Read fon Jozuwée 6 Bible Online

Jozuwée 6 - fon bible

Jozuwée 6

¹È sú hɔntogbó Jeliko tɔn lɛ́ɛ bǐ dó Izlayɛ́li ví lɛ́ɛ kpánwúnkpánwún, bó ján bǐ. Mɛ ɖěbǔ sixú byɔ́ to ɔ́ mɛ ǎ, mɛ ɖěbǔ ká sixú tɔ́n ǎ.

²Mawu Mavɔmavɔ ká ɖɔ nú Jozuwée ɖɔ: “Kpɔ́n, un ná jó Jeliko toxo ɔ́ nú we, bó ná jó axɔ́sú e kpa acɛ ɖo toxo ɔ́ mɛ ɔ́ kpó ahwanfuntɔ́ toxo ɔ́ tɔn lɛ́ɛ kpó nú we.

³Hwi kpódó ahwanfuntɔ́ towe lɛ́ɛ bǐ kpó ná nɔ́ ɖi zɔnlin lɛ́ lɛ̌ dó toxo ɔ́ azɔn ɖokpó gbe ɖokpó, káká nú azǎn ayizɛ́n.

⁴Vɔ̌sánú-xwlémawutɔ́ tɛ́nwe ná jɛ nukɔn nú akɔjijɛgbá ɔ́. Yě mɛ ɖokpó ɖokpó ná hɛn lanzo ɖokpó ɖokpó. Azǎn tɛ́nwegɔ́ ɔ́ gbe ɔ́, mi ná lɛ́ lɛ̌ dó toxo ɔ́ azɔn tɛ́nwe, bɔ vɔ̌sánú-xwlémawutɔ́ lɛ́ɛ ná kún lanzo.

⁵Hwenu e lanzo ɔ́ ná ɖo nǔ ɖɔ wɛ magbokɔ bɔ mi ná se ɔ́, togun ɔ́ ná sú xó ɖaxó ɖé. Énɛ́ ɔ́, dǒ e è mɛ lɛ́ lɛ̌ dó toxo ɔ́ lɛ́ɛ ná mu. Hwe énɛ́ ɔ́ nu ɔ́, mi bǐ ná byɔ́ toxo ɔ́ mɛ; fí e mɛ ɖokpó ɖokpó kpan nukɔn ɔ́, mɛ ɔ́ ná zɔn mɔ̌ tlélé byɔ́ toxo ɔ́ mɛ.”

⁶Ée Jozuwée Nuni ví ɔ́ se mɔ̌ ɔ́, é ylɔ́ vɔ̌sánú-xwlémawutɔ́ lɛ́ɛ, bó ɖɔ nú yě ɖɔ: “Mi zé akɔjijɛgbá Mawu Mavɔmavɔ tɔn ɔ́, bónú mi mɛ tɛ́nwe ní zé lanzo bo jɛ nukɔn tɔn.”

⁷Énɛ́ ɔ́ gúdo ɔ́, é ɖe gbe nú togun ɔ́ ɖɔ: “Éyá! Mi lɛ́ lɛ̌ dó toxo ɔ́. Mɛ e hɛn ahwanfunnú lɛ́ɛ ní jɛ nukɔn nú akɔjijɛgbá Mawu Mavɔmavɔ tɔn ɔ́.”

⁸Yě bló nǔ lɛ́ɛ bǐ lě e Jozuwée ɖɔ gbɔn nú yě ɔ́. Vɔ̌sánú-xwlémawutɔ́ tɛ́nwe e hɛn lanzo tɛ́nwe lɛ́ɛ ɖidó, bó ɖo lanzo kún wɛ, bɔ akɔjijɛgbá Mawu Mavɔmavɔ tɔn ɖo gǔdo yětɔn.

⁹Ahwanfuntɔ́ lɛ́ɛ ɖě ɖo vɔ̌sánú-xwlémawutɔ́ lɛ́ɛ nukɔn, bɔ yě mɛ e kpo lɛ́ɛ ɖo akɔjijɛgbá ɔ́ gúdo. Yě ɖo yiyi wɛ bɔ lanzo ɖo nǔ ɖɔ wɛ magbokɔ.

¹⁰Jozuwée ka ko ɖɔ nú togun ɔ́ ɖɔ: “Mi ma sú xó ó, mi ma nú è se gbe mitɔn ó, mi ma nú xó ɖé tɔ́n sín nu mitɔn mɛ káká jɛ gbe e gbe un ná ɖɔ nú mi ɖɔ mi sú xó é ó.”

¹¹É ɖɔ bɔ yě hɛn akɔjijɛgbá Mawu Mavɔmavɔ tɔn ɔ́ bó lɛ́ lɛ̌ dó toxo ɔ́ azɔn ɖokpó, bó lɛ́ kɔ wá fí e yě ɖǒ gɔnu ɖó ɔ́, bó dɔ́ fínɛ́.

¹²Ayǐhɔ́ngbe tɔn zǎnzǎn tɛɛn ɔ́, Jozuwée fɔ́n, bɔ vɔ̌sánú-xwlémawutɔ́ lɛ́ɛ lɛ́ ɖíɖá akɔjijɛgbá Mawu Mavɔmavɔ tɔn ɔ́.

¹³Bɔ vɔ̌sánú-xwlémawutɔ́ tɛ́nwe e hɛn lanzo lɛ́ɛ jɛ akɔjijɛgbá ɔ́ sín nukɔn ɖidó, bó ɖo lanzo yětɔn lɛ́ɛ kún wɛ. Ahwanfuntɔ́ lɛ́ɛ ɖě ɖo nukɔn nú yě, bɔ yě mɛ ɖě ɖo akɔjijɛgbá ɔ́ gúdo. Hwenu e yě ɖo yiyi wɛ ɔ́, lanzo ɔ́ ɖo nǔ ɖɔ wɛ magbokɔ.

¹⁴Gbe énɛ́ gbe ɖokpó ɔ́, yě lɛ́ lɛ́ lɛ̌ dó toxo ɔ́ azɔn ɖokpó, bó lɛ́ kɔ wá yi fí e yě ɖó gɔnu ɖó ɔ́. Yě bló mɔ̌ xɔ azǎn ayizɛ́n.

¹⁵Azǎn tɛ́nwegɔ́ ɔ́ gbe ɔ́, yě fɔ́n ayǐtéhɔ̌nnu, bó lɛ́ lɛ̌ dó toxo ɔ́ azɔn tɛ́nwe, bó bló nǔ lɛ́ɛ lě e yě kó nɔ́ bló gbɔn ɖ'ayǐ ɔ́. Azǎn énɛ́ ɔ́ gbe kɛ́ɖɛ́ wɛ yě lɛ́ lɛ̌ dó toxo ɔ́ azɔn tɛ́nwe.

¹⁶Ée yě ɖo lɛ̌ lɛ́ dó toxo ɔ́ wɛ azɔn tɛ́nwegɔ́ ɔ́, bɔ vɔ̌sánú-xwlémawutɔ́ lɛ́ɛ ɖo lanzo kún wɛ ɔ́, Jozuwée ɖɔ nú togun ɔ́ ɖɔ: “Mi sú xó! Mawu Mavɔmavɔ kó jó toxo ɔ́ nú mi.

¹⁷È nǎ gba toxo ɔ́, bó ná hɛn nǔ e ɖ'é mɛ lɛ́ɛ bǐ gblé, ɖó Mawu Mavɔmavɔ wɛ è sɔ́ ɖ'ayǐ ná. Hlaxábu agalɛtɔ́ ɔ́ kɛ́ɖɛ́, kpó mɛ e ɖo xwé tɔn gbe lɛ́ɛ bǐ kpó wɛ è nǎ jó dó, ɖó é wɛ sɔ́ dobanúnǔtɔ́ e mǐ sɛ́ dó lɛ́ɛ hwlá.

¹⁸Mi ká cɔ́ miɖée, mi ma sɔ́ nǔ e è ɖǒ ná hɛn gblé lɛ́ɛ ɖěbǔ ó, é má nyí mɔ̌ ǎ ɔ́, mi ná dɔn nǔ nyanya wá nú togun Izlayɛ́li tɔn ɔ́, bó ná vɔ to ɔ́.

¹⁹Kpatágan kpó siká kpó e è nǎ mɔ ɖo toxo ɔ́ mɛ lɛ́ɛ bǐ, nǔ e è zě ganvɔ dó bló ná lɛ́ɛ, kpódó éé è sɔ́ gan dó bló ná bɔ è nǎ mɔ ɖo toxo ɔ́ mɛ lɛ́ɛ bǐ kpó ɔ́, è nǎ sɔ́ ɖó vo nú Mawu Mavɔmavɔ bó ná bɛ́ kɔn nyi dɔkun tɔn lɛ́ɛ jí.”

²⁰ Ée Jozuwée ɖɔ mɔ̌ ɔ́, è kún lanzo. Ée togun ɔ́ se lanzo gbe tlóló ɔ́, xósúsú mlí, bɔ dǒ e è mɛ lɛ́ lɛ̌ dó toxo ɔ́ bǐ hɔ́. Énɛ́ ɔ́, Izlayɛ́li ví lɛ́ɛ nyi agbo byɔ́ toxo ɔ́ mɛ, mɛ ɖokpó ɖokpó ɖidó fí e é kpan nukɔn ɔ́ tlélé, bɔ yě yǐ toxo ɔ́.

²¹Yě vívá nǔ e ɖo toxo ɔ́ mɛ lɛ́ɛ bǐ sín kún. Yě hu súnnu lɛ́ɛ, bó hu nyɔ̌nu lɛ́ɛ, bó hu mɛ wínnyáwínnyá lɛ́ɛ kpódó degénɔ lɛ́ɛ kpó. Yě hu káká bó hu nyibú bó hu gbɔ̌ kpódó tócí lɛ́ɛ kpó.

²²Jozuwée yi ɖɔ nú mɛ we e yi ba do nú to ɔ́ lɛ́ɛ ɖɔ: “Mi yi Hlaxábu agalɛtɔ́ ɔ́ xwé, bó kplá é kpó mɛ tɔn lɛ́ɛ bǐ kpó tɔ́n sín xwé ɔ́ gbe, lě e mi ko ɖɔ bo xwlé nǔ d'é jí n'i gbɔn ɖ'ayǐ é.”

²³Bɔ yě yi bó kplá Hlaxábu, bó kplá tɔ́ tɔn, nɔ tɔn, nɔví tɔn súnnu lɛ́ɛ kpó nyɔ̌nu lɛ́ɛ kpó, kpódó mɛ tɔn lɛ́ɛ bǐ kpó wá. Yě ɖe mɛ e ɖo hɛ̌nnu tɔn mɛ lɛ́ɛ bǐ tɔ́n bó ɖó tɛnmɛ nú yě ɖó fí e yě ná nɔ bɔ nǔɖé má ná wa yě ǎ é. Yě ká ɖo fí e Izlayɛ́li ví lɛ́ɛ ɖó gɔnu ɖó é ǎ.

²⁴Énɛ́ ɔ́ gúdo ɔ́, yě dó toxo ɔ́ zo, kpódó nǔ e ɖo toxo ɔ́ mɛ lɛ́ɛ bǐ kpó. Yě jó nǔɖé dó zɛ kpatágan, siká, kpó nǔ e è zě ganvɔ abǐ gan dó bló ná lɛ́ɛ kpó wú ǎ. Yě bɛ̌ nǔ énɛ́ lɛ́ɛ bǐ dó dɔkun e ɖo Mawu Mavɔmavɔ sín xɔ mɛ lɛ́ɛ jí.

²⁵ Énɛ́ ɔ́, Jozuwée jó Hlaxábu agalɛtɔ́ ɔ́ dó nyi gbɛ, é kpó mɛ tɔn lɛ́ɛ bǐ kpó, ɖó hwenu e Jozuwée sɛ́ dobanúnǔtɔ́ lɛ́ɛ dó ɖɔ yě ní yi kpɔ́n lě e toxo ɔ́ ɖe gbɔn ɔ́, é wɛ sɔ́ yě hwlá bɔ è ma wa nǔɖé nú yě ǎ. É nɔ Izlayɛ́li ví lɛ́ɛ mɛ, bɔ kúnkan tɔn lɛ́ɛ kpo ɖo gbɛ ɖo yě mɛ káká jɛ égbé.

²⁶ Hwenɛ́nu ɖokpó ɔ́, Jozuwée ɖɔ xó dó Jeliko toxo ɔ́ wú, é xwlé nǔ d'é jí ɖɔ: “Ényí mɛɖé tɛ́nkpɔ́n ɖɔ émí ná vɔ́ toxo élɔ́ blóɖó ɔ́, Mawu Mavɔmavɔ ní dó nu mɛ énɛ́ ɔ́. Nú é kun do bo ná dó dǒ ɔ́ do ɔ́, nukɔn ví tɔn wɛ é ná d'é mɛ; é ja hɔn lɛ́ɛ dó gbé ɔ́, vǐ tɔn kpodé ɔ́ wɛ é ná d'é mɛ.”

²⁷Mawu Mavɔmavɔ ɖo kpɔ́ xá Jozuwée, bɔ nyǐkɔ tɔn gba kpé to ɔ́ bǐ mɛ.