gúdo; mɛ e nɔ gɔ́ alɔ nú mɛ lɛ́ɛ kpó agunvíjíkpɔ́ntɔ́ lɛ́ɛ kpó, kpó yě mɛ e è nǎ bɔ yě nɔ ɖɔ xó dó gbe tɛnmɛ tɛnmɛ mɛ lɛ́ɛ kpó jɛ gǔdo yětɔn.

²⁹Mɛ bǐ wɛ nyí mɛsɛ́dó a? Mɛ bǐ wɛ nyí gbeyíɖɔ Mawu tɔn a? Mɛ bǐ wɛ nyí nǔkplɔ́nmɛtɔ́ a? Mɛ bǐ wɛ ɖó acɛ e nɔ jlɛ́ nǔ é a?

³⁰Mɛ bǐ wɛ ɖó acɛ e nɔ gbɔ azɔn nú mɛ é a? Mɛ bǐ wɛ nɔ ɖɔ xó dó gbe tɛnmɛ tɛnmɛ mɛ a? Mɛ bǐ wɛ nɔ tín gbe énɛ́ lɛ́ɛ mɛ a?

³¹Ényí mɔ̌ hǔn, nǔníná e ɖo tají hú ɖě lɛ́ɛ bǐ ɔ́ ní bó myá nukún nú mi. Amɔ̌ din ɔ́, un ná xlɛ́ ali e mi ná gbɔn, bó ná kpé nǔ e nyɔ́ hú nǔ lɛ́ɛ bǐ é wú ɔ́ mi.