Read fon Efɛ́zinu 4 Bible Online

Efɛ́zinu 4 - fon bible

Efɛ́zinu 4

¹Đó nǔ énɛ́ lɛ́ɛ bǐ wú ɔ́, nyɛ mɛ e ɖo ganxó ɖó un ɖo Aklúnɔ sɛn wɛ wútu ɔ́, un ɖo byɔ̌byɔ́ mi wɛ ɖɔ mi ní zán gbɛ mitɔn ní sɔgbe xá lě e Mawu jló gbɔn hwenu e é ylɔ́ mi é.

² Mi nɔ sɔ́ miɖée hwe hwebǐnu; mi nɔ ɖó xomɛfífá, bó nɔ́ ɖó suúlu. Mi nɔ mɔ miɖée gbɔ ɖo wǎn yíyí mɛ.

³Mi dó gǎn, bó sɔ́ fífá e dɔn mi cá, bɔ mi nyí ɖokpó ɔ́ dó hɛn bǔteninɔ e Yɛsinsɛn ná mi ɔ́ ɖó te.

⁴Agbaza ɖokpó géé wɛ ɖe, bɔ Yɛsinsɛn ɖokpó géé ɖe lě e nukúnɖíɖó e wú Mawu ylɔ́ mǐ é lɔ nyí ɖokpó géé gbɔn é.

⁵Aklúnɔ ɖokpó géé wɛ ɖe, bɔ nǔɖiɖi ɖokpó géé ɖe, bɔ yɛhwesinlilɛ ɖokpó géé ɖe.

⁶Mawu ɖokpó géé wɛ ɖe, bó nyí Tɔ́ nú mɛ bǐ, bó kpa acɛ nú mɛ bǐ, bó ɖo azɔ̌ wa wɛ ɖo mɛ bǐ mɛ, bó ɖo mɛ bǐ mɛ.

⁷Có nǔníná vovo wɛ mǐ mɛ ɖokpó ɖokpó mɔ yí, bɔ é sɔgbe xá ée Klísu ná é.

⁸ Lě e nǔ e è wlǎn dó Mawuxówéma ɔ́ mɛ ɔ́ ɖɔ gbɔn ɔ́: “Hwenu e é yi jǐ aga ɔ́, é kplá gantɔ́ lɛ́ɛ yi, é ná nǔ gbɛtɔ́ lɛ́ɛ.”

⁹Étɛ́ ɖɔ wɛ è ka ɖe bó ɖɔ é yi jǐ aga? Ényí è ɖɔ é yi jǐ aga hǔn, é tó jɛ te wá do ɖo ayǐkúngban jí hwɛ̌ nɛ́!

¹⁰Mɛ e jɛ te wá do ɖo ayǐkúngban jí ɔ́ ɖokpó ɔ́ wɛ yi jǐ aga, bó ná sixú ɖu axɔ́sú ɖo nǔ bǐ nu ɖo fí bǐ.

¹¹É wɛ ná nǔníná vovo gbɛtɔ́ lɛ́ɛ. É ná, bɔ mɛɖé lɛ́ɛ nyí mɛsɛ́dó, bɔ mɛɖé lɛ́ɛ nyí gbeyíɖɔ Mawu tɔn, mɛɖé lɛ́ɛ nyí Mawuxójlátɔ́, bɔ mɛɖé lɛ́ɛ nyí nukɔntɔ́, bó nyí nǔkplɔ́nmɛtɔ́.

¹²É bló mɔ̌, bó ná bló mɛɖeɖóvo Mawu tɔn lɛ́ɛ ɖó, bɔ yě ná sixú wa azɔ̌ e nyí klísusɛntɔ́ tɔn é; é ná bló bɔ agun e nyí agbaza Klísu tɔn ɔ́ ná yi nukɔn ɖo nǔɖiɖi mɛ,

¹³káká bɔ mǐ ná nɔ bǔ ɖo nǔɖiɖi mɛ, bó ná nɔ bǔ ɖo nukúnnú mɔ jɛ Mawu ví ɔ́ wú mɛ; mǐ ná nyí mɛxó ɖo nǔɖiɖi mɛ, bó ná mɔ hlɔ̌nhlɔ́n, lobo ná sɔ ga Klísu, bɔ nǔ bǐ ná vɔ ɖ'é wú.

¹⁴Énɛ́ ɔ́, mǐ sɔ́ ná cí yɔkpɔ́vú lɛ́ɛ ɖɔhun, bɔ mɛblɛ́ɖutɔ́ lɛ́ɛ ná sɔ́ nǔkplɔ́nmɛ yětɔn lɛ́ɛ dó gba ayi dó nú mǐ, bɔ mǐ ná nɔ xo yi aɖisí, bó ná nɔ́ xo yi amyɔ, lě e aslɔkɛ́ kpó jɔhɔn kpó nɔ́ dó ya nú tɔjíhún gbɔn ɖo tɔjí é ɖɔhun ǎ. Đó mɛblɛ́ɖutɔ́ lɛ́ɛ ɔ́, nǔ e yě sɔ́ sísɛ́ yětɔn dó wa é wɛ yě nɔ́ zé dó dɔn mɛ dó nǔ nyanya mɛ.

¹⁵Lo ɔ́, mǐ ɖo nǔgbó ɔ́ jlá wɛ kpódó wǎn yíyí kpó ɔ́, mǐ ná ɖo nukɔn yi wɛ ɖo nǔ bǐ mɛ, bó ná ɖo sisɛkpɔ́ Klísu e nyí ta ɔ́ wɛ.

¹⁶ É wɛ zɔ́n bɔ wǔjɔnú tɛnmɛ tɛnmɛ agbaza tɔn lɛ́ɛ bǐ ɖo bǔ, bɔ gǒflɛ́mɛ tɛnmɛ tɛnmɛ e ɖo agbaza ɔ́ wú lɛ́ɛ hɛn agbaza ɔ́ ɖó bǔ ganjí. Énɛ́ ɔ́, ényí wǔjɔnú lɛ́ɛ ɖokpó ɖokpó ɖo azɔ̌ tɔn wa wɛ ɔ́, agbaza ɔ́ bǐ nɔ su, bó nɔ ɖo nukɔn yi wɛ gbɔn wǎn yíyí mɛ.

¹⁷Xó e ɖɔ nú mi wɛ un ɖe ɖo Aklúnɔ sín nyǐkɔ mɛ é ɖíe: mi ma sɔ́ nɔ zán gbɛ mitɔn nǔmaɖitɔ́ lɛ́ɛ ɖɔhun ó; yědɛɛ lɛ́ɛ ɔ́, linlin yětɔn ma ɖó ta ɖé lɛ́ɛ wɛ yě nɔ́ xwedó.

¹⁸Ayi yětɔn nɔ́ mɔ nǔ ɖěbǔ ǎ. Gbɛ jɔ gbɛ e Mawu nɔ́ ná mɛ ɔ́, yědɛɛ lɛ́ɛ ɖó mǐmá ɖěbǔ ɖ'é mɛ ǎ; ɖó yě gǔ, bó tlí tó taala.

¹⁹Nǔ ɖěbǔ sɔ́ nɔ́ nyí winnyá nú yě ǎ; yě jó yěɖée dó nú nǔ nyanya wiwa; nǔ ɖěbǔ nɔ́ hɛn yě ɖó te ɖo nǔ nyanya wiwa lixo ǎ.

²⁰Midɛɛ lɛ́ɛ ɔ́, nǔ e mi kplɔ́n dó Klísu jí ɔ́ nɛ́ ǎ.

²¹Dandan mɛ ɔ́, è ɖɔ Jezu sín xó bɔ mi se. Ée mi ka ɖi nǔ nú Jezu ɔ́, è ko kplɔ́n nǔgbó e ɖo Jezu mɛ ɔ́ mi.

²² Hǔn mi ɖó ná ɖe mɛ e mi nyí ɖ'ayǐ xóxó ɔ́ nyi ayǐ. Mɛ e mi nyí ɖ'ayǐ xóxó ɔ́ wɛ nɔ sɔ́ lě e mi nɔ zán gbɛ mitɔn gbɔn ɖ'ayǐ ɔ́ dó ayi mɛ nú mi. É wɛ jlǒ tɔn e nɔ blɛ́ mɛ lɛ́ɛ nɔ hɛn bú.

²³Ayixa mitɔn kpódó linlin mitɔn kpó ɖó ná húzú bǐ kpéte.

²⁴ Mi sɔ́ mɛ yɔ̌yɔ́ e Mawu bló, bɔ é cí é ɖésúnɔ ɖɔhun ɔ́ dó. Mɛ yɔ̌yɔ́ énɛ́ nɔ́ ɖe éɖée xlɛ́ ɖo gbɛ jlɔ́jlɔ́, gbɛ mímɛ́ e nǔgbó ɔ́ nɔ sɔ́ dó ayi mɛ nú mɛ ɔ́ mɛ.

²⁵ Énɛ́ wútu ɔ́, mi jó adingban dó, nú mɛ ɖokpó ɖokpó ní ɖɔ nǔgbó nú nɔzo tɔn, ɖó mǐ bǐ wɛ nyí wǔjɔnú agbaza ɖokpó ɔ́ tɔn.

²⁶ Ényí mi sin xomɛ hǔn, mi cɔ́ miɖée bó ma jɛ hwɛ mɛ ó; hwe ma yi xɔ dó xomɛsin mitɔn ó.

²⁷Mi ma ná tɛn awǒvi bónú é tɛ́n mi kpɔ́n ó.

²⁸Mɛ e nɔ jɛ ajo ɖ'ayǐ ɔ́, ní jó ajo dó bó wa azɔ̌, bó nyí é ɖésúnɔ kpódó ayijlɔ́jlɔ́ kpó; énɛ́ ɔ́, é ná ɖó nǔ e é ná dó dó alɔ mɛ e nǔɖé hudó lɛ́ɛ é.

²⁹Xó nyanya ɖěbǔ má nɔ tɔ́n sín nu mitɔn mɛ ó. Xó ɖagbe e ná dó alɔ mɛ nǔgbomɛ hwenu é, xó e ná wa ɖagbe nú mɛ e ɖo tó ɖó mi wɛ lɛ́ɛ kɛ́ɖɛ́ wɛ ná nɔ́ tɔ́n sín nu mitɔn mɛ.

³⁰Mi ma wa nǔ bónú wǔ kú Yɛsinsɛn Mawu tɔn ó; Yɛsinsɛn énɛ́ wɛ nyí wuntun Mawu tɔn e ɖo mi wú é. É wɛ nyí gǎnjɛwú mǐtɔn ɖɔ ayǐ ɖé ná wá hɔ́n, bɔ Mawu ná ɖe mǐ sín nǔ nyanya mɛ bǐ sésé.

³¹Mi jó akpɔmimɔ dó; mi jó aɖi ɖíɖó dó, bó jó xomɛsin dó; mi jó jlɛɖiɖɔ dó, bó jó mɛnúɖiɖɔ dó. Mi jó adǎkaxixo bǐ dó.

³² Mi nyɔ́ xomɛ dó miɖée wú, bó nɔ́ sɔ́ hwɛ kɛ miɖée, lě e Mawu sɔ́ hwɛ kɛ mi ɖo Klísu mɛ gbɔn é.