Read fon 1 Tɛsalonikinu 3 Bible Online

1 Tɛsalonikinu 3 - fon bible

1 Tɛsalonikinu 3

¹ Mǐ sɔ́ sixú wá nɔ te sɔ mɔ̌ ǎ, bó gbɔ bó ɖɔ mǐdɛɛ lɛ́ɛ kɛ́ɖɛ́ ná nɔ Atɛ́ni,

²bó sɛ́ nɔví mǐtɔn Timɔtée e kpó mǐ kpó ɖo Wɛn Ɖagbe e ɖɔ xó dó Klísu wú ɔ́ jlá wɛ, bó dó ɖo azɔ̌ wa nú Mawu wɛ ɔ́ dó mi. Mǐ sɛ́ ɛ dó mi, bónú é ná wá ɖɔ xó dó ná lǐnsyɛ́nsyɛ́n kpó akɔ́nkpinkpan kpó mi, ɖo nǔɖiɖi mitɔn mɛ;

³bónú mi ma jó miɖée dó nú ya e ji wɛ mǐ ɖe ɔ́ ní dán mɛ ɖokpó ɖo mi mɛ ó; ɖó mi ɖésúnɔ ɔ́, mi ko tunwun ɖɔ ya énɛ́ e ji wɛ mǐ ɖe ɔ́, tito Mawu tɔn mɛ wɛ é ko ɖe nú mǐ.

⁴Nǔgbó ɔ́, hwenu e mǐ kpo ɖo mi gɔ́n ɔ́, mǐ ko ɖɔ nú mi ɖ'ayǐ ɖɔ mǐ ná ji ya; nǔ énɛ́ wɛ ɖo jijɛ wɛ din; mi ɖésúnɔ ɔ́, mi tunwun ganjí.

⁵Énɛ́ ɔ́ wútu ɔ́, ée un ma sɔ́ sixú nɔ te ǎ ɔ́, un sɛ́ Timɔtée dó mi, bónú é ná wá kpɔ́n lě e nǔɖiɖi mitɔn ɖe gbɔn é, ɖó un ɖo xɛsi ɖi wɛ ɖɔ awǒvi ní ma wá tɛ́n mi kpɔ́n nú mi jɛ mɔɖónúmɛ tɔn lɛ́ɛ mɛ, bónú azɔ̌ e mǐ wa ɖo tɛ́ntin mitɔn ɔ́ nyí nǔ yǎyá ó.

⁶ Amɔ̌ din ɔ́, Timɔtée ko lɛ́ kɔ sín mi gɔ́n wá, bó ɖɔ xó ɖagbe nú mǐ dó nǔɖiɖi mitɔn kpó wǎn yíyí e mi ɖó nú miɖée ɔ́ kpó wú. É ɖɔ nú mǐ ɖɔ mi ɖo flínflín mǐ wɛ tɛgbɛ kpó wǎn yíyí kpó, bɔ mi jló ná lɛ́ mɔ mǐ lě e mǐ lɔ jló ná lɛ́ vɔ́ mɔ mi é.

⁷Nɔví mǐtɔn lɛ́ɛ mi, adǎn ɖo mǐ gbo wɛ, bɔ mǐ ɖo wǔvɛ́ mɔ wɛ mɔ̌ có, xó mitɔn e mǐ se ɔ́ ná akɔ́nkpinkpan mǐ. Nǔɖiɖi e mi ɖó ɔ́ wɛ ná akɔ́nkpinkpan mǐ.

⁸Din ɔ́, ényí mi syɛ́nlǐn ɖo kɔnɖókpɔ́ e mi ɖó xá Aklúnɔ ɔ́ mɛ ɔ́, hǔn mǐ ɖo gbɛ nǔgbó.

⁹Xomɛ e hun mǐ ɖo Mawu mǐtɔn nukɔn ɖó mi wútu ɔ́, mǐ tunwun lě e mǐ ná dó kú n'i gbɔn dó ta mitɔn mɛ, bɔ é ná jɛ mɛ é ǎ.

¹⁰Zǎn kpó kéze kpó ɔ́, mǐ nɔ́ byɔ́ ɛ syɛ́nsyɛ́n ɖɔ ní bló bónú mǐ ɖésúnɔ ná lɛ́ mɔ mi, bónú nǔ e lɛ́ hwedó mi ɖo nǔɖiɖi mitɔn mɛ ɔ́, mǐ ná gɔ́ ná nú mi.

¹¹Mawu Tɔ́ mǐtɔn ɔ́ ɖésú kpódó Aklúnɔ mǐtɔn Jezu kpó ní kplá mǐ, bónú mǐ ná sixú wá mɔ mi.

¹²Aklúnɔ ní bló bónú wǎn yíyí e mi ɖó nú miɖée, bó ɖó nú gbɛtɔ́ lɛ́ɛ bǐ ɔ́ ní nɔ ɖo jijɛ jí wɛ, bónú é ní cí wǎn yíyí e mǐdɛɛ lɛ́ɛ ɖó nú mi é ɖɔhun.

¹³Énɛ́ ɔ́, é ná dó wǔsyɛ́n lanmɛ nú mi, bɔ mi ná nyí mɛ mímɛ́, bó ná nyí mɛ ma ɖó blɔ̌ ɖo wǔ ɖo Mawu Tɔ́ mǐtɔn nukɔn, hwenu e Aklúnɔ mǐtɔn Jezu ná wá kpó mɛ e nyí étɔn lɛ́ɛ bǐ kpó é.