Read fon 1 Timɔtée 1 Bible Online

1 Timɔtée 1 - fon bible

1 Timɔtée 1

¹Nyɛ Pɔ́lu e Mawu Mɛhwlɛ́ngántɔ́ mǐtɔn, kpódó Klísu Jezu e nyí nukúnɖíɖó mǐtɔn ɔ́ kpán ɖe gbe, bɔ un nyí mɛsɛ́dó Klísu Jezu tɔn ɔ́

² wɛ wlán wěma élɔ́ sɛ́ dó hwi vǐ ce jiji ɖo nǔɖiɖi mɛ Timɔtée. Mawu Tɔ́ ɔ́ kpódó Aklúnɔ mǐtɔn Klísu Jezu kpán ní ná fɛ́nú we, bó kú nǔbláwǔ nú we, lobo ná fífá we.

³Nɔ Efɛ́zi lě e un ko ɖɔ gbɔn nú we hwenu e un ɖidó Masedwani é; mɛɖé lɛ́ɛ ɖo fínɛ́, bó nɔ ɖo nǔ e ma sɔgbe xá nǔɖiɖi mǐtɔn ǎ lɛ́ɛ kplɔ́n mɛ lɛ́ɛ wɛ; a ɖǒ ná gbɛ́ nǔ nú yě.

⁴Đɔ nú yě ɖɔ yě ní jó xɛxó kpódó kanfifɔ magbokɔ kpó dó, ɖó nǔ énɛ́ lɛ́ɛ ɔ́, adɔn wɛ yě nɔ dɔn nyi ayǐ, bó nɔ́ lɔn nú mɛ lɛ́ɛ ná nyí nǔjíkpɔ́ntɔ́ Mawu tɔn ɖagbe ɖo nǔɖiɖi mɛ ǎ.

⁵Nǔ e wú un ɖɔ mɔ̌ ɔ́ wɛ nyí ɖɔ nǔkplɔ́nmɛ mǐtɔn lɛ́ɛ ɖó ná d'alɔ mi, bɔ mi ná ɖó wǎn yíyí e nɔ tɔ́n sín ayi mímɛ́ mɛ é; wǎn yíyí e nɔ tɔ́n sín linlin ɖagbe mɛ é, wǎn yíyí e nɔ tɔ́n sín nǔɖiɖi jɔ nǔɖiɖi mɛ é.

⁶Mɛ ɖé lɛ́ɛ lɛ́ kɔ sín walɔ énɛ́ lɛ́ɛ gúdo, lobo kpo nú xógbló kɛ́ɖɛ́, káká bó bú ɖ'é mɛ.

⁷Yě jló ná nyí sɛ́nkplɔ́nmɛtɔ́, yě nɔ mɔ nukúnnú jɛ nǔ e ɖɔ wɛ yě ɖésúnɔ ɖe ɔ́ mɛ ǎ; yě ka nɔ mɔ nukúnnú jɛ nǔ e jí yě tɛ ɖɛ̌ sɔ mɔ̌, bó ɖo ɖiɖɔ wɛ ɔ́ mɛ ǎ.

⁸Nǔgbó ɔ́, mǐ tunwun ɖɔ sɛ́n ɔ́, nǔ ɖagbe wɛ é nyí, nú è zě dó wa azɔ̌ ná lě e é jɛ xá gbɔn ɔ́ nɛ́.

⁹Đo tají ɔ́, è ka ná flín ɖɔ é kún nyí nǔjlɔ́jlɔ́watɔ́ lɛ́ɛ wú wɛ è dǒ sɛ́n ɔ́ ó; lo ɔ́, mɛ e wú è dǒ sɛ́n ɔ́ lɛ́ɛ wɛ nyí nǔnyanyawatɔ́ lɛ́ɛ, tónúmasetɔ́ lɛ́ɛ, mɛ e ma nɔ sí Mawu ǎ lɛ́ɛ, hwɛhutɔ́ lɛ́ɛ, mɛ e ma nyí mɛ mímɛ́ ǎ lɛ́ɛ, mɛ e ma ɖi nǔ nú Mawu ǎ lɛ́ɛ, mɛ e nɔ hu tɔ́ yětɔn abǐ nɔ yětɔn lɛ́ɛ é, mɛhutɔ́ lɛ́ɛ.

¹⁰Nǔblíblíwatɔ́ lɛ́ɛ, súnnu e nɔ ɖó xó xá súnnu gbɛ̌ yětɔn lɛ́ɛ é, nyɔ̌nu e nɔ ɖó xó xá nyɔ̌nu gbɛ̌ yětɔn lɛ́ɛ é, kannumɔjɔ́watɔ́ lɛ́ɛ, adingbannɔ lɛ́ɛ, mɛ e nɔ xwlé nǔ dó nǔvú jí lɛ́ɛ, kpódó mɛ e nɔ wa nǔ e ma sɔgbe xá nǔkplɔ́nmɛ titewungbe ɔ́ ǎ lɛ́ɛ bǐ kpó.

¹¹Wɛn Ɖagbe e è sɔ́ dó así nú mǐ, bɔ é ɖɔ xó dó Mawu nyɔ̌nábǐnɔ ɔ́ sín susu wú ɔ́ mɛ wɛ è nɔ mɔ nǔkplɔ́nmɛ énɛ́ ɖe.

¹²Un dó kú nú Aklúnɔ mǐtɔn Klísu Jezu e ná hlɔ̌nhlɔ́n mì, nú ma dó wa azɔ̌ ce ná é. Un dó kú n'i, ɖó é mɔ ɖɔ un nyí mɛ bɔ è nǎ ɖeji dó wǔ ce, un dó kú n'i, ɖó é sɔ́ mì bónú ma wa azɔ̌ n'i.

¹³ Có ɖ'ayǐ ɔ́, un ko nylá nu dó wǔtu tɔn, bó kó dó ya n'i, bó ɖɔ alǎnnú n'i kpɔ́n. Lo ɔ́, é kú nǔbláwǔ nú mì, ɖó hwenɛ́nu ɔ́, un ɖi nǔ n'i ǎ, un ka tunwun nǔ e wa wɛ un ɖe ɔ́ ǎ.

¹⁴Aklúnɔ mǐtɔn ka kɔn fɛ́nú tɔn dó jǐ ce, bɔ é túnflá; é ná nǔɖiɖi kpódó wǎn yíyí e mǐ ɖǒ ɖo Klísu Jezu mɛ ɔ́ kpó mì.

¹⁵Xó nǔgbó ɖokpó ɖíe, bɔ é jɛ xá ɖɔ mɛ bǐ ní yí; é wɛ nyí ɖɔ Klísu Jezu wá gbɛ ɔ́ mɛ, bó ná hwlɛ́n hwɛhutɔ́ lɛ́ɛ gán; nyɛ wɛ ka nyí hwɛhutɔ́ hú hwɛhutɔ́ lɛ́ɛ bǐ.

¹⁶Amɔ̌ énɛ́ ɔ́ wútu wɛ Mawu kú nǔbláwǔ nú mì; é jló ɖɔ Jezu Klísu ní ɖe sɔxwixwe tɔn bǐ xlɛ́ gbɔn nyɛ mɛ e nyí hwɛhutɔ́ hú hwɛhutɔ́ lɛ́ɛ bǐ é sín gbɛzán mɛ, bónú ma nyí kpɔ́n d'é wú nú mɛ e ná wá ɖi nǔ n'i, bó ná mɔ gbɛ mavɔ mavɔ lɛ́ɛ é bǐ.

¹⁷Axɔ́sú mavɔ mavɔ e ma nɔ kú gbeɖé ǎ ɔ́, axɔ́sú e è ma nɔ mɔ ǎ é, axɔ́sú e nyí Mawu ɖokpó géé ée tíin é; è nǐ wlí yɛ̌yi n'i, bó kpa susu n'i káká sɔ́yi mavɔ mavɔ. Amǐ.

¹⁸Vǐ ce Timɔtée, un ɖo nǔ élɔ́ zɔ́n we wɛ, bɔ é sɔgbe xá nǔ e Mawu ɖɔ é ná jɛ dó jǐ towe lɛ́ɛ, bɔ è ko ɖɔ nú we ɖ'ayǐ é. Xwedó xó énɛ́ lɛ́ɛ, bó ná dó fun ahwan ɖagbe ɔ́,

¹⁹kpódó nǔɖiɖi kpó, kpódó linlin ɖagbe kpó. Mɛ ɖé lɛ́ɛ gbɛ́ ɖɔ émí kún ná ɖótó nǔ e ɖɔ nú émí wɛ linlin émítɔn ɖe ɔ́ ó, bɔ é sín énɛ́ wú, bɔ nǔɖiɖi yětɔn jɛ ayǐ.

²⁰Imɛnɛ́ɛ kpódó Alɛsándlu kpán ɖo mɛ énɛ́ lɛ́ɛ mɛ. Un jó yě dó nú Satáan[1], nú yě ná tunwun ɖɔ émí kún sɔ́ ná nylá nu dó Mawu wú ɖě ó.