Read fon Efɛ́zinu 5 Bible Online

Efɛ́zinu 5 - fon bible

Efɛ́zinu 5

¹Vǐ vívɛ́ná wɛ mi nyí nú Mawu; énɛ́ ɔ́ wútu ɔ́, mi ɖó ná dó gǎn, bó wa nǔ é ɖɔhun.

² Mi wa azɔ̌ kpódó wǎn yíyí kpó Klísu ɖɔhun. Klísu e yí wǎn nú mǐ bó sɔ́ éɖée jó dó ta mitɔn mɛ vɔ̌sánú ɖɔhun, vɔ̌sísá wǎn ɖagbenɔ e nɔ nyɔ́ Mawu nukún mɛ é ɖɔhun.

³È ma se agalilɛ xó, nǔblíblíwiwa, abǐ nukúnkɛndídó sín xó vɔ́vɔ́ ɖo tɛ́ntin mitɔn ó; ɖó mɛɖeɖóvo Mawu tɔn wɛ mi nyí.

⁴É jɛ xá ɖɔ è nǐ se wunhínhɔ́n xó, xó gbló kpódó xó kwíji kwíji ɖé kpán ɖo nu mitɔn ǎ; lo ɔ́, mi ní nɔ dó kú nú Mawu nú nǔ e é wa nú mi lɛ́ɛ.

⁵Mi tunwun ganjí ɖɔ agalɛtɔ́, nǔblíblíwatɔ́ abǐ gwěnɔ ɖé kún xwe axɔ́súɖuɖu Klísu tɔn kpódó Mawu tɔn kpó mɛ gbeɖé ó; ɖó gwě ɔ́, vodúnsinsɛn ɖɔhun wɛ é ɖe.

⁶Mɛ ɖé ma sɔ́ xó gbló bó dó blɛ́ mi ná ó, ɖó nǔ énɛ́ lɛ́ɛ wútu wɛ Mawu nɔ sin xomɛ dó mɛ e ma nɔ se tónú n'i ǎ lɛ́ɛ.

⁷Hǔn mi ma kpé nǔ ɖěbǔ xá mɛ énɛ́ lɛ́ɛ ó.

⁸Đ'ayǐ ɔ́, ablu mɛ wɛ mi ɖe; amɔ̌ din e mi ɖo bǔ xa Aklúnɔ ɔ́, mi ɖo wěziza mɛ; énɛ́ ɔ́ wú ɔ́, mi nɔ zán gbɛ mitɔn mɛ e nyí wěziza tɔn é ɖɔhun.

⁹Wěziza wɛ nɔ zɔ́n, bɔ è nɔ wa nǔ ɖagbe; è nɔ wa nǔ jlɔ́jlɔ́ bó nɔ́ ɖɔ nǔgbó.

¹⁰Mi nɔ́ tɛ́nkpɔ́n bó nɔ́ tunwun nǔ e nɔ́ nyɔ́ Aklúnɔ nukún mɛ é.

¹¹Mi ma nɔ wa nǔ nyanya e mɛ e ɖo ablu mɛ lɛ́ɛ nɔ wa é ɖě ó; lo ɔ́, mi ɖe nǔ énɛ́ ɔ́ lɛ́ɛ gba ɖo wěziza nu.

¹²Đó nǔ e mɛ énɛ́ lɛ́ɛ nɔ wa ɖo nǔglɔ́ ɔ́, è sixú ɖɔ ǎ; winnyánú wɛ.

¹³Ényí è ɖe nǔ énɛ́ lɛ́ɛ bǐ gba ɖo wěziza nu ɔ́, è nɔ mɔ nukúnnú jɛ nǔ e yě nyí ɔ́ wú céɖécéɖé.

¹⁴Đó nǔ e è ɖe gba ɖo wěziza nu lɛ́ɛ bǐ wɛ nɔ́ húzú wěziza; énɛ́ wútu wɛ è ɖɔ: “Hwi mɛ e ɖo amlɔ dɔ́ wɛ ɔ́, fɔ́n sí te sín mɛkúkú lɛ́ɛ mɛ; énɛ́ ɔ́, Klísu sín wěziza ná hɔ́n dó jǐ towe.”

¹⁵Hǔn mi bo cɔ́ miɖée ganjí dó gbɛ e zán wɛ mi ɖe ɔ́ wú. Mi ma zán gbɛ mitɔn xlonɔ ɖɔhun ó; lo ɔ́, mi zán gbɛ mitɔn nǔnywɛ́tɔ́ ɖɔhun.

¹⁶ Mi hwlɛndó hwenu lɛ́ɛ, bó wa nǔ; ɖó hwenu e mǐ ɖe ɔ́ nyɔ́ ǎ.

¹⁷Énɛ́ ɔ́ wútu ɔ́, mi ma wa nǔ mɛ e ma ɖó ayi xomɛ ǎ é ɖɔhun ó; lo ɔ́, mi tɛ́nkpɔ́n bó tunwun nǔ e Aklúnɔ jló ɖɔ mi ní wa é.

¹⁸Mi ma nu ahan mú ó; ahan nu díngan wɛ nɔ zɔ́n bɔ gbɛ mɛtɔn nɔ gblé; lo ɔ́, Yɛsinsɛn ní gɔ́ ayi mitɔn mɛ.

¹⁹ Mi ji han tɛnmɛ tɛnmɛ dó dó wǔsyɛ́n lanmɛ nú miɖée, bó lɛ́ ji dó kpa Aklúnɔ kpódó ayixa mitɔn bǐ kpó.

²⁰Mi dó kú nú Mawu Tɔ́ ɔ́ ɖó nǔ bǐ tamɛ hwebǐnu ɖo Aklúnɔ mitɔn Jezu Klísu sín nyǐkɔ mɛ.

²¹Mi nɔ hwíhwɛ́ miɖée ɖo miɖée glɔ́, ɖó sísí e mi ɖó nú Klísu ɔ́ wú.

²² Nyɔ̌nu lɛ́ɛ mi, mi nɔ hwíhwɛ́ miɖée ɖó asú mitɔn lɛ́ɛ glɔ́, lě e mi nɔ hwíhwɛ́ miɖée ɖó Aklúnɔ glɔ́ gbɔn é.

²³Đó asú wɛ nɔ kpa acɛ nú asi tɔn, lě e Klísu kpa acɛ nú agun tɔn gbɔn é. Klísu ɖésú wɛ nyí Mɛhwlɛ́ngántɔ́ nú agun e ɖo agbaza tɔn nyí wɛ é.

²⁴Lě e agun ɔ́ nɔ hwíhwɛ́ éɖée ɖo Klísu glɔ́ gbɔn ɔ́ wɛ nyɔ̌nu lɛ́ɛ lɔ ɖo ná nɔ́ hwíhwɛ́ yěɖée ɖó asú yětɔn lɛ́ɛ glɔ́ gbɔn ɖo nǔ bǐ mɛ.

²⁵ Súnnu lɛ́ɛ mi, mi yí wǎn nú asi mitɔn lɛ́ɛ, lě e Klísu yí wǎn nú agun ɔ́ gbɔn káká bó sɔ́ éɖée jó dó ta tɔn mɛ é.

²⁶É bló mɔ̌, bó sɔ́ sin kpódó xó tɔn kpó dó lɛ agun ɔ́ wé, bónú é ná sixú nyí agun e jɛ xá bó ná nyí agun Mawu tɔn é.

²⁷Đó é ɖo biba wɛ ɖɔ agun ɔ́ ní wá é ɖésúnɔ nukɔn kpódó susu kpó; é jló ɖɔ agun ɔ́ ní nyɔ́ ɖɛkpɛ, bónú nǔ bǐ ní vɔ ɖ'é wú, bónú è ma mɔ nǔ kwíji ɖěbǔ ɖo wǔ tɔn ó; é ní ma ɖó blɔ̌ ɖěbǔ wǔ ó.

²⁸Hǔn, asú lɛ́ɛ ɖó ná yí wǎn nú asi yětɔn lɛ́ɛ, lě e yě yí wǎn nú agbaza yě ɖésúnɔ tɔn gbɔn é. Mɛ e yí wǎn nú asi tɔn ɔ́, é ɖésúnɔ wɛ é yí wǎn ná.

²⁹Đó mɛ ɖěbǔ gbɛ́ wǎn nú agbaza é ɖésúnɔ tɔn kpɔ́n gbeɖé ǎ; é nyɔ́ wa ɔ́, be wɛ é nɔ́ lé ná, bó nɔ ná ɛ nǔɖuɖu, lě e Klísu nɔ bló gbɔn nú agun tɔn é;

³⁰agbaza tɔn sín wǔjɔnú wɛ mǐ nyí.

³¹Đó Mawuxó ɔ́ ɖɔ: “Énɛ́ ɔ́ wú wɛ súnnu ná jó tɔ́ tɔn kpódó nɔ tɔn kpó dó, bó ná jɛ kpɔ́ xá asi tɔn, bɔ yě mɛ we lɛ́ɛ bǐ ná húzú ɖokpó géé.”

³²Nǔbúdo titewungbe ɖé wɛ è ɖe xlɛ́ ɖo fí élɔ́, bɔ nyɛ mɔ ɖɔ Klísu kpódó agun ɔ́ kpó xó ɖɔ wɛ é ɖe.

³³É ka lɛ́ ɖo xó ɖɔ dó mǐ lɔmɔ̌ wú wɛ: súnnu ɖokpó ɖokpó ɖó ná yí wǎn nú asi tɔn é ɖésúnɔ ɖɔhun; nyɔ̌nu ɖokpó ɖokpó ɖó ná sí asú tɔn.