Read fon 2 Kɔlɛ́ntinu 4 Bible Online

2 Kɔlɛ́ntinu 4 - fon bible

2 Kɔlɛ́ntinu 4

¹Mawu ɔ́, ɖo xomɛnyínyɔ́ tɔn mɛ ɔ́, é sɔ́ azɔ̌ énɛ́ dó así nú mǐ; énɛ́ ɔ́ wú wɛ awakanmɛ ma kú mǐ ǎ.

²Nǔglɔ́nú e mǐ nɔ wa lɛ́ɛ kpó winnyánú e mǐ nɔ́ wa lɛ́ɛ kpó ɔ́, mǐ jó dó; mǐ nɔ sɔ́ sísɛ́ ɖó nukɔn dó wa nǔ ǎ; mǐ nɔ́ kpé ta do nú Mawuxó ɔ́ ǎ; é nyɔ́ wa ɔ́, mǐ nɔ́ ɖɔ nǔgbó ɔ́ nyi wɛn nú mɛ, bɔ è nɔ tunwun; énɛ́ ɔ́, gbɛtɔ́ bǐ nɔ mɔ ɖo ayi mɛ ɖo Mawu nukɔn ɖɔ azɔ̌ mɔ̌hunkɔtɔn wa tɔ́ wɛ mǐ nyí.

³Nú Wɛn Ɖagbe e jlá wɛ mǐ ɖe ɔ́ dó zǐnflú ɔ́, mɛ e ɖo dindɔn wɛ lɛ́ɛ jɛ́n é dó zǐnflú ná.

⁴Yě ɖi nǔ ǎ; ɖó gǎn nyanya gbɛ élɔ́ tɔn[4] ɔ́ va nukún ayixa yětɔn. Mawu gbɛ élɔ́ tɔn énɛ́ nɔ lɔn nú yě ná mɔ wěziza e Wɛn Ɖagbe e ɖɔ xó dó susu Klísu tɔn wú ɔ́ nɔ ná mɛ é ǎ. Klísu ɔ́ wɛ nyí akpajlɛ́ Mawu tɔn titewungbe ɔ́.

⁵Nǔgbó ɔ́, mǐ ɖésúnɔ jlá wɛ mǐ ɖe ǎ: Klísu Jezu jlá wɛ mǐ ɖe ɖɔ é nyí Aklúnɔ, bó ɖo mǐɖée jlá wɛ ɖɔ mɛsɛntɔ́ mitɔn wɛ mǐ nyí ɖó Jezu wú.

⁶ Mawu e ɖɔ: “Wěziza ní kɔ́n sín ablu mɛ” ɔ́, é ɖokpó ɔ́ wɛ lɛ́ nyí mɛ e bló bɔ wěziza tɔn nɔ kɔ́n ɖo ayi mǐtɔn lɛ́ɛ mɛ é, bónú mǐ ná ɖó nǔnywɛ́ wěziza tɔn e nyí susu Mawu tɔn é; susu Mawu tɔn e ɖo kínkɔ́n wɛ ɖo Klísu sín nukún mɛ é.

⁷Lo ɔ́, mǐ mɛ e sí dɔkun Yɛsinsɛn tɔn énɛ́ ɖe lɛ́ɛ ɔ́, kozɛ́n ɖɔhun wɛ mǐ cí, bónú è nǎ mɔ ganjí ɖɔ hlɔ̌nhlɔ́n aditi énɛ́ ɔ́, Mawu tɔn wɛ; é kún nyí mǐtɔn ó.

⁸Nǔgbomɛ alɔkpa alɔkpa lɛ́ɛ nɔ ɖo go ján dó mǐ wɛ; lo ɔ́, yě nyínyɛ́ mǐ ǎ; mǐ sɔ́ tunwun lě e mǐ ná wa nǔ gbɔn ɔ́ ǎ; lo ɔ́, mǐ mɔ ɖɔ nǔ bǐ ko vɔ ǎ.

⁹È ɖo ya dó nú mǐ wɛ; lo ɔ́, Mawu jó mǐ dó ǎ; è nɔ ɖo mǐ zín dó ayǐ wɛ, mǐ ka dɔn ǎ.

¹⁰Kú Jezu tɔn ɔ́ ɖo agbaza mǐtɔn mɛ bɔ mǐ kpó é kpó ɖo yiyi wɛ tɛgbɛ, bónú gbɛ tɔn lɔ ná ɖe éɖée xlɛ́ ɖo agbaza mǐtɔn mɛ.

¹¹Gbɛ mǐtɔn mɛ ɔ́, è ɖo kúdán gblɔ́n nú mǐ wɛ tɛgbɛ ɖó Jezu wú, nú gbɛ tɔn lɔ ná ɖe éɖée xlɛ́ ɖo agbaza mǐtɔn e ɖo te nú kú ɔ́ mɛ.

¹²Énɛ́ ɔ́, kú ɔ́ ɖo azɔ̌ wa wɛ ɖo mǐ mɛ; gbɛ lɔ ka ɖo azɔ̌ wa wɛ ɖo mi mɛ.

¹³ Mawuxówéma ɔ́ ɖɔ: “Un ɖi nǔ, énɛ́ ɔ́ wú wɛ un ɖɔ xó.” Đo nǔɖiɖi sín ayixa ɖokpó ɔ́ mɛ ɔ́, mǐ lɔ ɖi nǔ; énɛ́ ɔ́ wú wɛ mǐ ɖo xó ɖɔ wɛ.

¹⁴Nǔgbó ɔ́, mǐ tunwun ɖɔ Mawu e fɔ́n Aklúnɔ Jezu sín kú wá gbɛ ɔ́ ná fɔ́n mǐ lɔmɔ̌ wá gbɛ kpó Jezu kpó, bó ná bló bɔ mǐ kpó mi kpó ná wá nukɔn tɔn.

¹⁵Đagbe mitɔn wútu wɛ nǔ énɛ́ lɛ́ɛ bǐ jɛ; énɛ́ ɔ́, mɛ e jí kɔn nyi wɛ fɛ́nú Mawu tɔn ɖe lɛ́ɛ ná nɔ́ ɖo jijɛ jí wɛ, bɔ ɖɛ e mɛ gěgé ná nɔ́ xo dó dó kú nú Mawu ɔ́ ná nɔ́ ɖo jijɛ jí wɛ ayǐhɔ́ngbe ayǐhɔ́ngbe nú susu Mawu tɔn.

¹⁶Nǔ e wútu awakanmɛ ma nɔ kú mǐ ǎ ɔ́ nɛ́. Nú nǔ e mǐ nyǐ ɖo agbaza mɛ ɔ́ ná bo ɖo gblěgblé wɛ ɔ́, nǔ e mǐ nyí ɖo Yɛsinsɛn li jí ɔ́ nɔ ɖo hlɔ̌nhlɔ́n mɔ wɛ ayǐhɔ́ngbe ayǐhɔ́ngbe.

¹⁷Wǔvɛ́ kpɛ e mɔ wɛ mǐ ɖe din nú hwenu ɖé ɔ́ nɔ́ bló susu mavɔ mavɔ ɖ'ayǐ nú mǐ, bɔ é nɔ́ túnflá; susu énɛ́ ɖo tají hú wǔvɛ́ e mɔ wɛ mǐ ɖe din é ɖaxó.

¹⁸Đó nǔ e è nɔ mɔ ɖó nukún wú ɔ́ jí wɛ ayixa mǐtɔn ɖe ǎ; lo ɔ́, nǔ e è ma nɔ mɔ ɖó nukún wú ǎ ɔ́ jí wɛ ayixa mǐtɔn ɖe. Nǔ e è nɔ mɔ ɖó nukún wú ɔ́, hwenu kpɛɖé jɛ́n wɛ é nɔ́ nɔ ayǐ ná; lo ɔ́, nǔ e è ma nɔ mɔ ɖó nukún wú ǎ ɔ́, é nɔ́ nɔ ayǐ káká sɔ́yi.