Read fon Galatinu 6 Bible Online

Galatinu 6 - fon bible

Galatinu 6

¹Nɔví lɛ́ɛ mi! Mi mɛ e ko ɖó nukɔn yiyi ɖo nǔɖiɖi mɛ lɛ́ɛ ɔ́, ényí mɛɖé ɖo nǔ ɖěbǔ wa nyi do wɛ, bónú è gbo e dó hǔn, mi ɖe e ɖó ali jí; mi ka bló kpódó xomɛfífá kpó. Un ka lɛ́ ɖo ɖiɖɔ nú mi wɛ ɖɔ mi cɔ́ miɖée, bónú mi ɖésúnɔ má wá jɛ tɛ́nkpɔ́n mɛ ó.

²Mi hɛn agban mitɔn lɛ́ɛ xá miɖée; ényí mi bló mɔ̌ hǔn, Klísu sín sɛ́n ɔ́ nyi wɛ mi ɖe nɛ́.

³Mɛ e nɔ mɔ éɖée dó mɔ nǔgɛ́n, bó má ka nyí nǔɖé ǎ ɔ́, éɖée blɛ́ wɛ é ɖe, ɖó é nyí nǔtí ǎ.

⁴Mɛ ɖokpó ɖokpó ní byɔ́ éɖée mɛ, bó kpɔ́n nǔ e wa wɛ é ɖe lɛ́ɛ; ényí nǔ e wa wɛ é ɖe lɛ́ɛ sixú nyí xomɛhunhun nú n'i ɔ́, é ní hun xomɛ ɖo éɖée mɛ; é má jlɛ́ éɖée dó mɛ ɖě lɛ́ɛ wú ó.

⁵Đó mɛ ɖokpó ɖokpó ɖó ná wa azɔ̌ e nyí étɔn é.

⁶Mɛ e kplɔ́n Mawuxó ɔ́ wɛ è ɖe ɔ́ ɖó ná má nǔ ɖagbe e ɖo así tɔn lɛ́ɛ bǐ xá mɛ e ɖo Mawuxó ɔ́ kplɔ́n ɛ wɛ é.

⁷Mi ma blɛ́ miɖée ó, mɛɖé nɔ wa yɛ nú Mawu ǎ. Nǔ e è dǒ ɔ́ wɛ è nɔ ya.

⁸Mɛ ɖé wa jlǒ nyanya gbɛtɔ́ tɔn ɔ́, jlǒ nyanya gbɛtɔ́ tɔn ná dɔn kú wá n'i; mɛɖé ka wa jlǒ Yɛsinsɛn tɔn ɔ́, Yɛsinsɛn ná ná ɛ gbɛ mavɔ mavɔ.

⁹Hǔn awakanmɛ ní má kú mǐ dó nǔ ɖagbe wiwa wú ó. Đó nú awakanmɛ ma kú mǐ ǎ, bónú hwe tɔn nu wá su ɔ́, mǐ ná mɔ ajɔ tɔn yí.

¹⁰Ényí mɔ̌ hǔn nɔví lɛ́ɛ mi, ényí mǐ mɔ ɖagbewiwa sín ali hweɖěbǔnu hǔn, mǐ ní nɔ wa nú mɛ bǐ, ɖo tají ɔ́, nú nɔví ɖo nǔɖiɖi mɛ lɛ́ɛ.

¹¹Din ɔ́, nyɛ ɖésú wɛ ɖo xó élɔ́ lɛ́ɛ wlán sɛ́ dó mi wɛ kpó alɔ ce kpó. Ényí mi ko mɔ lě e wěkwín lɛ́ɛ kló gbɔn ɔ́, mi ná tunwun ɖɔ nyɛ ɖésúnɔ wɛ wlán.

¹²Mɛ e ɖɔ ada jɛ́n mi ná gbo dandan lɛ́ɛ ɔ́, nǔ e ba wɛ yě ɖe ɔ́ wɛ nyí ɖɔ yě ná ɖe yěɖée xlɛ́ ɖo gbɛtɔ́ lɛ́ɛ nukɔn, ɖó yě jlǒ ɖɔ è ní dó ya nú émí ɖó Klísu e kú ɖo aklúzu jí é wú ǎ.

¹³Yě mɛ énɛ́ lɛ́ɛ e gbo ada ɔ́ ɖésú nɔ nyi sɛ́n ɔ́ ǎ. Yě jló ɖɔ mi ní yí gbe bó gbo ada, bó ná dó tɛ afɔ ayǐ ɖɔ émí wɛ gbo ada nú mi.

¹⁴Nyɛ ɔ́, nǔ ɖokpó e wú un nɔ tɛ afɔ ayǐ ɔ́ wɛ nyí kú e Aklúnɔ mǐtɔn Jezu Klísu kú ɖo aklúzu jí é. Nǔgbó ɔ́, gbɔn kú Klísu tɔn jí ɔ́, gbɛ ɔ́ kú nú mì, bɔ nyɛ lɔ kú nú gbɛ ɔ́.

¹⁵Adagbigbo nyí nǔɖé ǎ; adamagbo lɔ ka nyí nǔɖé ǎ; nǔ e ɖo tají ɔ́ wɛ nyí ɖɔ è ní nyí mɛ yɔ̌yɔ́.

¹⁶Fífá kpódó xomɛnyínyɔ́ Mawu tɔn kpó ní nɔ kpɔ́ xá mɛ e nɔ xwedó tito énɛ́ lɛ́ɛ ɖo gbɛzán yětɔn mɛ lɛ́ɛ, bó nɔ kpɔ́ xá mɛɖeɖóvo Mawu tɔn lɛ́ɛ bǐ.

¹⁷Bɛ́ sín din ɔ́, mɛ ɖěbǔ má sɔ́ dó tagba ɖě nú mì ó. Đó akpado e ɖo wǔ ce lɛ́ɛ ko xlɛ́ ɖɔ un nyí Jezu tɔn.

¹⁸Nɔví lɛ́ɛ mi! Fɛ́nú Aklúnɔ mǐtɔn Jezu Klísu tɔn ní nɔ kpɔ́ xá mi bǐ. Amǐ.