Read fon Jozuwée 11 Bible Online

Jozuwée 11 - fon bible

Jozuwée 11

¹Yavíni Hasɔ́ɔ xɔ́sú ɔ́ se ɖɔ Jozuwée ɖu ɖo ahwan e é fun lɛ́ɛ jí. Ée é se mɔ̌ ɔ́, é sɛ́ wɛn dó Yovavu Madɔ́ni xɔ́sú ɔ́, bó sɛ́ wɛn dó Cimulɔ́ni xɔ́sú ɔ́ kpó Akisáfu xɔ́sú ɔ́ kpó.

²É sɛ́ wɛn dó axɔ́sú e ɖo sókan mɛ ɖo totaligbé lɛ́ɛ lɔmɔ̌, bó sɛ́ wɛn dó axɔ́sú e ɖo tɔdo Judɛ́ɛn tɔn ɔ́ mɛ, ɖo Jenɛzalɛ́ti tɔ ɔ́ sín afɔligbé lɛ́ɛ, bó sɛ́ wɛn dó axɔ́sú e ɖo to e ɖo tɔdo mɛ lɛ́ɛ kpódó éé ɖo kpó jí ɖo Dɔ́ɔ kpá, ɖo gbadahwe jí lɛ́ɛ kpó.

³É sɛ́ wɛn dó Kanáanu e ɖo Judɛ́ɛn tɔ ɔ́ sín zǎnzǎnhwe jí kpó gbadahwe jí lɛ́ɛ kpó. É sɛ́ wɛn dó Amɔliti lɛ́ɛ, bó sɛ́ wɛn dó Hitíti lɛ́ɛ, bó sɛ́ dó Pɛliziti lɛ́ɛ, bó sɛ́ wɛn dó Jebuzinu e ɖo sókan mɛ lɛ́ɛ, bó sɛ́ wɛn dó Hivíti e ɖo Ɛmɔ́ɔ só kpá, ɖo Misipa lɛ́ɛ.

⁴Axɔ́sú lɛ́ɛ bǐ jɛ ali kpó ahwanfuntɔ́ maxamaxa kpó. Ahwanfuntɔ́ lɛ́ɛ sukpɔ́ kɔ́ e ɖo xutó é ɖɔhun. Yě hɛn sɔ́ gěgé kpódó kɛkɛ́ví gěgé kpó.

⁵Yě kplé yěɖée ɖó kpɔ́, bó wá ɖó gɔnu ɖó tɔsisa Mɛlɔmu tɔn kpá, bó ná tɔ́n ahwan Izlayɛ́li ví lɛ́ɛ.

⁶Mawu Mavɔmavɔ ɖɔ nú Jozuwée ɖɔ: “Ma ɖi xɛsi nú yě ó, ɖó sɔ lěhwenu ɔ́, un ná jó yě bǐ nú mi togun Izlayɛ́li tɔn ɔ́, bɔ mi ná hu yě. A nǎ sɛ́n dɔnkan nú sɔ́ yětɔn lɛ́ɛ, bó ná dó kɛkɛ́ví yětɔn lɛ́ɛ zo.”

⁷Jozuwée kpódó ahwanfuntɔ́ tɔn lɛ́ɛ kpó yi tɔ́n ahwan kɛntɔ́ yětɔn lɛ́ɛ ajijimɛ, ɖo Mɛlɔmu tɔ ɔ́ tó.

⁸Mawu Mavɔmavɔ jó yě nú Izlayɛ́li ví lɛ́ɛ, bɔ Izlayɛ́li ví lɛ́ɛ ɖu ɖo yě jí, bó nya yě káká yi toxo ɖaxó Sidɔ́ɔn sín taligbé, bó lɛ́ nya yě gbɔn Mislefɔ́ti-Mayimu, ɖo zǎnzǎnhwe jí káká yi Misipa sín tɔdo mɛ. Yě hu yě bǐ, yě jó yě mɛ ɖokpó dó nyi gbɛ ǎ.

⁹Jozuwée wa nǔ xá yě lě e Mawu Mavɔmavɔ ɖɔ n'i gbɔn é. É sɛ́n dɔnkan nú sɔ́ yětɔn lɛ́ɛ, bó dó kɛkɛ́ví yětɔn lɛ́ɛ zo.

¹⁰Ée Jozuwée lɛ́ kɔ ɔ́, é yí Hasɔ́ɔ toxo ɔ́, bó hu axɔ́sú ɔ́. Hasɔ́ɔ ɔ́, Tota wɛ é nyí nú axɔ́súɖuto e ɖo totaligbé lɛ́ɛ ɖ'ayǐ.

¹¹É hu to ɔ́ mɛ nu lɛ́ɛ bǐ. É jó yě mɛ ɖokpó dó nyi gbɛ ǎ, bɔ è dǒ toxo ɔ́ zo.

¹²Jozuwée ɖu ɖo axɔ́sú e blá gbě tɔn lɛ́ɛ bǐ jí, bó yí toxo yětɔn lɛ́ɛ. É hu axɔ́sú lɛ́ɛ, bó hu mɛ e ɖo to yětɔn mɛ lɛ́ɛ bǐ, lě e mɛsɛntɔ́ Mawu Mavɔmavɔ tɔn Mɔyízi ɖɔ é ní bló gbɔn é.

¹³Amɔ̌, yě dó toxo e ɖo kpó jí lɛ́ɛ ɖěbǔ zo zɛ Hasɔ́ɔ e Jozuwée ná gbe bɔ è dǒ zo ɔ́ wú ǎ.

¹⁴Izlayɛ́li ví lɛ́ɛ bɛ́ dɔkun kpó kanlin kpó e yě mɔ ɖo toxo énɛ́ lɛ́ɛ mɛ lɛ́ɛ bǐ, bó hu to énɛ́ lɛ́ɛ mɛ nu lɛ́ɛ bǐ. Yě jǒ nǔ e kó sixú ɖó funfún lɛ́ɛ ɖokpó dó nyi gbɛ ɖo to énɛ́ lɛ́ɛ mɛ ǎ.

¹⁵Mɔyízi ko ɖɔ xó e Mawu Mavɔmavɔ ɖɔ n'i dó nǔ énɛ́ ɔ́ wú ɔ́ bǐ nú Jozuwée, bɔ Jozuwée bló ɖ'é jí, é hɔn xó ɔ́ ɖokpó nyi gbě ǎ.

¹⁶Jozuwée yí to ɔ́ bǐ. É yí to e ɖo sókan mɛ lɛ́ɛ, bó yí to e ɖo afɔligbé lɛ́ɛ bǐ, bó yí to e ɖo Gocɛ́ni gbé jí lɛ́ɛ bǐ, bó yí to e ɖo dodomɛ lɛ́ɛ, bó yí to e ɖo Judɛ́ɛn sín tɔdo mɛ lɛ́ɛ, bó yí to e ɖo Izlayɛ́li só jí, ɖo totaligbé lɛ́ɛ, kpódó éé ɖo ayǐkúngban wɛnjɛ jí ɖo só ɔ́ kpá lɛ́ɛ kpó.

¹⁷É ɖu ɖo to lɛ́ɛ bǐ jí, bɛ́ sín só e jí nǔɖé má ɖe ǎ, bɔ é gbɔn Seyíi káká yi Baalu-Gadi ɖo Libáan tɔdo mɛ, ɖo Ɛmɔ́ɔ só kpá é. É wlí to énɛ́ lɛ́ɛ bǐ sín axɔ́sú bó hu.

¹⁸É fun ahwan xá axɔ́sú énɛ́ lɛ́ɛ xɔ azǎn.

¹⁹Hivíti e ɖo Gabawɔ́ɔn lɛ́ɛ kɛ́ɖɛ́ wɛ jɛ akɔ xá Izlayɛ́li ví lɛ́ɛ. To ɖě lɛ́ɛ e kpó ɔ́, ahwan wɛ é fun dó yí bǐ.

²⁰Đó Mawu Mavɔmavɔ ná ta syɛ́nsyɛ́n to énɛ́ ɔ́ mɛ nu lɛ́ɛ ɖɔ yě ní fun ahwan xá Izlayɛ́li ví lɛ́ɛ. Mawu Mavɔmavɔ bló mɔ̌, nú Izlayɛ́li ví lɛ́ɛ ná hu yě ma kú nǔbláwǔ yětɔn, bó vɔ yě bǐ sésé, lě e Mawu Mavɔmavɔ ɖésú kó ɖɔ gbɔn nú Mɔyízi ɖ'ayǐ é.

²¹Hwe énɛ́ ɔ́ nu ɖokpó ɔ́, Jozuwée yi fun ahwan xá Anáki ví e ɖo sókan mɛ, ɖo Eblɔ́n lɛ́ɛ, éé ɖo Devíi lɛ́ɛ, éé ɖo Anávu lɛ́ɛ, kpódó éé ɖo Judáa kpó Izlayɛ́li kpó sín sókan mɛ lɛ́ɛ kpó. É vívá kún yě bǐ tɔn, bó gba to yětɔn bǐ hánnyá.

²²Anáki ví ɖé sɔ́ kpo ɖo Izlayɛ́li ǎ. Gaza kpódó Gati kpó, kpódó Acidɔ́di kpó kɛ́ɖɛ́ wɛ yě mɛ kwín we ɖé kpo ɖe.

²³Lě e Jozuwée yí to ɔ́ bǐ gbɔn ɔ́ nɛ́, bɔ é sɔgbe xá lě e Mawu Mavɔmavɔ kó ɖɔ gbɔn nú Mɔyízi ɖ'ayǐ é. Énɛ́ ɔ́ gúdo ɔ́, é má to ɔ́ nú Izlayɛ́li ví lɛ́ɛ. É má nú akɔta ɖokpó ɖokpó. Énɛ́ ɔ́, to ɔ́ gbɔjɛ́, bó sɔ́ fun ahwan ɖě ǎ.