Read fon Jozuwée 24 Bible Online

Jozuwée 24 - fon bible

Jozuwée 24

¹Jozuwée kplé akɔta Izlayɛ́li tɔn lɛ́ɛ bǐ ɖo Sikɛ́mu. É ylɔ́ tomɛxó lɛ́ɛ, gǎn lɛ́ɛ, hwɛɖɔtɔ́ lɛ́ɛ kpódó ahwangán Izlayɛ́li tɔn lɛ́ɛ kpó, bɔ yě wá kplé ɖo Mawu nukɔn,

²bɔ é ɖɔ nú yě bǐ ɖɔ nǔ e Mawu Mavɔmavɔ, Mawu Izlayɛ́li tɔn ɔ́ ɖɔ ɔ́ ɖíe: “Đ'ayǐ xóxó ɔ́, Efláti tɔ gúdo dɔ̌n wɛ tɔ́gbó mitɔn lɛ́ɛ nɔ, bó nɔ́ sɛn vodún lɛ́ɛ. Tɔ́gbó mitɔn énɛ́ lɛ́ɛ ɖě wɛ nyí Tɛláxi, Ablaxámu kpó Naxɔ́ɔ kpó sín tɔ́.

³ Un ɖe tɔ́gbó mitɔn Ablaxámu sín tɔ ɔ́ gúdo dɔ̌n, bó kplá ɛ gbɔn Kanáa to ɔ́ bǐ mɛ. Un ná ɛ vǐ gěgé. Un ná ɛ Izáki bɔ é ji.

⁴ Bó ná Jakɔ́bu kpódó Esawu kpó Izáki, bɔ é ji. Un ná ayǐkúngban Esawu ɖo Seyíi, ɖo sókan mɛ, bɔ é ná nɔ fínɛ́. Jakɔ́bu kpó vǐ tɔn lɛ́ɛ kpó ka yi Ejípu.

⁵ Ée é wá yá ɔ́, un sɛ́ Mɔyízi kpó Aalɔ́ɔn kpó dó. Un wa nǔ tɛnmɛ tɛnmɛ xá yě ɖo Ejípu; énɛ́ ɔ́ gúdo ɔ́, un ɖe togun mitɔn tɔ́n sín to ɔ́ mɛ.

⁶ Un ɖe tɔ́gbó mitɔn lɛ́ɛ tɔ́n sín Ejípu, bɔ yě wǎ xu Vɔvɔ ɔ́ tó. Ejípunu lɛ́ɛ ká fɔ kɛkɛ́ví kpódó sɔ́ kpó, bó jɛ gǔdo yětɔn káká wá fínɛ́.

⁷Énɛ́ ɔ́, tɔ́gbó mitɔn lɛ́ɛ ylɔ́ mì ɖɔ má wá dó alɔ émí, bɔ un sɛ́ akpɔ́kpɔ́ wiwi dó bɔ é wá nɔ tɔ́gbó mitɔn lɛ́ɛ kpó Ejípunu lɛ́ɛ kpó tɛ́ntin. Énɛ́ ɔ́ gúdo ɔ́, un bló bɔ xu ɔ́ cyɔ́n Ejípunu lɛ́ɛ. Mi tunwun lě e un wa nǔ xá Ejípunu lɛ́ɛ gbɔn ɔ́ ganjí. Bɔ tɔ́gbó mitɔn lɛ́ɛ nɔ gbětótló mɛ xɔ xwe mɔ̌kpán.

⁸ Énɛ́ ɔ́ gúdo ɔ́, un kplá mi yi Amɔliti lɛ́ɛ tomɛ, ɖo Judɛ́ɛn tɔ ɔ́ sín zǎnzǎnhwe jí. Yě tɔ́n ahwan mi, un ka jó yě nú mi, bɔ mi yí to yětɔn, un vívá kún yětɔn ɖo nukɔn mitɔn.

⁹ Axɔ́sú Mɔwabu tɔn Balaki Sipɔ́ɔ ví ɔ́ lɔ tɔ́n ahwan mi, é sɛ́ wɛn dó Baláamu, Beɔ́ɔ ví ɔ́, ɖɔ é ní wá dó nu mi.

¹⁰Un ka jló ná ɖótó Baláamu ǎ; bɔ é gbɔ bó xo ɖɛ dó mi jí bɔ un hwlɛ́n mi sín así tɔn.

¹¹ Mi dó asá Judɛ́ɛn tɔ ɔ́, bó wá Jeliko, bɔ Jelikonu lɛ́ɛ tɔ́n ahwan mi; mɔ̌ ɖokpó ɔ́, Amɔliti lɛ́ɛ, Pɛliziti lɛ́ɛ, Kanáanu lɛ́ɛ, Hitíti lɛ́ɛ, Giigacíti lɛ́ɛ, Hivíti lɛ́ɛ kpódó Jebuzinu lɛ́ɛ kpó tɔ́n ahwan mi, un ka jó yě bǐ nú mi.

¹² Un sɛ́ gbɔ̌nvɛ dó, bɔ yě jɛ nukɔn nú mi, bó yi nya Amɔliti lɛ́ɛ sín axɔ́sú we lɛ́ɛ dó wezun nu. Hwǐ e mi hɛn lɛ́ɛ kpó gǎ e mi hɛn lɛ́ɛ kpó wɛ mi dó wa nǔɖé ná ɖo nǔ énɛ́ ɔ́ mɛ ǎ.

¹³ Un ná mi to e mɛ mi ma jɛ tagba ɖěbǔ ɖe ǎ é, bó ná mi toxo e mi ma ɖó ayǐ ǎ lɛ́ɛ, bɔ mi ɖ'é mɛ. Un ná mi vǐwuntín e mi ma tun ǎ lɛ́ɛ, bó ná mi olívutín e mi ma tun ǎ lɛ́ɛ, bɔ mi ɖo ɖuɖu wɛ.”

¹⁴Jozuwée lɛ́ ɖɔ nú yě ɖɔ: “Din ɔ́, mi ɖó sísí nú Mawu Mavɔmavɔ bó sɛn ɛ kpódó ayixa mitɔn bǐ kpó, bó nɔ gbejí n'i. Vodún e tɔ́gbó mitɔn lɛ́ɛ nɔ sɛn ɖ'ayǐ ɖo Efláti tɔ ɔ́ gúdo kpó Ejípu kpó lɛ́ɛ ɔ́, mi bɛ́ yě kɔn nyi gbě, bó sɛn Mawu Mavɔmavɔ.

¹⁵Nú mi ma ka jló ná sɛn Mawu Mavɔmavɔ ǎ hǔn, mi bo ɖɔ nǔ e mi ná sɛn ɔ́ bɛ́ sín égbé. É sixú nyí vodún e tɔ́gbó mitɔn lɛ́ɛ sɛn ɖ'ayǐ ɖo Efláti tɔ ɔ́ gúdo lɛ́ɛ; é ká sixú nyí vodún e Amɔliti e mɛ mi ɖe lɛ́ɛ nɔ sɛn lɛ́ɛ é. Amɔ̌, nyɛ kpó xwédo ce kpó ɔ́, Mawu Mavɔmavɔ wɛ mǐ ná sɛn.”

¹⁶Ée Jozuwée ɖɔ mɔ̌ ɔ́, togun ɔ́ yí gbe n'i ɖɔ: “Gbeɖé kpɔ́n! Mǐ ná jó Mawu Mavɔmavɔ dó bó ná sɛn nǔ ɖěvo ǎ.

¹⁷Đó Mawu Mavɔmavɔ wɛ nyí Mawu mǐtɔn. É wɛ ɖe mǐ kpó tɔ́gbó mǐtɔn lɛ́ɛ kpó tɔ́n sín kannumɔgbénu, ɖo Ejípu. É wɛ jlɛ́ nǔ ɖaxó ɖaxó lɛ́ɛ bɔ mǐ mɔ. É wɛ cyɔ́n alɔ jǐ mǐtɔn ɖo ali e mǐ gbɔn ɔ́ bǐ xo, bó cyɔ́n alɔ jǐ mǐtɔn ɖo togun e mɛ mǐ gbɔn lɛ́ɛ bǐ mɛ.

¹⁸É wɛ nya togun lɛ́ɛ bǐ ɖo nukɔn mǐtɔn, bó nya Amɔliti e nɔ nɔ fí lɛ́ɛ. Mǐ lɔmɔ̌ ɔ́, Mawu Mavɔmavɔ wɛ mǐ ná sɛn, ɖó é wɛ nyí Mawu mǐtɔn.”

¹⁹Bɔ Jozuwée ɖɔ nú yě ɖɔ: “Mi ná sixú sɛn Mawu Mavɔmavɔ ǎ, ɖó Mawu mímɛ́ wɛ é nyí. Mawu ɖé wɛ é nyí bó nɔ́ ba gbeɖé ɖɔ è nǐ sɛn nǔ ɖěvo gɔ́ nú émí ǎ. É ná sɔ́ nǔ e mi wa nyi do lɛ́ɛ kpó hwɛ e mi hu lɛ́ɛ kpó kɛ mi ǎ.

²⁰Ényí mi lɛ́ kɔ sín gǔdo tɔn, bó jɛ nǔ ɖěvo lɛ́ɛ sɛn jí ɔ́, éyɛ́ mɛ e ko wa ɖagbe nú mi sɔ mɔ̌ ɔ́ ná húzú kpan nukɔn mi. É ná wa nǔ nyanya xá mi; é ná vívá kún mitɔn.”

²¹Ée Jozuwée ɖɔ mɔ̌ ɔ́, togun ɔ́ yí xó bó ɖɔ: “Gbeɖé, Mawu Mavɔmavɔ jɛ́n mǐ ná sɛn.”

²²Jozuwée lɛ́ yí xó bó ɖɔ: “É nyí mɔ̌ hǔn, mi ɖésúnɔ wɛ nyí kúnnuɖetɔ́ miɖée tɔn. Mi ɖésúnɔ wɛ yí gbe ɖɔ émí ná sɛn Mawu Mavɔmavɔ nɛ́.” Bɔ yě yí gbe ɖɔ: “Ɛɛn! Mǐ ɖésúnɔ wɛ nyí kúnnuɖetɔ́ mǐɖée tɔn.”

²³Ée yě ɖɔ mɔ̌ ɔ́, Jozuwée ɖɔ nú yě ɖɔ: “Hǔn mi bo bɛ́ vodún mitɔn lɛ́ɛ kɔn nyi gbě, bó sɔ́ ayi mitɔn jó nú Mawu Mavɔmavɔ, Mawu Izlayɛ́li tɔn.”

²⁴Togun ɔ́ ká yí gbe nú Jozuwée ɖɔ: “Mǐ ná sɛn Mawu Mavɔmavɔ, Mawu mǐtɔn, bó ná bló nǔ e é ɖɔ lɛ́ɛ.”

²⁵Gbe nɛ́ ɔ́ gbe ɖo Sikɛ́mu ɔ́, Jozuwée jɛ akɔ xá togun ɔ́. É dó sɛ́n lɛ́ɛ nú yě, bó ɖɔ tito e yě ná xwédo lɛ́ɛ nú yě.

²⁶Jozuwée wlán nǔ énɛ́ lɛ́ɛ dó sɛ́nwéma Mawu tɔn mɛ, bó wá sɔ́ awǐnnya ɖaxó ɖé, bó dó do nyi fínɛ́, ɖo cɛ́nitín ɖé sá, ɖo fí e yě nɔ́ sɛn Mawu Mavɔmavɔ ɖe é,

²⁷bó ɖɔ nú togun ɔ́ ɖɔ: “Mi kpɔ́n awǐnnya élɔ́ ganjí, é wɛ ná ɖe kúnnu nú mǐ, ɖó é se xó e Mawu Mavɔmavɔ ɖɔ nú mǐ lɛ́ɛ bǐ. É wɛ ná nɔ flín nǔ mi, bɔ mi ná lɛ́ kɔ sín Mawu mitɔn gúdo ǎ.”

²⁸Énɛ́ ɔ́ gúdo ɔ́, Jozuwée nyi togun ɔ́, bɔ mɛ ɖokpó ɖokpó lɛ́ kɔ yi ayǐkúngban e è nǎ ɛ ɔ́ jí.

²⁹Ée nǔ énɛ́ lɛ́ɛ bǐ jɛ wá yi ɔ́, mɛsɛntɔ́ Mawu Mavɔmavɔ tɔn Jozuwée Nuni ví ɔ́ wá kú. Xwe kanwe gban (110) ɖó wɛ é ɖe bó kú.

³⁰ È ɖi i ɖó ayǐkúngban e è ná ɛ ɔ́ jí, ɖo Timunati-Sɛláxi, ɖo sókan Eflayímu tɔn mɛ, ɖo Gaaci só ɔ́ sín taligbé.

³¹Izlayɛ́li ví lɛ́ɛ sɛn Mawu Mavɔmavɔ Jozuwée hwenu. Ée Jozuwée kú ɔ́, yě lɛ́ sɛn Mawu Mavɔmavɔ ɖo mɛxó e mɔ nǔ ɖagbe e Mawu Mavɔmavɔ wa nú Izlayɛ́li ví lɛ́ɛ hwenu.

³² Izlayɛ́li ví lɛ́ɛ bɛ́ Jozɛ́fu xú lɛ́ɛ sín Ejípu wá yi Sikɛ́mu, bó ɖi ɖó ayǐkúngban e Jakɔ́bu xɔ yí gankwɛ́ kanwe ko (100) ɖo Hamɔ́ɔ ví lɛ́ɛ sí ɔ́ jí. Hamɔ́ɔ wɛ ɖó Sikɛ́mu toxo ɔ́ ayǐ. Toxo énɛ́ ɔ́ wɛ è wǎ sɔ́ nú Jozɛ́fu vǐ lɛ́ɛ.

³³Eleazáa Aalɔ́ɔn ví ɔ́ lɔ wá kú, bɔ è ɖi i ɖó só e è nǎ vǐ tɔn Pínxási ɔ́ jí, ɖo Eflayímu sókan mɛ.