Read fon 1 Kɔlɛ́ntinu 14 Bible Online

1 Kɔlɛ́ntinu 14 - fon bible

1 Kɔlɛ́ntinu 14

¹Hǔn wǎn yíyí wɛ mi ná nɔ ba jɛ nukɔn nú nǔ bǐ; mi nɔ ba nǔníná Yɛsinsɛn tɔn lɛ́ɛ lɔmɔ̌; ɖo tají ɔ́, mi nɔ ba ná yí wɛn ɖo Mawu sí bó dó.

²Mɛ e ɖo xó ɖɔ dó gbe tɛnmɛ tɛnmɛ mɛ wɛ ɔ́, gbɛtɔ́ lɛ́ɛ ɖɔ xó ná wɛ é ɖe ǎ; lo ɔ́, Mawu ɖɔ xó ná wɛ é ɖe; ɖó mɛɖé mɔ nukúnnú jɛ nǔ e ɖɔ wɛ é ɖe ɔ́ mɛ ǎ. Nǔbúdo ɖɔ wɛ é ɖe gbɔn Yɛsinsɛn sín hlɔ̌nhlɔ́n jí.

³Amɔ̌, mɛ e yí wɛn ɖo Mawu sí bó ɖo dǐdó wɛ ɔ́, gbɛtɔ́ lɛ́ɛ ɖɔ xó ná wɛ é ɖe, bónú yě ná dó yi nukɔn ɖo nǔɖiɖi mɛ, bó ná dó ná akɔ́nkpinkpan yě, bó ná dó dó gbɔ nú yě.

⁴Mɛ e ɖo xó ɖɔ dó gbe tɛnmɛ tɛnmɛ mɛ wɛ ɔ́, é ɖésúnɔ ná hlɔ̌nhlɔ́n wɛ é ɖe; lo ɔ́, mɛ e yí wɛn ɖo Mawu sí bó ɖo dǐdó wɛ ɔ́, agun ɔ́ bǐ dɔn yi nukɔn wɛ é ɖe ɖo nǔɖiɖi mɛ.

⁵Un jló ganjí ɖɔ mi bǐ ní ɖɔ xó dó gbe tɛnmɛ tɛnmɛ mɛ; lo ɔ́, mi ní yí wɛn ɖo Mawu sí bó dó ɔ́ ka jló mì hú. Nǔgbó ɔ́, mɛ e ɖo wɛn mɔ̌hunkɔtɔn lɛ́ɛ dó wɛ ɔ́ hú gǎn mɛ e ɖo xó ɖɔ dó gbe tɛnmɛ tɛnmɛ mɛ wɛ é; afi nú mɛɖé ɖo fínɛ́, bó ná sixú tín xó e ɖɔ wɛ é ɖe ɔ́ mɛ, bónú agun ɔ́ bǐ ná dó sixú yi nukɔn.

⁶Énɛ́ ɔ́, nɔví lɛ́ɛ mi, un ná kan nǔ élɔ́ byɔ́ mi: ényí un wá mi gɔ́n, bó ɖɔ xó nú mi dó gbe tɛnmɛ tɛnmɛ mɛ ɔ́, nǔ ɖagbe tɛ́ un ka wa nú mi? Un ná nyí nǔɖéwanú nú mi ɖo nǔ ɖěbǔ mɛ ǎ; afi nú é nyí ɖɔ nǔɖé wɛ Mawu ɖe xlɛ́ mì bɔ un ɖɔ nú mi; abǐ nǔɖé wɛ un tunwun bo ɖɔ nú mi, abǐ wɛn ɖé wɛ un yí ɖo Mawu sí bó dó mi; abǐ nǔɖé wɛ un kplɔ́n mi.

⁷Mi nú mǐ ná kpɔ́n nǔ dó nǔxonú lɛ́ɛ wú; mǐ ní sɔ́ kpete, abǐ agǐdigbo: nú gbe e dó wɛ é ɖe lɛ́ɛ ɔ́, ɖě ma gbɔn vo nú ɖě ǎ ɔ́, nɛ̌ wɛ è nǎ sixú tunwun nǔ e ɖɔ wɛ kpete ɔ́ ɖe ɔ́, abǐ nǔ e ɖɔ wɛ agǐdigbo ɔ́ ɖe ɔ́ gbɔn?

⁸Ényí mɛ e ɖo ahwankpɛn kún wɛ ɔ́, ma kún céɖécéɖé tɔn ǎ ɔ́, mɛ̌ ka ná sɔ́ ahwan nú?

⁹Mɔ̌ ɖokpó ɔ́, ényí mi ma ɖɔ xó dó gbe e è se ɔ́ mɛ ǎ ɔ́, nɛ̌ wɛ è nǎ sixú mɔ nukúnnú jɛ nǔ e ɖɔ wɛ mi ɖe ɔ́ wú gbɔn? Xó ɖɔ dó jɔhɔn mɛ wɛ é ná nyí.

¹⁰Gbe e ɖo gbɛ ɔ́ mɛ lɛ́ɛ sukpɔ́; amɔ̌ gbe lɛ́ɛ ɖokpó ɖokpó ɖó nǔ e ɖɔ wɛ é ɖe é.

¹¹É ka ɖo mɔ̌ có, nú un ma se gbe e mɛ ɖɔ xó nú mì dó wɛ è ɖe ɔ́ ǎ ɔ́, mɛ e ɖo xó ɖɔ nú mì dó gbe énɛ́ mɛ wɛ ɔ́, un ná nyí akɔmasegbe n'i; éyɛ́ lɔ ná nyí akɔmasegbe nú mì.

¹²Énɛ́ ɔ́, ɖěe é nyí ɖɔ nǔníná Yɛsinsɛn tɔn lɛ́ɛ ba wɛ mi ɖe vɛ́návɛ́ná ɔ́, mi ní ba ée ná zɔ́n bɔ agun ɔ́ ná yi nukɔn tawun lɛ́ɛ é, bónú yě ní sukpɔ́ ɖo mi sí.

¹³Énɛ́ ɔ́ wú ɔ́, mɛ e ɖo xó ɖɔ dó gbe tɛnmɛ tɛnmɛ mɛ wɛ ɔ́ ɖó ná byɔ́ Mawu ɖɔ ní ná émí, bónú émí ná nɔ sixú tín gbe énɛ́ lɛ́ɛ mɛ.

¹⁴Đó nú un ɖo ɖɛ xo dó gbe mɔ̌hunkɔtɔn lɛ́ɛ mɛ wɛ ɔ́, ayi ce ɖo ɖɛ mɛ nǔgbó; lo ɔ́, nǔnywɛ́ ce ka ɖo azɔ̌ wa wɛ ǎ.

¹⁵Hǔn nɛ̌ wɛ un ka ná wa gbɔn? Un ná xo ɖɛ kpó ayi ce kpó, bó ka ná xo ɖɛ kpó nǔnywɛ́ ce lɔmɔ̌ kpó, bó ka ná ji han kpó ayi ce kpó, bó ka ná ji kpó nǔnywɛ́ ce lɔmɔ̌ kpó.

¹⁶Nǔgbó ɔ́, ényí a ɖo kú dó nú Mawu wɛ ɖo ayi mɛ kɛ́ɖɛ́ ɔ́, nɛ̌ wɛ mɛ e ɖo fínɛ́, bó ma mɔ nǔ jɛ mɛ ǎ ɔ́ ná sixú yí gbe ɖɔ “Amǐ” nú kú dó nú Mawu sín ɖɛ e xo wɛ a ɖe ɔ́ gbɔn? É sixú tunwun nǔ e ɖɔ wɛ a ɖe ɔ́ ǎ.

¹⁷Nú kú dó nú Mawu sín ɖɛ e xo wɛ a ɖe ɔ́ tlɛ nyɔ́ káká ɔ́, é d'alɔ mɛ ɖě ɔ́ bɔ é yi nukɔn ǎ.

¹⁸Un dó kú nú Mawu, ɖó é bló bɔ un nɔ ɖɔ xó dó gbe tɛnmɛ tɛnmɛ mɛ hú mi bǐ.

¹⁹Lo ɔ́, nú un ka ɖo agun mɛ ɔ́, un nɔ ba ná ɖɔ xógbe e è nǎ mɔ nukúnnú jɛ mɛ ɔ́ atɔ́ɔ́n, bó ná dó kplɔ́n nǔ mɛ ɖě lɛ́ɛ hú má ɖɔ xógbe děgba we afɔwó (10.000) dó gbe tɛnmɛ tɛnmɛ mɛ.

²⁰Nɔví lɛ́ɛ mi, mi ma nyí yɔkpɔ́vú ɖo linlin mitɔn lɛ́ɛ mɛ ó; mi ní nyí yɔkpɔ́vú ɖo nǔ e kunkplá nǔ nyanya é mɛ; amɔ̌, mi ní nyí mɛxó ɖo linlin mitɔn lɛ́ɛ mɛ.

²¹ Mawuxówéma ɔ́ ɖɔ: “Mɛ e nɔ dó gbe ɖěvo lɛ́ɛ jí wɛ un ná ɖɔ xó nú togun élɔ́ gbɔn; akɔmasegbe lɛ́ɛ sín nu mɛ wɛ un ná ɖɔ xó nú yě gbɔn; nú un na bo bló gbɔn mɔ̌ ɔ́, yě ná ba ná se xó ce ǎ.” Xó e Aklúnɔ ɖɔ ɔ́ nɛ́.

²²Énɛ́ ɔ́, wuntun ɖé wɛ xó ɖɔ dó gbe tɛnmɛ tɛnmɛ mɛ nyí nú mɛ e ma ɖi nǔ ǎ lɛ́ɛ; é ka nyí mɔ̌ nú mɛ e ɖi nǔ lɛ́ɛ ǎ; é nyɔ́ wa ɔ́, wɛn yí ɖo Mawu sí bó dó ɔ́, wuntun ɖé wɛ é nyí nú mɛ e ɖi nǔ lɛ́ɛ, é ka nyí mɔ̌ nú mɛ e ma ɖi nǔ lɛ́ɛ ǎ.

²³Hǔn, mǐ ní ɖɔ agun ɔ́ bǐ kplé bɔ mɛ bǐ jɛ xó ɖɔ dó gbe tɛnmɛ tɛnmɛ mɛ jí: nú gbɛtɔ́ kpaa lɛ́ɛ abǐ mɛ e ma ɖi nǔ ǎ lɛ́ɛ byɔ́ fí e mi ɖe ɔ́, yě ná ɖɔ taɖu wɛ mi hun ǎ cé?

²⁴Lo ɔ́, nú mɛ bǐ ka yí wɛn ɖo Mawu sí bó ɖo dǐdó wɛ, bɔ mɛ e ma ɖi nǔ ǎ, abǐ gbɛtɔ́ kpaa ɖé byɔ́ fínɛ́ ɔ́, xó e se wɛ é ɖe ɔ́ ná zɔ́n, bɔ ayi tɔn ná mɔ hwɛ e é hu ɔ́; nǔ e se wɛ é ɖe ɔ́ bǐ ná nɔ ɖɔ hwɛ dó e.

²⁵Bɔ nǔ e ɖo hwlǎhwlá ɖo ayi tɔn mɛ lɛ́ɛ bǐ sésé ná jɛ wě jí. Hwenɛ́nu ɔ́, é ná cyɔ́n nukún mɛ ayǐ, bó ná sɛn Mawu, bó ná ɖɔ: “Mawu ɖo tɛ́ntin mitɔn nǔgbó.”

²⁶Nɔví lɛ́ɛ mi, étɛ́ wɛ mǐ ná ɖɔ dó sú ta ná? Ényí mi kplé, bónú mɛɖé ɖó han ɖé bó ná ji hǔn, ní ji; mɛɖé ɖó nǔkplɔ́nmɛ ɖé bó ná kplɔ́n mɛ hǔn, ní kplɔ́n mɛ; mɛɖé ɖó nǔɖexlɛ́mɛ ɖé bó ná ɖe xlɛ́ mɛ hǔn, ní ɖe xlɛ́; mɛɖé ɖó xó ɖé bó ná ɖɔ dó gbe tɛnmɛ tɛnmɛ mɛ hǔn, ní ɖɔ; mɛɖé ɖo gbe e dó wɛ mɛ ɖě ɔ́ ɖe ɔ́ ná tínmɛ wɛ hǔn, ní tínmɛ; è ɖǒ ná bló nǔ énɛ́ lɛ́ɛ bǐ, dó dó alɔ agun ɔ́, bɔ é ná yi nukɔn.

²⁷Ényí è jɛ xó ɖɔ dó gbe tɛnmɛ tɛnmɛ mɛ jí ɔ́, mɛ e ná ɖɔ lɛ́ɛ ní ma sɔ́ hú mɛ we, abǐ mɛ atɔn ó; mɛ ɖě ɔ́ ka ɖó ná ɖɔ étɔn fó hwɛ̌, cóbɔ mɛɖěvo ná yí; mɛɖé ní ka tín nǔ e ɖɔ wɛ yě ɖe ɔ́ mɛ.

²⁸Nú mɛɖé ma ɖo fínɛ́ bó ná tín nǔ e ɖɔ wɛ è ɖe ɔ́ mɛ ǎ hǔn, yě ní nɔ abwɛ̌ ɖo agun ɔ́ mɛ; è nǐ ɖɔ xó nú mɛɖée, bó ɖɔ xó nú Mawu.

²⁹Ényí mɛ e Mawu nɔ dó wɛn lɛ́ɛ ɖě ja xó ɖɔ gbé hǔn, yě mɛ we, abǐ yě mɛ atɔn ní yí xó, bónú mɛ ɖě lɛ́ɛ ní gbéjé nǔ e ɖɔ wɛ yě ɖe lɛ́ɛ kpɔ́n.

³⁰Amɔ̌, nú mɛɖé ɖo fínɛ́ bɔ Mawu ɖe nǔɖé xlɛ́ ɛ ɔ́, mɛ e ɖo xó ɖɔ wɛ ɔ́ ɖó ná nɔ abwɛ̌.

³¹Mi bǐ sixú dó wɛn Mawu tɔn ɔ́, mɛ ɖě jɛ mɛ ɖě gúdo, bó ná dó ná kplɔ́n kpódó akɔ́nkpinkpan kpó mɛ bǐ.

³²Yě mɛ e ɖo wɛn mɔ̌hunkɔtɔn dó wɛ lɛ́ɛ ɖó ná ɖu ɖo yěɖée jí, ɖo nǔníná e Mawu ná yě ɔ́ nukɔn.

³³Đó Mawu ylɔ́ mǐ, bónú mǐ ná zán gbɛ hannyahannya ǎ, lo ɔ́, mǐ ná mɔ fífá wútu wɛ é ylɔ́ mǐ. Lě e é kó nɔ nyí gbɔn ɖo mɛɖeɖóvo Mawu tɔn lɛ́ɛ sín agun lɛ́ɛ bǐ mɛ ɔ́,

³⁴nyɔ̌nu lɛ́ɛ ɖó ná nɔ abwɛ̌ hwenu e agun ɔ́ kplé é: è nǎ gbe yě ɖɔ yě ní ɖɔ xó ǎ; lě e sɛ́n ɔ́ lɔmɔ̌ ɖɔ gbɔn ɔ́, yě ɖó ná hwíhwɛ́ yěɖée.

³⁵Ényí yě ɖo nǔɖé sín do ba wɛ hǔn, yě ní kan xó byɔ́ asú yětɔn lɛ́ɛ ɖo xwé gbe. É nyɔ́ bónú yě ná ɖɔ xó ɖo agun ɔ́ mɛ ǎ.

³⁶Abǐ mi gɔ́n wɛ Mawuxó ɔ́ gosín a? Abǐ midɛɛ lɛ́ɛ kɛ́ɖɛ́ gɔ́n wɛ é wá a?

³⁷Ényí mɛɖé lin ɖɔ émí nyí gbeyíɖɔ Mawu tɔn, abǐ é lin ɖɔ émí ɖó nǔníná Yɛsinsɛn tɔn ɖé ɔ́, mɛ ɔ́ ɖó ná tunwun ɖɔ nǔ e Aklúnɔ zɔ́n ɔ́ wɛ nyí nǔ e wlán sɛ́ dó mi wɛ un ɖe é.

³⁸Amɔ̌, nú mɛɖé má ké ya nú nǔkplɔ́nmɛ élɔ́ ǎ hǔn, mɛɖé má ké ya nú é lɔmɔ̌ ó.

³⁹Énɛ́ ɔ́, nɔví ce lɛ́ɛ mi, nǔ e mi ɖó ná nɔ ba ɔ́ wɛ nyí ɖɔ mi ná nɔ dó wɛn e Mawu dó mi é; amɔ̌, mi ma gbɛ́ xó ɖɔ dó gbe tɛnmɛ tɛnmɛ mɛ ó.

⁴⁰È nǐ bló nǔ lɛ́ɛ bǐ lě e é jɛ xá gbɔn é; è nǐ bló kpó tito kpó.