Read fon 2 Kɔlɛ́ntinu 10 Bible Online

2 Kɔlɛ́ntinu 10 - fon bible

2 Kɔlɛ́ntinu 10

¹Nyɛ Pɔ́lu e è nɔ ɖɔ, nú un ɖo kpɔ́ xá mi ɔ́, un nɔ fá, un ka ɖo zɔ ɔ́ un nɔ wa adǎn sɛ́ dó mi ɔ́, nyɛ ɖésú wɛ ɖo nǔ élɔ́ byɔ́ mi wɛ; gbɔn xomɛfífá kpó xomɛnyínyɔ́ Klísu tɔn kpó mɛ ɔ́, un ɖo vo sa nú mi wɛ ɖɔ:

²mi ma wa nǔ, bónú ma ɖe lě e un kpan akɔ́n gbɔn ɔ́ xlɛ́ mi hwenu e un ná ɖo mi gɔ́n é ó; ɖó un ɖó gǎnjɛwú ɖɔ un ná kpan akɔ́n dó ɖɔ xó nú mɛ e nɔ lin ɖɔ tito gbɛtɔ́ tɔn wɛ mǐ nɔ́ xwedó, dó wa nǔ ná lɛ́ɛ é.

³Agbaza gbɛtɔ́ tɔn mɛ wɛ mǐ ɖe nǔgbó; mǐ ka zé walɔ gbɛtɔ́ tɔn dó ɖo ahwan fun ná wɛ ǎ.

⁴Ahwanfunnú e dó fun ahwan ná wɛ mǐ ɖe lɛ́ɛ nyí gbɛtɔ́ gbɛmɛ fí tɔn lɛ́ɛ tɔn ǎ: ahwanfunnú hlɔ̌nhlɔ́nnɔ Mawu tɔn e è nɔ dó mu ahohó lɛ́ɛ ná ɔ́ wɛ. Mǐ nɔ́ gba linlin e ma sɔgbe ǎ lɛ́ɛ bǐ dó.

⁵Nǔ e è sɔ́ goyíyí dó glɔ́n ali ná, bónú è ma tunwun Mawu ó lɛ́ɛ bǐ ɔ́, mǐ nɔ́ flí bǐ xwe; mǐ nɔ́ wlí linlin lɛ́ɛ bǐ dó gan, bó ná dɔn yě nú yě ná se tónú nú Klísu.

⁶Mǐ ɖo gbesisɔ mɛ, bónú mi se tónú bɔ nǔ bǐ vɔ ɖ'é wú tlóló ɔ́, mǐ ná dɔn tó nú tónúmase sín nǔwiwa lɛ́ɛ bǐ.

⁷Nukúnta wɛ mi nɔ kpɔ́n nǔ lɛ́ɛ ɖe kpowun. Ényí mɛɖé gán jɛ wú ɖɔ émí nyí Klísu tɔn hǔn, mɛ ɔ́ ní tunwun dó ayi mɛ ɖɔ lě e é nyí Klísu tɔn ɔ́, mɔ̌ wɛ mǐ lɔ nyí Klísu tɔn.

⁸Đó nú un na bo gó zɛ jlɛ̌ wú kpɛɖé ɖó acɛ e Aklúnɔ ná mì ɔ́ wútu ɔ́, winnyá ná hu mì ǎ; acɛ énɛ́ ɔ́ sín azɔ̌ wɛ nyí ɖɔ mǐ ná bló bɔ gbɛ̌kplékplé mitɔn ná yi nukɔn ɖo nǔɖiɖi mɛ; é nyí mǐ ná bló bɔ mi ná gbadó wɛ ǎ.

⁹Un jló ɖɔ é ní ma nyí xɛsi ba ná dó mi wɛ un ɖe, bó ɖo nǔ e ɖo wěma ce mɛ lɛ́ɛ wlán sɛ́ dó mi wɛ ó.

¹⁰Nǔgbó ɔ́, nǔ e è nɔ ɖɔ ɔ́ ɖíe: “Pɔ́lu ɔ́, xó e é nɔ wlán dó wěma tɔn lɛ́ɛ mɛ ɔ́ nɔ ɖó hlɔ̌nhlɔ́n, bó nɔ ɖó zin; nú é ka ɖo tɛ́ntin mǐtɔn ɔ́, é nɔ ɖó gǎn ɖé ǎ, bɔ lě e é nɔ́ ɖɔ xó gbɔn ɔ́ nɔ́ blá wǔ.”

¹¹Mɛ e nɔ ɖo xó énɛ́ ɖɔ wɛ ɔ́, ní tunwun ganjí ɖɔ: hwenu e mǐ ɖo zɔ ɔ́, nǔ e mǐ nɔ́ wlán sɛ́ dó mi lɛ́ɛ kún gbɔn vo nú nǔ e mǐ ná wa hwenu e mǐ ná ɖo tɛ́ntin mitɔn lɛ́ɛ é ó.

¹²Nǔgbó ɔ́, mǐ ná glá bó sɔ́ mǐɖée ɖó mɛɖé há jí, abǐ mǐ ná jlɛ́ mǐɖée dó mɛɖé lɛ́ɛ wú, ɖo yě mɛ e nɔ sɔ́ yěɖée dó mɔ nǔgɛ́n ná lɛ́ɛ mɛ ǎ. Xlonɔ wɛ nú yě, ɖó yě ɖésúnɔ wɛ nɔ́ bló jlɛ̌nú yětɔn, bó nɔ dó jlɛ́ yěɖée ná; yě nɔ jlɛ́ yěɖée dó yěɖée wú.

¹³Mǐdɛɛ lɛ́ɛ ɔ́, mǐ ná jlá ajɔ̌ nú mǐɖée zɛ jlɛ̌ e è ɖǒ nú mǐ ɔ́ wú ǎ; azɔ̌ e Mawu sɔ́ dó así nú mǐ ɔ́, fí e é ɖɔ mǐ ní wá yi jɛ, bó ná gbe tɔn mǐ bɔ mǐ wa ɖo mi gɔ́n ɔ́, fínɛ́ wɛ mǐ ná jlá ajɔ̌ nú mǐɖée yi ɖó te ɖó. Azɔ̌ e mǐ wa ɖo mi gɔ́n ɔ́ lɔ ɖ'é mɛ.

¹⁴Mǐ zɛ jlɛ̌ e è ɖǒ nú mǐ ɔ́ wú, bónú é ná nyí ɖɔ mǐ kún hun káká wá gɔ̌n mitɔn ó ǎ; ɖó mǐ hun káká wá mi gɔ́n, bó wá jlá Wɛn Ɖagbe e ɖɔ xó dó Klísu wú ɔ́ mi.

¹⁵Énɛ́ ɔ́, mǐ nɔ́ tɔ́n sín jlɛ̌ e è ɖǒ ɔ́ mɛ ǎ; mǐ nɔ́ zé azɔ̌ e mɛɖěvo lɛ́ɛ wa ɔ́ dó jlá ajɔ̌ nú mǐɖée ǎ; é nyɔ́ wa ɔ́, mǐ ɖo nukún ɖó wɛ ɖɔ nǔɖiɖi mitɔn ná jɛjí, bónú mǐ ná sixú wa azɔ̌ e hú gǎn mɔ̌ é ɖo tɛ́ntin mitɔn, bó ná nɔ jlɛ̌ e Mawu ɖó nú mǐ ɔ́ mɛ tɛgbɛ.

¹⁶Énɛ́ ɔ́ gúdo ɔ́, mǐ hɛn ɔ́, mǐ ná jlá Wɛn Ɖagbe ɔ́ hɛn yi to e zɛ mi wú lɛ́ɛ gbé jí, ɖó mǐ jló ná zé azɔ̌ e mɛɖěvo lɛ́ɛ ko wa ɖo yě ɖésúnɔ sín azɔ̌ jí ɔ́, dó jlá ajɔ̌ nú mǐɖée ǎ.

¹⁷ É ka ɖo mɔ̌ có, lě e Mawuxówéma ɔ́ ɖɔ gbɔn ɔ́ ɖíe: “Nú mɛɖé jló ná jlá ajɔ̌ nú éɖée ɔ́, ní jlá ɖó Aklúnɔ ɔ́ wú.”

¹⁸Nǔgbó ɔ́, é nyí mɛ e nɔ ɖɔ xó ɖagbe dó éɖée wú ɔ́ wɛ Aklúnɔ nɔ yí wǎn ná ǎ; lo ɔ́, mɛ e wú Mawu nɔ ɖɔ xó ɖagbe dó ɔ́ wɛ é nɔ yí wǎn ná.