Read fon 1 Tɛsalonikinu 1 Bible Online

1 Tɛsalonikinu 1 - fon bible

1 Tɛsalonikinu 1

¹ Nyɛ Pɔ́lu kpó Silási kpó, kpódó Timɔtée kpán wɛ wlán wěma élɔ́ sɛ́ dó mi agunví e ɖo Tɛsaloniki bó ɖo bǔ ɖo Mawu Tɔ́ ɔ́ kpódó Aklúnɔ Jezu Klísu kpán mɛ é. Mawu ní ná fɛ́nú kpódó fífá kpó mi.

²Mǐ nɔ dó kú nú Mawu tɛgbɛ dó mi bǐ tamɛ, bó nɔ flín mi hwebǐnu ɖo ɖɛ mǐtɔn lɛ́ɛ mɛ.

³Nǔgbó ɔ́, ɖo Mawu Tɔ́ mǐtɔn nukɔn ɔ́, mǐ nɔ́ flín lě e mi zé nǔɖiɖi mitɔn dó wa azɔ̌ ná sɔ é, mǐ nɔ́ flín lě e mi wa wǎn-yíyízɔ́ sɔ é; bɔ nukún e ɖó Aklúnɔ mǐtɔn Jezu Klísu wɛ mǐ ɖe ɔ́, lě e mi syɛ́nlǐn ɖ'é mɛ sɔ ɔ́, mǐ nɔ́ flín.

⁴Nɔví ce lɛ́ɛ mi, mǐ tunwun ɖɔ Mawu yí wǎn nú mi, bó sɔ́ mi nú mi ná nyí étɔn.

⁵Đó mǐ jlá Wɛn Ɖagbe ɔ́ mi; mǐ ka jlá mi ɖó nu wú kpowun ǎ; lo ɔ́, mǐ jlá mi kpódó hlɔ̌nhlɔ́n kpó, kpó alɔgɔ́númɛ Yɛsinsɛn tɔn kpó, kpódó gǎnjɛwú titewungbe e ɖo Wɛn Ɖagbe énɛ́ mɛ ɔ́ kpó. Mi tunwun lě e mǐ zán gbɛ mǐtɔn gbɔn ɖo tɛ́ntin mitɔn, ɖó ɖagbe mitɔn wú é.

⁶ Lě e mǐ wa nǔ gbɔn ɔ́ kpódó lě e Aklúnɔ wa nǔ gbɔn ɔ́ kpán wɛ mi xwedó, dó wa nǔ, ɖó mi mɔ wǔvɛ́ ɖésú, có mi ka yí Mawuxó ɔ́ kpódó xomɛhunhun e Yɛsinsɛn nɔ ná mɛ é kpó.

⁷Énɛ́ ɔ́ zɔ́n, bɔ mi húzú kpɔ́ndéwú nú klísusɛntɔ́ e ɖo Masedwani lɛ́ɛ kpódó ée ɖo Akáyi lɛ́ɛ kpán.

⁸Đó Aklúnɔxó ɔ́, mi gɔ́n wɛ é gosín, bɔ mɛ gěgé se; é nyí Masedwani kpó Akáyi kpó kɛ́ɖɛ́ wɛ è se xó énɛ́ ɖe ǎ; lo ɔ́, fí bǐ wɛ nǔɖiɖi e mi ɖó nú Mawu ɔ́ sín xó gba kpé; mǐ sɔ́ ná xaji ɖɔ énɛ́ ɔ́ ǎ.

⁹Mɛ lɛ́ɛ bǐ wɛ nɔ́ ɖɔ lě e mi yí mǐ gbɔn hwenu e mǐ wá mi gɔ́n é; mɛ lɛ́ɛ bǐ wɛ nɔ́ ɖɔ lě e mi jó nǔmɛsɛn lɛ́ɛ dó gbɔn, bó húzú jɛ Mawu gbɛɖe, Mawu nǔgbó ɔ́ li jí, bó ná wa azɔ̌ n'i,

¹⁰lobo ná nɔ te kpɔ́n ɖɔ vǐ tɔn Jezu ní gosín sɛ́xwé wá é. Vǐ tɔn énɛ́ ɔ́ wɛ é fɔ́n sín kú, bɔ é hwlɛ́n mǐ sín xomɛsin Mawu tɔn e jǎwe ɔ́ mɛ.