Read fon 2 Kɔlɛ́ntinu 7 Bible Online

2 Kɔlɛ́ntinu 7 - fon bible

2 Kɔlɛ́ntinu 7

¹Mɛvívɛ́ná ce lɛ́ɛ mi, akpá énɛ́ lɛ́ɛ e Mawu dó ɔ́, mǐ wɛ é dó yě ná. Énɛ́ ɔ́ wú ɔ́, mǐ ní slá wǔ nú agbaza kpó lǐndɔ̌n kpó, bó dó gǎn, bó ɖi xɛsi nú Mawu ɖo gbɛzán mǐtɔn mɛ, lobo ná nyí mɛ mímɛ́ yi fó.

²Mi hun xomɛ dó mǐ wú! Mǐ wa nǔɖé nyi do nú mɛ ɖěbǔ ǎ; mǐ vɔ mɛ ɖěbǔ ǎ; mǐ ka xo mɛ ɖěbǔ ɖu ǎ.

³Un ná ɖó hwɛ nú mi wú wɛ un ɖo mɔ̌ ɖɔ wɛ ǎ. Nǔgbó ɔ́, lě e un ko ɖɔ gbɔn nú mi ɔ́, mi vɛ́ nú mǐ sɔ mɔ̌, bɔ mǐ ɖo kpɔ́ xá mi hwebǐnu, bó ná nɔ gbɛ xá mi, abǐ bó ná kú xá mi.

⁴Un ɖeji dó mi wú ɖaxó; un nɔ sɔ́ mi dó yí go ná tawun. Mǐ ɖo wǔvɛ́ mɔ wɛ có un ɖó akɔ́nkpinkpan titewungbe, bɔ xomɛ nɔ hun mì túnflá.

⁵Đésú ɔ́, hwenu e mǐ wá Masedwani ɔ́, mǐ mɔ gbɔjɛ́ ɖěbǔ ǎ; mǐ mɔ wǔvɛ́ gbɔn fí bǐ: mǐ nɔ ɖo zali xá mɛɖěvo lɛ́ɛ wɛ, bó nɔ́ ɖo xɛsi ɖi wɛ ɖo ayi mɛ.

⁶Lo ɔ́, Mawu e nɔ dó gbɔ nú mɛ e kanmɛ gbɔ́jɔ́ lɛ́ɛ ɔ́, dó gbɔ nú mǐ gbɔn Títu sín wǐwá gbla mɛ.

⁷É nyí wǐwá tɔn kɛ́ɖɛ́ wɛ dó gbɔ nú mǐ ǎ; lo ɔ́, xó e é wá ɖɔ nú mǐ dó lě e mi dó gbɔ nú é ɖésúnɔ gbɔn ɔ́ wú ɔ́ lɛ́ dó gbɔ nú mǐ. Lě e mi ɖó jlǒ sɔ, bó ná mɔ mǐ ɔ́, aluwɛ ɖaxó e mɛ mi ɖe é, kpódó lě e mi ɖo gbesisɔ mɛ, bó ná jɛ ahwan jǐ ce gbɔn ɔ́ kpó ɔ́, é ɖɔ nú mǐ. Énɛ́ ɔ́ wɛ zɔ́n din bɔ xomɛ lɛ́ hun mì d'é jí.

⁸Nǔgbó ɔ́, nú wěma e un wlán sɛ́ dó mi ɔ́ na bo zɔ́n bɔ mi ɖo aluwɛ mɛ ɔ́, é vɛ́ nú mì ǎ. Hwenu e un mɔ ɖɔ wěma énɛ́ zɔ́n, bɔ mi nɔ aluwɛ mɛ nú hwenu kpɛɖé ɔ́ wɛ é ná vɛ́ nú mì.

⁹Amɔ̌ din ɔ́, un ɖo awǎ jɛ wɛ; é nyí aluwɛ mɛ e un dɔn mi dó ɔ́ wú wɛ ǎ; lo ɔ́, un ɖo awǎ jɛ wɛ ɖó aluwɛ e mɛ mi nɔ ɔ́ zɔ́n bɔ mi húzú jijɔ. Mawu zě aluwɛ mɛ e mi nɔ ɔ́ dó wa azɔ̌ ná; hǔn mǐ sɔ́ wa nǔ ɖěbǔ nyi do nú mi ǎ.

¹⁰Đó aluwɛ e Mawu nɔ dó wa azɔ̌ ná ɔ́ nɔ́ ná mɛ jijɔ húzúhúzú e nɔ kplá mɛ bɔ è nɔ mɔ hwlɛngán é, bɔ é sɔ́ nɔ vɛ́ nú mɛ ǎ. Lo ɔ́, aluwɛ e mɛ gbɛ ɔ́ nɔ dɔn mɛ dó ɔ́, kú wɛ é nɔ kplá mɛ hɛn yi.

¹¹Aluwɛ e mɛ mi nɔ ɔ́, Mawu zě dó wa azɔ̌ ná; mi bó kpɔ́n nǔ e tɔ́n sín mɛ din lɛ́ɛ é! Aluwɛ énɛ́ e mɛ mi nɔ ɔ́, mi kpɔ́n lě e é zɔ́n bɔ mi sɔ́ nǔ e jɛ ɔ́ dó ylɔ́ nǔjɔnǔ sɔ é, bó kpɔ́n lě e é húzú mi gbɔn, bɔ mi bí dó azɔ̌ wú, bó ná dó jɛ ahwan miɖée jí é. Mi kpɔ́n lě e mi mɔ akpɔ sɔ é, bó kpɔ́n lě e xɛsi ɖi mi dó Mawu wú sɔ é. Mi kpɔ́n lě e mi ɖó jlǒ, bó ná mɔ mǐ sɔ é. Mi kpɔ́n lě e mi bí dó nǔ wú sɔ é, bó kpɔ́n lě e mi ván kan, bó ná dɔn tó nú mɛ e wa nǔ nyanya ɔ́ sɔ é! Mi ɖe xlɛ́ gbɔn alɔkpa lɛ́ɛ bǐ mɛ ɖɔ émí nyí xomɛvɔ́nɔ ɖo nǔ énɛ́ e jɛ ɔ́ mɛ.

¹²Hǔn, nú un sɛ́ wěma dó mi ɔ́, é nyí mɛ e wa nǔ nyi do ɔ́ wútu wɛ ǎ; é ka lɛ́ nyí mɛ e è wa nǔ nyi do ná ɔ́ wútu wɛ ǎ. Lo ɔ́, bónú mi ɖésúnɔ ná dó mɔ nukúnnú jɛ kan e mi xo dó mǐ ɔ́ wú céɖécéɖé ɖo Mawu nukɔn wútu wɛ un sɛ́ wěma dó mi.

¹³Énɛ́ ɔ́ wú wɛ lě e mi wa nǔ gbɔn ɔ́ dó gbɔ nú mǐ. Gbɔ kɛ́ɖɛ́ wɛ é dó nú mǐ ǎ. Ée mǐ mɔ lě e xomɛ hun Títu sɔ, ɖó alɔkpa e mɛ mi bǐ dó wǔsyɛ́n kanmɛ n'i gbɔn ɔ́ wú ɔ́, mǐ mɔ xomɛhunhun ɖaxó ɖěvo d'é jí.

¹⁴Un jlá ajɔ̌ nú nyɛɖée kpɛɖé ɖo gɔ̌n tɔn, ɖó mi wú, bɔ mi ka dó winnyá mǐ ǎ. Lo ɔ́, lě e nǔ e mǐ nɔ́ ɖɔ nú mi lɛ́ɛ bǐ nɔ nyí nǔgbó ɔ́, mɔ̌ ɖokpó ɔ́, lě e mǐ kpa mi gbɔn ɖo Títu gɔ́n ɔ́, è mɔ ɖó mɔ̌ jǐ.

¹⁵Énɛ́ ɔ́, nú é flín lě e mi bǐ ɖo gbesisɔ mɛ, bó ná se tónú gbɔn ɔ́, bó flín lě e mi yí i kpó xɛsi kpó, kpó sísɔ́sísɔ́ kpó gbɔn ɔ́, wǎn yíyí e é ɖó nú mi ɔ́ nɔ lɛ́ jɛjí.

¹⁶Xomɛhunhun gɔ́ ayi mɛ nú mì, ɖó un hɛn ɔ́, un ná ɖeji dó mi wú ɖo nǔ bǐ mɛ.