Read fon 1 Tɛsalonikinu 2 Bible Online

1 Tɛsalonikinu 2 - fon bible

1 Tɛsalonikinu 2

¹Nɔví lɛ́ɛ mi, mi ɖésúnɔ tunwun ganjí ɖɔ gɔ̌n mitɔn e mǐ wá ɔ́, mǐ kún wá dó wǔvɔ́ ó.

² Mi lɛ́ tunwun ɖɔ cóbónú mǐ ná wá mi gɔn ɖo Tɛsaloniki ɔ́, mǐ ji ya; è dǒ winnyá mǐ ɖo Filípu. Yě tɔ́n ahwan mǐ, bɔ é syɛ́n ɖésú, có Mawu ná akɔ́nkpinkpan mǐ, ɖɔ mǐ ní jlá Wɛn Ɖagbe émítɔn ɔ́ mi.

³Nǔgbó ɔ́, xó e ɖɔ dó ylɔ́ mɛ lɛ́ɛ ná wɛ mǐ ɖe ɔ́ jínjɔ́n nǔwanyido ɖé jí ǎ; é jínjɔ́n linlin kwíji kwíji ɖé jí ǎ; é ka jínjɔ́n nǔ hízíhízí ɖé jí ǎ.

⁴É nyɔ́ wa ɔ́, lě e Mawu jló gbɔn ɔ́ wɛ mǐ nɔ ɖɔ xó gbɔn hwebǐnu, ɖó é mɔ ɖɔ mǐ hɛn ɔ́, mǐ ná jlá Wɛn Ɖagbe ɔ́, bó sɔ́ dó así nú mǐ; gbɛtɔ́ lɛ́ɛ sí ba ná nyɔ́ ɖe wɛ mǐ ɖe, bó ɖo Wɛn Ɖagbe ɔ́ jlá wɛ ǎ; lo ɔ́, Mawu e nɔ gbéjé linlin e ɖo ayi mǐtɔn mɛ ɔ́ kpɔ́n ɔ́ sí ba ná nyɔ́ ɖe wɛ mǐ ɖe.

⁵Mi tunwun ganjí ɖɔ mǐ kún ɖɔ xó ɖé dó klɔ́ mɛ ná gbeɖé ó; é kún ka nyí nǔɖé ba ɖo mi sí wɛ mǐ ɖe, bó ɖo Wɛn Ɖagbe ɔ́ jlá mi wɛ ó; Mawu ɖésú ná ɖe kúnnu ná.

⁶Mǐ wa nǔɖé bó dó ɖɔ mɛɖé ní kpa mǐ ǎ; é ná bo nyí midɛɛ lɛ́ɛ oo, é ná bo nyí mɛɖěvo lɛ́ɛ oo, mǐ ba ǎ.

⁷Cóbɔ mǐ ka hɛn ɔ́, mǐ ná ko ɖɔ nú mi ɖɔ nǔ lě wɛ mi ná wa dandan, ɖó mɛsɛ́dó Klísu tɔn e mǐ nyí ɔ́ wútu; mǐ ka bló gbɔn mɔ̌ ǎ; é nyɔ́ wa ɔ́, hwenu e mǐ ɖo mi gɔn ɔ́, mǐ fá xomɛ dó mi wú, vǐnɔ e ɖo nukún kpé dó vǐ tɔn lɛ́ɛ wú wɛ ɔ́ ɖɔhun.

⁸Mǐ ɖo gbesisɔ mɛ, bó ná sɔ́ gbɛ mǐtɔn jó dó ta mitɔn mɛ, ɖó wǎn e mǐ nyí nú mi é wú; é nyí Wɛn Ɖagbe Mawu tɔn ɔ́ kɛ́ɖɛ́ wɛ mǐ ná jlá mi ǎ; ɖó mi vɛ́ nú mǐ sɔ mɔ̌.

⁹Nɔví lɛ́ɛ mi, lě e mǐ jɛ tagba, bó wa azɔ̌ gbɔn ɖo tɛ́ntin mitɔn ɔ́, mi flín ǎ cé? Mǐ ɖo Wɛn Ɖagbe Mawu tɔn ɔ́ jlá mi wɛ, bó ka nɔ wa azɔ̌ zǎn kpó kéze kpó, ɖó mǐ jló ná nɔ kɔ jí nú mi mɛ ɖěbǔ ǎ.

¹⁰Mi ná ɖe kúnnu ná, bɔ Mawu lɔmɔ̌ ná ɖe kúnnu ná ɖɔ gbɛ mímɛ́, gbɛ jlɔ́jlɔ́, gbɛ e mɛɖé ma ná mɔ nǔjɛdo ɖé ɖɔ d'é wú ǎ ɔ́ wɛ mǐ zán ɖo tɛ́ntin mitɔn.

¹¹Mi lɛ́ tunwun ɖɔ lě e vǐtɔ́ nɔ hɛn vǐ tɔn gbɔn ɔ́, mɔ̌ wɛ mǐ hɛn ɖokpó ɖokpó mitɔn gbɔn.

¹²Mǐ nɔ ɖo nǔ kplɔ́n mi wɛ, bó nɔ ɖo gbɔ dó nú mi wɛ, bó nɔ byɔ́ mi syɛ́nsyɛ́n ɖɔ gbɛzínzán mitɔn ní nyɔ́ Mawu e ylɔ́ mi dó axɔ́súɖuɖu tɔn kpó susu tɔn kpó mɛ ɔ́ sín nukún mɛ.

¹³Mǐ nɔ lɛ́ gɔn kú dó nú Mawu ɖó nǔ élɔ́ wú ǎ; é wɛ nyí ɖɔ hwenu e mǐ jlá Mawuxó ɔ́ mi ɔ́, mi se lobo yí dó ayi mɛ; mi ka yí dó yí gbɛtɔ́ xó ǎ; lo ɔ́ mi yí dó yí Mawuxó ná; Mawuxó ɔ́ wɛ é ka nyí nǔgbó; ée mi yí i mɔ̌ ɔ́, é ɖo azɔ̌ wa ɖo mi mɛ e ɖi nǔ lɛ́ɛ mɛ wɛ.

¹⁴ Nɔví lɛ́ɛ mi, nǔ e gbo agun e ɖo Judée, bó nyí Mawu tɔn ɖo bǔ e mǐ ɖe xá Klísu Jezu ɔ́ mɛ lɛ́ɛ ɔ́ wɛ gbo mi lɔmɔ̌. Ya e Jwifu lɛ́ɛ dó nú yě ɖo dɔ̌n ɔ́ ɖokpó ɔ́ wɛ to mitɔn mɛ nu lɛ́ɛ dó nú mi lɔmɔ̌.

¹⁵ Jwifu lɛ́ɛ wɛ hu Aklúnɔ Jezu, lobo hu gbeyíɖɔ Mawu tɔn lɛ́ɛ, bó nya mǐ. Yě dó xomɛsin nú Mawu, bó nyí kɛntɔ́ gbɛtɔ́ lɛ́ɛ bǐ tɔn.

¹⁶Yě nɔ dó gǎn, bó ná glɔ́n ali nú mǐ, bónú mǐ má kpé wú, bó jlá Wɛn Ɖagbe e ná zɔ́n, bɔ mɛ e ma nyí Jwifu ǎ lɛ́ɛ ná mɔ hwlɛngán é ó. Nǔ énɛ́ e yě wa ɔ́, hwɛ wɛ yě hu dó sú ta nú hwɛ e hu wɛ yě ko ɖe ɖ'ayǐ lɛ́ɛ. Xomɛsin Mawu tɔn ka wá kɔn nyi yě jǐ lo.

¹⁷Nɔví lɛ́ɛ mi, nǔ e kan mǐdɛɛ lɛ́ɛ ɔ́ wɛ nyí ɖɔ: sín hwenu e mǐ ko gosín mi gɔn nú hwenu yɔywɛ ɖé ɔ́, é jló mǐ ɖésú ɖɔ mǐ ní lɛ́ mɔ mi; énɛ́ wú wɛ mǐ lɛ́ vɔ́ gǎn dó d'é jí, bó ná sixú kpé wú; mǐ sɔ́ ɖo kpɔ́ xá mi ɖo agbaza mɛ ǎ; lo ɔ́, ayi mǐtɔn ɖo mi wú.

¹⁸Mǐ ko jló ná lɛ́ wá mi gɔ́n; ɖo tají ɔ́, nyɛ Pɔ́lu ɔ́, azɔn mɔ̌kpán wɛ un tɛ́nkpɔ́n bó ná lɛ́ wá mi gɔ́n; lo ɔ́, Satáan ka sú ali tɔn dó mǐ.

¹⁹Nǔgbó ɔ́, nukún mǐtɔn sɔ́ ɖo mɛɖé jí zɛ midɛɛ lɛ́ɛ kɛ́ɖɛ́ wú ǎ; mi jí wɛ nukún mǐtɔn ɖe; mi wɛ nyí xomɛhunhun mǐtɔn, bó nyí ɖuɖéjí mǐtɔn sín xlɛ́ e wú mǐ ná sixú tɛ afɔ ayǐ ɖo Aklúnɔ mǐtɔn Jezu nukɔn, ɖo hwenu e é ná lɛ́ kɔ wá é.

²⁰Nǔgbó wɛ! Mi wɛ nyí susu mǐtɔn, bó nyí xomɛhunhun mǐtɔn.