Read fon 1 Kɔlɛ́ntinu 2 Bible Online

1 Kɔlɛ́ntinu 2 - fon bible

1 Kɔlɛ́ntinu 2

¹Nɔví lɛ́ɛ mi, hwenu e un wá mi gɔ́n bó ná ɖɔ nǔbúdo Mawu tɔn ɔ́ sín xó nú mi ɔ́, un zán xógbe gɛ́dɛ́gɛ́dɛ́, abǐ nǔnywɛ́ xwítíxwítí ɖé dó ɖɔ xó nú mi ǎ.

²Đó un ko ɖɔ ɖɔ hwenu e un ná nɔ mi gɔ́n xɔ ɔ́ bǐ sésé ɔ́, un kún sɔ́ ná tunwun nǔ ɖěbǔ zɛ Jezu Klísu wú ó; ɖo tají ɔ́, Jezu Klísu e è ká nyi aklúzu jí é.

³ Énɛ́ ɔ́ wú wɛ un wá mi gɔ́n, gǎn ɖé ma ɖó, kpó xɛsi kpó, kpódó sísɔ́sísɔ́ kpán.

⁴É nyí nǔnywɛ́ gbɛtɔ́ tɔn sín xó víví lɛ́ɛ wɛ un sɔ́ dó kplɔ́n nǔ mɛ ǎ, é ka nyí é wɛ un dó ɖɔ Mawuxó ɔ́ ná ǎ; lo ɔ́, Yɛ Mawu tɔn sín hlɔ̌nhlɔ́n sín nǔwiwa wɛ.

⁵Énɛ́ ɔ́, nǔɖiɖi mitɔn jínjɔ́n nǔnywɛ́ gbɛtɔ́ lɛ́ɛ tɔn jí ǎ; lo ɔ́ hlɔ̌nhlɔ́n Mawu tɔn jí wɛ é jínjɔ́n.

⁶É ɖo mɔ̌ có, un ɖo nǔnywɛ́ ɖé kplɔ́n klísusɛntɔ́ e ko zin ɖo nǔɖiɖi mɛ lɛ́ɛ wɛ; amɔ̌ nǔnywɛ́ énɛ́ nyí nǔnywɛ́ gbɛmɛ fí tɔn ǎ; é ka nyí hlɔ̌nhlɔ́n e ɖo acɛ kpa wɛ ɖo gbɛ élɔ́ mɛ, bɔ è ka ná wá hu acɛ ná lɛ́ɛ ǎ[1].

⁷Éeǒ! Nǔnywɛ́ énɛ́ jlá wɛ un ɖe ǎ. Nǔnywɛ́ Mawu tɔn e nyí nǔbúdo bɔ Mawu zé hwlá dó gbɛtɔ́ lɛ́ɛ é jlá wɛ un ɖe; nǔnywɛ́ énɛ́ wɛ Mawu ko sɔ́ ɖ'ayǐ xóxó nú susu mǐtɔn, cóbɔ gbɛ ɔ́ wá tíin.

⁸Hlɔ̌nhlɔ́n gbɛ élɔ́ mɛ tɔn lɛ́ɛ ɖěbǔ kó tunwun nǔnywɛ́ énɛ́ ɖ'ayǐ ǎ; ényí ɖɔ yě kó tunwun wɛ ɔ́, yě ná zɔ́n ɖɔ è nǐ ká Aklúnɔ susunɔ ɔ́ nyi aklúzu jí ǎ.

⁹ Lo ɔ́, lě e Mawuxówéma ɔ́ kó ɖɔ gbɔn ɔ́: “Nǔ e mɛ ɖěbǔ ma mɔ kpɔ́n gbeɖé, bó ma ka se kpɔ́n gbeɖé ǎ ɔ́, nǔ e mɛ ɖěbǔ ma lin kpɔ́n gbeɖé ǎ ɔ́, Mawu bló nǔ énɛ́ ɖ'ayǐ nú mɛ e yí wǎn n'i lɛ́ɛ.”

¹⁰Mǐdɛɛ lɛ́ɛ wɛ ka nyí mɛ e Mawu ɖe nǔbúdo énɛ́ xlɛ́ gbɔn Yɛsinsɛn jí é. Nǔgbó ɔ́, Yɛsinsɛn ɔ́ nɔ ba do nú nǔ bǐ káká jɛ tito Mawu tɔn e ɖo hwlǎhwlá ɖo gɔngɔn mɛ lɛ́ɛ é lɔ jí.

¹¹Đo gbɛtɔ́ nyínyí sín alixo ɔ́, yɛ e ɖo gbɛtɔ́ mɛ ɔ́ jɛ́n tunwun nǔ e kunkplá gbɛtɔ́ é; mɔ̌ ɖokpó ɔ́, Yɛ Mawu tɔn kɛ́ɖɛ́ jɛ́n tunwun nǔ e kunkplá Mawu é.

¹²Mǐdɛɛ lɛ́ɛ ɔ́, ényí yɛ e ɖo gbɛ élɔ́ mɛ ɔ́ wɛ è nǎ mǐ ǎ; lo ɔ́, Mawu ná mǐ Yɛ e gosín gɔ̌n tɔn é, bónú mǐ ná tunwun nǔ e Mawu ná mǐ vɔ̌nu lɛ́ɛ bǐ,

¹³bó nɔ́ ɖo xó tɔn ɖɔ wɛ. É nyí xógbe e nǔnywɛ́ gbɛtɔ́ tɔn nɔ kplɔ́n mɛ lɛ́ɛ wɛ mǐ dó ɖo xó tɔn ɖɔ ná wɛ ǎ; lo ɔ́, ée Yɛ Mawu tɔn nɔ kplɔ́n mɛ lɛ́ɛ wɛ mǐ dó ɖo ɖiɖɔ ná wɛ. Mɛ e jí Yɛ énɛ́ ɖe lɛ́ɛ ɔ́, lě e mǐ nɔ tín nǔgbó Mawu tɔn ɔ́ mɛ nú yě gbɔn ɔ́ nɛ́.

¹⁴Mɛ e ma ɖó Yɛ Mawu tɔn ǎ ɔ́ sixú yí nǔníná Mawu tɔn e Yɛ énɛ́ ɔ́ nɔ ná mɛ lɛ́ɛ é ǎ; xlonɔxó wɛ é nɔ́ mɔ xó énɛ́ lɛ́ɛ dó mɔ ná; é sixú mɔ nukúnnú jɛ yě mɛ ǎ, ɖó Yɛ Mawu tɔn ɔ́ jɛ́n è sixú dó ba do nú nǔgbó Mawu tɔn lɛ́ɛ ná.

¹⁵Mɛ e ɖó Yɛ Mawu tɔn ɔ́ jɛ́n sixú ɖɔ hwɛ dó nǔ bǐ; lo ɔ́, mɛ ɖěbǔ sixú ɖɔ hwɛ dó éyɛ́ ǎ.

¹⁶ Ɖó Mawuxówéma ko ɖɔ: “Mɛ̌ ka tunwun Aklúnɔ sín linlin lɛ́ɛ? Mɛ̌ ka sixú kplɔ́n nǔ i?” Amɔ̌, mǐdɛɛ lɛ́ɛ ɔ́, linlin Klísu tɔn wɛ mǐ ɖó.