Read fon Jozuwée 2 Bible Online

Jozuwée 2 - fon bible

Jozuwée 2

¹ Jozuwée Nuni ví ɔ́ nɔ Citímu bó sɛ́ dobanúnǔtɔ́ we dó Jeliko ɖɔ yě ní gbɔn nǔglɔ́ nǔglɔ́ bó ba do nú to ɔ́. É ɖɔ nú yě ɖɔ yě ní ba do nú Kanáa to ɔ́ bǐ, ɖo tají ɔ́, yě ní ba do nú Jeliko toxo ɔ́. Ée mɛ we lɛ́ɛ yi to ɔ́ mɛ ɔ́, yě yi dɔ́ nyɔ̌nu agalɛtɔ́ ɖé xwé; è nɔ ylɔ́ nyɔ̌nu ɔ́ ɖɔ Hlaxábu.

²Axɔ́sú Jeliko tɔn ɔ́ se ɖɔ Izlayɛ́li ví ɖé lɛ́ɛ wá to ɔ́ mɛ ɖo zǎn énɛ́ ɔ́ mɛ, bó ná ba do nú to ɔ́.

³Ée axɔ́sú ɔ́ se mɔ̌ ɔ́, é dó wɛn sɛ́ dó Hlaxábu ɖɔ: “Nya e wá xwé towe gbe lɛ́ɛ ɔ́, è sɛ́ yě dó ɖɔ yě ní wá ba do nú to ɔ́ céɖécéɖé wɛ. Jǒ yě nú mǐ.”

⁴Hlaxábu ka ko sɔ́ yě hwlá, lobo ɖɔ nú mɛ e axɔ́sú ɔ́ sɛ́ dó lɛ́ɛ ɖɔ: “Nya ɖé lɛ́ɛ wá xwé ce gbe nǔgbó, amɔ̌, un tunwun fí e nu yě nyí ɔ́ ǎ.

⁵Yě kó lɛ́ kɔ yi hwenu e zǎn ɖo bibɔ wɛ, bɔ è ɖo hɔntogbó to ɔ́ tɔn ná sú wɛ é. Un tunwun fí e yě yi ɔ́ ǎ. Ényí mi hwlɛ́ndó ɔ́, mi sixú xwedó yě wú.”

⁶É ká kó kplá nya lɛ́ɛ yi xɔ ta, bó sɔ́ yě hwlá dó lɛ̌ɛnkantín e è ko xyá ɖó fínɛ́ lɛ́ɛ glɔ́.

⁷Mɛ e axɔ́sú ɔ́ sɛ́ dó lɛ́ɛ jɛ dobanúnǔtɔ́ lɛ́ɛ gbé mɛ; ée yě tɔ́n sín toxo ɔ́ mɛ tlóló ɔ́, è sú hɔntogbó ɔ́, bɔ yě wlí ali e yi fí e è nɔ dó asá Judɛ́ɛn tɔ ɔ́ ɖe ɔ́, bó ɖo dobanúnǔtɔ́ lɛ́ɛ ba wɛ.

⁸Cóbónú dobanúnǔtɔ́ lɛ́ɛ ná dɔ́ amlɔ ɔ́, Hlaxábu yi yě gɔ́n ɖo xɔ tɔn ta,

⁹bo ɖɔ nú yě ɖɔ: “Un tunwun ɖɔ Mawu Mavɔmavɔ ná to élɔ́ mi. Nǔwiwa mitɔn nɔ dó xɛsi nú mǐ ɖésú, káká bɔ mɛ ɖěbǔ sín ayi sɔ́ nɔ jɛ ayǐ ɖo to mǐtɔn mɛ fí ǎ, ɖó mi wú.

¹⁰Đó mǐ se ɖɔ hwenu e mi tɔ́n sín Ejípu bó wá jɛ Xu Vɔvɔ ɔ́ tó ɔ́, Mawu Mavɔmavɔ bló bɔ sin ɔ́ xú, bɔ mi gbɔn ayǐkúngban xúxú jí bó dín. Mǐ lɛ́ se ɖɔ mi hu Amɔliti lɛ́ɛ sín axɔ́sú we: Sihɔ́ni kpó Ɔgu kpó ɖo Judɛ́ɛn tɔ ɔ́ sín zǎnzǎnhwe jí, lobo hɛn nǔ yětɔn lɛ́ɛ bǐ gblé.

¹¹Ée mǐ se xó énɛ́ lɛ́ɛ ɔ́, ayixa mǐtɔn bǐ wɛ gba dó, bɔ mɛ ɖěbǔ sɔ́ glá bó ná nɔ te ɖo nukɔn mitɔn ǎ, ɖó Mawu Mavɔmavɔ, Mawu mitɔn ɔ́ wɛ ɖó acɛ ɖo jǐnukúnsin aga, bó ɖó acɛ ɖo ayǐkúngban jí fí ɖo do.

¹²Din ɔ́, mi xwlé Mawu Mavɔmavɔ nú mì ɖɔ émí ná nyɔ́ xomɛ dó hɛ̌nnumɔ ce lɛ́ɛ wú, lě e un nyɔ́ xomɛ dó mi wú gbɔn din é.

¹³Mi ná xlɛ̌ ɖé mì, bónú má ɖó gǎnjɛwú ɖɔ mi kún ná hu tɔ́ ce, nɔ ce, nɔví ce súnnu, nɔví ce nyɔ̌nu kpó mɛ yětɔn lɛ́ɛ ɖěbǔ kpó ó, mi kún ná lɔn bónú è nǎ hu mǐ ó.”

¹⁴Nya lɛ́ɛ yí gbe n'i ɖɔ: “Ényí mi ma ɖe mǐ gba ǎ ɔ́, mǐ ɖo gbesisɔ mɛ bó ná kú dó ta mitɔn mɛ. Hwenu e Mawu Mavɔmavɔ ná bló bɔ to ɔ́ ná jɛ mǐ sí ɔ́, mǐ ná bló nǔ e a ɖɔ é; mǐ ná nyɔ́ xomɛ dó wǔ towe.”

¹⁵Ée yě ɖɔ mɔ̌ ɔ́, Hlaxábu zé kan gbɔn flɛtɛ́li nu, bó dó ɖe yě jɛ te nyi toxo ɔ́ gúdo, ɖó dǒ e è dǒ xá toxo ɔ́ ná ɔ́ jí wɛ xɔ tɔn ɖe.

¹⁶É ɖɔ nú yě ɖɔ: “Mi yi hɔn hwlá cí sókan mɛ, bónú mɛ e jɛ gbě mitɔn mɛ lɛ́ɛ má mɔ mi ó. Mi nɔ fínɛ́ xɔ azǎn atɔn, káká jɛ hwenu e yě ná lɛ́ kɔ wá dó é. Énɛ́ ɔ́ gúdo ɔ́, mi ná wlí ali mitɔn ɖidó.”

¹⁷Nya we lɛ́ɛ ɖɔ n'i ɖɔ: “Akpá e a byɔ́ mǐ, bɔ mǐ dó nú we ɔ́, lě e mǐ ná ɖe gbɔn ɔ́ ɖíe:

¹⁸Hwenu e mǐ ná wá ahwan tɔ́n to ɔ́ gbé ɔ́, a nǎ sin kan vɔvɔ cɛ́cɛ́ élɔ́ dó flɛtɛ́li e nu a zě mǐ jɛ te gbɔn é. Énɛ́ ɔ́ gúdo ɔ́, a nǎ kplá tɔ́ towe, nɔ towe, nɔví towe súnnu kpó nyɔ̌nu kpó, kpódó hɛ̌nnumɔ towe bǐ kpán wá ɖó xwé towe gbe.

¹⁹Ényí mɛɖé tɔ́n sín xwé towe gbe, bónú nǔɖé yi wa ɛ ɔ́, é wɛ é kan; é kan mǐdɛɛ lɛ́ɛ ǎ. Amɔ̌, ényí è wa nǔɖé nú mɛ e ɖo gɔ̌n towe ɖo xwé towe gbe lɛ́ɛ ɖě hǔn, mǐdɛɛ lɛ́ɛ wɛ kú tɔn ɖo kɔ ná.

²⁰Ényí a ka yi jlá xó e mǐ ɖɔ din ɔ́ hǔn, akpá e a byɔ̌ bɔ mǐ dó nú we ɔ́ sɔ́ ɖ'é jí ǎ.”

²¹Ée yě ɖɔ mɔ̌ ɔ́, Hlaxábu yí gbe nú yě ɖɔ: “Ní bó nɔ lě e mi ɖɔ gbɔn ɔ́.” Énɛ́ ɔ́ gúdo ɔ́, é nyi yě. Ée yě ɖidó tlóló ɔ́, é sin kan vɔvɔ cɛ́cɛ́ ɔ́ dó flɛtɛ́li tɔn nu.

²²Nya we lɛ́ɛ yi sókan ɔ́ mɛ, bó hwlá cí fínɛ́ xɔ azǎn atɔn káká bɔ mɛ e jɛ gbě yětɔn mɛ lɛ́ɛ yi ba yě kpo, lobo lɛ́ kɔ wá Jeliko.

²³Nya we lɛ́ɛ ká jɛ te sín sókan ɔ́ mɛ fí e yě hɔn hwlá cí ɔ́, bó dó asá Judɛ́ɛn tɔ ɔ́. Yě yi Jozuwée Nuni ví ɔ́ gɔ́n, bó wlí nǔ e jɛ dó yě jí ɔ́ bǐ ɖɔ n'i.

²⁴Yě ɖɔ nú Jozuwée ɖɔ: “Mǐ mɔ ɖɔ Mawu Mavɔmavɔ jó to ɔ́ bǐ nú mǐ nǔgbó; to ɔ́ mɛ nu lɛ́ɛ bǐ wɛ kó ɖo xɛsi ɖi nú mǐ wɛ.”