Read fon Jozuwée 9 Bible Online

Jozuwée 9 - fon bible

Jozuwée 9

¹Axɔ́sú e ɖo Judɛ́ɛn tɔ ɔ́ gúdo ɖo sókan mɛ, ɖo tɔdo mɛ lɛ́ɛ kpódó éé ɖo Mɛditɛlanɛ́ɛ xu ɔ́ tó káká yi Libáan lɛ́ɛ kpó bǐ se ɖɔ è gba Ayíi toxo ɔ́. Axɔ́sú e wɛ lɛ́ɛ ɖíe: Hitíti lɛ́ɛ xɔ́sú ɔ́, Amɔliti lɛ́ɛ xɔ́sú ɔ́, Kanáanu lɛ́ɛ xɔ́sú ɔ́, Pɛliziti lɛ́ɛ xɔ́sú ɔ́, Hivíti lɛ́ɛ xɔ́sú ɔ́ kpódó Jebuzinu lɛ́ɛ xɔ́sú ɔ́ kpó.

²Yě ɖó gbe kpɔ́, bó ná fun ahwan xá Jozuwée kpó togun Izlayɛ́li tɔn ɔ́ kpó.

³Gabawɔ́ɔnnu lɛ́ɛ lɔ se lě e Jozuwée wa Jeliko toxo ɔ́ kpó Ayíi toxo ɔ́ kpó sín nǔ gbɔn ɔ́,

⁴bó ɖɔ émí ná ɖó ayi nukɔn nú Jozuwée. Énɛ́ ɔ́, yě ɖidó mɛɖé wɛ sɛ́ yě dó to yětɔn sín afɔ sɔ́ ɖó te gbé ɖɔhun. Yě dǒ nǔɖuɖu sín agban, lobo bɛ́ ati xóxó lɛ́ɛ kpó anyǔglo e mɛ è nɔ kɔn vɛ̌ɛn dó lɛ́ɛ xóxó tɔn e kó vún bɔ è ɖɛ̌ lɛ́ɛ kpó, bó dó agban tɔn nú tócí yětɔn lɛ́ɛ.

⁵Yě bɛ̌ awu vúnvún lɛ́ɛ kplá, bó bɛ́ afɔkpa e vún bɔ è ko tɔ lɛ́ɛ dó, lobo bɛ́ wɔ̌xúxú e kó xú káókáó bó gba hánnyá lɛ́ɛ hɛn.

⁶Yě yi fí e Izlayɛ́li ví lɛ́ɛ ɖó gɔnu ɖó ɖo Gilugalu é, bó ɖɔ nú Jozuwée kpó togun ɔ́ kpó ɖɔ: “To línlín ɖé mɛ wɛ mǐ gosín wá mi gɔ́n. Mǐ jló ná byɔ́ mi ɖɔ mi ní jɛ akɔ xá mǐ.”

⁷ Izlayɛ́li ví lɛ́ɛ ká ɖɔ nú yě ɖɔ: “É sixú kó nyí ɖɔ mǐ kpá fí jɛ́n mi ná ɖe din. Ényí mɔ̌ wɛ nyí ɔ́, mǐ ná sixú jɛ akɔ xá mi ǎ.”

⁸Yě ká ɖɔ nú Jozuwée ɖɔ: “Mɛsɛntɔ́ towe wɛ mǐ nyǐ.” Jozuwée ka kanbyɔ́ yě ɖɔ: “Mɛ̌ wɛ mi ka nyí tawun? Fítɛ́ mi ka gosín?”

⁹Yě yí gbe n'i ɖɔ: “Mǐ mɛsɛntɔ́ towe lɛ́ɛ ɔ́, to e mɛ mǐ gosín ɔ́ lín ɖésú. Mawu Mavɔmavɔ, Mawu towe sín nyǐkɔ wɛ mǐ se, mǐ ká lɛ́ se nǔjíwǔ e é bló ɖo Ejípu lɛ́ɛ bǐ.

¹⁰ Mǐ lɛ́ se nǔ e é dó sin xá axɔ́sú Amɔliti tɔn we e nɔ Judɛ́ɛn tɔ ɔ́ sín zǎnzǎnhwe jí lɛ́ɛ é: yě wɛ nyí axɔ́sú Hɛcibɔ́ni tɔn Sihɔ́ni kpódó axɔ́sú Basáni tɔn Ɔgu e nɔ Acitalɔ́ti é kpó.

¹¹Tomɛxó mǐtɔn lɛ́ɛ kpó to mǐtɔn mɛ nu lɛ́ɛ bǐ kpó kplɔ́n nǔ mǐ ɖɔ mǐ ní wá gɔ̌n mitɔn, mǐ ní ká hɛn nǔ e mǐ ná ɖu ɖo alixo é. Yě ɖɔ nú mǐ ɖɔ mǐ ní wá wa azɔ̌ nú mi, bó dó byɔ́ mi ɖɔ mi ní jɛ akɔ xá mǐ.

¹²Mi kpɔ́n wɔ̌xúxú e mǐ hɛn é. Hwenu e mǐ jɛ ali ja mi gɔ́n ɔ́, zozo wɛ é ɖe; é ɖíe ká kó xú bǐ din bo gba hánnyá e!

¹³Mi kpɔ́n, anyǔglo élɔ́ lɛ́ɛ ɔ́, yɔ̌yɔ́ wɛ yě ɖe bɔ mǐ kɔn vɛ̌ɛn d'é mɛ; din ɔ́, bǐ ɖíe ká kó vún e! Awu mǐtɔn lɛ́ɛ kpódó afɔkpa mǐtɔn lɛ́ɛ kpó lɔmɔ̌ ɔ́, yě bǐ wɛ vún, ɖó aliga e mǐ zɔn é wútu.”

¹⁴Ée yě ɖɔ mɔ̌ ɔ́, Izlayɛ́li ví lɛ́ɛ sɔ́ kan gbe byɔ́ Mawu Mavɔmavɔ ǎ, lobo dó alɔ nǔɖuɖu e yě hɛn ɔ́ jí,

¹⁵bɔ Jozuwée zun xɔ́ntɔn xá yě, bo jɛ akɔ xá yě ɖɔ émí kún ná hu yě ó. Gǎn lɛ́ɛ lɔ yí gbe ná, bó xwlé nǔ d'é jí nú yě.

¹⁶Ée yě jɛ akɔ énɛ́ ɔ́ xá yě ɔ́, azǎn tɔn atɔn gbe gúdo ɔ́, Izlayɛ́li ví lɛ́ɛ wá se ɖɔ akpá émítɔn fí jɛ́n yě nɔ́ nɔ.

¹⁷Ée Izlayɛ́li ví lɛ́ɛ se mɔ̌ ɔ́, yě jɛ ali bo yi mɛ e wá jɛ akɔ xá yě lɛ́ɛ sín toxo lɛ́ɛ mɛ azǎn tɔn atɔngɔ́ ɔ́ gbe. Toxo lɛ́ɛ sín nyǐkɔ ɖíe: Gabawɔ́ɔn, Kefila, Beelɔ́ti kpódó Kiliyati-Yealimu kpó.

¹⁸Yě ká hu yě ǎ, ɖó togun Izlayɛ́li tɔn ɔ́ sín gǎn lɛ́ɛ kó dó akpá nú yě, ɖo Mawu Mavɔmavɔ, Mawu Izlayɛ́li tɔn ɔ́ sín nyǐkɔ mɛ. Izlayɛ́li ví lɛ́ɛ bǐ jɛ nǔ húnhún ɖɔ dó gǎn yětɔn lɛ́ɛ wú jí.

¹⁹Gǎn yětɔn lɛ́ɛ ká ɖɔ nú yě ɖɔ: “Mǐ má sixú wa nǔɖé nú yě nɛ́, ɖó mǐ dó akpá nú yě ɖo Mawu Mavɔmavɔ, Mawu Izlayɛ́li tɔn ɔ́ sín nyǐkɔ mɛ.

²⁰Mǐ ɖó ná jó yě dó nyi gbɛ, ɖó akpá e mǐ dó ɔ́ wútu. É má nyí mɔ̌ ǎ ɔ́, mǐ ná dɔn xomɛsin Mawu Mavɔmavɔ tɔn dó mǐɖée jí. Lo ɔ́, lě e mǐ ná wa nǔ yětɔn gbɔn ɔ́ ɖíe:

²¹Mǐ ná jó yě dó nyi gbɛ. Amɔ̌, mǐ ná ɖɔ nú yě bɔ yě ná nɔ́ gbo atín nú mǐ, bó ná nɔ́ dun sin nú togun ɔ́.” Lě e gǎn lɛ́ɛ ɖɔ gbɔn ɔ́ nɛ́.

²²Énɛ́ ɔ́, Jozuwée ylɔ́ Gabawɔ́ɔnnu lɛ́ɛ kplé, bó ɖɔ nú yě ɖɔ: “Akpá mǐtɔn fí jɛ́n mi gosín! Nɛ̌ ka gbɔn bɔ mi blɛ́ mǐ ɖɔ fí línlín wɛ émí gosín?

²³Din ɔ́, nu wɛ è ko dó mi, mi ɖě sɔ́ ná gɔn kannumɔ nyí gbeɖé ǎ. Mi wɛ ná gbo atín e è nǎ zǎn ɖo Mawu ce xwé lɛ́ɛ, bó ná dun sin e è nǎ zǎn ɖo fínɛ́ é.”

²⁴Ée Jozuwée ɖɔ mɔ̌ ɔ́, Gabawɔ́ɔnnu lɛ́ɛ yí gbe n'i ɖɔ: “Nǔ e zɔ́n bɔ mǐ wa nǔ gbɔn mɔ̌ ɔ́ ɖíe: mǐ se ɖɔ Mawu Mavɔmavɔ, Mawu towe ná gbe mɛsɛntɔ́ tɔn Mɔyízi ɖɔ ní ná to élɔ́ ɔ́ bǐ mi. É ɖɔ nú mi ɖɔ mi ɖo yiyi wɛ ɔ́, mi ná nɔ́ ɖo to ɔ́ mɛ nu lɛ́ɛ bǐ hu wɛ. Nǔ énɛ́ ɔ́ e mǐ se ɔ́ hu ado nú mǐ bɔ mǐ ɖo xɛsi ɖi wɛ ɖɔ mǐ táá kú.

²⁵Din ɔ́, acɛ towe glɔ́ wɛ mǐ ɖe, zě mǐ dó wa nǔ e jló we ɔ́ ná.”

²⁶Lě e Jozuwée wa nǔ yětɔn gbɔn ɔ́ ɖíe: é gbɛ́ nú Izlayɛ́li ví lɛ́ɛ ɖɔ yě ní má hu yě ó.

²⁷É ɖɔ nú Gabawɔ́ɔnnu lɛ́ɛ ɖɔ yě ná nɔ gbo atín, yě ná nɔ́ dun sin nú togun Izlayɛ́li tɔn ɔ́, bó ná nɔ́ dun sin e è nǎ nɔ zán ɖo vɔ̌sákpe Mawu Mavɔmavɔ tɔn ɔ́ kɔn é, ɖo fí e Mawu Mavɔmavɔ ná xlɛ́ Izlayɛ́li ví lɛ́ɛ bɔ yě ná nɔ sɛn ɛ ɖe é. Kúnkan yětɔn lɛ́ɛ kpo ɖo azɔ̌ énɛ́ ɔ́ wa wɛ káká jɛ égbé.