Read fon Efɛ́zinu 1 Bible Online

Efɛ́zinu 1 - fon bible

Efɛ́zinu 1

¹ Nyɛ Pɔ́lu e nyí mɛsɛ́dó Klísu Jezu tɔn gbɔn jlǒ Mawu tɔn mɛ é wɛ sɛ́ wěma élɔ́ dó mɛɖeɖóvo Mawu tɔn e ɖo Efɛ́zi, bó ɖo gbejí ɖo bǔ e yě ɖe xá Klísu Jezu ɔ́ mɛ lɛ́ɛ é.

²Mawu Tɔ́ mǐtɔn kpódó Aklúnɔ mǐtɔn Jezu Klísu kpó ní ná fɛ́nú kpódó fífá kpó mi.

³Mi nú mǐ ná dó kú nú Mawu Aklúnɔ mǐtɔn Jezu Klísu sín Tɔ́, ɖó é ná nyɔ̌ná Yɛsinsɛn tɔn tɛnmɛ tɛnmɛ lɛ́ɛ bǐ mǐ, bó dó xo ɖɛ dó mǐ jí, ɖo bǔ e mǐ ɖe xá Klísu ɖo yɛswímɛ ɔ́ mɛ.

⁴Đó, cóbónú Mawu ná bló gbɛ ɔ́, é ko cyán mǐ, bɔ mǐ ná nyí étɔn ɖo Klísu mɛ, bónú mǐ ná sixú nyí mɛ mímɛ́, mɛ ma ɖó blɔ̌ ɖo wǔ ɖo nukɔn tɔn; ɖo wǎn yíyí tɔn mɛ ɔ́,

⁵Mawu ko to ɖ'ayǐ ɖɔ émí ná sɔ́ mǐ dó ɖó vǐ gbɔn Jezu Klísu jí. É jló e mɔ̌ ɖó é nyɔ́ nukún tɔn mɛ.

⁶Mǐ ní bó kpa Mawu, ɖó é ná fɛ́nú tɔn susunɔ ɔ́ mǐ kpó xomɛhunhun kpó, ɖo Vǐ tɔn vívɛ́ná ɔ́ mɛ.

⁷Đó Mawu ɖe mǐ sín nǔ nyanya mɛ, bó sɔ́ hwɛ mǐtɔn lɛ́ɛ kɛ mǐ gbɔn Jezu Klísu sín hun gbla mɛ[1]. Lě e é ɖe xomɛnyínyɔ́ tɔn maɖójlɛ̌ ɔ́ xlɛ́ mǐ gbɔn é nɛ́.

⁸É ná mǐ nyɔ̌ná tɔn énɛ́ bɔ é túnflá gbɔn nǔnywɛ́ kpíkpé kpódó nukúnnú-mɔjɛnǔmɛ kpíkpé e é ná mǐ ɔ́ kpán gbla mɛ.

⁹Mawu ɖe nǔbúdo e é ko to, bó ɖɔ kpó jlǒ tɔn kpó ɖɔ émí ná bló gbɔn Klísu jí ɔ́ xlɛ́ mǐ.

¹⁰Tito énɛ́ e Mawu bló fó ɖo hwe tɔn nu ɔ́ wɛ nyí ɖɔ nǔ e ɖo jǐnukúnsin lɛ́ɛ, kpó ée ɖo ayǐkúngban jí lɛ́ɛ bǐ kpó ná kplé ɖo gǎn ɖokpó géé glɔ́; Gǎn énɛ́ wɛ nyí Klísu.

¹¹Bǔ e mǐ ɖe xá Klísu é mɛ wɛ mǐ mɔ hwlɛngán e nyí mǐtɔn ɔ́ yí ɖe; ɖó Mawu ko sɔ́ mǐ ɖ'ayǐ lě e é ko to gbɔn é; Mawu nɔ́ wa nǔ bɔ é nɔ sɔgbe xá lě e é ɖésúnɔ jló bó ɖɔ gbɔn é.

¹²Mǐ mɛ Jwifu lɛ́ɛ wɛ nyí mɛ nukɔntɔn e ɖo nukún ɖó nǔ wɛ ɖo Klísu mɛ lɛ́ɛ é; hǔn mǐ ní bó kpa susu Mawu tɔn.

¹³Mi mɛ e ma nyí Jwifu ǎ lɛ́ɛ lɔmɔ̌ ɔ́, hwenu e mi se nǔgbó wɛn, Wɛn Ɖagbe e nɔ ná hwlɛngán mɛ ɔ́ sín xó ɔ́, mi ɖi nǔ nú Klísu, bɔ Mawu ná Yɛsinsɛn e sín akpá e é dó ɔ́ mi, bó dó ɖó wuntun mi.

¹⁴Yɛsinsɛn ɔ́ wɛ nyí nǔ ɖagbe e Mawu sɔ́ ɖó te nú togun tɔn ɔ́ sín gǎnjɛwú nú mǐ. É wɛ nyí gǎnjɛwú mǐtɔn ɖɔ hwenu e mǐ ná nyí Mawu tɔn bǐ kpéte ɔ́, mǐ ná mɔ yě yí. Hǔn mǐ ní bó kpa susu Mawu tɔn.

¹⁵Énɛ́ ɔ́ wútu wɛ ée nyi lɔmɔ̌ un se lě e mi ɖi nǔ nú Aklúnɔ Jezu gbɔn, bó se lě e mi yí wǎn nú mɛɖeɖóvo Mawu tɔn lɛ́ɛ bǐ gbɔn ɔ́,

¹⁶un nɔ gɔn kú dó nú Mawu dó ta mitɔn mɛ ǎ. Un ɖo ɖɛ xo wɛ hweɖěbǔnu ɔ́, un nɔ flín mi.

¹⁷Un nɔ byɔ́ Mawu Aklúnɔ mǐtɔn Jezu Klísu tɔn e nyí Tɔ́ susunɔ ɔ́ ɖɔ ní ná Yɛ tɔn mi, bónú Yɛ ɔ́ ná ná nǔnywɛ́ mi, bó ná ɖe mɛ e Mawu nyí ɔ́ xlɛ́ mi, bónú mi ná tunwun i.

¹⁸Un nɔ byɔ́ ɛ ɖɔ ní bló bónú wěziza ní byɔ́ ayi mitɔn mɛ, bónú mi ná tunwun nǔ e nukúnɖíɖó e wútu é ylɔ́ mi ɔ́ nyí é, bó ná tunwun lě e dɔkun e ɖo nǔ ɖagbe ɖagbe e é sɔ́ ɖ'ayǐ nú mɛ e nyí étɔn lɛ́ɛ mɛ ɔ́ sɔ́ é.

¹⁹ Énɛ́ ɔ́, mi ná tunwun acɛ ɖaxó e ɖo azɔ̌ wa wɛ ɖo mǐ mɛ e ɖi nǔ n'i lɛ́ɛ mɛ é. Acɛ ɖaxó énɛ́ ɖokpó ɔ́ wɛ é ɖe xlɛ́ mǐ kpódó hlɔ̌nhlɔ́n tɔn kpán hwenu e é fɔ́n Klísu sín kú wá gbɛ, bó sɔ́ ɛ jínjɔ́n ɖisíxwé ɖo yɛswímɛ é.

²¹Đo fínɛ́ ɔ́, Klísu hú gǎn gǎn lɛ́ɛ bǐ; é hú gǎn hlɔ̌nhlɔ́n lɛ́ɛ bǐ; é hú gǎn acɛkpikpa lɛ́ɛ bǐ; é hú gǎn gǎnhúnǔtɔ́ lɛ́ɛ bǐ, bɔ nǔ e mɛ ɖěbǔ ko sixú nyí ɔ́, é hú gǎn bǐ; é nyí gbɛ élɔ́ mɛ kɛ́ɖɛ́ wɛ é hú gǎn nǔ bǐ ɖe ǎ; lo ɔ́, é lɛ́ hú gǎn nǔ bǐ ɖo gbɛ e jǎwe ɔ́ mɛ.

²² Mawu sɔ́ nǔ lɛ́ɛ bǐ ɖó Klísu sín acɛ mɛ, bó sɔ́ ɛ ɖó agun ɔ́ nú, bɔ é wɛ nyí gǎn ɖaxó bǐ ɔ́.

²³Agun Mawu tɔn ɔ́, agbaza Klísu tɔn wɛ, bɔ Klísu e kpa acɛ nú gbɛ ɔ́ bǐ ɔ́, agun ɔ́ mɛ wɛ é ɖe bǐ kpéte.