Read fon 1 Kɔlɛ́ntinu 4 Bible Online

1 Kɔlɛ́ntinu 4 - fon bible

1 Kɔlɛ́ntinu 4

¹Hǔn, mi ɖó ná nɔ mɔ mǐ dó mɔ azɔ̌watɔ́ Klísu tɔn ná, bó ɖó ná mɔ mǐ dó mɔ mɛ e Mawu sɔ́ nǔbúdo tɔn lɛ́ɛ sín azɔ̌ dó así ná lɛ́ɛ é.

²Mɛ e è zě azɔ̌ ɖé dó así ná ɔ́, nǔ e byɔ́ ɛ wɛ è ɖe kpowun ɔ́ wɛ nyí ɖɔ é ní nɔ gbejí.

³Nyɛ ɔ́, ényí mi ɖɔ hwɛ xá mì, abǐ è ɖɔ hwɛ xá mì, ɖo hwɛɖɔxɔsá gbɛtɔ́ lɛ́ɛ tɔn ɔ́, énɛ́ ɔ́ vɛ́ nú mì ɖěbǔ ǎ; un ka ɖo hwɛ ɖɔ xá nyɛ ɖésúnɔ wɛ ǎ.

⁴Nǔgbó ɔ́, ayixa ce xo hun xá mì ɖo nǔ ɖěbǔ mɛ ǎ; lo ɔ́, énɛ́ ɔ́ ko ɖe xlɛ́ ɖɔ un nyí xomɛvɔ́nɔ ǎ. Aklúnɔ wɛ nyí mɛ e nɔ ɖɔ hwɛ dó mì é.

⁵Énɛ́ ɔ́ wú ɔ́, mi ma ɖɔ hwɛ dó mɛ ɖěbǔ cóbónú hwenu e Mawu ɖó ɔ́ ná su ó; mi nɔ te nú Aklúnɔ ní wá: é ná ɖe nǔ e ɖo hwlǎhwlá ɖo zǐnflú mɛ ɔ́ nyi wěxo, bɔ linlin e ɖo ayixa mɛ nú gbɛtɔ́, bɔ è ma mɔ nukúnnú jɛ wú ǎ lɛ́ɛ ɔ́, é ná ɖe xlɛ́; énɛ́ ɔ́, Mawu ná kpa mɛ ɖokpó ɖokpó lě e é jɛ xá gbɔn é.

⁶Nɔví lɛ́ɛ mi, nǔ énɛ́ lɛ́ɛ e un ɖɔ nú mi din ɔ́, Apolosu kpó nyɛ ɖésúnɔ kpó wú wɛ un ɖɔ xó dó, bó dó kplɔ́n nǔ mi, bónú mi ná kpɔ́n nǔ dó mǐ wú, bó ná tunwun nǔ e ɖɔ wɛ lǒ élɔ́ ɖe é: “Mi ma wa nǔ zɛ nǔ e è wlán ɔ́ wú ó.” Mɛ ɖé ma ɖo mi mɛ, bó sɔ́ mɛɖé dó xɔ susu ná, bó gbɛ́ wǎn nú mɛɖé ó.

⁷Đó mɛ̌ wɛ bló bɔ a hú gǎn mɛ ɖě lɛ́ɛ? Mawu wɛ ná nǔ e a ɖǒ lɛ́ɛ bǐ we ǎ cé? Ée nǔ ka nyí mɔ̌ ɔ́, nɛ̌ ka gbɔn bɔ a nɔ sɔ́ nǔ e ɖo así we ɔ́ dó yí go ná, nǎ wɛ è nǎ we ǎ ɖɔhun?

⁸Mi ɖíe ko ɖó nǔ e ba wɛ mi ɖe lɛ́ɛ bǐ e. Mi ɖíe ko jɛ dɔkun e. Mi ko húzú axɔ́sú, có mǐdɛɛ lɛ́ɛ ka nyí axɔ́sú ǎ. Un jló ganjí ɖɔ mi ní ɖu axɔ́sú nǔgbó, bónú mǐ lɔmɔ̌ ná ɖu axɔ́sú xá mi.

⁹Đó mǐ mɛ mɛsɛ́dó lɛ́ɛ ɔ́, ɖo nukún ce mɛ ɔ́, é cí tɛn gǔdo tɔn ɔ́ mɛ wɛ Mawu sɔ́ mǐ ɖó ɖɔhun; mǐ cí mɛ e ɖó ná kú ɖo agbawungba ɔ́ ɖɔhun; mǐ húzú nǔkpínkpɔ́n nú gbɛ ɔ́ bǐ, bó húzú nǔkpínkpɔ́n nú wɛnsagun lɛ́ɛ kpó gbɛtɔ́ lɛ́ɛ kpó.

¹⁰Mǐ nyí xlonɔ ɖó Klísu wútu; midɛɛ lɛ́ɛ ka nyí nǔnywɛ́tɔ́ ɖo bǔ e mi ɖe xá Klísu ɔ́ mɛ; mǐdɛɛ lɛ́ɛ vɔ́, midɛɛ lɛ́ɛ ka ɖó hlɔ̌nhlɔ́n; è dó vɛ̌ nú mǐ, bó ka wlí yɛ̌yi nú midɛɛ lɛ́ɛ.

¹¹Káká jɛ gan élɔ́ mɛ ɔ́, mǐ mɔ nǔ ná ɖu ǎ, mǐ ka mɔ sin ná nu ǎ; avɔ vún mǐ; è xo mǐ; mǐ flú yi dě ɔ́, mǐ nɔ́ flú yi dě.

¹² Mǐ nɔ́ jɛ tagba bó nɔ́ wa azɔ̌, bó ná dó sixú nyí mi ɖésúnɔ; è ɖo mǐ zun wɛ ɔ́, mǐ nɔ́ ɖo fífá byɔ́ nú mɛ wɛ; è ɖo ya dó nú mǐ wɛ ɔ́, mǐ nɔ́ dɛ ɖ'é nu.

¹³Mǐ nɔ́ nyɔ́ xomɛ dó mɛ e ɖo xó mǐtɔn nyanya ɖɔ wɛ lɛ́ɛ wú. Káká wá jɛ din ɔ́, è nɔ lɛ́ mɔ mǐ dó mɔ zunkɔ́ gbɛ ɔ́ tɔn ná, bó nɔ́ mɔ mǐ dó mɔ nǔ kwíji gbɛtɔ́ lɛ́ɛ tɔn ná.

¹⁴Ényí un ná dó winnyá mi wú wɛ un wlán nǔ énɛ́ lɛ́ɛ sɛ́ dó mi ǎ; lo ɔ́, nú má dó kplɔ́n nǔ mi vǐ ce vívɛ́ná lɛ́ɛ ɖɔhun wú wɛ.

¹⁵Đó, nú mi na bo ɖó vǐhɛntɔ́ děgba we afɔwó (10.000) ɖo Klísu mɛ ɔ́, mi ɖó tɔ́ gěgé ɖo Klísu mɛ ǎ: nǔgbó ɔ́, nǔ e kunkplá gbɛzán mitɔn ɖo Klísu Jezu mɛ ɔ́, nyɛ wɛ húzú tɔ́ nú mi, gbɔn Wɛn Ɖagbe e un jlá mi ɔ́ jí.

¹⁶ Hǔn un ɖo byɔ̌byɔ́ mi wɛ ɖɔ mi ní wa nǔ ɖi nyɛ ɖɔhun.

¹⁷Énɛ́ ɔ́ wú ɔ́, un sɛ́ vǐ vívɛ́ ce Timɔtée dó mi; é ɖo gbejí nú Aklúnɔ. É ná flín lě e un nɔ zán gbɛ ce gbɔn ɖo Klísu mɛ ɔ́ mi; lě e un nɔ zán gbɛ gbɔn ɔ́ wɛ un nɔ kplɔ́n mɛ gbɔn fí bǐ, ɖo agun Klísu tɔn lɛ́ɛ bǐ mɛ.

¹⁸Mɛ ɖé lɛ́ɛ ɖo mi mɛ, bó ɖo go yí wɛ, ɖi un kún ná wá mi gɔ́n ó ɖɔhun.

¹⁹Amɔ̌ ényí é jló Aklúnɔ ɔ́, un ná wá mi gɔ́n ɖo malín málín mɛ din; énɛ́ ɔ́, un ná tunwun nǔ e wú goyítɔ́ énɛ́ lɛ́ɛ kpé é; ényí xó yětɔn lɛ́ɛ kɛ́ɖɛ́ wɛ un ná se kpowun ǎ.

²⁰Đó axɔ́súɖuɖu Mawu tɔn ɔ́, é nyí xó nyɔ́ ɖɔ nú ɖé ǎ; hlɔ̌nhlɔ́n nú wɛ[2].

²¹Nɛ̌ mi ka jló gbɔn? Un ja gɔ̌n mitɔn hǔn, ma hɛn kpo a? Abǐ ma wá kpó wǎn yíyí kpó, kpódó xomɛfífá kpán a?