Read fon 2 Tɛsalonikinu 3 Bible Online

2 Tɛsalonikinu 3 - fon bible

2 Tɛsalonikinu 3

¹Nɔví lɛ́ɛ mi, bó ná dó fó ɔ́, mǐ ɖo byɔ̌byɔ́ mi wɛ ɖɔ mi ní nɔ xo ɖɛ nú mǐ, bónú Aklúnɔxó ɔ́ ní yá wǔ gba kpé, bónú mɛ lɛ́ɛ ní nɔ kpa susu ná lě e é ɖe gbɔn ɖo mi gɔ́n é.

²Mi lɛ́ xo ɖɛ nú mǐ, bónú Mawu ná hwlɛ́n mǐ ɖo mɛdídá lɛ́ɛ kpódó mɛ nyanya lɛ́ɛ kpó sí; ɖó mɛ bǐ wɛ ɖi nǔ nú Wɛn Ɖagbe ɔ́ ǎ.

³Lo ɔ́, Aklúnɔ ɔ́, gbejínɔtɔ́ wɛ; é ná ná hlɔ̌nhlɔ́n mi, bó ná cyɔ́n alɔ mi jí, bɔ awǒvi ná kpé mi wú ǎ.

⁴Aklúnɔ ná jiɖiɖe mǐ dó mi wú; é ná gǎnjɛwú mǐ ɖɔ mi nɔ bló nǔ e ɖɔ nú mi wɛ mǐ ɖe lɛ́ɛ, bó ka lɛ́ kpo ɖo blǒbló wɛ.

⁵Aklúnɔ ní wa azɔ̌ ɖo ayixa mitɔn mɛ, bónú mi ná yí wǎn nú Mawu bó ná ɖó hǔnkúkú e Klísu nɔ ná mɛ é.

⁶Nɔví lɛ́ɛ mi, mǐ ɖo byɔ̌byɔ́ mi wɛ ɖo Aklúnɔ Jezu Klísu sín nyǐkɔ mɛ ɖɔ mi nɔ nɔ zɔ nú nɔví mǐtɔn e nɔ nɔ fɔnlín gbɛ mɛ, bó ma nɔ jló ná wa nǔɖé ǎ, bó ma nɔ xwedó nǔ e mǐ kplɔ́n yě ɔ́ ǎ lɛ́ɛ bǐ.

⁷Mi ɖésúnɔ ɔ́, lě e mi ɖó ná wa nǔ mǐdɛɛ lɛ́ɛ ɖɔhun gbɔn ɔ́, mi tunwun ganjí; ɖó hwenu e mǐ ɖo mi gɔ́n ɔ́, mǐ ɖi fɔnlín ǎ.

⁸Mǐ ɖu mɛɖé nǔɖuɖu bó gɔn axɔ́ sú ǎ; é nyɔ́ wa ɔ́, mǐ nɔ́ jɛ tagba, bó nɔ wa azɔ̌, bó nɔ jɛ dɛ̌n zǎn kpó kéze kpó, bó ma nɔ kɔ jí nú mɛ ɖěbǔ ó.

⁹É nyí mǐ gɔn acɛ e ná ɖu nǔ mitɔn bó gɔn axɔ́ sú ɔ́ ɖó wútu wɛ mǐ wa nǔ gbɔn mɔ̌ ǎ; lo ɔ́, mǐ wa nǔ gbɔn mɔ̌, bó ná dó ná xlɛ́ e mi ná xwedó ɔ́ mi.

¹⁰Nǔgbó ɔ́, hwenu e mǐ ɖo mi gɔ́n ɔ́, mǐ ko ɖɔ nú mi ɖɔ mɛ e ma jló ná wa azɔ̌ ǎ ɔ́, ní ma ɖu nǔɖuɖu lɔ ó.

¹¹Mǐ ɖo xó ɖɔ nú mi wɛ gbɔn mɔ̌, ɖó mǐ se ɖɔ mɛɖé lɛ́ɛ ɖo mi mɛ, bó nɔ nɔ fɔnlín gbɛ mɛ, bó nɔ́ ba nǔɖé ná wa zɛ yě ná ɖo nu dó mɛɖěvo xó mɛ wɛ wú ǎ.

¹²Mɛ énɛ́ lɛ́ɛ ɔ́, mǐ ɖo byɔ̌byɔ́ yě wɛ, bó lɛ́ ɖo zǐnzɔ́n yě wɛ ɖo Aklúnɔ Jezu Klísu sín nyǐkɔ mɛ wɛ ɖɔ yě ní ma nɔ nya xó gbé ó; yě ní nɔ ɖó kan dó azɔ̌ wú, bó ná dó sixú nyí yě ɖésú.

¹³Nɔví lɛ́ɛ mi, midɛɛ lɛ́ɛ ɔ́, ɖagbewiwa ní ma ci kɔ nú mi ó.

¹⁴Nǔ e kplɔ́n mi wɛ mǐ ɖe ɖo wěma élɔ́ mɛ ɔ́, ényí mɛɖé ma bló ɖ'é jí ǎ hǔn, mi ɖó kɛ́n jǐ tɔn, bó ma dó gbɛ̌ tɔn ó, bónú winnyá ná hu i.

¹⁵Amɔ̌ mi ma ka sɔ́ ɛ dó ɖó kɛntɔ́ na ó; lo ɔ́, mi kplɔ́n nǔ i nɔví ɖɔhun.

¹⁶Aklúnɔ e nɔ́ ná fífá mɛ ɔ́, é ɖésúnɔ ní ná fífá mi hwebǐnu, gbɔn alɔkpa bǐ mɛ. Aklúnɔ ní nɔ kpɔ́ xá mi bǐ.

¹⁷Nyɛ Pɔ́lu ɖésú wɛ sɔ́ alɔ ce dó wlán xógbe élɔ́ lɛ́ɛ ná: un dó gbe mi; lě e un nɔ dó alɔ wěma ce lɛ́ɛ bǐ mɛ gbɔn ɔ́ nɛ́; mɔ̌ wɛ un nɔ wlán nǔ gbɔn.

¹⁸Fɛ́nú Aklúnɔ mǐtɔn Jezu Klísu tɔn ní nɔ kpɔ́ xá mi bǐ.