Read fon Galatinu 4 Bible Online

Galatinu 4 - fon bible

Galatinu 4

¹Xó e ɖɔ wɛ un ɖe, bó ɖɔ mɔ̌ ɔ́ ɖíe: vǐ e ɖó ná ɖu tɔ́ tɔn sín gǔ, bó má ka ko su ǎ é ɔ́, kannumɔ gbɛ mɛ wɛ é ɖe, có étɔn wɛ ka nyí nǔ lɛ́ɛ bǐ.

²Hwenu e é kpo ɖo yɔkpɔ́vú ɔ́, mɛ wɛ nɔ kpé nukún wǔ tɔn; mɛ wɛ nɔ kpɔ́n nǔ tɔn lɛ́ɛ jí káká jɛ xwe nabí e tɔ́ ɔ́ ɖɔ é ná ɖó, bɔ é ɖésúnɔ ná jɛ nǔ tɔn lɛ́ɛ nu é.

³Mɔ̌ ɖokpó ɔ́, mǐ lɔmɔ̌ ɔ́, nǔɖoyɛswímɛ gbɛmɛ fí tɔn lɛ́ɛ sín kannumɔ wɛ mǐ ko nyí ɖ'ayǐ, cóbó wá su ɖo Mawu mɛ.

⁴Lo ɔ́, ée hwe tɔn nu wá su ɔ́, é sɛ́ vǐ tɔn dó gbɔn nyɔ̌nu ɖé jí, bɔ vǐ énɛ́ lɔ nɔ sɛ́n ɔ́ glɔ́,

⁵bó ná sixú hwlɛ́n mɛ e ɖo sɛ́n ɔ́ glɔ́ lɛ́ɛ gán, bónú mǐ ná sixú húzú vǐ nú Mawu.

⁶Mawu sɛ́ yɛ vǐ tɔn tɔn dó ayi mǐtɔn mɛ, bó ná dó ɖe xlɛ́ ɖɔ mǐ nyí vǐ émítɔn nǔgbó. Yɛ ɔ́ nɔ sú xó, bó nɔ́ ɖɔ: “Daá ce! Tɔ́ ce vívɛ́ná!”

⁷Énɛ́ ɔ́, a sɔ́ nyí kannumɔ ǎ; vǐ wɛ a nyǐ. Ée a ka nyí vǐ ɔ́, Mawu ná ná nǔ ɖagbe e é sɔ́ ɖ'ayǐ nú vǐ tɔn lɛ́ɛ é bǐ we.

⁸Đ'ayǐ xóxó ɔ́, mi tunwun Mawu ǎ, bó nyí kannumɔ nú nǔmɛsɛn e ma nyí Mawu jɔ Mawu ǎ lɛ́ɛ.

⁹Amɔ̌ din e mi tunwun Mawu ɔ́, un ka ná ɖɔ din e mi tunwun Mawu ɔ́ lɔ ǎ; din e Mawu tunwun mi ɔ́, nɛ̌ mi ka sixú lɛ́ lɛ́ kɔ yi nǔmaɖinǔ énɛ́ lɛ́ɛ e má ɖó gǎn ǎ lɛ́ɛ kɔn gbɔn? Étɛ́wú mi ka jló ná lɛ́ húzú kannumɔ nǔ énɛ́ lɛ́ɛ tɔn?

¹⁰Mi nɔ ɖó kɛ́n azǎn ɖé lɛ́ɛ, sun ɖé lɛ́ɛ, hwenu ɖé lɛ́ɛ kpódó xwe ɖé lɛ́ɛ kpó jí, bó nɔ sɔ́ yě dó ɖó nǔ ɖaxó ná.

¹¹Ado ɖo huhu mì wɛ ɖó mi wú; ɖó é cí ɖi azɔ̌ e un wa ɖo mi tɛ́ntin ɔ́ nǔ yǎyá wɛ é nyí ɖɔhun.

¹²Nɔví lɛ́ɛ mi, un ɖo kɛnklɛ́n dó nú mi wɛ; mi húzú, bó cí nyɛ ɖɔhun, lě e nyɛ lɔ húzú, bó cí mi ɖɔhun gbɔn é. Mi wa nǔɖé nyi do nú mì ǎ.

¹³Mi ní flín ɖɔ azɔn jɛ wɛ un ɖe wú wɛ un jlá Wɛn Ɖagbe ɔ́ mi azɔn nukɔn nukɔntɔn ɔ́.

¹⁴Azɔn e jɛ wɛ un ɖe ɔ́ dó azɔ̌ kɔ nú mi có mi ka dó vɛ̌ nú mì ǎ; mi ka nya mì ǎ; é nyɔ́ wa ɔ́, mi yí mì lě e è nɔ yí wɛnsagun Mawu tɔn gbɔn é. Un ná ɖɔ tawun ɔ́, Klísu Jezu ɖɔhun wɛ mi yí mì.

¹⁵Xomɛ e nɔ hun mi hwenɛ́nu ɔ́, fítɛ́ é ka gbɔn? Đó un ná ɖe kúnnu nú mi ɖɔ: ényí nukún ɔ́, nǔ wɛ nyí bɔ è nɔ ɖe sín ta wú ɔ́, mi ná ko ɖe bó ná mì.

¹⁶Din ɔ́, kɛntɔ́ mitɔn wɛ un húzú ɖó nǔgbó e un ɖɔ nú mi ɔ́ wú a?

¹⁷Mɛ énɛ́ lɛ́ɛ ɖo ɖagbe mitɔn ba wɛ bó ɖɔ, lo ɔ́, ayixa yětɔn nyɔ́ ǎ. Nǔ e ba wɛ yě ɖe ɔ́ wɛ nyí ɖɔ nyɛ kpódó mi kpó ní klán, nú mi ná xwedó yě.

¹⁸Nǔgbó ɔ́, é nyɔ́ nú è nǐ ba ɖagbe mɛtɔn; è nǐ vɛ kó sixú ba kpódó ayixa ɖagbe kpó, é ní ka nyí hwebǐnu; é ní má nyí hwenu e un ɖo kpɔ́ xá mi ɔ́ kɛ́ɖɛ́ ó.

¹⁹Vǐ ce lɛ́ɛ mi, un lɛ́ ɖo wǔvɛ́ mɔ dó ta mitɔn mɛ wɛ nyɔ̌nu ɖo ajidonu ɖɔhun. Un ná ɖo wǔvɛ́ énɛ́ ɔ́ mɔ wɛ káká jɛ hwenu e mi ná wa nǔ Klísu ɖɔhun dó é.

²⁰É jló mì nú má ɖo kpɔ́ xá mi din, bó ná sɔ́ gbe vo dó ɖɔ xó nú mi; ɖó ado ɖo huhu mì wɛ tawun ɖó mi wú.

²¹Nǔ e un jló ná kanbyɔ́ mi ɔ́, mi mɛ e jló ná nɔ sɛ́n ɔ́ sín acɛ mɛ lɛ́ɛ ɔ́, mi se nǔ e sɛ́n ɔ́ ɖɔ ɔ́ ǎ cé?

²² È ɖɔ Ablaxámu ɖó vǐ we; é ji ɖokpó ɖo nyɔ̌nu kannumɔ ɔ́ xomɛ, bó ji ɖokpó ɖo mɛ e ma nyí kannumɔ ǎ é xomɛ.

²³Kannumɔ ɔ́ sín vǐ ɔ́, è ji i vǐ bǐ ɖɔhun. Lo ɔ́, nyɔ̌nu e má nyí kannumɔ ǎ ɔ́ sín vǐ ɔ́, akpá tɔn wɛ Mawu dǒ nú Ablaxámu cóbɔ è ji i.

²⁴Nǔ énɛ́ lɛ́ɛ e è ɖɔ ɔ́, nǔ jlɛ́ dó nǔ wú wɛ. Nyɔ̌nu we énɛ́ lɛ́ɛ ɔ́, akɔjijɛ we wɛ yě nyí. Nyɔ̌nu e ji vǐ kannumɔ lɛ́ɛ ɔ́, Hagáa wɛ, bɔ éyɛ́ sɔ́ akɔ e è jɛ ɖo só Sinayíi tɔn jí ɔ́ sín afɔ ɖó te.

²⁵Đó Hagáa wɛ nyí só Sinayíi tɔn e ɖo Alabíi é. É wɛ lɛ́ ɖo Jeluzalɛ́mu[4] égbé tɔn ɔ́ nyí wɛ, bɔ é kpódó vǐ tɔn lɛ́ɛ kpó ɖo kannumɔgbénu.

²⁶Jeluzalɛ́mu sɛ́xwé tɔn ɔ́ ɖo é ɖésúnɔ sí; é wɛ nyí nɔ mǐtɔn.

²⁷Đó Mawuxó ɔ́ ɖɔ: “Wɛnsinɔ, hwi mɛ e ma ji vǐ kpɔ́n ǎ é, jɛ awǎ; hwi mɛ e ma mɔ wǔvɛ́ ɖo ajidonu kpɔ́n ǎ é, sú xó bó jɛ awǎ; ɖó nyɔ̌nu e asú tɔn gbɛ́ e ná ɖó vǐ hú nyɔ̌nu e ɖo asúxwé é.”

²⁸Amɔ̌ mi nɔví lɛ́ɛ mi! Vǐ e Mawu dó akpá tɔn bó ji lɛ́ɛ wɛ mi nyí Izáki ɖɔhun.

²⁹Đ'ayǐ xóxó ɔ́, mɛ e è ji vǐ bǐ ɖɔhun ɔ́ nɔ dó ya nú mɛ e è ji gbɔn Yɛsinsɛn jí ɔ́; mɔ̌ ɖokpó ɔ́ wɛ é lɛ́ ɖe gbɔn din.

³⁰ Lo ɔ́, étɛ́ Mawuxó ɔ́ ɖɔ? É ɖɔ: “Nya nyɔ̌nu mɛsɛntɔ́ ɔ́ kpódó vǐ tɔn kpó; ɖó mɛsɛntɔ́ sín vǐ ná ɖu gǔ xá mɛ e ma nyí mɛsɛntɔ́ ǎ é sín vǐ ǎ.”

³¹Hǔn nɔví lɛ́ɛ mi! Mǐ nyí nyɔ̌nu kannumɔ ɔ́ sín vǐ ǎ; nyɔ̌nu e má nyí kannumɔ ǎ é sín vǐ wɛ mǐ nyí.