Read fon Kolósinu 4 Bible Online

Kolósinu 4 - fon bible

Kolósinu 4

¹ Gǎn lɛ́ɛ mi, mi zé ayixa jlɔ́jlɔ́, ayixa sɔgbe dó hɛn kannumɔ mitɔn lɛ́ɛ ná. Mi ná nɔ flín ɖɔ émí lɔmɔ̌ ɖó gǎn ɖokpó ɖo sɛ́xwé.

²Mi nɔ xo ɖɛ hwɛhwɛ; mi nɔ kpé nukún dó ɖɛ e xo wɛ mi ɖe ɔ́ wú, kpódó kú dó nú Mawu kpó.

³Nú mi ka ɖo ɖɛ xo wɛ hǔn, mi nɔ xo ɖɛ dó mǐ lɔmɔ̌ tamɛ, bónú Mawu ní hun ali ɖagbe nú mǐ, nú mǐ ná jlá xó tɔn, bó ná ɖɔ nǔbúdo Klísu tɔn sín xó nú mɛ lɛ́ɛ. Nǔgbó ɔ́, nǔbúdo énɛ́ wútu wɛ un ɖo gankpá mɛ din.

⁴Hǔn mi bo nɔ xo ɖɛ dó ta ce mɛ, bónú ma nɔ ɖɔ nǔbúdo ɔ́ sín xó céɖécéɖé nú mɛ lɛ́ɛ, lě e un ɖó ná nɔ ɖɔ gbɔn é.

⁵ Mi zán gbɛ mitɔn kpó nǔnywɛ́ kpó xá mɛ e ma ɖo agun Klísu tɔn mɛ ǎ lɛ́ɛ; ali tɔn hun nú mi hweɖěbǔnu hǔn, mi hwlɛ́ndó.

⁶Xó mitɔn lɛ́ɛ ní nɔ nyɔ́ se tɛgbɛ, bó nɔ́ dɔn mɛ; mi ná tunwun lě e mi ná nɔ́ ná xósin mɛ ɖokpó ɖokpó gbɔn é.

⁷ Nɔví wǎnyínámɔ mǐtɔn Ticíku e nyí azɔ̌watɔ́ gbejínɔtɔ́, bɔ nyɛ kpó é kpó ɖo Aklúnɔ sín azɔ̌ ɔ́ wa wɛ ɔ́, ná wá ɖɔ xó ce lɛ́ɛ bǐ nú mi.

⁸Nǔ e wú un sɛ́ ɛ dó tawun ɔ́ wɛ nyí ɖɔ é ná wá ɖɔ lě e mǐ ɖe gbɔn ɔ́ nú mi, bó ná ná akɔ́nkpinkpan mi.

⁹ Wǎnyínámɔ mǐtɔn gbejínɔtɔ́ Onɛzímu e nyí mɛ mitɔn ɔ́, un sɛ́ é lɔmɔ̌ dó, bɔ é ná xwedó e; yě ná ɖɔ nǔ e ɖo jijɛ wɛ ɖo dě ɔ́ bǐ nú mi.

¹⁰ Alisitáki e kpó nyɛ kpó ɖo gankpá mɛ ɔ́ dó gbe sɛ́ dó mi; Baanabási sín nɔví Maki lɔmɔ̌ dó gbe sɛ́ dó mi. Lě e mi ná yí Maki gbɔn ɔ́, è ko ɖɔ nú mi; nú é wá mi gɔ́n hǔn, mi yí i ganjí.

¹¹Jezu e è nɔ ylɔ́ ɖɔ Jusitúsi ɔ́ lɔmɔ̌ dó gbe sɛ́ dó mi. Yě mɛ atɔn énɛ́ lɛ́ɛ jɛ́n nyí Jwifu e húzú jɛ Klísu sín ali jí lɛ́ɛ é; yě ɖo azɔ̌ wa xá mì wɛ nú axɔ́súɖuɖu Mawu tɔn. Yě dó wǔsyɛ́n lanmɛ nú mì ɖésú.

¹² Epaflasi e nyí mɛ mitɔn ɔ́ lɔmɔ̌ dó gbe sɛ́ dó mi; mɛsɛntɔ́ Klísu Jezu tɔn énɛ́ ɔ́ nɔ gɔn ɖɛ xo, kpódó ayixa tɔn bǐ sésé kpán dó ta mitɔn mɛ ǎ, bónú mi ná dó sixú syɛ́nlǐn, bó ná zin ɖo nǔɖiɖi mɛ, bó ná sɔgbe titewungbe, bó ná wa nǔ e Mawu jló ɔ́ bǐ.

¹³Un hɛn ɔ́, un ná ɖe kúnnu élɔ́ n'i ɖɔ: é nɔ jɛ tagba ɖésú dó ta mitɔn mɛ, bó nɔ jɛ tagba dó mɛ e ɖo Lawodisée lɛ́ɛ tamɛ, bó nɔ jɛ tagba dó mɛ e ɖo Ielapólisi lɛ́ɛ tamɛ.

¹⁴ Wǎnyínámɔ mǐtɔn Luki dotóo ɔ́ kpódó Demási kpán dó gbe sɛ́ dó mi.

¹⁵Mi dó gbe nɔví mǐtɔn e ɖo Lawodisée lɛ́ɛ; mi dó gbe Nɛfáa lɔmɔ̌, kpódó nɔví e nɔ kplé ɖo xwé tɔn gbe lɛ́ɛ kpán.

¹⁶Mi xa wěma élɔ́ ɔ́ hǔn, mi bló bónú è xa nú agun e ɖo Lawodisée ɔ́ lɔmɔ̌. Mi lɔmɔ̌ ɔ́, mi xa wěma e è nǎ sɛ́ dó mi sín Lawodisée é.

¹⁷ Mi ɖɔ nú Aacípu ɖɔ é ní kpé nukún dó azɔ̌ e Aklúnɔ zɔ́n ɛ ɔ́ wú bó wa ganjí.

¹⁸Nyɛ Pɔ́lu ɖésú wɛ sɔ́ alɔ ce dó wlán xó élɔ́ lɛ́ɛ ná: Un dó gbe sɛ́ dó mi; mi ma wɔn ɖɔ gankpá mɛ wɛ un ɖe ó. Fɛ́nú Mawu tɔn ní nɔ kpɔ́ xá mi.