Read fon 1 Kɔlɛ́ntinu 16 Bible Online

1 Kɔlɛ́ntinu 16 - fon bible

1 Kɔlɛ́ntinu 16

¹ Un ná lɛ́ ɖɔ xó kpɛɖé nú mi dó akwɛ́ e è nɔ jɔ dó mɛɖeɖóvo Mawu tɔn lɛ́ɛ tamɛ ɔ́ wú: mi wa nǔ bónú é ní sɔgbe xá lě e un ɖɔ nú agun e ɖo Galatinu lɛ́ɛ ɖɔ yě ní bló gbɔn é.

²Azǎn nukɔntɔn e ɖo aklúnɔzán gbla mɛ é tɛgbɛ ɔ́, mi mɛ ɖokpó ɖokpó ɖó ná ɖe akwɛ́ ɖó vo lě e mi mɔ akwɛ́ gbɔn é, bó ná sɔ́ ɖ'ayǐ ɖo xwé mitɔn lɛ́ɛ gbe, bónú é ma wá nyí hwenu e un ná wá ɔ́ wɛ è nǎ wá jɔ akwɛ́ ó.

³Hwenu e un ná wá ɔ́, un ná wlán wěma dó así nú mɛ e mi ná ɖe lɛ́ɛ, bó ná sɛ́ yě dó Jeluzalɛ́mu, bɔ yě ná bɛ́ nǔníná mitɔn lɛ́ɛ yi jó.

⁴Ényí é byɔ́ ɖɔ nyi lɔmɔ̌ ná yi ɔ́, yě ná xwedó mì yi.

⁵ Un ná wá mi gɔ́n; un ná gbɔn Masedwani wá; ɖó un ná gbɔn tokpɔn énɛ́ mɛ dín.

⁶Bóyá un sixú nɔ mi gɔ́n kpɛɖé; afɔ nyɔ́ ɔ́, un sixú nɔ fínɛ́ avivɔ hwenu ɔ́ bǐ; énɛ́ ɔ́, un ná yi fí ɖěbǔ ɔ́, mi ná dó alɔ mì bɔ un ná yi.

⁷Đó un jló ɖɔ ma wá kpɔ́n mi kpowun, bó ná dín ǎ. Ényí é jló Aklúnɔ ɔ́, un ɖo linlin wɛ ɖɔ un ná nɔ mi gɔ́n nú hwenu kpɛɖé.

⁸ É ka ɖo mɔ̌ có, un tunwun ɖɔ un ná nɔ Efɛ́zi káká yi jɛ Pantekótu gbe.

⁹Đó kɛntɔ́ lɛ́ɛ sukpɔ́; Mawu ka hun ali nú mì ɖo fínɛ́, bɔ un ná wa azɔ̌ ɖaxó ɖé, bɔ nǔ ɖagbe ná tɔ́n sín mɛ.

¹⁰ Ényí Timɔtée wá hǔn, mi bló gbɔn ɖě bónú xɛsi ní ma ɖi i ɖo tɛ́ntin mitɔn ó; ɖó é ɖo aklúnɔzɔ́ ɔ́ wa wɛ nyɛ ɖɔhun.

¹¹Mɛ ɖěbǔ má dó vɛ̌ n'i ó; é nyɔ́ wa ɔ́, alɔ wɛ mi ná dó e, bɔ é ná yi tomɛ kpó fífá kpó bó ná sixú lɛ́ kɔ wá gɔ̌n ce, ɖó un ɖo te kpɔ́n é kpódó nɔví lɛ́ɛ kpán.

¹²Nɔví mǐtɔn Apolosu ɔ́, azɔn mɔ̌kpán wɛ un ko ná akɔ́nkpinkpan éyɛ́ ɖɔ é kpódó nɔví ɖě lɛ́ɛ kpán ní wá mi gɔ́n; lo ɔ́, é ka jló e ɖěbǔ ɖɔ é ní wá din ǎ; é ka ɖo mɔ̌ có, nú é ko wá mɔ ali tɔn ɔ́, é ná wá.

¹³Mi nɔ acéjí; mi syɛ́nlǐn ɖo nǔɖiɖi mɛ; mi ɖó akɔ́nkpinkpan; mi ɖó hlɔ̌nhlɔ́n.

¹⁴Mi wa nǔ bǐ kpó wǎn yíyí kpó.

¹⁵ Nɔví lɛ́ɛ mi, mi tunwun Sitefanási kpódó hɛ̌nnu tɔn kpó: mi tunwun ɖɔ, ɖo Akáyi ɔ́, yě wɛ nyí mɛ nukɔntɔn e húzú jɛ Klísu sín ali jí, bó jó yěɖée dó nú mɛɖeɖóvo Mawu tɔn lɛ́ɛ é. Un ɖo byɔ̌byɔ́ mi wɛ ɖɔ,

¹⁶mi hwíhwɛ́ miɖée dó mɛ mɔ̌hunkɔtɔn lɛ́ɛ, kpódó mɛ e kpó yě kpó ɖo azɔ̌ wa wɛ syɛ́nsyɛ́n lɛ́ɛ bǐ kpán glɔ́.

¹⁷Đěe Sitefanási kpó Fɔtunatúsi kpó, kpódó Akayikúsi kpán wá ɔ́, xomɛ hun mì, ɖó do mitɔn e jɛ wɛ un ɖe, ɖó fí ma ɖe mitɔn wútu ɔ́, yě wá sú;

¹⁸yě blǒ bɔ ayi ce j'ayǐ lě e yě blǒ bɔ mi ɖésúnɔ sín ayi j'ayǐ gbɔn é. Mɛ mɔ̌hunkɔtɔn lɛ́ɛ ɔ́, è ɖǒ ná tunwun lě e è ɖǒ ná nɔ́ kpa yě gbɔn é.

¹⁹ Agun e ɖo tokpɔn Azíi tɔn mɛ lɛ́ɛ dó gbe sɛ́ dó mi. Akilási kpó Plisílu kpó, kpódó agun e nɔ kplé ɖo xwé yětɔn gbe ɔ́ kpán dó gbe sɛ́ dó mi ɖaxó ɖo Aklúnɔ mɛ.

²⁰Nɔví e ɖo fí lɛ́ɛ bǐ dó gbe sɛ́ dó mi. Mi kí nɔví nɔví sín si dó dó gbe miɖée ná.

²¹Xógbe élɔ́ e ná xa wɛ mi ɖe din ɔ́, nyɛ ɖésúnɔ wɛ sɔ́ alɔ ce dó wlán ná: Nyɛ Pɔ́lu dó gbe sɛ́ dó mi.

²²Ényí mɛɖé ma yí wǎn nú Aklúnɔ ǎ hǔn, heelú i! Aklúnɔ mǐtɔn, wǎ!

²³Fɛ́nú Aklúnɔ Jezu tɔn ní nɔ kpɔ́ xá mi.

²⁴Wǎn yíyí ce ɖo kpɔ́ xá mi bǐ ɖo bǔ e mǐ ɖe xá Klísu Jezu ɔ́ mɛ.