Read fon Galatinu 3 Bible Online

Galatinu 3 - fon bible

Galatinu 3

¹Galatinu xlonɔ e mi! Mɛ̌ ka flú mi lě e? Có lě e è ká Jezu Klísu nyi aklúzu jí bɔ é kú gbɔn ɔ́, nukún mitɔn mɛ fí jɛ́n è tínmɛ ɖe céɖécéɖé.

²Nǔ e un jló ɖɔ mi ní tínmɛ nú mì kpowun ɔ́ ɖíe: nǔ e sɛ́n ɔ́ zɔ́n wiwa lɛ́ɛ wɛ zɔ́n bɔ Mawu ná Yɛsinsɛn tɔn mi a, abǐ Wɛn Ɖagbe e mi se bó ɖi nǔ ná ɔ́ wú wɛ?

³Xlo jɛ́n mi jɔ sɔ mɔ̌ a? Yɛ Mawu tɔn ná hlɔ̌nhlɔ́n mi, bɔ mi jɛ gbɛ yɔ̌yɔ́ ɔ́ zán jí. Din ɔ́, mi jló ná zé hlɔ̌nhlɔ́n mi ɖésúnɔ tɔn dó sú ta ná wɛ a?

⁴Nǔ énɛ́ lɛ́ɛ gbo mi dó wǔvɔ́ wɛ a? Nǔ énɛ́ lɛ́ɛ sixú gbo mi dó wǔvɔ́ ǎ.

⁵Sɛ́n e mi nɔ nyi ɔ́ wú wɛ Mawu ná Yɛsinsɛn tɔn mi, bó nɔ jlɛ́ nǔ ɖo tɛ́ntin mitɔn a, abǐ Wɛn Ɖagbe e mi se bo ɖi nǔ ná ɔ́ wú wɛ?

⁶ Mɔ̌ wɛ Mawuxó ɔ́ ɖɔ xó dó Ablaxámu wú gbɔn; Mawuxó ɔ́ ɖɔ: “É ɖi nǔ nú Mawu, bɔ Mawu kpɔ́n dó nǔɖiɖi tɔn wú, bó mɔ ɛ dó mɔ hwɛjijɔnɔ.”

⁷ Hǔn mi bo tunwun ɖɔ mɛ e ɖó nǔɖiɖi lɛ́ɛ wɛ nyí Ablaxámu ví tawun.

⁸ Mawuxó ɔ́ ko ɖɔ sín do ɖɔ: mɛ e ma nyí Jwifu ǎ lɛ́ɛ ná ɖi nǔ nú Mawu, bɔ Mawu ná sɔ́ yě dó húzú hwɛjijɔnɔ; énɛ́ ɔ́ wú wɛ Mawu dó akpá ɖagbe élɔ́ nú Ablaxámu ɖo Mawuxówéma ɔ́ mɛ ɖɔ: “Un ná xo ɖɛ dó akɔta e ɖo gbɛ ɔ́ mɛ lɛ́ɛ bǐ jǐ gbɔn jǐ towe.”

⁹Ablaxámu ɖi nǔ nú Mawu, bɔ Mawu xo ɖɛ dó jǐ tɔn; mɔ̌ ɖokpó ɔ́, é ná xo ɖɛ dó mɛ e ɖi nǔ n'i lɛ́ɛ bǐ jǐ, Ablaxámu ɖɔhun.

¹⁰ Lo ɔ́, mɛ e gán jɛ sɛ́n nyinyi wú, bó ná dó mɔ hwlɛngán lɛ́ɛ bǐ wɛ è dó nu. Đó è ko wlán dó Mawuxówéma ɔ́ mɛ ɖɔ: “Mɛ e ma nɔ xwedó nǔ e è wlǎn dó sɛ́nwéma ɔ́ mɛ lɛ́ɛ bǐ hwebǐnu ǎ ɔ́, nu wɛ è dó e.”

¹¹ È ka mɔ nukúnnú jɛ mɛ ganjí ɖɔ Mawu kún sixú mɔ mɛɖé dó mɔ hwɛjijɔnɔ ɖó sɛ́n e é nɔ nyi ɔ́ wú ó; ɖó Mawuxówéma ɔ́ ɖɔ: “Mɛ e Mawu mɔ dó mɔ hwɛjijɔnɔ ɖó nǔɖiɖi tɔn wú ɔ́ ná nɔ gbɛ.”

¹² Sɛ́n ɔ́ ɖo nǔɖiɖi sín acɛ mɛ ǎ; é nyɔ́ wa ɔ́, ɖi lě e Mawuxó ɔ́ ko ɖɔ gbɔn ɔ́: “Mɛ e ná sixú nyi sɛ́n lɛ́ɛ bǐ ɔ́ ná nɔ gbɛ gbɔn sɛ́n ɔ́ gbla mɛ.”

¹³ Ée Klísu húzú mɛ e è dó nu ɖó tɛn mǐtɔn mɛ ɔ́, é hwlɛ́n mǐ gán sín nyladó e sɛ́n ɔ́ nɔ hɛn wá nú mǐ é mɛ; ɖó Mawuxówéma ɔ́ ɖɔ: “Mɛ e è ká nyi atín wú ɔ́, nu wɛ è dǒ e.”

¹⁴Nǔ cí mɔ̌, bónú mɛ e ma nyí Jwifu ǎ lɛ́ɛ lɔ ná mɔ nyɔ̌ná e sín akpá Mawu dó nú Ablaxámu ɔ́ yí gbɔn Jezu Klísu jí. Nǔ cí mɔ̌, bónú mǐ bǐ ní mɔ Yɛsinsɛn e sín akpá Mawu dó nú mǐ ɔ́ yí ɖó nǔ e mǐ ɖi nú Mawu ɔ́ wútu.

¹⁵Nɔví lɛ́ɛ mi, un ná sɔ́ nǔ e nɔ jɛ tɛgbɛ ɔ́ ɖokpó dó kplɔ́n nǔ mi ná. Ényí mɛɖé ɖɔ lě e è nǎ zán nǔ tɔn lɛ́ɛ gbɔn ɖo kú tɔn gúdo ɔ́ ganjí ɔ́, mɛɖé sɔ́ sixú gbídí ǎ; mɛɖé ka sixú gɔ́ nǔɖé ná ǎ.

¹⁶ Mawu dó akpá nú Ablaxámu kpódó vǐ tɔn kpán. Mawuxówéma ɔ́ ɖɔ é kpódó vǐ tɔn lɛ́ɛ kpán, bónú è nǎ vɛdó ɖɔ mɛ gěgé xó ɖɔ wɛ é ɖe sín ǎ. Mawuxó ɔ́ ɖɔ hwi kpódó vǐ towe kpán, bó dó ɖo ɖiɖe xlɛ́ wɛ ɖɔ mɛ ɖokpó xó ɖɔ wɛ é ɖe; mɛ énɛ́ ɔ́ wɛ nyí Klísu.

¹⁷ Nǔ e ɖɔ wɛ un ɖe ɔ́ ɖíe: Mawu ko sɔ́ akɔjijɛwéma ɖé ɖ'ayǐ, bó dó akpá ɖɔ émí ná bló ɖ'é jí. Sɛ́n e wá tɔ́n xwe afɔwe gban (430) gúdo ɔ́, sixú gbídí nǔ e ɖo akɔjijɛwéma énɛ́ mɛ lɛ́ɛ, bɔ akpá e Mawu dó ɔ́ ná nyí nǔ yǎyá ǎ.

¹⁸Đó ényí sɛ́n wɛ è nɔ nyi cóbó nɔ́ mɔ nǔ ɖagbe e Mawu sɔ́ ɖ'ayǐ nú mɛ lɛ́ɛ yí ɔ́, hǔn nǔ ɖagbe énɛ́ lɛ́ɛ sɔ́ nyí akpá e Mawu dó ɔ́ sín xó ɖé ǎ. Lo ɔ́, akpá e Mawu dó nú Ablaxámu ɔ́ wútu wɛ é ɖe nyɔ̌ná tɔn xlɛ́ Ablaxámu.

¹⁹Étɛ́wú è dǒ sɛ́n ɔ́ lo? È dǒ sɛ́n ɔ́ bónú é ná ɖe zǐnzán e gbɔn vo nú jlǒ Mawu tɔn ɔ́ xlɛ́; é ná ɖo te káká jɛ hwenu e Ablaxámu ví e è dǒ akpá ɔ́ na ɔ́ na wá dó é. Wɛnsagun Mawu tɔn lɛ́ɛ wɛ hɛn sɛ́n ɔ́ wá gbɔn mɛ ɖokpó jí[3].

²⁰Đó akpá e Mawu dó ɔ́, é ɖokpónɔ wɛ é kan; é byɔ́ ɖɔ wɛnsagun Mawu tɔn ɖé, abǐ mɛɖé ní ɖe kúnnu ná ǎ.

²¹Sɛ́n ɔ́ gbɛ́ akpá e Mawu dó lɛ́ɛ ɖɔ wɛ è ɖe a? Gbeɖé kpɔ́n. Ényí è dǒ sɛ́n ɖé, bɔ sɛ́n énɛ́ hɛn ɔ́, é ná ná gbɛ jɔ gbɛ gbɛtɔ́ lɛ́ɛ ɔ́, hǔn mɛ bǐ wɛ sixú nyí hwɛjijɔnɔ ɖo Mawu nukɔn, gbɔn sɛ́n ɔ́ gbla mɛ.

²²Lo ɔ́, Mawuxówéma ɔ́ ɖɔ gbɛtɔ́ lɛ́ɛ bǐ wɛ ɖo súsú ɖo hwɛ sín acɛ glɔ́, bónú nǔ e sín akpá Mawu dó ɔ́, é ná ná mɛ e ɖi nǔ lɛ́ɛ, ɖó nǔɖiɖi e yě ɖǒ nú Jezu Klísu ɔ́ wú.

²³Cóbónú nǔɖiɖi sín hwenu ná su ɔ́, sɛ́n ɔ́ tó hɛn mǐ gantɔ́ ɖɔhun hwɛ̌, káká jɛ hwenu e Mawu wá ɖe nǔɖiɖi énɛ́ xlɛ́ mǐ dó é.

²⁴Énɛ́ ɔ́, sɛ́n ɔ́ ɖo mǐ kplɔ́n wɛ káká jɛ hwenu e Klísu wá dó é, bónú Mawu ná zé mǐ dó húzú hwɛjijɔnɔ gbɔn nǔɖiɖi gbla mɛ.

²⁵Din e nǔɖiɖi sín hwenu su ɔ́, mǐ sɔ́ ɖo mɛkplɔ́ntɔ́ énɛ́ sín acɛ mɛ ǎ;

²⁶ɖó mi bǐ nyí Mawu ví, ɖo Klísu Jezu mɛ, gbɔn nǔɖiɖi gbla mɛ.

²⁷Nǔgbó ɔ́, è lɛ yɛhwesin nú mi bǐ ɖo Klísu mɛ, bɔ mi sɔ́ Klísu sín jijɔ.

²⁸Hǔn din ɔ́, Jwifu sɔ́ ɖo vo nú mɛ e ma nyí Jwifu ǎ é ǎ; kannumɔ sɔ́ ɖo vo nú mɛ e ma nyí kannumɔ ǎ é ǎ; súnnu sɔ́ ɖo vo nú nyɔ̌nu ǎ; ɖó mi mɛ bǐ wɛ nyí ɖokpó ɔ́ ɖo Klísu Jezu mɛ.

²⁹ Ényí mi nyí Klísu tɔn hǔn, mi nyí Ablaxámu ví, bɔ nǔ ɖagbe e sín akpá Mawu dó nú Ablaxámu ɔ́, mi ná mɔ yí.