Read fon 2 Kɔlɛ́ntinu 5 Bible Online

2 Kɔlɛ́ntinu 5 - fon bible

2 Kɔlɛ́ntinu 5

¹Nǔgbó ɔ́, mǐ tunwun ɖɔ nú è kíjá agbaza mǐtɔn e nyí goxɔ ayǐkúngban jí tɔn ɔ́, mǐ ɖó ɖěvo e nyí xɔ Mawu tɔn e gbɛtɔ́ sín alɔ ma bló ǎ, bɔ é ná nɔ ayǐ káká sɔ́yi ɔ́ ɖo sɛ́xwé.

²Lě e mǐ ɖe din ɔ́, mǐ ɖo azɔn wɛn wɛ, ɖó mǐ ɖó jlǒ ɖaxó ɖɔ mǐ ní sɔ́ agbaza mǐtɔn sɛ́xwé tɔn ɔ́ dó.

³Nǔgbó ɔ́, ényí ɖɔ mǐ vɛ ko sixú sɔ́ dó ɔ́, è sɔ́ ná mɔ mǐ ɖo mɛ̌ ǎ.

⁴Nǔgbó wɛ! Káká jɛ hwenu e mǐ ná ɖo ayǐkúngban jí sín goxɔ énɛ́ ɔ́ mɛ dó ɔ́, mǐ ná ɖo azɔn wɛn wɛ, agban kpinkpɛn ɖé glɔ́ wɛ mǐ ɖe ɖɔhun. É nyí biba wɛ mǐ ɖe ɖɔ mǐ ní gosín agbaza mǐtɔn ayǐkúngban jí tɔn ɔ́ mɛ ǎ; lo ɔ́, nǔ e ba wɛ mǐ ɖe ɔ́ wɛ nyí ɖɔ mǐ ní sɔ́ agbaza sɛ́xwé tɔn ɔ́ dó, bónú nǔ e ɖo gbɛ ɔ́ ná sɔ́ nǔ e ɖo te nú kú ɔ́ mi.

⁵Mawu ɖésú wɛ kó bló mǐ nú mǐ ná tunwun hǔzúhúzú mɔ̌hunkɔtɔn, bó ná Yɛ tɔn mǐ, bɔ é nyí ɖagbe e é sɔ́ ɖ'ayǐ nú mǐ lɛ́ɛ sín gǎnjɛwú nú mǐ.

⁶Hǔn akɔ́nkpinkpan gɔ́ ayi mɛ nú mǐ hwebǐnu. Mǐ tunwun ɖɔ hwenu e mǐ ko sixú kpo ɖo agbaza énɛ́ ɔ́ mɛ ɔ́, mǐ ɖo zɔ nú nɔtɛn Aklúnɔ tɔn.

⁷Nǔgbó ɔ́, mǐ ɖo gbɛ ɔ́, nǔ e mǐ ɖi ɔ́ wú wɛ; é nyí mǐ kó mɔ ɖó nukún wú wɛ ǎ.

⁸Akɔ́nkpinkpan gɔ́ ayi mɛ nú mǐ, bɔ nǔ e jló mǐ tawun ɔ́ wɛ nyí ɖɔ mǐ ní gosín agbaza élɔ́ mɛ, bó ná yi nɔ xwé mǐtɔn gbe, ɖo Aklúnɔ gɔ́n.

⁹Lo ɔ́, nú mǐ nɔ agbaza élɔ́ mɛ kpó mǐ gosín mɛ kpó ɔ́, nǔ e jló mǐ jɛ nukɔn ɔ́ wɛ nyí ɖɔ mǐ ní nyɔ́ Aklúnɔ nukún mɛ.

¹⁰Đó mǐ bǐ ɔ́, mǐ ɖó ná wá Klísu nukɔn, bɔ é ná ɖɔ hwɛ dó mǐ, bónú mɛ ɖokpó ɖokpó ná mɔ lě e é wa nǔ gbɔn hwenu e é ɖo agbaza tɔn mɛ ɔ́ sín ajɔ yí; nú nǔ ɖagbe wɛ mɛ ɔ́ wa, abǐ nǔ nyanya wɛ mɛ ɔ́ wa ɔ́, é ná mɔ ajɔ tɔn yí.

¹¹Mǐ tunwun nǔ e nyí sísí ɖó nú Aklúnɔ é, bó ɖo biba wɛ nú gbɛtɔ́ lɛ́ɛ ná wá mǐtɔn jí. Mawu tunwun mǐ céɖécéɖé, bɔ un ɖi ɖɔ, ɖo ayi mi ɖésúnɔ tɔn mɛ ɔ́, mi tunwun nyɛ lɔmɔ̌.

¹²É nyí ɖɔ mǐ jló ná lɛ́ jɛ mǐɖée kpa jí ɖo mi gɔ́n wú wɛ ǎ; lo ɔ́, mǐ jló ná ná ali mi, bɔ mi ná xɔ susu ɖó mǐ wú; énɛ́ ɔ́, mi ná mɔ xósin e mi ná nɔ ná yě mɛ e nɔ sɔ́ nǔ e ɖo nukúnta lɛ́ɛ dó yí go ná, bó ma nɔ́ sɔ́ nǔ e ɖo ayi mɛ lɛ́ɛ dó yí go ná ǎ lɛ́ɛ.

¹³Ényí tamɛmasɔgbenánɔ wɛ mǐ nyí nǔgbó ɔ́, Mawu wɛ mǐ nyí ná; lo ɔ́, nú tamɛ mǐtɔn ka sɔgbe ɔ́, mi wɛ é sɔgbe ná.

¹⁴Wǎn yíyí Klísu tɔn ɖu ɖo mǐ jí, ɖó mǐ ɖó gǎnjɛwú ɖɔ mɛ ɖokpó géé wɛ kú dó mɛ bǐ tamɛ; é wɛ nyí ɖɔ mɛ bǐ kú xá ɛ.

¹⁵É kú dó mɛ bǐ tamɛ, bónú mɛ e ɖo gbɛ lɛ́ɛ ɔ́, yě ma sɔ́ nɔ gbɛ nú yě ɖésúnɔ ó; lo ɔ́, yě ní nɔ gbɛ nú mɛ e kú dó yě tamɛ, bɔ è lɛ́ fɔ́n ɛ wá gbɛ dó yě tamɛ é.

¹⁶Énɛ́ ɔ́, bɛ́ sín din ɔ́, mǐ sɔ́ nɔ sɔ́ gbɛtɔ́ sín ayixa dó kpɔ́n mɛ ɖěbǔ ná ǎ; ényí mǐ ko sɔ́ gbɛtɔ́ sín ayixa dó kpɔ́n Klísu ná ɖ'ayǐ ɔ́, mǐ sɔ́ nɔ́ zé ayixa énɛ́ ɔ́ dó kpɔ́n ɛ ná din ǎ.

¹⁷Hǔn ényí mɛɖé jɛ kpɔ́ xá Klísu lě tlóló ɔ́, mɛ ɔ́ nɔ húzú nǔɖíɖó yɔ̌yɔ́: nǔ e nyí xóxó ɔ́ bú, bɔ yɔ̌yɔ́ ɔ́ wá.

¹⁸Mawu e dó hwɛ gbɔ xá mǐ gbɔn Klísu jí ɔ́ sín azɔ̌ wɛ nyí nǔ énɛ́ lɛ́ɛ bǐ; é wɛ zé azɔ̌ dó así nú mǐ, bɔ mǐ ná dɔn mɛɖěvo lɛ́ɛ wá, bɔ é ná dó hwɛ gbɔ xá yě.

¹⁹Đó Mawu kó ɖo azɔ̌ wa wɛ gbɔn Klísu jí, bó ná dó hwɛ gbɔ xá gbɛtɔ́ lɛ́ɛ bǐ; é kpɔ́n dó nǔwanyido yětɔn lɛ́ɛ wú ǎ. Hwɛdógbɔ sín azɔ̌ énɛ́ e wa wɛ é ɖe ɔ́, é sɔ́ dó así nú mǐ ɖɔ mǐ ní jlá.

²⁰Hǔn, Klísu nu ɖɔ xó dó wɛ mǐ ɖe, è ka ná ɖɔ nǔgbó ɔ́, Mawu ɖésú wɛ ɖo mi ylɔ́ wɛ gbɔn mǐ jí: mǐ ɖo vo sa nú mi wɛ, ɖo Klísu sín nyǐkɔ mɛ ɖɔ mi ní yí gbe bó dó hwɛ gbɔ xá Mawu.

²¹Klísu hu hwɛ ɖě kpɔ́n gbeɖé ǎ; amɔ̌ Mawu ɖíɖá ɛ hwɛ mǐtɔn lɛ́ɛ, bónú ɖo bǔ e mǐ ɖe xá Klísu ɔ́ mɛ ɔ́, mǐ ná sixú ɖu azɔ̌ e gbla mɛ Mawu sɔ́ mǐ dó húzú hwɛjijɔnɔ ná ɖo nukɔn tɔn ɔ́ sín le.