Read fon Galatinu 1 Bible Online

Galatinu 1 - fon bible

Galatinu 1

¹Nyɛ Pɔ́lu, mɛsɛ́dó Jezu Klísu tɔn, mɛsɛ́dó Mawu Tɔ́ mǐtɔn e fɔ́n ɛ sín kú ɔ́ tɔn wɛ ɖo wěma élɔ́ sɛ́ dó mi wɛ. Un nyí mɛsɛ́dó gbɛtɔ́ lɛ́ɛ tɔn ǎ; gbɛtɔ́ ɖé wɛ sɛ́ mì dó ǎ.

²Nyɛ kpódó nɔví e ɖo fí lɛ́ɛ bǐ kpó wɛ ɖo wěma élɔ́ sɛ́ dó mi agun e ɖo Galati gbé jí lɛ́ɛ wɛ.

³Mawu Tɔ́ mǐtɔn kpódó Aklúnɔ mǐtɔn Jezu Klísu kpán ní ná fɛ́nú kpódó fífá kpó mi.

⁴JezuKlísu énɛ́ wɛ sɔ́ gbɛ tɔn jó, dó hwɛ mǐtɔn lɛ́ɛ tamɛ, bó ná dó hwlɛ́n mǐ gán sín gbɛ nyanya e mɛ mǐ ɖe din é mɛ. Lě e Mawu mǐtɔn, Tɔ́ mǐtɔn ɔ́ jló gbɔn é nɛ́.

⁵Susu nú Mawu káká sɔ́yi! Amǐ.

⁶É kpácá mì tawun bɔ mi yá wǔ jó Mawu e ylɔ́ mi gbɔn fɛ́nú Klísu tɔn gbla mɛ ɔ́ dó, lobo xwedó Wɛn Ɖagbe ɖěvo.

⁷É ka nyí ɖɔ Wɛn Ɖagbe ɖěvo tíin wɛ ǎ; lo ɔ́, mɛɖé lɛ́ɛ wɛ ɖo ayi gbadó nú mi wɛ, bó jló ná hɛn Wɛn Ɖagbe Klísu tɔn gblé.

⁸Má ɖɔ nú mi: ényí mɛɖé wá jlá Wɛn Ɖagbe ɖé mi, bɔ é gbɔn vo nú ée mǐ kó jlá mi ɔ́ hǔn, Mawu ní dó nu i. É ná bó nyí mǐ ɖésúnɔ wɛ oo, wɛnsagun sɛ́xwé tɔn lɛ́ɛ ɖě wɛ oo, Mawu ní dó nu i.

⁹Mǐ ko ɖɔ nú mi ɖ'ayǐ; un ka lɛ́ ɖo ɖiɖɔ nú mi wɛ din ɖɔ ényí mɛɖé wá jlá Wɛn Ɖagbe ɖé mi bɔ é gbɔn vo nú ée mi yí gbe ná ɔ́ hǔn, Mawu ní dó nu i.

¹⁰Din ɔ́, má wa nǔ bónú gbɛtɔ́ lɛ́ɛ ná kpa mì, abǐ Mawu ná kpa mì ba wɛ un ɖe a? Abǐ un jló ná nyɔ́ ɖo gbɛtɔ́ lɛ́ɛ sí? Ényí gbɛtɔ́ lɛ́ɛ sí nyɔ́ ɖe wɛ un kpo ɖe ɔ́, un ná ɖo mɛsɛntɔ́ Klísu tɔn nyí wɛ din ǎ.

¹¹Nɔví lɛ́ɛ mi! Má ɖɔ nú mi: Wɛn Ɖagbe e jlá wɛ un ɖe ɔ́, gbɛtɔ́ lɛ́ɛ wɛ dó wá ǎ;

¹²mɛɖé wɛ ɖɔ nú mì ǎ; mɛɖé ka kplɔ́n mì ǎ; Jezu Klísu ɖésú wɛ ɖe xlɛ́ mì.

¹³ Hwenu e un ɖo Jwifu lɛ́ɛ sín sinsɛn mɛ ɔ́, mi se lě e un zán gbɛ ce gbɔn é; mi tunwun lě e un nɔ dó ya nú agun Mawu tɔn gbɔn é; un nɔ dó ya n'i titewungbe, bó nɔ dó gǎn ná sú kún tɔn dó.

¹⁴ Mi tunwun lě e un nɔ xwedó Jwifu lɛ́ɛ sín sinsɛn hú hǎtɔ́ ce gěgé gbɔn é; mi tunwun lě e un nɔ jɛ hun dó hwɛndo tɔ́ mǐtɔn lɛ́ɛ tɔn jí gbɔn hú gbɛ̌ ce lɛ́ɛ bǐ é.

¹⁵ Lo ɔ́, Mawu ɔ́, ɖo nyɔ̌ná tɔn mɛ ɔ́, é ko sɔ́ mì cóbɔ è wá ji mì, bó ylɔ́ mì, bónú má sɛn ɛ.

¹⁶Hwenu e é ka jló Mawu bɔ é ɖe vǐ tɔn xlɛ́ mì, bónú má jlá Wɛn Ɖagbe e ɖɔ xó dó vǐ ɔ́ wú ɔ́ mɛ e ma nyí Jwifu ǎ lɛ́ɛ ɔ́, un kan nǔɖé byɔ́ mɛɖé ǎ;

¹⁷un ka lɛ́ yi mɛ e ko nyí mɛsɛ́dó jɛ nukɔn nú mì lɛ́ɛ gɔ́n ɖo Jeluzalɛ́mu ǎ; lo ɔ́, un dín tlɔlɔ yi Alabíi; énɛ́ ɔ́ gúdo ɔ́, un lɛ́ kɔ wá Damási.

¹⁸ Xwe atɔn gúdo wɛ un yi Jeluzalɛ́mu, bó ná yi tunwun Sefási[1]; ée un yi gɔ̌n tɔn ɔ́, un nɔ fínɛ́ xɔ azǎn afɔtɔn.

¹⁹Lo ɔ́, un sɔ́ mɔ mɛsɛ́dó ɖěvo ǎ; Jaki Aklúnɔ sín nɔví ɔ́ jɛ́n un mɔ.

²⁰Nǔ e wlán sɛ́ dó mi wɛ un ɖe ɔ́ nǔgbó wɛ. Mawu nukɔn ɖíe un ɖe e; un ɖo adingban ɖó wɛ ǎ.

²¹Énɛ́ ɔ́ gúdo ɔ́, un yi Silíi, kpódó Silisíi kpán gbé jí.

²²Káká jɛ hwenɛ́nu ɔ́, mɛ e ɖo agun Klísu tɔn mɛ ɖo Judée lɛ́ɛ ɖě kó mɔ mì kpɔ́n ǎ.

²³Yě se kpowun ɖɔ: “Mɛ e nɔ dó ya nú mǐ ɖ'ayǐ ɔ́ ɖo ɖiɖɔ nú mɛ lɛ́ɛ wɛ din ɖɔ yě ní ɖi nǔ nú Jezu. Đ'ayǐ ɔ́, é wɛ ka nɔ dó gǎn, bó ná sú mɛ e ɖi nǔ nú Jezu lɛ́ɛ sín kún dó.”

²⁴Bɔ yě kpa susu nú Mawu ɖó nyɛ wútu.