Read fon 2 Kɔlɛ́ntinu 11 Bible Online

2 Kɔlɛ́ntinu 11 - fon bible

2 Kɔlɛ́ntinu 11

¹Ényí mi sixú gbɔ nú ma ɖɔ tamɛmasɔgbenánɔ xó kpɛɖé nú mi ɔ́, nyɔ́ wɛ lo nyɔ́. Nǔgbó wɛ! Mi gbɔ ma ɖɔ!

²Un nɔ hwan wǔ dó mi; wǔhwinhwan e gosín Mawu gɔ́n ɔ́ wɛ un ka nɔ hwan dó mi; ɖó ɖyɔ̌vǐ ɖo alɔjí mímɛ́ ɖɔhun wɛ mi cí, bɔ un ko dó akpá nú asú ɖokpó géé ɖɔ un ná sɔ́ mi da n'i; asú énɛ́ ɔ́ wɛ nyí Klísu.

³ Lo ɔ́, un ɖo xɛsi ɖi wɛ ɖɔ lě e mi tɛ́ dó Klísu wú ɖo gbejíninɔ kpódó mǐmɛ́ kpán mɛ gbɔn ɔ́, nǔɖé ní ma flú ayixa mitɔn, bónú mi ná jó Klísu dó, lě e Ɛvu jó éɖée dó, bɔ dan sɔ́ bǐbí ɖó nukɔn, bó ɖó nǔvú dó flú i é ɖɔhun ó.

⁴Đó ényí mɛɖé wá ɖɔ Jezu ɖé xó nú mi bɔ é gbɔn vo nú Jezu e xó mǐ ɖɔ nú mi ɔ́, mi nɔ xwɛ bó nɔ́ ɖótó e ganjí, bó nɔ́ lɛ́ ɖo gbesisɔ mɛ, bó ná yí yɛ kpó wɛn kpó e gbɔn vo nú Yɛ Mawu tɔn kpódó Wɛn Ɖagbe e mǐ wa jlá mi bɔ mi yí é kpán.

⁵Un mɔ ɖɔ mɛ énɛ́ lɛ́ɛ e mi nɔ mɔ dó mɔ mɛsɛ́dó ɖaxó ɖaxó lɛ́ɛ ɔ́, un kún hwe hú yě ɖo nǔ ɖěbǔ mɛ ó.

⁶Đo xóɖiɖɔ sín alixo ɔ́, è sixú ɖɔ un kún nyɔ́ xó ɖɔ ó; amɔ̌ dandan mɛ ɔ́, ɖo nǔtunwuntunwun lixo ɔ́, è sixú ɖɔ un kún tunwun nǔ ó ǎ; mǐ ko ɖe xlɛ́ mi céɖécéɖé gbɔn ali bǐ xo, bó ɖe xlɛ́ mi céɖécéɖé ɖo nǔ bǐ mɛ.

⁷Hwenu e un jlá Wɛn Ɖagbe Mawu tɔn ɔ́ mi ɔ́, vɔ̌nu wɛ un jlá mi; un sɔ́ nyɛɖée hwe, bó ná dó sɔ́ mi su. Ée un wa nǔ gbɔn mɔ̌ ɔ́, nǔ wɛ un wa nyi do a?

⁸Un yí gbe bɔ agun ɖěvo lɛ́ɛ nɔ sú axɔ́ mì; ényí è nǎ ɖɔ ɔ́, é cí mɛ ɖě lɛ́ɛ sín akwɛ́ wɛ un fin, bó dó wá dó alɔ mi ɖɔhun.

⁹ Hwenu e un ɖo mi gɔ́n ɔ́, nǔɖé hú dó mì ɔ́, agban tɔn nɔ kpɛn mɛ ɖěbǔ ǎ, ɖó nɔví e gosín Masedwani lɛ́ɛ hɛn nǔ e ɖo tají nú mì lɛ́ɛ bǐ wá nú mì. Un hɛn nyɛɖée bó ma nyí agban ɖo kɔ jí nú mi ɖo nǔ ɖěbǔ mɛ ó; un ka ná lɛ́ kpo ɖo nyɛɖée hɛn wɛ mɔ̌.

¹⁰Un zé Klísu e ɖo nyɛ mɛ ɔ́ sín nǔgbó dó ɖo ɖiɖɔ nú mi wɛ ɖɔ agban e un ma nyí bó ɖo kɔ jí nú mɛɖé ǎ ɔ́ wú wɛ un nɔ ɖo ajɔ̌ jlá nú nyɛɖée wɛ; mɛɖé ka yí sín así ce ɖo fí ɖěbǔ ɖo Akáyi gbé ɔ́ bǐ jí ǎ.

¹¹Étɛ́wú un ɖɔ mɔ̌? Un yí wǎn nú mi ǎ wútu wɛ a? Mawu tunwun ganjí ɖɔ un yí wǎn nú mi.

¹²Un ná ɖo nǔ wa wɛ lě e bló gbɔn wɛ un ɖe din é, bɔ yě mɛ e ɖo ali ba wɛ, bó ná jlá ajɔ̌ nú yěɖée, bó ná ɖɔ émí ɖo azɔ̌ ɖokpó ɔ́ wa wɛ mǐ ɖɔhun lɛ́ɛ ɔ́, nǔ e wú yě ná ɖó dó ɔ́, un ná sú ali tɔn dó yě.

¹³Mɛ énɛ́ lɛ́ɛ ɔ́, mɛsɛ́dónyíjɛtɔ́ wɛ yě nyí; mɛwlóɖutɔ́ wɛ yě nyí, bó nɔ́ sɔ́ mɛsɛ́dó Klísu tɔn sín ninɔmɛ.

¹⁴Nǔkpácámɛ ɖé ka ɖo fínɛ́ ǎ, ɖó Satáan ɖésú hɛn ɔ́, é ná sɔ́ wɛnsagun wěziza tɔn sín ninɔmɛ.

¹⁵Hǔn nú azɔ̌watɔ́ tɔn lɛ́ɛ lɔ nɔ sɔ́ azɔ̌watɔ́ nǔ e sɔgbe ɔ́ tɔn sín ninɔmɛ ɔ́, nǔkpácámɛ ɖé sɔ́ ɖo fínɛ́ ǎ; amɔ̌, lě e yě ná vɔ gbɔn ɔ́ ná sɔgbe xá nǔ e yě wa é.

¹⁶Un lɛ́ ɖo vǐvɔ́ ɖɔ wɛ ɖɔ mɛ ɖěbǔ má mɔ mì dó mɔ taɖunɔ ó; ényí mɔ̌ wɛ mi ka lɛ́n gbɔn hǔn, mi bo yí mì dó yí taɖunɔ ná, bónú nyɛ lɔmɔ̌ ma sixú jlá ajɔ̌ nú nyɛɖée kpɛɖé.

¹⁷Dandan mɛ ɔ́, nǔ e ɖɔ wɛ un ɖe din ɔ́, é nyí nǔ e Aklúnɔ jló é ǎ; ɖó ninɔmɛ énɛ́ e mɛ un ɖe, bó ɖo ajɔ̌ jlá nú nyɛɖée wɛ ɔ́, un nɔ ɖɔ xó taɖunɔ wɛ un nyí ɖɔhun.

¹⁸Đó mɛ gěgé ɖěvo lɛ́ɛ nɔ xwedó linlin gbɛtɔ́ tɔn kpowun, bó nɔ ɖo ajɔ̌ jlá nú yěɖée wɛ; énɛ́ wú ɔ́, nyɛ lɔmɔ̌ ná jlá ajɔ̌ nú nyɛɖée.

¹⁹Tɛgbɛ jɛ́n mi nɔ yí gbe, bó nɔ ɖótó tamɛmasɔgbenánɔ lɛ́ɛ; có nǔnywɛ́tɔ́ wɛ mi ka nyí nɛ́!

²⁰Mi nɔ yí gbe, bɔ è nɔ kpa acɛ nú mi kannumɔ ɖɔhun, abǐ è nɔ wló mi ɖu; mi nɔ yí gbe bɔ è nɔ blɛ́ mi ɖu; mi nɔ yí gbe bɔ è nɔ kpɔ́n ahɔnxlomɛ nú mi; mi nɔ yí gbe bɔ è nɔ gba nukún mɛ nú mi.

²¹Xó ɔ́, ɖiɖɔ tɔn hu winnyá: mǐ ɖe gǎnmaɖó mǐtɔn xlɛ́ dín. Có ényí mɛɖé glá, bó zé nǔɖé dó jlá ajɔ̌ nú éɖée ɔ́, nyɛ lɔmɔ̌ ná glá, bó ná zé nǔ énɛ́ dó jlá ajɔ̌ nú nyɛɖée. (Un ɖo xó ɖɔ wɛ taɖunɔ wɛ un nyí ɖɔhun.)

²²É ma nyí Eblée wɛ yě nyí a? Nyɛ lɔmɔ̌ ɔ́, Eblée wɛ un nyí. É ma nyí Izlayɛ́li ví wɛ yě nyí a? Nyɛ lɔmɔ̌ ɔ́, Izlayɛ́li ví wɛ un nyí. É ma nyí Ablaxámu ví wɛ nyí a? Nyɛ lɔmɔ̌ ɔ́, Ablaxámu ví wɛ un nyí.

²³ É ma nyí azɔ̌watɔ́ Klísu tɔn wɛ yě nyí a? Din ɔ́, un ná ɖɔ xó ta ce mɛ ma sɔgbe ɖěbǔ ɖɔhun: un nyí Klísu sín azɔ̌watɔ́ hú yě; un wa azɔ̌ hú yě; è nɔ wlí mì dó gankpá mɛ hú yě; è xo mì dín hú yě; kúdán gbo mì hú yě.

²⁴Jwifu lɛ́ɛ ɔ́, azɔn atɔ́ɔ́n wɛ yě sɛ́n lanbá kanɖé é hwe ɖokpó (39) nú mì.

²⁵ Hlɔ̌manu lɛ́ɛ ɔ́, azɔn atɔn wɛ yě ɖǒ kpo nú mì, bó nyi awǐnnyaglo bó ná dó hu mì ná azɔn ɖokpó; azɔn atɔn wɛ tɔjíhún syɔ́ dó mì; un nɔ tɔ jí nú kéze ɖokpó zǎn ɖokpó.

²⁶ Tomɛ tobutóbú e un yi lɛ́ɛ ɔ́, adǎn gbo mì ɖo tɔ jí, bó gbo mì ɖo to ce mɛ nu Jwifu lɛ́ɛ sín alɔ mɛ, bó gbo mì ɖo mɛ e ma nyí Jwifu ǎ lɛ́ɛ sín alɔ mɛ; adǎn gbo mì ɖo toxo lɛ́ɛ mɛ, bó gbo mì ɖo gbětótló lɛ́ɛ mɛ; adǎn gbo mì ɖo xu jí, bó gbo mì ɖo nɔvínyíjɛtɔ́ lɛ́ɛ sín alɔ mɛ.

²⁷Un wa azɔ̌ syɛ́nsyɛ́n lɛ́ɛ, bɔ adǎn ɖaxó ɖaxó lɛ́ɛ gbo mì; un nɔ sixú dɔ́ amlɔ hwɛhwɛ ǎ; un nɔ sixú ɖu nǔ ǎ; avivɔ dó ya nú mì; avɔ hán mì.

²⁸Gɔ́ nú nǔ énɛ́ lɛ́ɛ bǐ ɔ́, ayǐhɔ́ngbe ayǐhɔ́ngbe ɔ́, nǔ e ɖo hǔnmɛ nú mì nú agun lɛ́ɛ bǐ ɔ́ nɔ nyí agban bó nɔ́ kpɛn mì.

²⁹Ényí mɛɖé ma ɖó gǎn ǎ ɔ́, un nɔ ɖɔ nyɛ lɔ kún ɖó gǎn ó; ényí mɛɖé jɛ hwɛ mɛ ɔ́, é nɔ nyí wǔvɛ́ ɖaxó nú mì.

³⁰Nú é byɔ́ ɖɔ ma jlá ajɔ̌ nú nyɛɖée ɔ́, nǔ e nɔ ɖe gǎnmaɖó ce xlɛ́ ɔ́ bǐ wɛ un ná dó jlá ajɔ̌ nú nyɛɖée.

³¹Mawu Aklúnɔ Jezu sín Tɔ́ tunwun ɖɔ un kún nɔ ɖó adingban ó. Susu nú nyǐkɔ tɔn hwe lɛ́ɛ bǐ nu!

³² Hwenu e un ɖo Damási ɔ́, tokpɔngán e ɖo azɔ̌ wa nú axɔ́sú Aletási wɛ ɔ́ fɔ sɔ́ja ɖó to ɔ́ sín hɔn lɛ́ɛ jí, bónú yě ná wlí mì.

³³Lo ɔ́, è zě mì dó xasun mɛ, bó zé mì gbɔn flɛtɛ́li e è ɖe dó dǒ e è do xá toxo ɔ́ ná lɛ́ɛ ɖokpó nu, bɔ un jɛ te ɖo dǒ ɔ́ gúdo, bó yi; lě e un gló yě gbɔn ɔ́ nɛ́.