Read fon 1 Tɛsalonikinu 5 Bible Online

1 Tɛsalonikinu 5 - fon bible

1 Tɛsalonikinu 5

¹Nɔví lɛ́ɛ mi, hwenu e nǔ énɛ́ lɛ́ɛ ná jɛ dó ɔ́, é sɔ́ byɔ́ ɖɔ è nǐ wlán nǔɖé d'é wú sɛ́ dó mi ǎ.

²Đó mi ɖésúnɔ ɔ́, mi tunwun ganjí ɖɔ Aklúnɔzán ɔ́ ná wá fyán mɛ lě e ajotɔ́ nɔ wá fyán mɛ zǎn mɛ é ɖɔhun.

³Hwenu e gbɛtɔ́ lɛ́ɛ na ɖɔ: “Fífá tíin, bɔ ayi jɛ ayǐ” ɔ́, hwe énɛ́ ɔ́ nu wɛ nǔ e ná vívá kún yětɔn ɔ́ ná zɔn yě jǐ ajijimɛ lě e nyɔ̌nu e ɖo xo ɔ́ nɔ jɛ flú mɛ ajijimɛ é ɖɔhun; yě ná gán ɖ'é mɛ ǎ.

⁴Amɔ̌, nɔví lɛ́ɛ mi, midɛɛ lɛ́ɛ ɔ́, mi ɖo ablu mɛ, bónú azǎn énɛ́ ɔ́ ná wá fyán mi ajotɔ́ ɖɔhun ǎ.

⁵Nǔgbó ɔ́, wěziza tɔn wɛ mi bǐ nyí, bó nyí kéze tɔn; mi nyí zǎn tɔn ǎ; mi ka nyí ablu tɔn ǎ.

⁶Ényí mɔ̌ hǔn, mǐ ɖó ná dɔ́ amlɔ mɛ ɖě lɛ́ɛ ɖɔhun ǎ; lo ɔ́, mǐ ɖó ná nɔ wunzɛn; ayi mǐtɔn ní ɖo te.

⁷Đó mɛ e nɔ dɔ́ amlɔ lɛ́ɛ ɔ́, zǎn mɛ wɛ yě nɔ dɔ́ amlɔ, bɔ mɛ e nɔ nu ahan mú lɛ́ɛ nɔ́ nu ahan mú zǎn mɛ.

⁸ Amɔ̌, mǐdɛɛ lɛ́ɛ ɔ́, kéze tɔn wɛ mǐ nyí, bɔ ayi mǐtɔn ɖó ná nɔ te. Nǔɖiɖi kpó wǎn yíyí kpó ní nyí ganwu, bónú mǐ ní sɔ́ dó; hwlɛngán e ɖó nukún wɛ mǐ ɖe ɔ́ ní nyí gangbákún bónú mǐ ní sɔ́ xwe.

⁹Nǔgbó ɔ́, tito Mawu tɔn wɛ nyí ɖɔ é ná zé xomɛsin tɔn dó wa nǔ xá mǐ ǎ; lo ɔ́, tito tɔn wɛ nyí ɖɔ é ná hwlɛ́n mǐ gán, gbɔn Aklúnɔ mǐtɔn Jezu Klísu jí.

¹⁰Đó Jezu Klísu kú dó ta mǐtɔn mɛ, nú mǐ kpo ɖo gbɛ oo, abǐ mǐ kó kú oo, mǐ ná nɔ gbɛ xá ɛ.

¹¹Hǔn, mi ná akɔ́nkpinkpan miɖée, bó dó wǔsyɛ́n lanmɛ nú miɖée, lě e bló gbɔn wɛ mi ko ɖe é.

¹²Nɔví lɛ́ɛ mi, mǐ ɖo byɔ̌byɔ́ mi wɛ ɖɔ mi nɔ ɖó sísí nú mɛ e Aklúnɔ sɔ́, bɔ yě ɖo azɔ̌ wa wɛ ɖo tɛ́ntin mitɔn lɛ́ɛ é; mɛ e Aklúnɔ sɔ́ azɔ̌ dó así ná, bɔ yě ɖo ali xlɛ́ mi wɛ, bó ɖo kplɔ́n ná mi wɛ lɛ́ɛ é.

¹³Mi nɔ wlí yɛ̌yi nú yě ganjí; mi ná yí wǎn nú yě titewungbe, ɖó azɔ̌ e wa wɛ yě ɖe ɔ́ wútu. Mi nɔ ɖó xomɛfífá dó miɖée wú.

¹⁴Nɔví lɛ́ɛ mi, mǐ lɛ́ ɖo byɔ̌byɔ́ mi wɛ ɖɔ mi nɔ gbɛ́ nǔ nú fɔnlínnɔ lɛ́ɛ; mi nɔ ná akɔ́nkpinkpan mɛ e ma nɔ gba wǔ dó mɛ mɛ ǎ lɛ́ɛ; mi ní nɔ gɔ́ alɔ nú mɛ e ma ɖó gǎn ǎ lɛ́ɛ; mi nɔ ɖó suúlu dó mɛ bǐ wú.

¹⁵Mi cɔ́ miɖée, bónú è wa nǔ nyanya nú mɛɖé hǔn, ní ma sɔ́ nyanya dó sú axɔ́ ná ó; lo ɔ́, mi dó gǎn bó nɔ wa ɖagbe nú miɖée hwebǐnu, bó nɔ wa nú gbɛtɔ́ lɛ́ɛ bǐ.

¹⁶Mi nɔ jɛ awǎ hwebǐnu.

¹⁷Mi nɔ xo ɖɛ hwebǐnu.

¹⁸Mi nɔ dó kú nú Mawu ɖo nǔ bǐ mɛ; ɖó nǔ e ba ɖo gbɛzínzán mitɔn mɛ wɛ Mawu ɖe, ɖo bǔ e mi ɖe ɖo Klísu Jezu mɛ é nɛ́.

¹⁹Mi ma glɔ́n ali nú Yɛsinsɛn sín azɔ̌ ó.

²⁰Mi ma gbɛ́ wǎn nú wɛn e Mawu sɔ́ dó ayi mɛ nú mɛɖé ɖɔ ní dó mi ɔ́ ó.

²¹Lo ɔ́, mi ba do nú nǔ bǐ céɖécéɖé, bó nɔ hɛn ée nyɔ́ lɛ́ɛ dó ayi mɛ.

²²Mi nɔ́ cɔ́ miɖée dó nǔ nyanya alɔkpa alɔkpa bǐ wú.

²³Mawu e nɔ ná fífá mɛ ɔ́ ní bló bónú mi ní nyí étɔn bǐ dégbédégbé, ní cɔ́ mi ɖésúnɔ ɔ́ bǐ, ní cɔ́ yɛ mitɔn, bó cɔ́ lǐndɔ̌n mitɔn kpódó agbaza mitɔn kpó, bónú blɔ̌ ɖé ma nɔ mi wú ó, nú gbe e gbe Aklúnɔ mǐtɔn Jezu Klísu ná wá é.

²⁴Đó mɛ e ylɔ́ mi ɔ́ ɖo gbejí; é wɛ ná wa azɔ̌ énɛ́ ɖo gbɛ mitɔn mɛ.

²⁵Nɔví lɛ́ɛ mi, mi nɔ xo ɖɛ nú mǐ lɔmɔ̌.

²⁶Mi kí nɔví nɔví sín si nú nɔví lɛ́ɛ bǐ, bó dó dó gbe yě ná.

²⁷Đo Aklúnɔ sín nyǐkɔ mɛ ɔ́, un ɖo byɔ̌byɔ́ mi wɛ ɖɔ mi ní kɛnklɛ́n bó xa wěma élɔ́ nú nɔví lɛ́ɛ bǐ.

²⁸Fɛ́nú Aklúnɔ mǐtɔn Jezu Klísu tɔn ní nɔ kpɔ́ xá mi.