Read fon Galatinu 5 Bible Online

Galatinu 5 - fon bible

Galatinu 5

¹Klísu ɖe mǐ sín sɛ́n ɔ́ kannu, bónú mǐ ná jɛ mǐ ɖésúnɔ sí. Mi bo syɛ́nlǐn, bó má lɛ́ wá húzú kannumɔ ó.

²Nyɛ Pɔ́lu wɛ tɛ ɖɛ̌ jí, bó ɖo ɖiɖɔ nú mi wɛ ɖɔ ényí mi jó miɖée dó, bónú è gbo ada nú mi hǔn, nǔ e Klísu wa nú mi ɔ́, nǔ yǎyá wɛ.

³Un lɛ́ ɖo ɖiɖɔ nú mi wɛ ɖɔ: mɛ ɖěbǔ gbo ada lě e Jwifu lɛ́ɛ sín sɛ́n zɔ́n gbɔn ɔ́ hǔn, ní tunwun ɖɔ émí ɖó ná nyi sɛ́n Jwifu lɛ́ɛ tɔn bǐ.

⁴Mi mɛ e nɔ ba ná nyi sɛ́n ɔ́, bó ná dó nyí hwɛjijɔnɔ ɖo Mawu nukɔn lɛ́ɛ ɔ́, mi tunwun ɖɔ émí kpó Klísu kpó klán, bɔ émí ba fɛ́nú Mawu tɔn kpo.

⁵Mǐdɛɛ lɛ́ɛ ɔ́, mǐ ɖo nukún ɖó wɛ ɖɔ Mawu ná sɔ́ mǐ dó húzú hwɛjijɔnɔ. Nǔ énɛ́ ɖó nukún wɛ mǐ ɖe gbɔn Yɛsinsɛn e ɖo azɔ̌ wa wɛ gbɔn nǔɖiɖi mɛ ɔ́ sín hlɔ̌nhlɔ́n jí;

⁶ɖó ényí mǐ ɖo kpɔ́ xá Klísu Jezu ɔ́, adagbigbo nyí nǔɖé ǎ; adamagbo lɔ ka nyí nǔɖé ǎ. Nǔ e ɖo tají ɔ́ wɛ nyí nǔɖiɖi e nɔ wa nǔ kpódó wǎn yíyí kpó é.

⁷Mi ka ɖo nukɔn yi wɛ ganjí ɖ'ayǐ nɛ́! Mɛ̌ ka ɖó mi te bó gbɛ́ ɖɔ mi ní má sɔ́ se tónú nú nǔgbó ɔ́ ó?

⁸Nǔ énɛ́ e è ɖɔ nú mi káká bɔ mi yí gbe ná ɔ́ gosín Mawu e ɖo mi ylɔ́ wɛ ɔ́ gɔ́n ǎ.

⁹ Lě e è ko nɔ ɖɔ gbɔn ɔ́: “Tɔ́n[5] kpɛví ɖé wɛ nɔ fɔ́n linfín e è nya ɔ́ bǐ.”

¹⁰É ɖo mɔ̌ có un ɖó jiɖiɖe dó mi wú ɖo Aklúnɔ mɛ ɖɔ mi kún ná lin nǔ ɖěvo zɛ ée un lin é wú ó; amɔ̌ mɛ e ɖo hunnyahunnya dó mi mɛ wɛ ɔ́, é ná bo nyí nǔɖébǔnɔ ɔ́, Mawu na dɔn tó n'i.

¹¹Nɔví lɛ́ɛ mi, nyɛ ɔ́, ényí un lɛ́ kpo ɖo ɖiɖɔ wɛ ɖɔ ada jɛ́n è nǎ gbo dandan ɔ́, étɛ́ sín ya dó nú mì wɛ è ka lɛ́ kpo ɖe? Ényí ɖɔ mɔ̌ bló gbɔn wɛ un ɖe ɔ́, Wɛn Ɖagbe e jlá wɛ un ɖe bɔ é ɖɔ xó dó Klísu e è ká nyi aklúzu jí ɔ́ wú ɔ́ sɔ́ ná nyí afɔklɛ́nnú nú mɛɖé ǎ.

¹²Un jló ɖɔ mɛ e ɖo hunnyahunnya dó mi mɛ wɛ lɛ́ɛ ɔ́, ní má nyí ada kɛ́ɖɛ́ wɛ yě ná gbo ó; lo ɔ́, yě ní sá yěɖée.

¹³Nɔví lɛ́ɛ mi, midɛɛ lɛ́ɛ ɔ́, mi ná nɔ mi ɖésúnɔ sí wú wɛ Mawu ylɔ́ mi; amɔ̌ mi ma kpɔ́n ɖɔ émí ko ɖo émí ɖésúnɔ sí, bó wa nǔ e jló mi ɔ́ ó. Lo ɔ́, mi xwedó wǎn yíyí Mawu tɔn, bó húzú mɛsɛntɔ́ nú miɖée.

¹⁴Đó ényí è sɛ sin xwe nú sɛ́n lɛ́ɛ bǐ ɔ́, nǔ e ɖɔ wɛ yě ɖe ɔ́ ɖíe: “Yǐ wǎn nú nɔzo towe hwi ɖésú ɖɔhun.”

¹⁵Mi cɔ́ miɖée, é má nyí mɔ̌ ǎ ɔ́, nú mi zán gbɛ mitɔn gběkanlin lɛ́ɛ ɖɔhun, bó ɖo wǔ gblé miɖée wɛ, bó ɖo ya dó nú miɖée wɛ ɔ́, mi ná sú miɖée kún dó.

¹⁶Un ɖo ɖiɖɔ nú mi wɛ ɖɔ mi ní jó miɖée dó nú Yɛsinsɛn ní xlɛ́ ali mi; mi ma wa nǔ e jló mi lɛ́ɛ ó.

¹⁷Đó jlǒ nyanya gbɛtɔ́ tɔn lɛ́ɛ nɔ sí te dó jlǒ Yɛsinsɛn tɔn lɛ́ɛ jí. Mɔ̌ ɖokpó ɔ́, jlǒ Yɛsinsɛn tɔn lɛ́ɛ lɔ nɔ sí te dó jlǒ nyanya gbɛtɔ́ tɔn lɛ́ɛ jí; yě gbɔn vo sésé nú yěɖée, bónú mi ma wa nǔ e jló mi lɛ́ɛ ó.

¹⁸Ényí Yɛsinsɛn ɖo ali xlɛ́ mi wɛ ɔ́, sɛ́n ɔ́ sɔ́ ɖó acɛ ɖo mi jí ǎ.

¹⁹Nǔ nyanya e gbɛtɔ́ nɔ wa lɛ́ɛ ɖo nǔglɔ́ ǎ; yě wɛ nyí: agalilɛ, nǔ kwíji kwíji wiwa, nǔ nyanya wiwa,

²⁰vodúnsinsɛn, majíkiblóbló, wǎngbɛ́númɛ, jlɛɖiɖɔ, wǔhwinhwan, majijɛ, zalixámɛ, nǔmɛkínkɛ́n, gbemanɔkpɔ́,

²¹mɛnújlójló, ahannumú, nǔɖudíngan kpódó nǔ hǔnmɛ énɛ́ lɛ́ɛ kpán. Un ɖo ɖiɖɔ nú mi wɛ din lě e un ko ɖɔ gbɔn nú mi ɖ'ayǐ ɔ́, ɖɔ mɛ e nɔ wa nǔ mɔ̌hunkɔtɔn lɛ́ɛ kún ɖo axɔ́súɖuɖu Mawu tɔn mɛ ná byɔ́ wɛ ó.

²²Lo ɔ́, nǔ e Yɛsinsɛn nɔ ná mɛ ɔ́ wɛ nyí wǎn yíyí, xomɛhunhun, vivo mimɔ, suúluɖíɖó, xomɛnyínyɔ́, ɖagbewiwa, gbejíninɔ,

²³fífá, mɛɖéejíɖuɖe[6]; nǔgbó ɔ́, sɛ́n ɔ́ gbɛ́ nǔ énɛ́ lɛ́ɛ ǎ.

²⁴Mɛ e nyí Klísu Jezu tɔn lɛ́ɛ ko ká hwɛhuhu sín ninɔmɛ e yě ɖó ɔ́, kpódó jlǒ tɔn lɛ́ɛ bǐ kpó nyi aklúzu jí.

²⁵Ée ényí ɖɔ Yɛsinsɛn wɛ ná gbɛ jɔ gbɛ mǐ ɔ́, mǐ ní bó jó mǐɖée dó n'i, bónú é ná xlɛ́ ali mǐ.

²⁶Mǐ ní má nyí goyítɔ́ ó; mǐ ní má nɔ dó xomɛsin xomɛ nú mǐɖée ó; mǐɖée nú ní má nɔ su mǐɖée nukún mɛ ó.