Read fon 2 Kɔlɛ́ntinu 12 Bible Online

2 Kɔlɛ́ntinu 12 - fon bible

2 Kɔlɛ́ntinu 12

¹Hǔn, un ɖó ná jlá ajɔ̌ nú nyɛɖée; có é ka nyɔ́ mɔ̌ ǎ. Amɔ̌ din ɔ́, un ná ɖɔ xó dó nǔmimɔ kpódó nǔɖexlɛ́mɛ kpán e Aklúnɔ ná mì ɔ́ wú.

²Un tunwun klísusɛntɔ́ ɖokpó, bɔ xwe wɛ̌nɛ ɖíe ɔ́, è sɔ́ ɛ káká yi jǐnukúnsin e yi jǐ hú jǐnukúnsin lɛ́ɛ bǐ é; un tunwun nú agbaza tɔn wɛ è sɔ́ yi abǐ lǐndɔ̌n tɔn wɛ è sɔ́ yi ǎ; Mawu ɖokpónɔ wɛ tunwun.

³Nǔgbó wɛ! Un tunwun ɖɔ nya énɛ́ ɔ́, káká sɛ́xwé wɛ è sɔ́ ɛ yi; un lɛ́ ɖo vǐvɔ́ ɖɔ wɛ ɖɔ un kún tunwun nú agbaza tɔn wɛ è sɔ́ yi, abǐ lǐndɔ̌n tɔn wɛ è sɔ́ yi ó; Mawu ɖokpónɔ wɛ tunwun.

⁴É se xó e è ma sixú vɔ́ ɖɔ ǎ é, xó e è ma ka ná gbe gbɛtɔ́ ɖɔ ní ɖɔ ǎ é ɖo fínɛ́.

⁵Un ná jlá ajɔ̌ nú nyɛɖée ɖó nya énɛ́ tamɛ; lo ɔ́, un ná jlá ajɔ̌ nú nyɛɖée ɖó nyɛ ɖésúnɔ tamɛ ǎ, afi nú ma dó ɖɔ nǔ e nɔ ɖe gǎnmaɖó ce lɛ́ɛ bǐ xlɛ́ é.

⁶Ényí un jló ná jlá ajɔ̌ nú nyɛɖée ɔ́, un ná nyí taɖunɔ ǎ, ɖó xó nǔgbó wɛ un ná ɖɔ. Lo ɔ́, un nɔ lɔn bo nɔ jlá ajɔ̌ nú nyɛɖée ǎ; ɖó un jló ɖɔ mɛɖé ní ɖó linlin ɖé dó wǔ ce, nú é hú gǎn linlin e é ɖó dó nǔ e é mɔ bɔ un ɖo wiwa wɛ ɔ́, kpó nǔ e é se bɔ un ɖo ɖiɖɔ wɛ ɔ́ kpó wú ǎ.

⁷É ka ɖo mɔ̌ có, bónú goyíyí ma gɔ́ gbɛzán ce mɛ, ɖó nǔ ɖaxó ɖaxó énɛ́ lɛ́ɛ e Mawu nɔ ɖe xlɛ́ mì lɛ́ɛ wútu ó ɔ́, è sɛ́ azɔn baɖabaɖa ɖé dó mì, bɔ é cí wɛnsagun Satáan tɔn ɖé ɖɔhun, bó xo mì, bó glɔ́n ali nú mì, bónú goyíyí ma gɔ́ gbɛzán ce mɛ ó.

⁸Azɔn atɔn wɛ un sa vo nú Aklúnɔ, ɖɔ ní hwlɛ́n mì sín wǔvɛ́ énɛ́ mɛ.

⁹Bɔ Mawu yí gbe nú mì ɖɔ: “Wǔjɔmɛ ce wɛ nyí nǔ e hudó we ɔ́ bǐ, ɖó hwenu e a ma kpé nǔ wú ǎ ɔ́ wɛ hlɔ̌nhlɔ́n ce nɔ́ ɖe nǔwiwa tɔn lɛ́ɛ bǐ xlɛ́ dégbédégbé.” Hǔn, un ɖo gbesisɔ mɛ bó ná sɔ́ gǎnmaɖó ce dó jlá ajɔ̌ nú nyɛɖée kpó ayixa ce bǐ kpó, bónú hlɔ̌nhlɔ́n Klísu tɔn ná cyɔ́n alɔ jǐ ce.

¹⁰Énɛ́ ɔ́ wútu ɔ́, gǎnmaɖó ce nɔ́ dó xomɛhunhun nú mì ɖó Klísu wú. È ɖo zunzun mì wɛ ɖó Klísu wú ɔ́, xomɛ nɔ hun mì; nǔ ɖo gbigbo mì wɛ ɖó Klísu wú ɔ́, xomɛ nɔ hun mì; ya e è nɔ dó mì ɖó Klísu wútu lɛ́ɛ kpódó xɛsi e è nɔ dó nú mì ɖó Klísu wútu lɛ́ɛ kpán nɔ hun xomɛ nú mì, ɖó hwenu e un ma ɖó gǎn ǎ ɔ́, hwenɛ́nu wɛ un nɔ mɔ hlɔ̌nhlɔ́n.

¹¹Un ɖo xó ɖɔ wɛ taɖunɔ wɛ un húzú ɖɔhun; lo ɔ́, mi wɛ zɔ́n mɔ̌; mi wɛ ná ko jɛ ahwan jǐ ce. Đó nú un ma tlɛ nyí nǔɖé ǎ ɔ́, un hwe hú mɛ e mi nɔ mɔ dó mɔ mɛsɛ́dó ɖaxó lɛ́ɛ é ɖo nǔ ɖěbǔ mɛ ǎ.

¹²Un wa azɔ̌ e ɖe xlɛ́ ɖɔ un nyí mɛsɛ́dó lɛ́ɛ ɖo tɛ́ntin mitɔn kpó hǔnkúkú titewungbe kpó: nǔwiwa énɛ́ lɛ́ɛ wɛ nyí wuntun tɛnmɛ tɛnmɛ lɛ́ɛ, nǔjlɛ́jlɛ́ tɛnmɛ tɛnmɛ lɛ́ɛ kpó nǔdábaɖa tɛnmɛ tɛnmɛ e Mawu bló gbɔn jǐ ce lɛ́ɛ kpó.

¹³Ani un ka wa nú agun ɖě lɛ́ɛ, bó ma wa nú midɛɛ lɛ́ɛ zɛ agban e un ma nyí bó kpɛn mi ǎ é wú? Agɔ énɛ́ e un jɛ dó mi ɔ́, mi bo sɔ́ kɛ mì.

¹⁴Nyɛ ɖíe ko lɛ́ ɖo gbesisɔ mɛ bó ja gɔ̌n mitɔn azɔn atɔngɔ́ e, un ka ná lɛ́ nyí agban bo kpɛn mi ǎ; mi ba wɛ un ɖe; akwɛ́ mitɔn ba wɛ un ɖe ǎ. Nǔgbó ɔ́, é nyí vǐ lɛ́ɛ wɛ ná sɔ́ nǔ e yě ɖǒ lɛ́ɛ dó tɔ́jú mɛjitɔ́ yětɔn lɛ́ɛ ná ǎ; lo ɔ́, mɛjitɔ́ lɛ́ɛ wɛ ná sɔ́ nǔ e yě ɖó lɛ́ɛ dó tɔ́jú vǐ yětɔn lɛ́ɛ ná.

¹⁵Nyɛ ɔ́, é ná hun xomɛ nú mì ɖɔ ma zán nǔ e un ɖó ɔ́ bǐ, bó zán nyɛ ɖésúnɔ dó dó alɔ mi ná. Lě e nyɛ yí wǎn nú mi sɔ ɔ́, midɛɛ lɛ́ɛ ná yí wǎn nú mì sɔ́ mɔ̌ ǎ wɛ a?

¹⁶Un nyí agban bo kpɛn mi ǎ nǔgbó. Lo ɔ́, mɛɖé lɛ́ɛ ná ɖɔ un sɔ́ sísɛ́ ɖó nukɔn, bó zé adingban dó ɖó mɔ nú mi bɔ mi jɛ mɛ.

¹⁷Un xo mi ɖu gbɔn mɛ e un sɛ́ dó mi lɛ́ɛ ɖě jí wɛ a?

¹⁸Un sa vo nú Títu ɖɔ ní wá gɔ̌n mitɔn; un sɛ́ é kpódó nɔví e mi tunwun ɔ́ kpán dó. Mi ná ɖɔ Títu ɔ́ xo émí ɖu wɛ a? Nyɛ kpó Titu kpó ɔ́, ayixa ɖokpó ɔ́ wɛ mǐ xwedó bó dó wa nǔ, bó zán gbɛ mǐtɔn gbɔn alɔkpa ɖokpó ɔ́ mɛ ǎ cé?

¹⁹Linlin wɛ mi ka ɖe sín hwe ɖé nu ɖɔ mǐ ɖo biba ná jɛ ahwan mǐɖée jí, ɖo nukɔn mitɔn a? Éeǒ, mǐ ɖo biba ná jɛ ahwan mǐɖée jí wɛ ǎ. Lě e Klísu jló gbɔn ɔ́ wɛ mǐ ɖo xó ɖɔ gbɔn wɛ ɖo Mawu nukɔn. Mɛvívɛ́ná mǐtɔn lɛ́ɛ mi, mǐ ɖo énɛ́ lɛ́ɛ bǐ ɖɔ nú mi wɛ, bó ná dó dɔn mi yi nukɔn ɖo nǔɖiɖi mɛ.

²⁰Un ɖo xɛsi ɖi wɛ ɖɔ hwenu e un ná wá gɔ̌n mitɔn ɔ́, un ná wá mɔ mi ɖo lě e un ma jló gbɔn ǎ é, bɔ mi lɔmɔ̌ ná mɔ mì ɖo lě e mi ma jló gbɔn ǎ é. Un ɖo xɛsi ɖi wɛ ɖɔ un wá ɔ́, jlɛ kpó wǔhwinhwan kpó ná ɖo tɛ́ntin mitɔn; xomɛsin kpó agbahwlɛ́nxámɛ kpó ná ɖo tɛ́ntin mitɔn; mɛzunzun kpó xó ma sɔgbe kpó, goyíyí kpó nǔ hannyahannya wiwa kpó ná ɖo tɛ́ntin mitɔn.

²¹Un ɖo xɛsi ɖi wɛ ɖɔ gɔ̌n mitɔn e un ná wá din ɔ́, Mawu ce ná sɔ́ mì hwe ɖo nukɔn mitɔn; bɔ un ná ya avǐ dó mɛ tobutóbú e hu hwɛ ɖ'ayǐ, bó ma lɛ́ kɔ sín nǔ kwíji wiwa, agalilɛ, kpódó nǔ nyanya e yě wa lɛ́ɛ kpán gúdo ǎ lɛ́ɛ tamɛ.