Read fon Jozuwée 5 Bible Online

Jozuwée 5 - fon bible

Jozuwée 5

¹Axɔ́sú Amɔliti lɛ́ɛ tɔn e ɖo Judɛ́ɛn tɔ ɔ́ sín gbadahwe jí lɛ́ɛ bǐ kpódó axɔ́sú Kanáanu lɛ́ɛ tɔn e ɖo Mɛditɛlanɛ́ɛ xu ɔ́ tó lɛ́ɛ kpó se ɖɔ Mawu Mavɔmavɔ bló bɔ Judɛ́ɛn tɔ ɔ́ xú, bɔ Izlayɛ́li ví lɛ́ɛ gbɔn ayǐkúngban xúxú jí yi jɛ tɔ ɔ́ gúdo. Ée yě se mɔ̌ ɔ́, ayixa yětɔn bǐ gba dó, bɔ yě sɔ́ glá bó ná nɔ te ɖo Izlayɛ́li ví lɛ́ɛ nukɔn ǎ.

²Hwenɛ́nu ɖokpó ɔ́, Mawu Mavɔmavɔ ɖɔ nú Jozuwée ɖɔ: “Zě awǐnnya dó bló jǐví, bó gbo ada nú Izlayɛ́li ví e má kó gbo ada ǎ lɛ́ɛ.”

³Bɔ Jozuwée sɔ́ awǐnnya dó bló jǐví, bó dó gbo ada nú Izlayɛ́li ví lɛ́ɛ ɖo Adagbigbo só jí.

⁴Nǔ e wú Jozuwée gbo ada nú Izlayɛ́li ví lɛ́ɛ ɔ́ ɖíe: ée togun ɔ́ tɔ́n sín Ejípu ɔ́, súnnu lɛ́ɛ, súnnu e ko su ahwan yi lɛ́ɛ bǐ kú ɖo gbětótló mɛ ɖo alixo.

⁵Togun énɛ́ e tɔ́n sín Ejípu ɔ́ bǐ wɛ è ko gbo ada ná. Lo ɔ́, hwenu e yě tɔ́n sín Ejípu ɔ́, vǐ súnnu e yě wá ji ɖo gbětótló mɛ ɖo alixo lɛ́ɛ ɔ́, è gbo ada nú yě ɖě ǎ.

⁶ Đó xwe kanɖé (40) wɛ Izlayɛ́li ví lɛ́ɛ ɖi zɔnlin xɔ ɖo gbětótló mɛ. Yě ɖo gbětótló ɔ́ mɛ káká bɔ súnnu e ko su ahwan yi ɖo yě mɛ hwenu e yě gosín Ejípu lɛ́ɛ bǐ kú, ɖó yě se tónú nú Mawu Mavɔmavɔ ǎ; bɔ Mawu Mavɔmavɔ xwlé nǔ ɖɔ émí kún ná jó yě dó, bɔ yě ná mɔ to e sín akpá émí dó nú tɔ́gbó yětɔn lɛ́ɛ ɖɔ émí ná ná yě ɔ́ ó. Anɔ̌sin kpó wǐin kpó wɛ gɔ́ to énɛ́ ɔ́ mɛ.

⁷Vǐ yětɔn lɛ́ɛ wɛ Mawu Mavɔmavɔ kplá byɔ́ to énɛ́ ɔ́ mɛ ɖó tɛn yětɔn mɛ. Yědɛɛ lɛ́ɛ wɛ Jozuwée wá gbo ada ná, ɖó è ko gbo nú yě ɖ'ayǐ ǎ.

⁸Ée è gbo ada nú yě bǐ fó ɔ́, yě nɔ fí e yě ɖó gɔnu ɖó ɔ́ káká bɔ ada yětɔn kú.

⁹Énɛ́ ɔ́ gúdo ɔ́, Mawu Mavɔmavɔ ɖɔ nú Jozuwée ɖɔ: “Égbé ɔ́, un ɖe winnyá[1] e mɛ mi nɔ, ɖo Ejípu ɔ́ nú mi.” Énɛ́ ɔ́ wú wɛ è nǎ nɔ́ ylɔ́ fí élɔ́ ɖɔ Gilugalu. Fí énɛ́ ɔ́ kpo ɖo mɔ̌ nyí wɛ káká jɛ égbé.

¹⁰ Izlayɛ́li ví lɛ́ɛ ɖó gɔnu ɖó Gilugalu, bó ɖu Dǐndínwáyixwe ɔ́ ɖo sun ɔ́ sín azǎn wǒ-ɛnɛgɔ́ ɔ́ gbe gbadanu, ɖo ayǐkúngban wɛnjɛ jí ɖo Jeliko kpá.

¹¹Ayǐhɔ́ngbe tɔn ɔ́, yě ɖu wɔ̌xúxú e tɔ́n má ɖ'é mɛ ǎ é kpó jinukún mimɛ kpó ɖo gbe énɛ́ ɔ́ gbe ɖokpó ɔ́. Jinukún to ɔ́ mɛ tɔn wɛ yě dó ɖa nǔɖuɖu énɛ́ lɛ́ɛ ná.

¹² Bɛ́ sín gbe énɛ́ ɔ́ gbe e yě ɖu nǔɖuɖu to ɔ́ mɛ tɔn ɔ́, nǔɖuɖu e è nɔ ylɔ́ ɖɔ mǎna ɔ́ ɖě sɔ́ wá nú yě ǎ. Jinukún e nɔ wú ɖo Kanáa ɔ́ wɛ yě ɖu ɖo xwe énɛ́ ɔ́ xwe.

¹³Jozuwée ɖo Jeliko toxo ɔ́ kpá gbe ɖokpó, bó zé ta. É ná mɔ nǔɖé kpowun ɔ́, nya ɖé jɛ́n wá nɔ te nukɔn tɔn, bɔ nya ɔ́ kó sún hwǐ tɔn sín akún mɛ, bó hɛn alɔ mɛ. É ká sɛkpɔ́ nya ɔ́, bó kanbyɔ́ ɛ ɖɔ: “Mǐdɛɛ lɛ́ɛ jí wɛ a ɖe a, abǐ kɛntɔ́ mǐtɔn lɛ́ɛ jí wɛ a ɖe?”

¹⁴Bɔ nya ɔ́ yí gbe n'i ɖɔ: “Un ɖo mɛ ɖěbǔ jí ǎ, ahwangán Mawu Mavɔmavɔ tɔn wɛ un nyí. Wǐwá wɛ un ɖe din.” Ée Jozuwée se mɔ̌ ɔ́, é xwe agbɔ̌nnusú do, bó ɖe kɔ́, lobo ɖɔ nú nya ɔ́ ɖɔ: “Mɛsɛntɔ́ towe wɛ un nyí, étɛ́ a jlǒ ná zɔ́n mì?”

¹⁵Ahwangán Mawu Mavɔmavɔ tɔn ɔ́ ká ɖɔ n'i ɖɔ: “Đe afɔkpa towe, ɖó tɛn e mɛ a ɖe ɔ́, tɛn mímɛ́ wɛ.” Bɔ Jozuwée ɖe afɔkpa tɔn.