Read fon Jozuwée 16 Bible Online

Jozuwée 16 - fon bible

Jozuwée 16

¹Ayǐkúngban e è nǎ kúnkan Jozɛ́fu tɔn lɛ́ɛ gosín Judɛ́ɛn ɖo Jeliko kpá, ɖo Jeliko tɔ lɛ́ɛ sín awa jí, ɖo zǎnzǎnhwe jí, bó gbɔn gbětótló mɛ, bó yi Betɛ́li sókan ɔ́ mɛ.

²Bó gosín fínɛ́ bó ɖidó Lǔzi bó gbɔn Atalɔ́ti fí e Aakíti lɛ́ɛ nɔ́ nɔ é,

³bó sí kɔ do ɖidó Yaflɛ́ti ví lɛ́ɛ sín toxo mɛ ɖo gbadahwe jí. É xo Bɛti-Holɔ́ni dodomɛ tɔn kpódó Gɛzɛ́ɛ kpó zlɛ́, bó wá fó dó Mɛditɛlanɛ́ɛ xutó.

⁴Ayǐkúngban e è nǎ kúnkan Jozɛ́fu tɔn lɛ́ɛ, akɔta Manasée tɔn ɔ́, kpó akɔta Eflayímu tɔn ɔ́ kpó ɔ́ nɛ́.

⁵Akɔta Eflayímu tɔn ɔ́ sín xwédo lɛ́ɛ yí ayǐkúngban ɔ́ akpáxwé ɖokpó. Ayǐkúngban e yě yí ɔ́ bɛ́ sín Atlɔ́ti-Adáa, ɖo afɔligbé zǎnzǎnhwe jí, bó hun káká yi Bɛti-Holɔ́ni kpóta tɔn ɔ́.

⁶É gosín fínɛ́ bó hun káká yi Mɛditɛlanɛ́ɛ xu ɔ́ tó. Bó gbɔn Mikumɛtáti kpá ɖo totaligbé. Bó gosín Mikumɛtáti sín zǎnzǎnhwe jí ɖidó Tanati-Silóo, bó gbɔn fínɛ́ dín yi Yanɔwáxi.

⁷É gosín fínɛ́ bó sí kɔ do yi Atalɔ́ti kpódó Naalata kpó, bó dín yi Jeliko, lobo wá fó dó Judɛ́ɛn tɔ ɔ́ tó.

⁸Dogbó e ɖo totaligbé ɔ́ gosín Tapuwaxi bó tunta gbadahwe jí, bó hun káká yi Kana tɔ ɔ́ tó, bó yi fó dó Mɛditɛlanɛ́ɛ xu ɔ́ tó. Ayǐkúngban e è nǎ akɔta Eflayímu tɔn sín xwédo lɛ́ɛ ɔ́ nɛ́.

⁹È nǎ yě toxo ɖé lɛ́ɛ, kpódó gletoxo e ɖo akpá yětɔn, bó ɖo akɔta Manasée tɔn ɔ́ sín ayǐkúngban jí lɛ́ɛ kpó gɔ́ ná.

¹⁰ Eflayímu ví lɛ́ɛ nya Kanáanu e ɖo Gɛzɛ́ɛ lɛ́ɛ ǎ. Yě mɛ énɛ́ lɛ́ɛ kpo ɖo Eflayímu ví lɛ́ɛ mɛ káká jɛ égbé, bɔ Eflayímu ví lɛ́ɛ kpa acɛ nú yě bó nɔ́ zɔ́n azɔ̌ syɛ́nsyɛ́n lɛ́ɛ yě.