Read fon Filípunu 1 Bible Online

Filípunu 1 - fon bible

Filípunu 1

¹ Mǐ mɛsɛntɔ́ Klísu Jezu tɔn Pɔ́lu kpódó Timɔtée kpán wɛ sɛ́ wěma élɔ́ dó mɛɖeɖóvo Mawu tɔn e ɖi nǔ nú Klísu Jezu bó ɖo Filípu lɛ́ɛ; mǐ sɛ́ dó yě kpó agunnukɔntɔ́ lɛ́ɛ kpó[1], kpódó yě mɛ e nɔ kpé nukún dó agunví lɛ́ɛ wú é kpán.

²Mawu Tɔ́ mǐtɔn kpódó Aklúnɔ Jezu Klísu kpán ní ná fɛ́nú kpódó fífá kpó mi.

³Nú un flín mi hweɖěbǔnu ɔ́, un nɔ dó kú nú Mawu ɖó mi bǐ ta mɛ.

⁴Un ɖo ɖɛ xo dó ta mitɔn mɛ wɛ hweɖěbǔnu ɔ́, un nɔ xo ɖɛ kpódó xomɛhunhun kpán.

⁵Đó lě e mi dó alɔ mì gbɔn sín gbe e gbe mi ɖi nǔ ɔ́, káká wá jɛ din, ɖo Wɛn Ɖagbe ɔ́ jlájlá lixo ɔ́ wútu.

⁶Un gán jɛ nǔ élɔ́ wú: Mawu e bɛ́ azɔ̌ ɖagbe énɛ́ ɖo tɛ́ntin mitɔn ɔ́ ná ɖ'é wú, káká bɔ é ná fó ɖo gbe e gbe Jezu Klísu ná lɛ́ kɔ wá dó é.

⁷Linlin mɔ̌hunkɔtɔn e un ɖó dó mi bǐ wú ɔ́ sɔgbe ganjí. Nǔgbó ɔ́, mi bǐ ɖo ayi mɛ nú mì, ɖó din e un ɖo gankpá mɛ ɔ́ kpó hwenu e è ma ko wlí mì ǎ, bɔ un jɛ ahwan Wɛn Ɖagbe ɔ́ jí, bó sɔ́ jínjɔ́n ayǐ, bɔ é lí dǒ é kpó ɔ́, ɖagbe e Mawu wa nú mì ɔ́, é wa nú mi lɔmɔ̌.

⁸Ée un ɖɔ un yí wǎn nú mi ɔ́, Mawu tunwun ɖɔ nǔgbó ɖɔ wɛ un ɖe. Wǎn e un yí nú mi ɔ́, Klísu Jezu gɔn wɛ é gosín.

⁹Đɛ e un nɔ xo nú mi ɔ́ ɖíe: un nɔ byɔ́ Mawu ɖɔ é ní bló bónú wǎn e mi yí nú miɖée ɔ́ ní ɖo jijɛ jí wɛ, bónú mi ní tunwun nǔ ganjí, bó ɖó nukúnnú-mɔjɛnǔmɛ titewungbe.

¹⁰Énɛ́ ɔ́, mi ná sixú tunwun nǔ e nyí nǔ ɖagbe ɔ́ bó sɔ́ bó ná nyí mɛ mímɛ́, bɔ hwenu e Klísu ná lɛ́ kɔ wá ɔ́, è nǎ mɔ nǔɖé ɖɔ dó mi wú ǎ.

¹¹Jezu Klísu ná ná hlɔ̌nhlɔ́n mi, bɔ mi ná nɔ wa nǔ jlɔ́jlɔ́, bɔ mɛ lɛ́ɛ ná nɔ kpa susu nú Mawu, bó ná nɔ mlá ɛ.

¹²Nɔví ce lɛ́ɛ mi, un jló nú mi ní tunwun ɖɔ nǔ e jɛ dó jǐ ce ɔ́ lɛ́ zɔ́n bɔ Wɛn Ɖagbe ɔ́ yi nukɔn.

¹³ Nǔ énɛ́ wɛ zɔ́n, bɔ sɔ́ja hɔnmɛcɔ́tɔ́ lɛ́ɛ bǐ kpó mɛ ɖě lɛ́ɛ bǐ kpó tunwun ɖɔ Klísu e un nɔ sɛn ɔ́ wútu wɛ un ɖo gankpá mɛ.

¹⁴Ée nɔví lɛ́ɛ mɔ ɖɔ un ɖo gankpá mɛ ɔ́, yě mɛ gěgé ɖó akɔ́nkpinkpan, bó ɖó jiɖiɖe dó Aklúnɔ wú, bó nɔ syɛ́n ta bó nɔ ɖo Mawuxó jlá d'é jí wɛ ma ɖi xɛsi.

¹⁵Nǔgbó ɔ́, mɛɖé lɛ́ɛ ɖo yě mɛ, bó sɔ́ wǔhwan kpó jlɛ kpó sín ayixa dó jlá Klísuxó ɔ́ ná; mɛ ɖěvo lɛ́ɛ ka nɔ jlá Klísuxó ɔ́ kpó ayixa ɖagbe kpó.

¹⁶Yě mɛ e nɔ jlá Klísuxó ɔ́ kpódó ayixa ɖagbe kpó lɛ́ɛ ɔ́, yě nɔ wa nǔ kpódó wǎn yíyí kpán, ɖó yě tunwun ɖɔ Mawu sɔ́ mì, nú ma nɔ jɛ ahwan Wɛn Ɖagbe ɔ́ jí.

¹⁷Mɛɖě lɛ́ɛ ɔ́, xó e ɖɔ wɛ yě ɖe lɛ́ɛ gosín ayixa yětɔn mɛ ǎ; lo ɔ́, zalixámɛ sín ayixa wɛ yě sɔ́ dó ɖo Klísuxó ɔ́ jlá ná wɛ; yě ɖo linlin wɛ ɖɔ émí ná dó wǔvɛ́ wǔvɛ́ jí nú mì din e un ɖo gankpá mɛ é.

¹⁸Nú ayixa e dó jlá Klísuxó ɔ́ ná wɛ yě ɖe ɔ́ sɔgbe kpó é ma sɔgbe kpó ɔ́, énɛ́ ɖɔ nǔɖé ǎ; é ná bó nyí alɔkpa ɖěbǔ mɛ ɔ́, è ko jlá Klísuxó ɔ́, bɔ é nyí xomɛhunhun nú mì, bɔ xomɛ tɔn ná ɖo hunhun mì wɛ tɛgbɛ.

¹⁹Đó un tunwun ɖɔ gbɔn ɖɛ mitɔn lɛ́ɛ kpódó Yɛ Jezu Klísu tɔn sín alɔgɔ́númɛ kpán gbla mɛ ɔ́, nǔ énɛ́ lɛ́ɛ bǐ sésé ná wá nyí ɖagbe nú mì.

²⁰Nǔgbó ɔ́, un ɖo te, bó ɖo nukún ɖó wɛ syɛ́nsyɛ́n ɖɔ nǔ ɖěbǔ ní ma zɔ́n, bónú winnyá hu mì ó. É nyɔ́ wa ɔ́, din kpódó hwe lɛ́ɛ bǐ nu kpó ɔ́, un ɖó gǎnjɛwú syɛ́nsyɛ́n ɖɔ un ɖo gbɛ oo, un ɖo kú oo, un ná sɔ́ nyɛɖée bǐ dó ɖe susu tɔn xlɛ́.

²¹Đó nyɛ ɔ́, gbɛ ce ɔ́, Klísu wɛ, bɔ kú nyí le nú mì.

²²Lo ɔ́, nú un nɔ gbɛ ɔ́, un hɛn ɔ́, un ná wa nǔ ɖagbe; hǔn, gbɛ wɛ un ná nɔ a, kú wɛ un ná kú a, un sɔ́ tunwun ée un ná sɔ́ ɖ'é mɛ é ǎ.

²³Un mɔ ɖɔ nǔ we énɛ́ lɛ́ɛ bǐ ɖo dindɔn mì wɛ: un jló ná gosín gbɛ élɔ́ mɛ, bó ná yi nɔ kpɔ́ xá Klísu, énɛ́ ɔ́ ba wɛ un ɖe tawun.

²⁴Lo ɔ́, nǔ e ɖo tají ɔ́ wɛ nyí ɖɔ ma nɔ gbɛ ɖó midɛɛ lɛ́ɛ wútu.

²⁵Un gán jɛ énɛ́ wú, bó tunwun ɖɔ un ná nɔ ayǐ, bó nɔ kpɔ́ xá mi bǐ, bó ná dó alɔ mi bɔ mi ná ɖó nukɔn yiyi, bó ná ɖó xomɛhunhun ɖo nǔɖiɖi e mi ɖó nú Klísu ɔ́ mɛ.

²⁶Énɛ́ ɔ́, hwenu e un ná lɛ́ wá mi gɔ́n ɔ́, mi na ɖeji, bó gó ɖo Klísu Jezu mɛ ɖó nyɛ wú.

²⁷Nǔ e mi ná wa kpowun ɔ́ wɛ nyí ɖɔ mi ní zán gbɛ mitɔn lě e Wɛn Ɖagbe Klísu tɔn ɔ́ zɔ́n gbɔn é. Énɛ́ wú ɔ́, nú un wá mi gɔ́n oo, abǐ un gɔn mi gɔ́n oo, má se ɖɔ mi syɛ́nlǐn, bó ɖó linlin ɖokpó ɔ́, lobo zé ayixa ɖokpó ɔ́ dó ɖo ahwan fun ɖó kpɔ́ wɛ, nú nǔɖiɖi e Wɛn Ɖagbe ɔ́ nɔ na mɛ é.

²⁸Mi ma jó miɖée dó nú kɛntɔ́ mitɔn lɛ́ɛ ní dó xɛsi nú mi ɖo nǔ ɖěbǔ mɛ ó; énɛ́ ɔ́ ná nyí xlɛ́ nú yě ɖɔ bǔbú wɛ yě ɖe, bó ka ná nyí xlɛ̌ nú midɛɛ lɛ́ɛ ɖɔ hwlɛngán li jí wɛ mi ɖe; Mawu sín azɔ̌ wɛ nyí énɛ́ lɛ́ɛ.

²⁹Đó Mawu wa ɖagbe nú mi, bɔ mi ná sɛn Klísu; é nyí mi ná ɖi nǔ n'i kpowun wɛ ǎ, lo ɔ́, mi ná ji ya lɔmɔ̌ ɖó ta tɔn mɛ.

³⁰ Din ɔ́, nyɛ kpó mi kpó bǐ wɛ ɖo ahwan fun ɖó kpɔ́ wɛ, bɔ ahwan e fun wɛ mi ɖe ɔ́, mi mɔ bɔ un fun ɖ'ayǐ, bó ka lɛ́ kpo ɖo funfun wɛ din, lě e mi se gbɔn é.